Marik 11

DIMAS SA DABID’A HI JESUS

D’A MI LAT GO KI JERUSALEM-MBA

(11—15)

Jesus mi kal kur Jerusalem

(Gol Mat 21.1-11; Luc 19.28-40; Jn 12.12-19)

1Kid’a azi mba go ki Jerusalem ki Betfage ki Betani avun ahina d’a Olif-fid’a, Jesus mi sun mam suma hata mbà, 2mi dazi ala: Agi igi kur azì ma ngol ma sä avorogi wana. Ata yima agi kalagi kuana, agi mba fagi gor korona nga djinda kä ma sa nga nga kam mbuo tua na; agi bud’umu, agi mbeyendjïya. 3Le sa mi dagi ala: Ni kayam me ba, agi bud’um ge ni, agi dum ala: Salamina mi minimî mamu; mba mi sunumï ka hî atogo zak mi.

4Azi iya, a fe gor korona nga djinda kä abu avun agre’â gen lovota, a bud’umu. 5Suma dingâ aduk suma a nga tchola ata yi mámina, a dazi ala: Agi lagi ni me na ge? Agi bud’ugi gor korona ana?

6Azi dazi d’igi Jesus mi dazi na mi, a arazi a iya. 7Azi mba ki gor korona mi Jesus, a zlup baru mazina kamu, Jesus mi nga kam mi. 8Ablau suma a nga bar baru mazina kä kur lovota. Suma dingâ a nga tchuk ahlap ma gogot ma azi kamï kur asinenina kä mi. 9Ablau suma a nga tit avoroma kablau suma a nga tid’ï ad’uma, a nga sor ki delezi akulo ala: Suburi Alona. Ar Alona mi b’e vunam yam sama nga mi mba ki simiyê Ma didinina. 10Ar Alona mi b’e vunam yam sama nga mi mba te leud’a habui ngolo David ta nga d’i mbad’ina. Suburi Alo ma sä akulona.

11Jesus mi kal avo Jerusalem, mi i kur gong nga kud’ora hAlonid’a. Kid’a mi pret tam mi gol ahlena peta, mi nde mi i Betani ki suma hat suma dogo yam mbàna, kayam yina mbut fladege da’.

Jesus mi ge tuluma vuna

(Gol Mat 21.18-19)

12Tcha ndjivinda, kid’a azi buzuk kei kur Betani-d’a, Jesus meid’a nga d’i tchumu. 13Ata yi máma, mi we tulum ma humam d’ufina sä woi hina dei, mi i á golomu, na ni mi fe vuta kua zi ge. Wani mi mbaza, mi fe nga va d’i, ni humba hol, kayam me nata yima tuluma mi vut kuana d’i. 14Jesus mi de mi tuluma ala: Ar avok hî gak didin sa dok mi tang vud’ung nguo d’a. Mam suma hata a hum zla ndata mi.

Jesus mi kal kur gong nga kud’ora

(Gol Mat 21.12-17; Luc 19.45-48; Jn 2.13-22)

15Jesus ki mam suma hata a mba kur Jerusalem. Jesus mi kal kur gong nga kud’ora hAlonid’a, mi nde dik suma a nga gus ahlena woina ki suma a nga gus abozina woi kur gong nga kud’ora hAlonid’a. Mi zut tabulâ hi suma mbut beged’ina kä, mi zut zlumiyôna hi suma a nga gus gugud’a woina kä mi. 16Mi ar nga sa á kal kur gong nga kud’ora hAlonid’a ki va kam mbi. 17Mi had’azi ala: A b’ir nga kur mbaktumba hAlonid’a ala: Alona mi dala: A nga yi gong manda ala Gong nga andjaf suma pet a mba tchen Alona kuad’a d’uo zu? Wani agi mbud’ut domina hi suma kulina.

18Kid’a suma nglo suma ngat buzuna azi ki suma hat gata a hum zla ndatid’a, a nga hal lovota á tchum mbeyo, wani azi nga lum mandaramu, kayam ablau suma pet a nga le atchap yam hat mamba.

19Kid’a afata nika, Jesus azi ki mam suma hata a buzuk kei kur azì ma ngolâ.

Jesus ki tulum ma so woina

(Gol Mat 21.20-22)

20Yorogod’a, kid’a azi nga kala, suma hata hi Jesus-na a we tulum máma mi so woi ki sideyem pet. 21Pierre humam gum kayam zla ndata, mi de mi Jesus ala: Ma hat suma, ang gola. Tulum ma ang gum vunina, mi so wa woyo.

22Jesus mi hulong dazi ala: Djivid’a agi hagi gagazid’a yam Alona. 23Gagazi, an nga ni dagiya, le sama lara pî ma de mahina d’a wanda ala: Ndak pat tak ge tak kur alum ma ngolâ, wani le mi le nga gigrit kurum mbuo, le mi tin hurum yam vama mi duma ala mba mi le ni, a mba lumzi hina mi. 24Kayam ndata, an nga ni dagiya, le agi tchenegi va ata Alona, le agi tinigi hurugi kam ala agi fum wa ni, Alona mba mi hagizi hina mi. 25Le agi nga tchologi á tchen Alona, le agi nga ki hur ma zala yam sa ni, ar hurugi vat tei kamu. Hina wani, Abugi ma sä akulona hurum mba mi vat tei yam tcho magid’a mi. [26Wani le hurugi mi vat nga woi kam mbuo ni, Abugi ma sä akulona pî, hurum mba mi vat tei yam tcho magid’a d’uo mi.]

Jesus mi fad’eng ndata ni lara ge?

(Gol Mat 21.23-27; Luc 20.1-8)

27Jesus azi ki mam suma hata a hulong kur Jerusalem kua d’ei. Kid’a Jesus nga mi poi kur gong nga kud’ora hAlonid’id’a, suma nglo suma ngat buzuna azi ki suma hat gata ki suma nglona a mba gevemu, 28a djobom ala: Ni kad’eng nga lara ba, ang le kahle ndazina hina ge? Sama mi hang ad’eng ndata ni nge ba, ang nga le kahle ndazina hina ge?

29Jesus mi hulong dazi ala: An nga ni djobogi zla tu. Le agi dan wa ni, an mba ni dagi yam ad’eng nga an nga ni lahle ndazina ki sed’eta mi. 30Ma sunï Jean ma le suma batembina nAlona, d’oze ni suma zu? Agi dan-ngiya!

31Azi nde tchi tazi gagad’a ala: Le ei dei wa ala: Alona mi sunumï ni mamu ni, mam mba dei ini ala: Ni kayam me ba, agi hagi gagazid’a kam mbuo ge? 32Wani le ei dei wa ala: Suma a sunumï ni aziya ni, nad’enga heî. Azi de hina, a le ni mandara ablau suma, kayam suma pet a wala Jean ni ma djok vun ma gagazina hAlonina. 33Azi hulong de mi Jesus ala: Ami wami nga d’i.

Jesus mi dazi ala: An nga ni dagi yam ad’eng nga an nga ni lahle ndazina ki sed’eta d’uo mi.

Currently Selected:

Marik 11: BA

Highlight

Copy