Matiye 24
24
Jesus mi de yam b’laka hi gong nga kud’orid’a
(Gol Mar 13.1-2; Luc 21.5-6)
1Kid’a Jesus mi ndabu woi kur gong nga kud’ora hAlonid’a nga mi id’a, mam suma hata a mba gevem á tagam minda hi gong nga kud’ora hAlonid’a. 2Wani Jesus mi hulong dazi ala: Agi wagi nga ahle ndazina pet tuo? Gagazi, an nga ni dagiya, ahina d’a a mba arat akulo yam ndrat ahinad’a bei hôt kä woid’a nga d’i.
Ahle suma a mba le suma avok dabid’a hi duniyad’ina
(Gol Mar 13.3-13; Luc 21.7-19)
3Jesus mi nga kak kä yam ahina d’a Olif-fa. Mam suma hata a mba gevem vaziya, a djobom ala: Ang damiya, ahle ndazina a mba le ni mindja ge? Vama simat ma mba mi le ba suma a mba wala mba manga ki dabid’a hi duniyad’id’a a ar go na, ni me ge?
4Jesus mi hulong dazi ala: Agi gologi tagi djiviya, ar sa mi vid’igi woi d’i. 5Kayam ablau suma a mba mba ki simiyênu, a mba dala: An ni Mesi máma. Azi mba vit suma woi ngola. 6Agi mba humugi siwela hayî ma durâ, agi mba humugi zla ayîna mi. Wani agi gologi tagi djiviya, ar vunadigagi d’i pat ti, kayam ahle ndazina mbeî a mba le, wani nad’u dabid’a hi duniyad’id’a d’i. 7Kayam andjaf ma dingâ mba mi tchol djangûna kandjaf ma dingâ, leu d’a dinga mba d’i tchol djangûna ki leu d’a dinga, baktarad’a mba d’i nde, andagad’a mba d’i yir gigidji ata yina teteng mi. 8Wani ahle ndazina pet a mba le ni d’igi ad’u tinda hi ndak ka vutid’a na.
9Kayam ndata, azi mba hagi abo suma a mba djobogi vunagiya, a mba tchagi mi. Andjaf suma pet a mba noyôgi woi yam simiyên mi. 10Ata yi máma, ablau suma a mba dadak bugolo, a mba he tazi abo taziya, a mba noî tazi mi. 11Suma djok vun suma ka zlad’a ablaud’a a mba tchola, a mba lop vun suma ngola mi. 12Kayam tchod’a mba d’i zul ngola, od’a hablau sumid’a mba d’i b’leng mi. 13Wani sama mi ve tam ad’enga gak ad’u dabid’ina, mba mi fe suta. 14Zla d’a Djivi d’a yam leud’a hAlonid’a a mba tchat walat tei mi suma yam andagad’ina pet á le glangâsâ mandjaf suma pet. Ata yi máma, ad’u dabid’a mba d’i mba.
Vama ndjendje ma b’lak keina
(Gol Mar 13.14-23; Luc 21.20-24)
15Jesus mi had’azi kua ala: Kayam ndata, fata agi mba wagi Vama ndjendje ma b’lak kei ma Daniel ma djok vun Alona mi de kama, mi nga tchola ata yima a tinim iram vam ma kal teglesîd’a, ar sama ndumba mi wäd’u zla ndata djiviya. 16Ata yi máma, ar suma Jude-na a ring ngei aduk ahuniyôna. 17Le sana mi nga akulo yam gonga ni, ar mi tchuk asem kä á kal kur gong mamba á hle va d’i. 18Le sana mi nga kur asinena abageya ni, ar mi hulong avo á yo baru mam mba ngola d’uo mi. 19Kur bur máma, ni zla d’a hohoud’a yam arop suma wirâ karop suma a nga ki grona abozina. 20Agi tchenegi Alona yam ahle ndazina, ar a mba kur yima ab’lenga d’oze kur bur ma sabatna d’i. 21Ndak ka ngol la mba d’i le suma kur bur mámid’a, kad’u tinda hi duniyad’id’a dei gak ki tchetchemba, andjaf ndak ka hina d’a ti le nga yat tu d’uo tua. Wani andjaf ndak ka hina d’a mba d’i le bugol luo d’a. 22Wani ladjï Alona mi dadak burâ go d’uo ni, sana mba mi fe suta d’i. Wani ni kayam suma mi manazina ba, mi dadagï ki burâ wana.
23Ata yi máma, le sana mi dagi ala: Gola! Mesi máma mi kä wana d’oze ala: Gola! Mi sä wana ni, agi hagi gagazid’a kam mbi. 24Suma ka zlad’a a mba tchol a mba yi tazi ala azi ni Mesi, suma dingâ a dala azi ni suma djok vun Alona. A mba lahle suma simat suma nglona kahle suma ndandalâ, kayam le a ndaga ni, a mba lop vun suma Alona mi manazina mi. 25Gola! An dagi wa ahlena woi avok da’.
