Matiye 28

TCHOLA HI JESUS-D’A KI TAK KA MI TAK TAM MBEID’A

(28.1-20)

Jesus mi tchol akulo aduk suma matna

(Gol Mar 16.1-10; Luc 24.1-12; Jn 20.1-10)

1Bugol bur ma sabatna ki dimas yorogo tcholol, Marie d’a Makdala-d’a azi ki Marie d’a dinga, a mba á gol asud’a hi Jesus-d’a. 2Atogo hina zak, andagad’a ti yir ngola, kayam malaikana hi Salad’ina mi tcholï akulo, mi mba, mi ligat ahinad’a woyo, mi kak kad’u. 3Tam wile d’igi wiled’a halonid’a na, baru mamba hapa titil d’igi gagarad’a na mi. 4Mandarâ tchi suma ndjola su, a zlak djidjik, a mbut d’igi suma matna na.

5Wani malaikana mi de marop ndazina ala: Agi lagi mandar ri, kayam an wala agi halagi ni Jesus ma a b’alam akulo ata agunina. 6Mi nga ka hî d’i, mi tchol wa, d’igi mi davok na. Agi mbeyegïya! Agi gologi yima a gum kuana. 7Agi igi atogo zak, i dagi mi mam suma hata ala: Mi tchol wa akulo aduk suma matna. Mi i sä avorogi yam ambas sa Galile-d’a ka tchetchem. Agi mba wum sä hî. Gola! An dagiya wa da’.

8Azi buzuk kei yam asud’a atogo hina zak ki mandarâ ki furîd’a ngola. A ring á de zla ndata mi suma hata hi Jesus-na. 9Ata yi máma na wat, Jesus mi ngavaziya, mi dazi ala: An gagi depa. Azi mba, a vum asem a kud’uromu. 10Ata yi máma, Jesus mi dazi ala: Agi lagi mandar ri, agi i dagi mi b’oziyona ala á i yam ambas sa Galile-d’a. Azi mba wan sä hî.

Zla d’a ded’a hi azigar suma ndjolid’a

11Kid’a azi nga i tua d’a, suma aduk suma ndjola a kal hur azina, a de mi nglo suma ngat buzuna ahle suma a lena pet. 12Ata yi máma, azi tok ki suma nglona, a ndjak vunazi tu, a he beged’a ngola mi azigarâ, 13a dazi ala: Agi dagi ala: Kid’a ami nga senid’a, mam suma hata a mba a kulum mad’am andjege. 14Le ma te yamba mi hum zla ndata ni, ami mba minimi zlad’a ki sed’em á pad’azi zlad’a woi kagiya.

15Azi ve gurzu ndata, a le d’igi a gad’azi na. Zla ndata b’rau aduk Juif-fâ gak ini.

Jesus mi nde tam mbei ir mam suma hata

(Gol Mar 16.14-18; Luc 24.36-49; Jn 20.19-23; Sun SS 1.6-8)

16Mam suma hat suma dogo yam tuna a i yam ambas sa Galile-d’a yam ahina d’a Jesus mi tagazizid’a. 17Kid’a azi wumba, a kud’uromu, wani suma dingâ adigazi a le gigrit.

18Jesus mi mba, mi dazi ala: Ad’eng nga akulod’a ki d’a yam andagad’id’a pet, Alona mi handjiya. 19Kayam ndata, agi igiya, agi mbud’ugi andjaf suma pet man suma hata, agi lazi batemba ki simiyê Abun ki simiyê an Gorâ ki simiyê Muzuk ma bei tchod’a ba na mi. 20Agi had’azi á ngom ahlena pet suma an hagi vuna kazina. Gola! An nga ki sed’egi teteu gak dabid’a hi duniyad’id’a mi.

Currently Selected:

Matiye 28: BA

Highlight

Copy