Matiye 23

Giget ta yam suma hat gata ki Fariziyênid’a

(Gol Mar 12.38-39; Luc 11.43,46; 20.45-46)

1Ata yi máma, Jesus mi de zlad’a mablau suma ki mam suma hata ala: 2Suma hat gata azi ki Fariziyêna a vrak kaka balum Moise á vagi ad’u gat mamba. 3Kayam ndata, agi lagi nahle suma azi nga hagi vuna kazi á led’ina. Wani agi lagi sun mazid’a d’i, kayam azi de ni ki vunaziya, wani a nga le d’i. 4Azi djin ahle suma aneka heîna, a tinizi kel suma, wani azi tazid’a a min dozi ki tchitchid’azi d’i. 5Azi nga le sun mazid’a pet ni kayambala suma a waziya d’a, azi nga tchuk gan gata hAlonid’a atazi bibigilir, azi nga ndjap ahle suma djifâ avun baru mazina ndjundjû mi. 6Azi min yima avo’â ata yima te tena ki zlumiyô suma avo’â kur gongîyo magi suma toka. 7A min ala suma a gazi depa ad’u su’â, a yazi ala Suma hat suma mi. 8Wani agiya, ar a yagi ala Suma hat suma d’i, kayam Ma hata ni tu, agi pet ni b’oziyo tagiya. 9Ar agi yagi sama yam andagad’a ka hina ala Abugiya d’i, kayam Abugi ni tu, ni Ma sä akulona. 10Ar sa mi yagi ala Suma avok sumina d’uo mi, kayam Ma avok sumina ni tu, ni Mesi. 11Wani ma ngol ma adigagina, ar mi mbut nazong magina. 12Sama mi hle yam akulona, a mba hulongôm yam kä, sama mi ge yam kä na, a mba hlum yam akulo mi.

Ni hohou d’a yam suma hat gata ki Fariziyê suma lop irid’a

(Gol Mar 12.40; Luc 11.39-42,44,52; 20.47)

13Jesus mi de kua ala: Ni zla d’a hohoud’a kagi agi suma hat gata ki Fariziyê suma lop ira. Agi suma nga dugugi vun leu d’a akulod’a woi avok sumina, agi tagid’a nga kalagi kua d’i, wani agi nga ar suma a min kal kuana á kal kua d’uo mi.

[14Ni zla d’a hohoud’a kagi agi suma hat gata ki Fariziyê suma lop ira, kayam agi tagi ahlena harop suma modonod’ina, agi tchenegi tchen nda fiyak ka lop ira. Kayam ndata, Alona mba mi kagi sariya d’a tcho d’a kal teglesa kagiya.]

15Ni zla d’a hohoud’a kagi agi suma hat gata ki Fariziyê suma lop ira, kayam agi nga tid’igi yam andagad’a teteng, agi djagagi alum ma ngolâ teteng á fagi sama agi mbud’um ma Juif-fîna. Le agi mbud’um wa ma Juif-fâ da ni, bugola, agi mbud’um sana hi Jahanama-na yam mbà kal agiya.

16Ni zla d’a hohoud’a kagi agi suma duk suma tagagi lovota mi ndrogi suma dukina. Agi nga dagi ala: Le sana mi gun tamï ki gong nga kud’ora hAlonid’a ni, gun nda kola ni hawa, wani le mi gun tamï ki lor ra kur gong nga kud’ora hAlonid’a ni, gun ndata mba d’i vumu. 17Agi suma lilid’a suma duka, vama ngol ma kalâ ni ma lara, lora, d’oze gong nga kud’ora hAlonid’a d’a tin lor ra a tinit irat vat mAlona kuad’a zu? 18Agi nga dagi ala: Le sana mi gun tamï ki yima ngal ahle suma ngat buzuna ni, gun nda kola ni hawa, wani le mi gun tamï ki he d’a hawa d’a yam yima ngal ahle suma ngat buzunid’a ni, gun ndata mba d’i vumu. 19Agi suma duka, vama ngol ma kalâ ni ma lara, ni he d’a hawad’a, d’oze ni yima ngal ahle suma ngat buzu ma nga mi tinit irat vat mAlonina zu? 20Kayam ndata, le sana mi gun tamï ki yima ngal ahle suma ngat buzuna ni, mi gun ni tam ki va máma kahle suma kama pet. 21Le sana mi gun tamï ki gong nga kud’ora hAlonid’a ni, mi gun ni tam ki gong ndata kAlo ma nga kaka kurutna mi. 22Le sana mi gun tamï kakulod’a ni, mi gun ni tam ki zlam mba amula hAlonid’a ki mam ma nga kaka katna mi.

