Marik 12

D’ogol ma yam suma a le sun guguzlu suma tchonina

(Gol Mat 21.33-46; Luc 20.9-19)

1Jesus mi nde dazi zlad’a ki d’ogolâ ala: Sana mi pe guguzlud’a kur asinemu, mi ge kangâna kamu, mi djugot zula yam ahinad’a á miret guguzlu mamba, mi min gong nga fiyak ka ndjola adugu, mi tchuk suma sunda kur á fe mbiyo mazina kua mi, mi ge tam mi i yam andaga d’a dinga.

2Kid’a yima duta ndaka, mi sun azong mama gen suma sun ndazina, kayam mi vumî vud’a guguzlu d’a azi humzid’a. 3Wani azi vumu, a tomu, a gum abom hawa. 4Mi sun azong ma dingâ geveziya. Máma, azi vumu, a tchom yamu, a kragam ngula mi. 5Mi sunuzi ma hindina kua d’ei. Máma, azi tchumu. A le azungeî suma dingâ ablaud’a hina mi. A to suma dingâ, a tchi suma dingâ woi mi.

6Ma ding ma ar tuna ni gorom ma hurum vum heîna. Mi sunumï gevezi á dabid’a kis. Mi dala: Azi mba le zulo gorona. 7Wani suma sun ndazina a de tazi ala: Wana ni ma te djona; ei mbeyegi tcheiziya, kayam djona mi arî meina. 8Azi vumu, a tchumu, a gum mbei bugol asine guguzlud’a.

9Jesus mi djobozi ala: Sala asine máma mba mi le ni nana ki sum ndazina ge? Mi mba mi ba suma sun ndazina woyo, mba mi he asine máma woi mi suma dingâ. 10Agi ndumugi nga zla d’a a b’irit kur mbaktumba hAlonid’a ala:

Ahina d’a suma djak gonga a gat teid’a,

ti mbut ta djik gonga akulod’a.

11Wana ni sun nda led’a hi Ma didinid’a.

Ni vama ndandalâ ireya d’a d’uo zu?

12Ata yi máma, suma nglona hi Juif-fîna a we tcha ala Jesus mi de zla d’a d’ogol ndata ni kaziya, a halam á ved’a, wani a le mandara ablau suma. A aramu, a iya.

A djop Jesus yam lombo d’a hed’a

(Gol Mat 22.15-22; Luc 20.20-26)

13A sun suma dingâ aduk Fariziyêna azi ki suma hi Herot-na ata Jesus, kayam a hal á vum ki zla d’a de d’a avunamba. 14Kid’a azi mbeï atamba, a dum ala: Ma hat suma, ami wami ala angî ma gagazi ma bei le mandara sa ba na, kayam ang nga ka ir sa d’uo mi, wani ang hat suma yam lovota hAlonid’a kur gagazid’a. Djivid’a ei hei tara mamulâ Sesar roze ei hum mbuo zu?

15Wani Jesus mi we mbut ir mazid’a, mi dazi ala: Ni kayam me ba, agi kugun nge ge? Agi hanï sile ndata wana, an golod’u. 16A mbamziya.

Jesus mi djobozi ala: Angusa ki b’ir ra wanda ni hi nge ge?

A hulong dum ala: Ni hi Sesar-ra.

17Mi dazi ala: Agi hagi ahle sumala ni hi Sesar-ru na mi Sesar, agi hagi ahle sumala ni hAlona na mAlona mi. A le atchap kam heî.

A djop Jesus yam tchola hi suma matnid’a

(Gol Mat 22.23-33; Luc 20.27-40)

18Sadusiyê suma a nga dala suma matna a mba tchol akulo d’uo na, a mbeï ata Jesus, a djobom ala: 19Ma hat suma, Moise mi b’iri ala: Le sana wiyema mi mid’a, mi ar amamba bei gorâ ni, wiyema mi vatcha ndata, mi djok andjaf wiyema. 20Wani adjeu suma kid’iziya a nga, azi ni b’oziyo taziya. Ma avo’â mi vatchad’a, mi mit bei mi vut gorâ. 21Ma mbàna mi vad’u, mi mit bei mi vut gorâ mi. Ma hindina mi vat hina mi. 22Aduk suma kid’iziyana ma vut gor tu nga d’i. Blogozi pet atcha ndata ti mit mi. 23Kur bur ma tchola hi suma matnina, ti mba d’i arî atchad’a hi nge adigazi ge? Kayam azi ki zlazi d’a kid’iziyad’a pet a vat atchad’a.

