Luc 7

Jesus mi sut azongâ hi azigarîna

(Gol Mat 8.5-13)

1Bugol la Jesus mi dap zla mam mba ded’a mi suma peta, mi kal avo Kapernayum. 2Ma ngol ma azigarâ abom kis ma Romê-na, azong mam ma mam le kam heîna, mi ve tugud’eid’a go á matna. 3Kid’a mi hum zla Jesus-d’a, mi sun nglo suma Juif-fâ á tchenem ala mi mbeï mi sud’um azong mama. 4A mbaza gen Jesus, a tchenem ki labiyad’a ala: Sa máma ndak ang ndjunumu, 5kayam mam le yam andjavei heî; ni mam ba, mi minimi gong mami d’a toka.

6Jesus mi i ki sed’eziya. Kid’a mi mba go kazinid’a, ma ngol ma azigarâ abom kisâ, mi sunï buniyôma gen Jesus á dum ala: Salamina, ang kau tang ngi, an ndak nga á ang kal avo hatan ndi. 7Kayam ndata, an djib’era an ndak á iza geveng nguo mi. Wani ang de ni zlad’a tu go, azong mana mba mi tchol akulo. 8Kayam an nga nad’u vun ma hed’a hi sa mi, an nga ki azigarâ abonu. An le ni de mi ma tuna ala: Ang iya ni, mi iya; an le ni de mi ma dingâ ala: Ang mbeya ni, mi mba mi; an le ni de mazong mana ala: Ang le hina ni, mi le mi. 9Ata yima Jesus mi hum zla ndatina, mi le atchap kamu, mi pret tamu, mi de mablau suma a nga tit ad’uma ala: An nga ni dagiya, aduk Israel-lâ pî, an fe nga he gagazi d’a ngol la hina d’a d’i. 10Ata yima suma a sunuzina a hulongî avona, a fe azong máma mi tchol wa akulo.

Jesus mi tchol atcha d’a modonod’a gorotna akulo

11Bugola, Jesus mi i kur azì ma ding simiyêm ala Nayin. Mam suma hata azi kablau suma a i ki sed’emu. 12Kid’a a mbaza go avun azinid’a, suma a nde woi ki matna á im tosa; ni gor ma abo asum vam tuna. Asum ni modonod’a. Suma kur azì mámina ablaud’a a nga i ki sed’ed’u. 13Ata yima Salad’a mi watna, mi wat hohowod’u, mi dat ala: Ndak tchi d’i. 14Mi hut go, mi do zlat ma sama matna mi nga kuana. Suma a hle matnina a tchola. Mi dala: Azongâ, an nga ni dangû, ang tchol akulo. 15Sama matna mi tchol mi kagakulo, mi nde mi de zlad’a. Jesus mi hum masumu.

16Azi pet a le mandarâ, a nga subur Alona, a dala: Ma djok vun ma ngolâ hAlonina mi nde wa woi adigeya, Alona mi mba wa á ndjun sum mama. 17Kayam ndata, zlam nde yina kur ambas sa Jude-d’a pet kambas sa nguyuta mi.

Suma sunda hi Jean ma le suma batembina

(Gol Mat 11.2-19)

18Suma hata hi Jean ma le suma batembina a de zla ndata pet mi Jean. 19Jean mi yi mam suma hata mbà, mi sunuzi gen Salad’a á djobom ala: Angî ma nga mbana, d’oze ami djubumi ni sama ding zu?

20Azi mbaza gen Jesus, a dum ala: Jean ma le suma batemba sunumï geveng ni mam ala ami djobongû, Angî Ma nga mbana, d’oze ami djubumi ni sama ding zu?

21Ata yi máma, Jesus mi sut suma tugud’eid’a ablaud’a ki suma homozed’a ki suma a nga ki muzuk ma tchona kuruzina, mi mal ir suma duka woi ablaud’a mi. 22Jesus mi hulong dazi ala: Agi i dagi mi Jean vama agi wagizina ki vama agi humugizina mi. Suma duka a nga we, suma dileîd’a a nga tid’a, suma libina a nga yak keyo, suma ngela a nga huma, an nga ni tchol suma matna akulo, an nga ni tchi wal Zla d’a Djivid’a mi suma houd’a mi. 23Sama le nga hur ma mbàmbàna kan nduo na mi le furîd’a.

24Kid’a suma sunda hi Jean-na a id’a, Jesus mi nde de zlad’a yam Jean mablau suma. Mi dala: Agi igi abagei á gologi ni me ge? Akei d’a simetna nga gazata zu? 25Wani agi i gologi ni me ge? Sama tchuk baru d’a djif fa luluîd’ina zu? Wani suma tchuk baru d’a djif fa luluîd’ina ni suma a nga kaka kä ki furîd’a ki tena avo hamuleina. 26Agi i gologi ni me ge? Ma djok vun Alona zu? Â, an nga ni dagiya, mi kal ma djok vun Alona woi dei. 27Wana ni Jean ma a b’irim zlam kur mbaktumba hAlonid’a ala: Alona mi dala:

Gola! An nga ni sunï man ma sunda.

