Ad’u Tinda 34
34
Hamor goroma mi b’lak Dina
1Dina Lea azi ki Jakob gorozid’a, ti nde woi á gol yugunei suma kur azì mámina. 2Sikem, Hamor amul ma Hef ma yam andaga ndatina goroma, mi wad’u, mi vad’u, mi bur ki sed’et mi b’lagad’u. 3Mi tin hurum pet kad’u, hurum vad’u, mi dat zla d’a kurumba pet. 4Sikem mi de mabum Hamor ala: Ang van gor ndata.
5Jakob mi hum ala Sikem mi b’lak wa goromba Dina. Wani grom suma andjofâ a sä abagei kaho’â tua. Kayam ndata, mi de nga zla d’i, gak azi mba avo.
6Hamor Sikem abum mi mba gen Jakob á dum zlad’a. 7Kid’a Jakob groma a tcholï abagei a hum zla ndatid’a, huruzi mi zal ngola. A tchol kayîna ngola, kayam Sikem mi le nahle suma nga ata yazi d’uo na aduk Israel-lâ, mi bur ki Jakob goromba; ni vama ndak á led’a d’uo na.
8Hamor mi dazi ala: Gorona Sikem hurum ve gorogid’a heî; agi humzi atchad’a. 9Ei veigi teya, agi hami grogina, ami hagi mamina mi. 10Agi kagagi ki sed’emiya, andagad’a sä avorogi wana: Agi kagagi kua. Agi mbud’ugi abogiya, guzugi andagad’a kazina, a mbut magina mi.
11Sikem mi de mi gora abut ki b’oziyotna ala: Agi wan hohowonu; vama agi mba dan kama, an mba ni hagiziya. 12Le agi ngan begena ngola ki he d’a hawad’a ngola heî pî, an mba ni hagizi d’igi agi dagi na; agi han gor ndata, an vad’u.
13Jakob groma a hulong de mi Sikem kabum Hamor zlad’a ki lemba, kayam mi b’lak wiyezid’a Dina. 14A dazi ala: Wana ni vama ami ndak á lum mbuo na tala ami hami wiyemid’a mi sama bei ngat bayâd’a d’a; le ami lami na ni, mba mbut ni vama zulona atamiya. 15Le agi min ala ei ndjagei vunei tu, agi mbud’ugi d’igi ami na ni, vama agi luma ba wana: Nala, mbeî agi ngad’agi sum magina bayâd’a pet. 16Hina wani, ami mba hagi gromina, ami mba vigimi magina; ami mba kagami ki sed’egiya, ei mba mbud’i suma tuna. 17Wani le agi min hum zla mamid’a ni, agi ngad’agi bayâd’a; le d’uo ni, ami vami wiyemid’a, ami hulongômi ki sed’ed’u.
18Zla mazid’a ti le Hamor azi ki goroma Sikem tazi djivid’a. 19Gor azong máma mi le nga lilinga yam vama a dumzina d’i, kayam hurum ve Jakob goromba; suma avo habuma pet a nga hum ngola mi. 20Hamor ki goroma Sikem a buzuk kei avun azina, a de mi suma kur azina ala: 21Sum ndazina a ve wa banad’a ki sed’eya; ei arazi a kak yam andaga meid’a, ei arazi a mbut aboziya, kayam andagad’a nga bubud’a avoroziya. Ar ei vigi grozina, ar ei hazi meina mi. 22Wani sum ndazina a min ala le ei ngad’ei sum meina bayâd’a d’igi azi na d’uo ni, azi min zlap darigïd’a ki ei d’i, d’oze a mbut suma tuna ki ei d’uo mi. 23Ei vei zla mazid’a tala azi kak zlapa ki eya d’a; d’uwar mazina, ahle mazina ki bege mazid’a a mba mbut ni meina d’uo zu?
24Suma a buzugï woi avun azinina pet a hum zlad’a hi Hamor azi ki goroma Sikem-mba; andjof suma kur azina pet a ngat bayâd’a.
25Wani kur bur ma hindina a nga tchi abo tazid’a ted’a, Jakob groma Simeon azi ki Levi, Dina b’oziyotna, a yo mbuguyo suma fuyogeina aboziya, a i hur azina d’igi azi tit ni hawa na, a tchi andjuvei suma hur azinina woi pet, 26a tchi Hamor azi ki goroma Sikem, a veï Dina avo hi Sikem, a i ki sed’ed’u.
27Jakob groma a tchuk avo hi suma azi tchazina, a hurum ahle suma avo hur azinina pet, kayam azi b’lak wiyezid’a. 28Azi yo ahok mazina, amuzleina, korona, ahle suma hur azinina kahle suma hur asinenina mi. 29Azi yo beged’a pet, grozina pet karubuyozi pet, a hurum ahle suma avo kur azinina pet mi.
30Jakob mi de mi Simeon azi ki Levi ala: Agi b’lagan wa, agi mbud’un wa ndjendjed’a avok suma yam andaga d’a wandina, suma Kanan-na ki suma Peris-sâ. An nga ki suma ngol luo; azi mba tok taziya, a mba durunu, a mba tchan ndei ki sum meina mi.
31Azi hulong dum ala: Sana mi ndak á lami wiyemid’a d’igi atcha d’a gaulangâ hina zu?
Currently Selected:
Ad’u Tinda 34: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
