Suma ka sariyad’a 20
20
Ayî ma a gat ki vun suma hi Benjamin-nina
1Israel-lâ pet á buzugï woi tinï ad’ud’a Dan dei gak mba Berseba, ki suma yam ambas sa Galät-tina mi. Ablau suma a tok tazi avo Mispa ni d’igi sama tuna na. 2Suma avok sumina pet kandjafâ hi Israel-lâ pet a i toka hi suma hAlonid’ina. Suma mayâ suma ki mbigeu d’a fiyaka abozina, a ni 400.000. 3Suma hi Benjamin-na a hum ala Israel-lâ a mba nga Mispa.
Israel-lâ a dala: Agi damiya, ahle ndazina ad’uzi ni nana ge?
4Ata yi máma sana hi Levi-na atcha d’a a tchata ndjuvud’u, mi dala: An mba kaman nda gora avo Gibeya-d’a hi Benjamin-nda á bur kua. 5Suma Gibeya-na a mba atanu, kandjeged’a a ngui azì ma an nga kuana, a tin huruzi ná tchan anu. Wani a le murud’umba kamanda, ti mid’a. 6An hlaman nda gora, an pawat hliwit teyo, an sunum yam andaga d’a a hat djona mi Israel-lâ pet. Kayam azi le ni sun nda tchi matna ki sun nda tchod’a aduk Israel-lâ. 7Gola! Ni agi Israel-lâ ba wan pet, agi djobogi tagiya, agi ngagi hurugi yam va tu ka hî!
8Suma pet a tchol akulo d’igi sama tuna na, a dala: Sa adigei tu pî mba mi i kur zlub’u mamba d’i, sa tu pî mba mi hulong avo hatam mbuo mi. 9Ki tchetchemba, wana ni vama ei mba lum ki suma Gibeya-nina: Ei mba i atazi á durâ ni ki togina. 10Ei yoi suma aduk andjaf Israel ma lara pî suma dogo aduk suma kisâ, suma kis aduk suma dubuna, suma dubu aduk suma dudubud’a dogona mi. A i halï tena mi suma. Kur hulong mazid’a, ei mba i tagei va mi suma a nga Gibeya-d’a hi Benjamin-ndina yam sun nda tchod’a a lat aduk Israel-lîd’a.
11Ni hina ba, Israel-lâ a tok tazi á dur azì ma ngolâ d’igi sama tuna na. 12Andjaf Israel-lâ a tchuk sunda ata adesâ hi Benjamin-na pet, a dazi ala: Ad’u zla d’a tchi mat ta ladigagi ndata ni nana ge? 13Ki tchetchemba, agi hami suma asa’at suma a nga Gibeya-na, kayam ami tchazi woi á pat tchod’a woi aduk Israel-lâ.
Wani suma hi Benjamin-na a min nga a hum b’oziyozi suma Israel-lâ d’i. 14Suma hi Benjamin-na a buzugï woi kur azì mazi ma nglona teteng, a tok tazi Gibeya á dur b’oziyozi suma Israel-lâ. 15Ablau suma hi Benjamin suma a buzugï kur azì mazi ma nglona a ndumuzina, a ni 26.000, ni suma ki mbigeu d’a fiyakina mi bei ndum suma Gibeya suma dingaû suma kikisa kid’iziyana ba. 16Aduk sum ndazina pet suma gula suma dingaûd’a a nga kikisa kid’iziya. Sum ndazina pet a ndak á d’ingêr tumus sa yam sanid’a á gat ki mbiud’a abozi mi vat bei kal mbloka ba. 17A ndum Israel-lâ bei ndum suma hi Benjamin-na ba, a ni 400.000, ni suma ki mbigeu d’a fiyaka abozina pet, ni suma dur ayîna mi.
18Israel-lâ a tchol a i Betel, a djop Alona ala: Ni nge adigami ba, mba mi ndavok á dur suma hi Benjamin-na ge?
Ma didina mi hulong dazi ala: Nandjafâ hi Juda-na ba, mi ndavogo.
19Ki yorogo tcholola, Israel-lâ a yo tita, a i ve kangâ go ki Gibeya. 20Israel-lâ a i á dur suma hi Benjamin-na, a ndjar rei á duruzi avok Gibeya. 21Suma hi Benjamin-na a buzugï woi avo Gibeya, a tchi Israel-lâ kur bur máma 22.000. 22Israel-lâ a ve taziya, a i ndjar kua á durâ ata yima a tchol kua avo’â. 23Israel-lâ a i tchi avok Ma didina gak fladege, a djobom ala: Na ni ami i durumi b’oziyomi suma hi Benjamin-na kua zu?
Ma didina mi hulong mi dazi ala: Agi i durugiziya!