Ni mam ma mba mi min lovot mangina na.

28An nga ni dagiya, aduk suma aropma a vud’uzina pet ma kal Jean ma le suma batemba ki ngolina nga d’i. Wani ni ma gor ma nga kur leud’a hAlonid’ina ba, mi kalam ki ngola.

29Ata yima suma pet ki suma ve lombod’a a hum zla ndatina, a dala: Alona ni Ma d’ingêrâ, kayam Jean mi lazi batemba. 30Wani Fariziyêna azi ki suma hat gata a noî minda hAlonid’a woyo, kayam azi min nga ala Jean mi lazi batemba d’i.

31Jesus mi dazi kua ala: An mba ni nga suma kur atchogoi d’a wandina ni ki me ge? Azi ni d’igi me na? 32Azi ni d’igi gugurei suma a nga kaka kä ad’u su’îna a yi tazi akulo ala: Ami nga bugi taulâd’a, agi nga luwugi d’i; ami nga tchimi horâ, agi nga tchigi d’uo mi na na. 33Kayam Jean ma le suma batemba mi mba, mi te nga avu d’i, mi tche nga süm guguzlud’a d’i. Wani agi nga dala: Mi nga ki muzuk ma tchona kurumu. 34An Gor Sana ni mba, nga ni te, nga ni tche. Wani agi nga dagi ala: Sa máma ni sama b’oid’a, ni sama tche süm guguzlud’a heîna, ni suma ve lombod’a azi ki suma tchona banazina. 35Wani ned’a hAlonid’a ti tak kei ala sun mata ni d’ingêru nata grotna.

Jesus mi kal avo hi Simon ma Fariziyêna

36Ma Fariziyêna tu mi yi Jesus á te ki sed’emu. Mi kal avo hatamu, mi kak kä á te tena. 37Atcha d’a tchod’a nga kur ambas ndata. Kid’a ti we Jesus nga mi te tena avo hi Fariziyê mámid’a, ti mba kagel la albatred’a oîd’a ki mbul ma his ma afufuîna. 38Ti tchol bugol Jesus go kasemu, nga d’i tchiya, simi ma iratna nga mi labam asemu, nga d’i sad’am mbei ki tumus sa kata. Ti vum asemu, ti sad’amzi ki mbul ma his ma afufuîna. 39Kid’a Fariziyê ma yum yam tenina mi we hina d’a, mi de kurum ala: Sa máma ladjï ni ma djok vun Alona gagaziya ni, mi we wa atcha d’a domba, mi wat wa tit mata, kayam ndat natcha d’a tchod’a.

40Jesus mi dum ala: Simon, an nga ki zlad’a á dangû.

Simon mi hulong dum ala: Ma hat suma, ang danu.

41Jesus mi dum ala: Sana tu bal mama nga yam suma mbà, ma tuna siled’a nga kam kikis vahl, ma dingâ, siled’a nga kam dok vahl mi. 42Ata yima azi nga ki vama wurak kuo na, mam arazi djak hawa. Adigazi na ni ma mba mi le kam kalâ ni ma lara ge?

43Simon mi hulong dum ala: An djib’er ala ni ma mam aram beged’a ngolina.

Jesus mi hulong dum ala: Ang de nata yad’u. 44Mi mbut iram yam atcha ndata, mi de mi Simon ala: Ang watcha d’a wanda? An mba avo hatangû, ang han nga mbina á mbus asen ndi, wani ndat mbuzun asen ki simi ma iratna, ti sad’am ki tumus sa kata mi. 45Kid’a an kal avo hatanga, ang van nga atang ngi, wani ndat ar nga bei van asen ndi. 46Ang sad’an nga mbul kan ndi, wani ndat ti sad’an mbul ma his ma afufuîna asenu. 47Kayam ndata, an nga ni dangû, an vat wa hurun ndei yam tcho mat ta ablaud’a, kayam o mat ta ngola, wani sama an vat nga hurun ndei kam akid’eid’ina, o mamba nakid’eid’a mi.

48Jesus mi de matcha ndata ala: An vat wa hurun ndei yam tcho maka.

49Suma a nga kaka kä ki sed’em avun tenina, a nde de kuruzi ala: Sa máma ni nge ba, mi vat hurum mbei yam tchod’a ge?

50Wani Jesus mi de matcha ndata ala: He gagazi maka sud’uk wa; ndak i lafiya.

Currently Selected:

Luc 7: BA

Highlight

Copy