Matiye 4
4
Kuka hi Jesus-d’a
(Gol Mar 1.12-13; Luc 4.1-13)
1Ata yi máma, Muzu’â hAlonina mi i Jesus hur fulâ, kayam diable mi kugumu. 2Ata yi máma, mi le burâ dok fid’i falei kandjege bei te tena; meid’a ti nde tchumu. 3Diable mi mba atamu, mi dum ala: Ang le nAlona Goroma ni, ang he vuna mahuniyô suma wana a mbut avuna.
4Wani Jesus mi hulong dum ala: A b’ir kur mbaktumba hAlonid’a ala: Sana mi kak karid’a ni yam tena hol li, wani ni ki zla d’a lara ge pet ta ndeï avun Alonid’a.
5Ata yi máma, diable mi im kur azì ma ngolâ hAlonina, mi tinim akulo yam gong nga kud’ora hAlonid’a, mi dum ala: 6Ang le nAlona Goroma ni, ang geï tang kä, kayam a b’ir kur mbaktumba hAlonid’a ala:
Alona mba mi he vuna mi malaika mama kangû.
A mba vang akulo kabozi
kayambala ahinad’a ti dabang kang aseng nguo d’a.
7Jesus mi hulong dum ala: A b’ir kur mbaktumba hAlonid’a kua ala: Ang kuk Ma didina Alo mangâ d’i.
8 Diable mi djok ki sed’em akulo kua yam ahina d’a fiyak ka ked’iwurenga, mi tagam leu d’a yam andagad’id’a ki subur mata pet. 9Mi dum ala: Ang le grif kä ang kud’uronu ni, an mba ni hang ahle ndazina pet.
10Jesus mi hulong dum ala: Seitan, ang huttcha woi dei, kayam a b’ir kur mbaktumba hAlonid’a ala: Ang kud’orî Ma didina Alo mangâ, ni mam tu go ba, ang lum sunda.
11Ata yi máma, diable mi aramu, wani malaikana a mba, a nga lum sunda.
JESUS MI TCHI WALA MI SUMA GALILE-NA
(4.12—18.35)
Jesus mi tin ad’u sun mamba kur Galile
(Gol Mar 1.14-15; Luc 4.14-15)
12Kid’a Jesus mi hum ala a ge wa Jean dangeina d’a, mi i Galile. 13Mi ar Nazarat, mi i avo Kapernayum mba nga avun apo d’a Galile d’a ir hagad’a hi Zabulon ki Neftali-d’a. 14Ahle ndazina a le hina á ndak vun zla d’a Isai ma djok vun Alona mi dat ala:
15Andaga d’a Zabulon-nda kandaga d’a Neftali-d’a
suma a nga kaka avun lovot ta i avun alum ma ngolîd’a
suma sä abo alum ma Jurdê-na woi hina
suma kur Galile d’a handjaf suma dingîd’a
16suma a nga kaka kur nduvundina
a we b’o d’a ngola,
suma a nga kaka kä ad’u angus matnina,
b’od’a ti nde woi kazi mi d’a.
17Ata yi máma, Jesus mi tin ad’u tchi wala ala: Agi mbud’ugi hurugi yam tcho magid’a, kayam Alona mi mba wa go á te leu mamba yam andagad’a.
Jesus mi yi suma tchiuna fid’i
(Gol Mar 1.16-20; Luc 5.1-11)
18Kid’a Jesus nga mi tit avun apo d’a Galile-d’id’a, mi we gro asud’a mbà, Simon ma a yum ala Pierre-râ azi ki wiyema Andre. A nga tchuk abeina kä kur apod’a, kayam azi ni suma tchiuna. 19Jesus mi dazi ala: Agi mbeyegï ad’unu; an mba ni mbud’ugi suma tchiu suma. 20Atogo hina zak, a ar abei mazina kä, a i ad’umu.
21Kid’a Jesus mi kal avok hina nded’a, mi we gro asud’a dingâ mbà, Jacques azi ki wiyema Jean Zebede groma. Azi nga kur alumba kabuzi Zebede, a nga min ir abei mazina. Jesus mi yazi mi. 22Atogo hina zak, a ar abuzi kalumba, a i ad’umu.
23Jesus nga mi tit yam andaga d’a Galile-d’a pet, nga mi hat suma kur gongîyo mazi suma toka, nga mi tchi wal Zla d’a Djivi d’a yam leud’a hAlonid’a, nga mi sut suma kur tugud’ei mazid’a ki suma homozed’a mi. 24Zlam nde yina kur ambas sa Siri-d’a pet. A nga mbam suma a nga kandjaf tugud’ei d’a teteng nga nga d’i lazi ndakid’a, a nga mbam suma a nga ki muzuk ma tchona kuruzina, suma pipina ki suma gugutud’a mi. Mi sud’uzi pet mi. 25Ablau suma a nga i ad’umu, nala, suma Galile-na, suma kur Azì ma nglo ma dogona, suma Jerusalem-ma, suma Jude-na ki suma a nga kaka avun alum ma Jurdê-na abo woi hina mi.
Currently Selected:
Matiye 4: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