23Ni zla d’a hohoud’a kagi agi suma hat gata ki Fariziyê suma lop ira, kayam agi nga hagi dim d’utna, nala, mêta ki aneta ki kumina. Agi aragi ahle suma kal tegles kur gatina woi ta, nala, d’ingêra ki we hohowa suma ki d’engzenga. Djivid’a agi lagi ahle ndazina bei ar suma hiuna woi mi. 24Agi suma duk suma tagagi lovota mi tagina, agi nga fogi vurutna woyo, wani agi nga ligigi djambala.

25Ni zla d’a hohoud’a kagi agi suma hat gata ki Fariziyê suma lop ira, kayam agi nga mbuzugi huyok kopma ki tazana woi yed’et, wani huruzi ma krovona mi ni oîd’a ki kula ki djib’er ra bei ve tad’a ba d’a. 26Ang Fariziyê ma duka, ang mbus hur kopma ki tazana woi adjeu tua. Hina wani, huyogozi pî mba mi mbut yed’et.

27Ni zla d’a hohoud’a kagi agi suma hat gata ki Fariziyê suma lop ira, kayam agi ni d’igi asu d’a a gulud’ut hapid’a na. Ti djifa abu á gola, wani krovo ni oîd’a kaso’â hi suma matnina kahle suma tchimba pet mi. 28Agi ni na mi. Abu ir suma agi ni d’igi suma d’ingêrâ na, wani hurugi krovo ni oîd’a ki lop ira ki tchod’a mi.

Jesus mi de zlad’a yam ngopa

(Gol Luc 11.47-51)

29Jesus mi de kua ala: Ni zla d’a hohoud’a kagi agi suma hat gata ki Fariziyê suma lop ira, kayam agi nga minigi asud’a hi suma djok vun Alonid’a, agi minigi yam asud’a hi suma d’ingêrîd’a djifa mi. Agi nga dagi ala: 30Ladjï ei sä ni kur atchogoid’a habuyoi ngolod’a ni, ei mba zlabei ki sed’ezi á tchi suma djok vun Alona d’i. 31Kayam ndata, agi lagi glangâsâ kagi ala agi ni suma tchi suma djok vun Alonina grozi ngolona. 32Hina, agi nga ndagagi vun sun nda ar abo abuyogi ngolod’a. 33Agi guguyona, agi mageid’a grotna! Ni nana ba, agi mba ringîgi woi abo sariya d’a ka d’a ti tchugugi aduk aku d’a Jahanama-d’a ge? 34Kayam ndata, an nga ni sunugi suma djok vuna azi ki suma ned’a ki suma hat gata. Agi mba tchagi suma dingâ, agi mba b’alagi suma dingâ akulo ata aguna, agi mba togi suma dingâ kur gongîyo magi suma toka, agi mba digigi suma hiuna á lazi ndaka kur azina kur azina mi. 35Hina wani, buzu suma d’ingêrâ pet ma djang ngei yam andagad’ina, mi hulong kagiya, tinï ad’ud’a ata matna hi Abel ma d’ingêrâ dei, gak mba ata matna hi Zakari Barasi gorom ma agi tchum aduk yima a tinim iram vam mAlonina ki yima ngal ahle suma ngat buzunina. 36Gagazi, an nga ni dagiya, ahle ndazina pet a mba hulong yam agi suma kur atchogoi d’a wandina.

Jesus azi ki Jerusalem

(Gol Luc 13.34-35)

37Jesus mi de kua ala: Agi suma Jerusalem-ma, agi suma Jerusalem-ma, agi tchagi suma djok vun Alona, agi durugi suma Alona mi sunugizïna kahinad’a mi. Ni yan ga ba, an min á kod’ogi d’igi ahleka nga d’i kot grotna ad’u gigingât na ge? Wani agi nga minigi d’i. 38Agi gologiya, aziyagi mba mi ar djona grib’ing. 39Kayam ndata, an nga ni dagiya, agi mba wan nduo d’a, gak bur ma agi mba dagi ala: Ar Alona mi b’e vunam yam sama nga mi mba ki simiyê Ma didinina na.

Currently Selected:

Matiye 23: BA

Highlight

Copy