Jean 11
11
Matna hi Lazar-râ
1Sana tu, simiyêm ala Lazar mi nga tugud’eid’a. Mi ni kur azì ma Betani-na zlapa ki b’oziyom suma aropma Marie azi ki Marta. 2Ni Marie d’a vo mbul ma his ma afufuîna yam asem Salad’a ti sed’emzi woi ki tumus sa katid’a, ni d’a wiyetna Lazar mi nga tugud’eid’id’a. 3Kayam ndata, b’oziyoma a sun yam Jesus, a dum ala: Salamina, gola! Ma ang le kam heîna, mi nga tugud’eid’a.
4Kid’a Jesus mi hum zla ndatid’a, mi dazi ala: Tugud’ei mamba ndak á tchum mbi, wani ná tak subura hAlonid’a tala á suburun an Alona Goroma d’a.
5Jesus mi le yam Marta azi ki wiyeta ki Lazar mi. 6Kid’a Jesus mi hum ala Lazar nga tugud’eid’a d’a, mi kak sä ata yima mi nga kuana burâ mbà. 7Bugola, mi de mi suma hata ala: Ar ei hulongeî avo Jude.
8Suma hata a dum ala: Ma hat suma, Juif-fâ a halang á durâ kahinad’a ka tchetchem wana. Ang dok hulong kua d’ei?
9Jesus mi hulong dazi ala: Lera nga dogo yam mbà kur afat ta tud’a d’uo zu? Le sana nga mi tit faleya ni, va nga mi dabam asem mbi, kayam me nga mi we b’od’a hi duniyad’id’a. 10Wani le sana nga mi tit andjege ni, va mba mi dabam asemu, kayam b’od’a nga avorom mbi. 11Bugol zla ndata mi dazi ala: Baneina Lazar, mi bur wa sena, wani an i ni zlid’im akulo.
12Kayam ndata, mam suma hata a dum ala: Salamina, le mi burî sena ni, mba mi tchol akulo.
13Jesus mi de ni zla mad’amu, wani a djib’er ala mi de ni yam sen ma hawana. 14Kayam ndata, Jesus mi dazi woi mbak ala: Lazar mi mit wa. 15An nga ki furîd’a kagi kayamba an sä kua d’uo d’a, kayam agi fagi lovota á hagi gagazid’a. Ar ei i gevemu.
16Toma ma a yum ala Ngoneîna, mi de mi ndrom suma hata ala: Ar ei i boi ki Ma hat suma mi.
Jesus ni Ma tchol suma matna ni Ma hazi arid’a mi na
17Kid’a Jesus mi mbazid’a, mi hum ala Lazar mi le wa burâ fid’i kur zula da’. 18Betani ni go ki Jerusalem, adigazi ni d’igi kilometred’a hindi na. 19Juif-fâ ablaud’a a mba gen Marta azi ki Marie á yorozi yam zla matna hi wiyezinina.
20Kid’a Marta ti hum ala Jesus nga mi djïya d’a, ti i á d’ugulomu, wani Marie ti ar nga avo.
21Marta ti de mi Jesus ala: Salana, ladjï ang nga ka hî ni, wiyena nga mi mit ti. 22Wani ki tchetchemba, an wala ang le tchen ni me pî ata Alona ni, Alona mba mi hangziya.
23Jesus mi dat ala: Wiye’â mba mi tchol akulo karid’a.
24Marta ti dum ala: An wala mba mi tchol akulo aduk suma matna kur bur ma dabid’a.
25Jesus mi dat ala: An ni Ma tchol suma matna ni Ma hazi arid’a mi na. Sama he gagazid’a kana, le mi mid’u pî, mba mi kaka karid’a. 26Sama lara pî ma nga karid’a ma nga he gagazid’a kana, mba mi mit ti gak didin. Ndak he gagazid’a yam zla ndata zu?
27Ti dum ala: Â, Salana, an he wa gagazid’a ala angî Mesi Alona Gorom ma nga mi mba kur duniyad’ina.
Jesus mi tchiya
28Bugol la Marta ti de zla ndata dad’a, ti i yi wiyeta Marie gumunu, ti dat ala: Ma hat suma mi mba wa, nga mi yagu. 29Kid’a Marie ti hum hina d’a, ti tchol atogo zak, ti i gen Jesus. 30Jesus nga bei kal avo hurazina tua, wani mi nga nata yima Marta d’ugulom kuana. 31Juif suma a nga kak kä gevet avo hatat á yorotna, a wat kid’a ti tchol atogo zak ti ndabud’a, a i ad’ud’u, a djib’er ala: Ti i ni sä hî yam asud’a á tchina.
