Matiye 3
3
JEAN MA LE SUMA BATEMBINA MI TCHI WALA
(3.1-12)
Tchi wala hi Jean ma le suma batembina
(Gol Mar 1.1-8; Luc 3.1-18; Jn 1.19-28)
1Kur bur máma Jean ma le suma batembina mi nde woyo, nga mi tchi wala kur ful la Jude-d’a. 2Mi dala: Agi mbud’ugi hurugi yam tcho magid’a, kayam Alona mi mba wa go á te leu mamba yam andagad’a.
3Ni Jean ma ma djok vun Alona Isai mi dum zlam ala:
Wana ni dela hi ma nga mi er ad’um kur fula ala:
Agi minigi lovota hi Ma didinid’a,
agi minigi lovot mam mba gureid’a d’ingêru na.
4Jean baru mam mba tchuka ni tumus djambala, d’i’â nga djinda furum mi. Te mama nabureina kayuma. 5Suma kur Jerusalem-ma azi ki suma Jude-na pet ki suma a ngui alum ma Jurdê-nina pet a buzuk a iza gevemu. 6Ata yima azi de tcho mazid’a woina, mi nga mi lazi batemba kur alum ma Jurdê-na mi.
7Wani kid’a Jean mi we Fariziyêna azi ki Sadusiyêna ablaud’a a nga mba gevem ala mi lazi batemba d’a, mi dazi ala: Agi gro mageid’a, sama kid’ezegi á ringîgi woi avok ayî ma nga mbana ni nge ge? 8Agi lagi ni sun nda memeta á tak kei ala agi mbud’ugi wa hurugiya d’a. 9Ar agi djib’eregi kurugi ala Abraham nabui ngolo hina d’i, kayam an nga ni dagi woi mbak Alona mi ndak á mbut ahuniyô suma wana grona mi Abraham. 10Ki tchetchemba, andjetna mi ged’a kä ad’u aguna. Agu ma lara ge pet ma nga mi vut vut ta djivid’a d’uo na, a mba kam mbeyo, a mba gum aduk akud’a. 11Anu, an nga ni lagi batemba kayambala agi mbud’ugi hurugiya d’a, wani ma nga mi djï blogona, mi kalan kad’enga. An ndak á zi atuguru mama d’i. Ni mam ma mba mi lagi batemba ki Muzuk ma bei tchod’a ba na kakud’a mi na. 12Mam nga kangot mam ma sira abomu, mba mi sir awu mama woi yuyung, mba mi togom kur avir mama, wani mba mi ngal brad’a woi kaku d’a bei mit tei ba d’a.
BATEMBA HI JESUS-D’A KI KUK MAMBA
(3.13—4.11)
Batemba hi Jesus-d’a
(Gol Mar 1.9-11; Luc 3.21-22)
13Ata yi máma, Jesus mi tcholï kur ambas sa Galile-d’a, mi mba gen Jean avun alum ma Jurdê-na ala mi lum batemba. 14Wani Jean mi min ndi, mi dum ala: Ni an ba ni min ala ang lan batemba. Ni nana ba, ang mba ala an ni lang batemba ge?
15Wani Jesus mi hulong dum ala: Ar ang lan ka tchetchem, kayam ei ndagei vun ahlena pet suma Alona mi minizina.
Bugola, Jean mi mina. 16Ata yima Jean mi le Jesus batembina, Jesus mi tup pei akulo aduk mbina. Ata yi máma na wat, akulod’a ti mal leyo, Jesus mi we Muzu’â hAlonina mi surop kam kä d’igi gugud’a na mi. 17Dela ti tcholï akulo, ti dala: Wana ni Goron ma an hurun vum heîna, ni ma tan ndi lan djivid’a heî kama.
Currently Selected:
Matiye 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