24Israel-lâ a i á dur suma hi Benjamin-na kua yazi á mbàd’a. 25Kur bur máma suma hi Benjamin-na a buzugï woi avo Gibeya á ngavaziya, a tchi Israel suma nga ki mbigeu d’a fiyakina kua 18.000. 26Israel-lâ pet kablau suma pet a mba Betel, a kak kua avok Ma didina, a d’el tazi bei te tena gak fladege, a hum he d’a hawa d’a ngala ki he d’a hawa d’a ngat buzu d’a zlap darigïd’a mi. 27Israel-lâ a djop Ma didina. Nata yi máma ba, zandu’â hAlonina mi nga kua. 28Ni kur atchogoi ndata ba, Fines Elazar gorom ma Aron gorom ngolonina mi nga avok Alona ni mamu. Israel-lâ a djop Ma didina ala: Ami i durumi b’oziyomi suma hi Benjamin-na, d’oze ami vami tami kei zu?
Ma didina mi hulong dazi ala: Agi igi ataziya, kayam avin an nga ni hagizi abogiya.
29Ata yi máma Israel-lâ a i buruzi kä bugol Gibeya. 30Israel-lâ a i nde suma hi Benjamin-na ayîna kua kur bur ma hindina, a ndjar rei á duruzi d’igi avoka na. 31Suma hi Benjamin-na a buzugï woi á ngaf suma, a i sä woi dei kazì ma ngolâ, a tin ad’ud’a a nga tchi suma d’igi avoka na kur lovot ta abagei d’a dinga tu d’a i Betel-la d’a hid’a ti i Gibeya mi d’a. A tchi Israel-lâ ni d’igi dok hindi na. 32Suma hi Benjamin-na a dala: Gola! A mbut wa amangeîd’a avogei d’igi fata deid’a na. Wani Israel-lâ ala: Ei ringîya, ei lobeizi vunazi woi dei kazì ma ngolâ kur lovota.
33Israel-lâ pet a ar yazi ma azi tchol kuana, a mba ndjar rei Bäl-Tamar, suma a ngei kä na a buzugï woi ata yazi ma Märe-Gibeya-na. 34Suma 10.000 suma a manazi aduk Israel-lâ petna, a mba tchol lei avok Gibeya. Ayî máma mad’enga heî. Suma hi Benjamin-na a djib’er nga d’ala azi mba fe ini ndaka d’a d’i. 35Ma didina mi tchi suma hi Benjamin-na woi avok Israel-lâ. Israel-lâ a tchi suma hi Benjamin-na kur bur máma ni 25.100 mi. Azi pet ni suma mbigeu d’a fiyaka abozina.
36Ki yorogod’a, suma hi Benjamin-na a djib’er ala azi kuzî yam Israel-lâ. Wani Israel-lâ a arazi yina kayambala azi tin huruzi ni yam mazi suma a ngei kä á dur suma Gibeya-na d’a. 37Israel suma ngei kä na, a buzuk kei a nde yam suma Gibeya-na, a tchi suma kur azì ma ngolîna woi pet ki mbuguyo suma fuyogeina. 38D’igi a he vuna aduk tazi azi Israel-lâ na, yam vama taka, Israel suma ngei kä na a do azì ma ngolâ akud’a. 39Kid’a Israel-lâ a ar ayî ma durîd’a, suma hi Benjamin-na a tchi suma woi ad’uzi ni d’igi dok hindi na, a dala: Gola! A mbut wa amangeîd’a d’igi avoka na. 40Wani ata yi máma andosâ mi tin d’ugula akulo gongzong. Suma hi Benjamin-na a gol irazi blogoziya. Gol wani, yam azì ma ngolâ vakud’a pepet, nga d’i i irat akulo hur alona. 41Israel-lâ a gid’ei durâ ataziya, suma hi Benjamin-na a nde tcha tata abo ndak ka mba kazid’a. 42Azi häzigazi mi Israel-lâ, a nga ring kur lovot ta i irat abageid’a, wani suma a buzugï avorozi kur azì ma ngolîna, a nga tchaziya. 43Azi ngui suma hi Benjamin-na, a digiziya, a tchazi ata yima a min a tuk tazi kua ata yima ding ma hi Gibeya-na tu abo ma yorogona. 44Azi tchi suma gangrang suma hi Benjamin-na pet ni 18.000. 45Aduk suma a häzigazi mi Israel-lâ a ring ki lovot ta i abagei hur fulâ yam ahina d’a Rimon-ndina, a tchazi ni 5000 abagei hur lovota, a digizi gak a izi Gidom. A tchazi kua 2000 d’ei. 46Ablau suma hi Benjamin suma a tchazi kur bur mámina ni suma 25.000. Azi pet ni suma gangrang suma a nga ki mbigeu d’a fiyaka abozina. 47Suma kikisa karagaya suma a häzigazi mi Israel-lâ a ring ki lovot ta i hur fulâ yam ahina d’a Rimon-ndina, a kak sä kua gak tilâ fid’i. 48Israel-lâ a hulongî ata suma hi Benjamin-na, a tchaziya, andjuveina, d’uwarâ kahlena pet suma azi fazina woi ki mbigeu d’a fiyaka hur azì ma nglo ma ar ta ta na, a ngalam mbei mi.
Currently Selected:
Suma ka sariyad’a 20: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