26Le azi dagi ala: Gola! Mi sä abageya ni, agi igi d’i, d’oze ala: Gola! Mi nga ngeid’a ka hî ni, agi hagi gagazid’a d’i. 27Ni d’igi alona mi wileï abo ma yorogona gak mi ndeza woi abo ma fladegena na, mbad’a hi an Gor Sanid’a ni na. 28Ata yima harâ mi nga kuana, ata yi máma, aba’â mba mi tok kua mi.
Mbad’a hi Gor Sanid’a
(Gol Mar 13.24-27; Luc 21.25-28)
29Jesus mi dazi kua ala: Bugol ndaka hi bur mámid’a, atogo hina zak afata mba d’i mbut nduvunda, tilâ mba mi b’o d’i, tchitchiud’a mba d’i tchugï kä, ahle suma ad’eng suma akulona a mba yira. 30Ata yi máma, simata hi an Gor Sanid’a mba d’i ndeï akulo. Kur bur máma andjaf suma yam andagad’ina pet a mba tchiya, a mba wan an Gor Sana mba ni mbeï kur d’ugula kad’enga ki subur ra ngola. 31An mba ni sun malaika mana, a mba bu adif fa ngola, a mba tok suma an manazina abo yima fid’ina gak ata avun dabid’a handagad’id’a pet mi.
Hat ta yam tulumid’a
(Gol Mar 13.28-31; Luc 21.29-33)
32Jesus mi had’azi kua ala: Agi vagi hata yam d’ogolâ hi tulumina: Fata abom nde wa tchuk d’ufa ni, agi wagi ala amenda mba wa go. 33Hina mi, fata agi wagi ahle suma hina na a nga le d’a, ata yi máma, agi wagi ala an Gor Sana ni nga go avun agre’â. 34Gagazi, an nga ni dagiya, suma kur atchogoi d’a wandina, a mba bo pet ti gak ahle ndazina pet a mba le tua. 35Akulod’a kandagad’a a mba kal leyo, wani zla manda mba d’i kal lei d’i.
Alona tu ni ma we bur ma dabid’ina
(Gol Mar 13.32-37; Luc 17.26-30,34-36)
36Jesus mi had’azi kua ala: Wani yam zla mbad’a hi bur máma ki ler ndatid’a, sa nga mi we d’i, d’oze malaika suma sä akulona, d’oze an tan Gorâ pî, ni we nga d’i; nAbui Alona tu gid’eng ba, mi we. 37Wani mbad’a hi an Gor Sanid’a mba d’i le ni d’igi burâ hi Noe-na na mi. 38Kayam adjeu avok ka bei mbina mi kusa, suma a nga te, a nga tche, a nga vik aropma, a nga he grozina ndjufâ gak bur ma Noe mi kal kur batod’ina. 39Azi we nga va d’i, gak mbina mi mba mi yozi woi pet. Mbad’a hi an Gor Sanid’a mba d’i le ni hina dedege mi. 40Ata yi máma, le suma mbà a nga kur asinena ni, a mba hle tu, a mba ar tu mi. 41Le aropma mbà a nga lud’a ni, a mba hle tu, a mba ar tu mi. 42Kayam ndata, agi kagagi ki ndjola, kayam agi wagi nga bur ma mbad’a hi an Salaginina d’i. 43Wani agi wagi djiviya, le samazina mi we yima sama kula nga mba kuana ni, mi ka’î ndjola, nga mi ar ma kula mi kulum mbi. 44Kayam ndata, agi pî, minigi tagiya, kayam ata yima agi nga djib’eregi d’uo na, an Gor Sana mba ni mba kua.
Azong ma d’engzengâ ki ma bei d’engzengâ
(Gol Luc 12.41-48)
45Jesus mi had’azi kua ala: Ni nge nazong ma d’engzeng ma ne ma salama mi tinim yam suma avo hatama á b’rawazi tena ata yama ge? 46Azong ma salama mi hulongî avo hatam mi fum nga mi le hina na, mi le furîd’a. 47Gagazi, an nga ni dagiya, salama mba mi tinim yam ahle suma avo hatama pet. 48Wani le azong máma ni ma tchona ni, mba mi de kurum ala: Salana mba mi mba atogo d’i, 49mba mi nde to ndrom suma sunda, mba mi te, mba mi tche zlapa ki suma a gurut ki sümina. 50Salama mba mi mba kur bur ma mam nga mi djubum mbuo na, ata yima mam we d’uo na mi. 51Salama mba mi tchum tod’a. Azong máma mba mi fe wurak mamba zlapa ki suma lop ira. Ni yima suma a mba tchi a mba mut siyazi kua ngolina.
Currently Selected:
Matiye 24: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
