Ad’u Tinda 33
33
Jakob azi a ngaf tazi ki Esau
1Jakob mi hle iram akulo, mi we Esau mi mba ki suma ad’um kikis fid’i, mi ka kemba woi avok Lea ki Rachel ki yugunei suma mbàna mi. 2Mi tchol yuguneina avok ki grozina, bugola, Lea ki grotna, bugola, Rachel ki Josef. 3Mam tamba mi kal avoroziya, mi grif kä, andaga grigrif yam kid’iziya tua ba, mi fe wiyema.
4Esau mi ring á ngavamu, mi bed’em kok, mi vum delemu; a hileû taziya, azi djak a nga tchiya. 5Esau mi hle iram akulo, mi waropma ki kemba, mi de mi Jakob ala: Suma ki ang wana ni suma hi nge na ge?
Jakob mi hulong dum ala: Ni gro suma Alona mi hazi mi an azong mangîna.
6Yuguneina a hud’ï ki grozina, a grif kä; 7Lea d’i hud’ï ki grotna mi, a grif kä; bugola, Josef azi ki Rachel a hud’ïya, a grif kä mi.
8Esau mi djop ala: Ahle suma an fazi glovot pet wana, ang izi ni mi nge ge?
Jakob mi hulong dum ala: Salana, an min ala ang van atang ki djivid’a.
9Esau mi hulong dum ala: Wiyena, ahle mana nga ngola, ang kak ki mangziyo.
10Jakob mi dum ala: Hawa! An nga ni tchenengû, le ang wan ala an ni sana avorong ko ni, ang ve he d’a hawa manda abonu, kayam an wang irangî d’igi sana mi we ir Alona na, ang van atang ki djivid’a mi. 11Ang ve he d’a hawa man nda an mbangzid’a. Kayam nAlona ba, mi handjiya, an nga kahlena pet suma ndagana. Jakob mi lum baba; Esau mi vad’u.
12Esau mi dum ala: Ei i asem teya, an iza avorongû.
13Wani Jakob mi hulong dum ala: Salana, kemba a gugureid’a tua, an nga kaho’â kamuzlei suma grona mi; le an tid’izi atogo kur bur ma tuna go ni, suma gureina a mba ba woyo. 14Salana, ar ang iza avok azong mangâ, an tit tcha blogong lalam d’igi sana mi tit ki d’uwarâ ki kemba na gak an mbaza avo hatang Seir.
15Esau mi hulong dum ala: An min ar sum mana ki sed’eng hiu.
Jakob mi dum ala: A na ge? Ang lan wa djivid’a da’.
16Kur bur máma Esau mi hle lovot mamba, mi hulong Seir. 17Wani Jakob mi i Sukot#33.17 Sukot: Nala, Azangâ., mi min azina kua, mi vazangâ teteng yam ahok mama. Ni kayam ndata ba, mi yi yi máma ala Sukot.
Jakob mi kak go ki Sikem
18Jakob mi tcholï Padan-Aram, mi mba go kazì ma Sikem-ma yam andaga d’a Kanan-nda ki lafiya, mi ve zlub’u mamba go kazì ma ngolâ. 19Mi gus asinena abo Hamor ma tin Sikem-ma grom ngolona ir gurzud’a kis, mi ve zlub’u mamba kua, 20mi min yima ngal ahle suma ngat buzuna, mi yum ala El, Elohe Israel#33.20 El, Elohe Israel: Nala, Alona, Alona hi Israel-lâ..
Currently Selected:
Ad’u Tinda 33: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