32Kid’a Marie ti mbaza ata yima Jesus mi nga kuanid’a, ti wumu, ti grif kä avoromu, ti dum ala: Salana, ladjï ang nga ka hî ni, wiyena nga mi mit ti.
33Kid’a Jesus mi wat nga d’i tchiya, Juif suma a mba ki sed’etna a nga tchi mi d’a, mi hlihlik kurum krovo, hurum nga mi had’a, 34mi djobozi ala: Agi gumî lara ge?
A dum ala: Salamina, ang mbeï gola.
35Jesus mi tchiya. 36Kayam ndata, Juif-fâ a dala: Gol o d’a nga mi lat kamba.
37Wani suma hiuna adigazi a dala: Sa máma ni ma mi mal ir sama duka woina. Mi ndak á d’el sama wana bei matna mi d’uo zu?
Jesus mi tchol Lazar akulo karid’a
38Jesus hlihlik kurum krovo kua, mi i yam asud’a. Asu ndata ni zul ahinad’a, a dugut vunat kahinad’a mi. 39Jesus mi dazi ala: Agi ligad’agi ahinad’a woyo.
Marta ma mitna wiyemba, ti dum ala: Salana, mi bu da’, kayam mi le burâ fid’i.
40Jesus mi dat ala: An dak ala: Le ndak he gagazid’a ni, ndak mba d’i we subura hAlonid’a d’uo zu?
41Kayam ndata, azi ligat ahina ndata woyo. Jesus mi hle iram akulo, mi dala: Abunu, an lang mersi kayamba ang humunda. 42An we tcha ala ang nga humun teteu, wani an de ni yam ablau suma nguyun wana, kayam azi fe lovota á he gagazid’a ala ni ang ba, sununïya.
43Kid’a mi de zla ndata dad’a, mi de ki delem akulo ala: Lazar, ang nde woyo. 44Sama mitna mi nde woyo, abom kasem d’uta ki baktana ki barud’a djinda kam mi. Jesus mi dazi ala: Agi bud’um mbeyo, agi aram mi iya.
Juif-fâ a ndjak vunazi yam Jesus
(Gol Mat 26.1-5; Mar 14.1-2; Luc 22.1-2)
45Ablau Juif suma a mba gen Marie-na, a wahle suma mi lazina, a he gagazid’a kamu. 46Wani suma hiuna adigazi a i gen Fariziyêna, a dazi yam ahle suma Jesus mi lazina. 47Kayam ndata, nglo suma ngat buzuna azi ki Fariziyêna a tok suma b’ak zlad’a, a djop tazi ala: Ei lei ni nana? Kayam sa máma nga mi lahle suma ndandalâ ngola. 48Le ei aram hina ni, suma pet a mba he gagazid’a kamu, Romê-na a mba mba á b’lagei gong mei d’a kud’ora hAlonid’a woi kandjavei pet.
49Wani ma dingâ tu adigazi simiyêm ala Kayif, ni ma ngol ma ngat buzuna kur biza ndata, mi dazi ala: Agi wagi nga va tu d’i. 50Agi djib’eregi nga d’ala djivid’a kagi sana tu mi mit yam suma tala ar andjavei pet mi ba woi d’uo d’a d’i. 51Mi de zla ndata ni yam tam mbi, wani kayam mam mi ma ngol ma ngat buzuna kur biza ndata, mi djok vuna avok yam Jesus ala mba mi mit yam andjaf Juif-fâ, 52ni kayam andjaf máma hol li, wani á tok Alona grom suma a b’rau woi yaya’â tu.
53Kur bur máma a nde ndjak vunazi á tchum mbeyo. 54Kayam ndata, Jesus mi dok tit nga aduk Juif-fâ pid’ak kuo d’a, mi tchol ata yi máma, mi i kur ambas sa go ki fulîd’a, mi kal kur azì ma ngol ma simiyêm ala Efraim-ma, mi kak sä kua ki mam suma hata.
55Vun til ma Pa’â hi Juif-fâ ar go. Suma ablaud’a kur ambasa teteng a i Jerusalem á mbut tazi yed’et avok vun til ma Pa’â. 56Azi nga hal Jesus, a nga tchola kur gong nga kud’ora hAlonid’a, a de tazi ala: Agi djib’eregi nana ge? Mba mi mba vun tilâ d’uo zu? 57Nglo suma ngat buzuna azi ki Fariziyêna a he vuna ala le sa mi we yima mi nga kuana ni, mi daziya, kayam azi i vumu.
Currently Selected:
Jean 11: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
