Jude 1

Dep pa ged’a hi Jude-d’a

1Ni an Jude ma sunda hi Jesus Christ ma Jacques wiyemina.

An nga ni b’ir mbaktumba mi agi suma Alona Abui mi yagi suma nga mi le kagi heî suma nga mi ngomogi zlapa ki Jesus Christ-sâ.

2Ar Alona mi wagi hohowogi ngola, mi hagi b’leng nga halasa ki od’a mi.

Suma a hat hat ta tchod’ina

(Gol 2 Pier 2.1-17)

3Buniyôna, an min tan ngola á b’irigi mbaktumba yam sut ta ei fata. Wani le ni nana pî, an b’irigi mbaktum ndata á siragi ngingring á dur ayîna yam he gagazi d’a Alona mi hat yam tu mi sum mama peta. 4Kayam suma ding suma tchona a nga si kä adigei gumunu, ni suma a ka sariyad’a kazi avok deina, ni suma bei ge yazi kä ad’u Alonina; ni suma a mbut sumad’a hAlo meinid’a woi vama ndjendjed’a kur tit mazid’ina; ni suma a noî Saleina Jesus Christ ma tu ni mei ma hatina.

5Wani ki tchetchemba, agi wagi ahle ndazina tetet, wani an nga ni gagi humagi kua, ni nana ba, Salad’a mi sut Israel-lâ woi kur ambas sa Ezipte-d’a, bugola, mi ba suma a he nga gagazid’a d’uo na woi ge. 6Agi djib’eregi yam malaika suma a ngom nga ad’eng nga Alona mi hazizid’a d’uo suma a ar yazi ma kaka woina. Kayam ndata, Alona nga mi ngomozi kä kur nduvunda djinda ki kindjing ma didina á djup bur ma ngol ma a mba kazi sariyad’a kazina. 7Agi djib’eregi yam suma Sodom-ma ki suma Gomor-râ kazì ma nguyuzina. Azi le dedege d’igi malaika ndazina na, a he tazi á le mizeuna, a lahle suma ndjendje suma ndak á led’a d’uo na. Azi ndak á fe ndaka aduk aku d’a didinda; azi ni vama simata mi suma pet.

8Sum ndazina a le hina dedege mi, a nga tit bugol ahle suma nde tazi irazina á mbut tazi ndjendjed’a, a nga gol ad’enga hAlonid’a is, a nga ngul ahle suma ari suma subur suma akulona. 9Wani ata yima Michel ma ngolâ hi malaikanina tamba mi nga mi yal ki Diable ata yima a tchi tazi tuguyod’a yam mad’a Moise-sâ, mi kam nga sariya d’a tchod’a kam mbi, wani mi dum ala: Ar Ma didina mi ngobongû. 10Wani sum ndazina a nga ngul vama azi wum mbuo na kahle suma azi wazi kur djib’er mazid’a d’igi ahle suma abagei suma bei djib’era na na, a nga b’lak kei kur ahle ndazina. 11Ni zla d’a hohoud’a kaziya, kayam a hle ni lovota hi Kain-nda, a he tazi yam d’od’oka hi beged’id’a d’igi Baläm na, a ba woyo, kayam azi le yam mba ad’enga d’igi Kore na. 12Sum ndazina a mbut ni vama dap asema ata yi magi ma darigïd’a, zulona nga lazi ki hop mazina d’uo mi. Azi ni d’igi d’ugul la bei mbina d’a simetna nga mi tchat tata d’a na. Azi ni d’igi agu ma le ni vun simetna pî nga mi vut tuo ma mi mit yam mbà ma a pad’am sideyem mbeina na. 13Azi ni d’igi abilâ halum ma ngol ma nga mi sulul hubup hubup ki sun mazi d’a zulona na, azi ni d’igi tchitchiu d’a tcha tata d’a na. Alona nga mi ngomozi kä kur yima nduvun ma i’îlik ma yiyi’â gak didin.

14Enok nandjaf ma kid’iziyana hi Adam-ma, mi djok vuna woi avok kazi ala: Agi humugiya! Salad’a nga mi mba ki malaika mam suma a tinizi irazi vazina dudubu dogo 15á ka sariyad’a yam suma pet, á ve suma tchona ki zlad’a yam sun nda tcho d’a azi lat ata yima a le yam mba ad’enga kAlona ki zla d’a de d’a tcho d’a lara ge pet ta azi dat kamba. 16Sum ndazina tazi nga d’i lazi djivi d’i, huruzi nga mi zal yam ahle suma a nga mba kazina, a nga tit kur d’od’oka hi hliwizid’a, a nga de zla d’a subur tad’a, a nga lad’u suma á fe mbina ataziya.

Ge humba ki tchenda

17Wani buniyôna, agi djib’eregi yam zla d’a suma a sunuzina hi Saleina Jesus Christ-sâ a dat adjeu deid’a. 18Azi dagi ala: Kur bur ma danana, suma las suma a mba mba, ni suma a tit kur d’od’ok mazi d’a tchod’ina. 19Azi ni suma wal suma, azi ni suma a le minda hi hliu tad’ina, a nga ki Muzu’â hAlonina d’uo mi. 20Wani agi buniyôn suma od’a, agi wulugi tagi akulo kur he gagazi magi d’a kal papa d’a tinigi iragi vagi mAlonid’a, agi tchenegi Alona kad’enga hi Muzuk mam ma bei tchod’a ba na mi. 21Ar agi vagi tagi kur od’a hAlonid’a á djubugi Saleina Jesus Christ ki djivi mamba á hagi ari d’a didinda.

22Agi wagi hohowa suma a nga le huruzi gigritna. 23Agi prud’uzi woi aduk akud’a á sud’uziya, agi wagi hohowa suma dingâ zlapa ki mandarâ. Wani le ni baru mazi d’a tubaka ki d’od’ok mazi d’a tchod’id’a pî, ar agi noyôd’u.

Gile d’a dabid’a

24Mam ma ndak á ngomogi tala agi pugugi kä d’uo na, mba mi buzugugi woi avorom kur subur mamba bei zla d’a kagi ba ki furîd’a. 25Mam tu nAlo ma sud’i yam Saleina Jesus Christ-sâ. Subura ki ngola kad’enga ki yam mba ted’a katchogoi d’a kala pet ki d’a tchetchemba ni mamba gak didin. Amin!

Currently Selected:

Jude 1: BA

Highlight

Copy