Suma ka sariyad’a 21
21
Andjafâ hi Benjamin ma tin ad’ud’a á mbàd’ina
1Israel-lâ a gun tazi Mispa ala: Ar sa adigei tu mi he goromba ndjufâ mi sama hi Benjamin-na d’i. 2Ablau suma hi Israel-lîna a mba Betel, a kak kua avok Alona gak fladege, a nga tchi ki delezi akulo ki simina irazi ngola mi. 3Azi dala: Ma didina Alona hi Israel-lîna, ni kayam me ba, ahle ndazina a mba ini aduk Israel-lâ ba, andjafâ sop mi zleng ngei na ge?
4Tcha yorogod’a ablau suma a min yima ngal ahle suma ngat buzuna kua kolâ, a he he d’a hawa d’a ngala, a he he d’a hawa d’a ngat buzu d’a zlap darigïd’a mi. 5Israel-lâ a dala: Aduk Israel-lâ pet, andjaf ma mi i nga aduk toka avok Ma didina d’uo na ni ma lara ge? Kayam ei guni tei avok Ma didina avo Mispa ala: Andjaf ma mi i nga d’uo na, ei tchum mbeyo.
6Israel-lâ a nga ki hur ma hata yam zlad’a hi b’oziyozi suma hi Benjamin-nid’a, a dala: Ini andjaf Israel-lâ sop mi ka wa woi aduk Israel-lâ. 7Ei lei ni nana ba, ei mba fei aropma mi suma a arâ ge? Kayam ei guni tei avok Ma didina ala: Ei hazi gureina ndjufâ d’i.
8Azi dala: Na ni aduk andjaf Israel-lâ, suma dingâ a mba nga Mispa avok Ma didina d’uo zu? Wani suma a nga kaka Jabes sa Galät-tina, sa tu pî mi mba nga kur kangâ aduk toka d’i. 9A ndum suma a mba tokina, wani aduk suma a nga kaka Jabes sa Galät-tina, a fe nga sa adigazi kua tu d’i. 10Ata yi máma toka sun azigarâ atazi 12.000, a hazi vuna ala: Agi tchagi suma a nga kaka Jabes sa Galät-tina woi zlapa karopma ki kemba mi. 11Vama agi mba luma ba wana: Agi tchagi andjofâ karop suma a zlap kandjofîna mi woi pet bei ar sa tu ba.
12A fe gro arop suma bei zlap kandjofâ ba na kikisa fid’i aduk suma a nga kaka Jabes sa Galät-tina. A mba ki sed’ezi kur kangâ avo Silo d’a Kanan-nda.
13Ablau suma toka pet a tchuk sunda ata suma hi Benjamin suma a nga kaka yam ahina d’a Rimon-ndina á dazi zlad’a yam halasa. 14Ata yi máma suma hi Benjamin-na a hulongîya, Israel-lâ a hazi gro arop suma a arazi bei tchid’a aduk arop suma Jabes sa Galät-tina, wan pî a ndak nga kazi d’i.
15Ablau suma a nga hat huruzi yam suma hi Benjamin-na, kayam Ma didina mi ngat nga hod’ola aduk andjaf Israel-lâ. 16Suma avok ablau sumina a dala: Ei lei ni nana ba, ei feigi aropma mi suma a arâ ge? Kayam aropma hi suma hi Benjamin-nina a tchazi wa woyo.
17A dala: Ar suma hi Benjamin suma a prut teina, a ngom djo mazina kayambala andjaf tu aduk Israel-lâ mi hlet tei d’uo d’a. 18Hina pet pî, ei ndak á hazi gurei suma aropma ndjufâ d’i, kayam ei guni tei ala: Ar Ma didina mi ge vuna mi sama Israel ma mba mi he goromba ndjufâ mi suma hi Benjamin-nina.
19A dala: Gola! Bizad’a ki bizad’a vun tilâ hi Ma didinina mi nga avo Silo d’a abo ma norâ hi Betel-lîd’a abo ma yorogona hi lovot ta tchol Betel i Sikem-mba kabo ma sutna hi Lebona-na mi d’a.
20Azi he vuna mi suma hi Benjamin-na ala: Agi i ngeyegi tagi kä aduk asine ma guguzlud’a, 21agi gologi yina. Ata yima gro arop suma Silo-na a mba buzugï woi á lü djongîna, agi buzugugï woi aduk asine ma guguzlud’a, nge nge pî mi hle gor atchad’a tutu á atchad’a, mi i ki sed’et yam ambasa hi Benjamin-nda. 22Le abuyozi d’oze b’oziyozina a mba a tchi tazi gevemiya ni, ami mba dazi ala: Ami nga tchenegiya, ar agi humumi yam zlad’a hi suma hi Benjamin-nid’a, kayam ata yima ami durumi suma Jabes-sina, ami fami nga lovota á hazi aropma tutu pet tuo d’igi ni agi ba, hazi grogi suma aropma d’uo na. Sa mi ndak á tchugugi zlad’a kagi ala agi tchilagi ni yam gun ta d’a agi gunugi tagi d’a d’i.
23Suma hi Benjamin-na a i le na mi. A yo gro aropma aduk gro arop suma a buzugï á lü djongîna ngad’a yam ablawaziya. Bugola, a hulong yam ambas mazi d’a a hazizi djonid’a. A i min azì mazi ma nglona akulo, a kak kua mi. 24Ata yi máma Israel-lâ a hulong avo nge nge pî ad’u andjavamu, ad’u adezem mi, a hulong avo nge nge pî mi i yam ambas mam mba a humzi djonid’a.
25Kur atchogoi ndata amul nga avok Israel-lâ d’i, nge nge pî mi le ni vama hurum minima.
Currently Selected:
Suma ka sariyad’a 21: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
