Matiye 2
2
Suma ned’a a mba á gol Jesus
1Kid’a Marie ti vut Jesus kur Betelehem yam ambas sa Jude-d’a kur atchogoi d’a Herot mi nga kur amulid’a, suma ned’a a tcholï abo ma yorogona, a mba Jerusalem. 2A djop ala: Amulâ hi Juif-fâ ma a vud’uma, mi nga ni lara ge? Ami wamï tchitchiu mamba abo ma yorogona, ami mba á kud’uromu.
3Kid’a amulâ Herot mi hum zla ndatid’a, vunadigam mbi pat fek ki suma Jerusalem-ma pet mi. 4Mi tok nglo suma ngat buzuna azi ki suma hat gata pet. Mi djobozi ala: A mba vut Mesi máma ni lara ge?
5Azi hulong dum ala: Kur Betelehem mba yam ambas sa Jude-d’id’a d’igi ma djok vun Alona mi de na ala:
6Ang azì ma Betelehem ma yam ambas sa Juda-d’ina,
ang nga gogora aduk azì ma Juda-na d’i,
kayam ma te yamba mba mi ndeï ni kurungû,
mba mi pol man suma Israel-lâ.
7Ata yi máma, Herot mi yi suma ned’a gumunu, mi djobozi yam bur ma tchitchiud’a ndei woi kuana. 8Mi sunuzi Betelehem, mi dazi ala: Agi igiya, agi humugi ad’u zlad’a hi gor mámid’a tetet. Le agi fumu ni, agi mbei danu, kayam an i kud’urom mi.
9Kid’a azi hum zlad’a hamulîd’a dad’a, a iya. Wani tchitchiu d’a azi wad’ï adjeu abo ma yorogonid’a, nga d’i tit avorozi gak ti tchol ata yima gorâ mi nga kuana. 10Ata yima azi we tchitchiu ndatina, a le furîd’a ngola. 11Ata yima azi tchuk klavina, a we gorâ azi kasum Marie. A grif kä, a kud’uromu. A mal vun bud’omei mazi suma beged’a, a hum he d’a hawad’a, nala, lora ki lubana ki mirâ mi. 12Wani Alona mi tagazi kur adïd’a ala ar azi hulong gen Herot ti. Kayam ndata, a i yam andaga mazid’a ki lovot ta dinga.
Josef ki Marie a ring Ezipte
13Kid’a suma ned’a a i dad’a, malaikana hi Salad’ina mi de Josef adïd’a ala: Ang tchola, ang yo gorâ azi kasumu, ang ring yam andaga d’a Ezipte-d’a, ang kak sä kua gak an dangî an tua, kayam Herot nga mi hal gorâ á tchid’a.
14Josef mi tchol kandjeged’a, mi yo gorâ azi kasumu, mi i Ezipte. 15Mi kak sä kua gak matna hi Herot-na, kayam zla d’a Salad’a mi dat avun mam ma djok vuna d’a ala: An yi gorona woi kur Ezipte d’a, ti ndak memet.
Tchid’a hi gugureinid’a
16Ata yima Herot mi wala suma ned’a a lobomî loba na, hurum zal ngola. Mi tchuk sunda á tchi gro andjof suma Betelehem-ma ki suma kur ambas sa nguyuta pet suma bizazi mbàmbàna ki suma bizazi ndak nga mbàmbà d’uo na woyo, ndak yam bur ma suma ned’a a dum yam tchitchiud’ina. 17Ahle ndazina a le hina á ndak vun zla d’a ma djok vun Alona Jeremi mi dat ala:
18A hum dela avo Rama.
Suma a nga tchi tchi ma hohoud’a ngola.
Rachel nga d’i tchi yam grotna,
ti min b’leng hur ma suma a b’lengêt tchina d’i,
kayam grotna a mid’a d’a.
Josef azi ki Marie a hulong yam Israel
19Wani kid’a Herot mi mit dad’a, malaikana hi Salad’ina mi de Josef adïd’a avo Ezipte ala: 20Ang tchola, ang yo gorâ azi kasumu, ang hulong yam andaga d’a Israel-la, kayam suma a nga hal gorâ á tchid’ina a bo wa d’a.
21Josef mi tchol mi yo gorâ azi kasumu, azi hulong yam andaga d’a Israel-la. 22Wani kid’a mi hum ala Arkelus nga mi tamula yam ambas sa Jude-d’a balum abum Herod’u d’a, mi le mandarâ á kak kur ambas ndata. Wani yam adï d’a Alona mi dumzid’a, mi i kur ambas sa Galile-d’a. 23Mi i kak kur azì ma a yum ala Nazarat-na, kayam zla d’a suma djok vun Alona a dat ala: A mba yum ala Ma Nazarat-na d’a, ti ndak memet.
Currently Selected:
Matiye 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