24Jesus mi hulong dazi ala: Ni kayamba agi nga wagi mbaktumba hAlonid’a kad’eng mamba d’uo d’a ba, agi vid’igi woi wan nduo zu? 25Kayam fata suma a mba tchol akulo aduk suma matnid’a, azi mba vik arop pi, aropma a mba vik andjof fuo mi, wani azi mba ka’î d’igi malaika suma sä akulona na. 26Wani kayam zlad’a hi suma mat suma a mba tcholozi akulonid’a, agi ndumugi nga kur mbaktumba hi Moise-sa, ata yima mi de yam awei-avirina d’uo zu? D’igi Alona mi dum na ala: An nAlona hi Abraham-ma, Alona hi Isa’â, Alona hi Jakob-ma mi. 27Alona nAlona hi suma arinina, nga nAlona hi suma matnina d’i. Kayam ndata, agi vid’igi woi ngola heî.

Vun ma he ma ngol ma kalâ

(Gol Mat 22.34-40; Luc 10.25-28)

28Sama hat gata tu, mi hum a nga tchi tazi tuguyod’a. Mi we d’ala Jesus mi hulong zla d’a de d’a djivid’a mi Sadusiyêna d’a. Hina wani, mi hut gevemu, mi djobom ala: Vun ma hed’a pet ma djivi ma kal ndramina, ni ma lara ge?

29Jesus mi hulong dum ala: Ma kal ndramina ba wana: Agi Israel-lâ, agi humugiya, Ma didina Alo meina ni Ma didina tu go. 30Ang le yam Ma didina Alo mangâ ki hurung pet ki tang pet ki djib’er manga pet kad’engêng pet mi. 31Ma mbàna wana: Ang le yam ndrangâ d’igi ang tanga na. Vun ma he ma ding ma kal máma ki djivid’ina nga d’i.

32Ma hat gata mi dum ala: Gagazi, ma hat suma, ang de nata yad’u. Ma didina nAlona tu gid’eng ma ding ma d’igi mam na na nga d’i. 33Djivid’a sana mi le kam ki hurum pet ki djib’er mamba pet kad’eng mamba pet mi. Mi le yam ndrama d’igi mam tamba na mi, wani kal ahle suma ngat buzu suma ngala kahle suma ngat buzu suma a nga hazi mAlonina pet mi.

34Ata yima Jesus mi wum ala mi hulong zla d’a de d’a irata na, mi dum ala: Ang nga dei ki leud’a hAlonid’a d’i. Wani suma a nga le mandarâ á djop zlad’a mi Jesus bugolo.

Mesi azi ki David

(Gol Mat 22.41-46; Luc 20.41-44)

35Kid’a Jesus nga mi hat suma kur gong nga kud’ora hAlonid’id’a, mi djobozi ala: Ni nana ba, suma hat gata a nga dala: Mesi máma ni David goroma ge? 36Kayam David tamba ki yamu, Muzu’â hAlonina mi zud’um mi dala:

Ma didina Alona mi de mi Salana ala:

Ang kak ata bigan nda ndjufa,

gak an mba ni tin mang suma djangûna ad’u asengû.

37David tamba nga mi yum ala Salana. Ni nana ba, Mesi mi mbut goroma ge?

Giget ta yam suma hat gatid’a

(Gol Mat 23.1-36; Luc 20.45-47)

38Ablau suma a hum Jesus ki furîd’a. Mi dazi kur hat mamba ala: Agi gologi tagi djivi ki suma hat gat suma a min á tit ki baru d’a fiyakina. Azi min ala suma a gazi depa ad’u su’â, 39a min á kak yam zlumiyô suma avo’â kur gongîyo mazi suma toka, a min yima avo’â ata yima te tena mi. 40Azi tahlena harop suma modonod’a, a nga tchen Alona tchen nda fiyaka á mbut tazi djivid’a avok suma. Sum ndazina a mba kazi sariyad’a kazi ngola kala.

He d’a hawad’a hatcha d’a modono d’a hohoud’id’a

(Gol Luc 21.1-4)

41Jesus mi kak gen zanduk ma suma tchuk beged’a kuana á we ni nana ba, ablau suma a nga tchuk beged’a kur zandu’â ge? Ablau suma ndjondjoîna a tchuk ngola. 42Atcha d’a modono d’a hohoud’a ti mba, ti tchuk sisid’a mbà, nala, siled’a tu.

43Jesus mi yi mam suma hata gevem mi dazi ala: Gagazi, an nga ni dagiya, atcha d’a modono d’a hohou d’a wanda, ti tchuk beged’a kal suma ding suma a tchuk beged’a kur zandu’îna pet. 44Kayam suma ding suma a tchuk beged’ina pet, a yo ni aduk bege mazi d’a ndjondjoîd’a. Wani ndad’u, kur hohou mata ti tchu’î bege d’a ndat nga ki d’a pet, ni d’a nga d’i ngom ki tata pet mi.

Currently Selected:

Marik 12: BA

Highlight

Copy