Ad’u Tinda 32

1Jakob mi hle lovot mamba, mi iya. Malaikana hAlonina a ngavamu. 2Ata yima Jakob mi wazina, mi er ad’um akulo ala: Ihî ni yina hAlonina, mi yi yi máma ala Mahanayim.

Jakob mi min tam á ngaf Esau

3Jakob mi sun suma avorom gen wiyema Esau, kur ambas sa Seir yam andaga d’a Edom-mba. 4Mi hazi vuna ala: Agi dagi mi salana Esau ala: Azong mangâ Jakob mi dala: An kagï ngola avo hi Laban gak ini. 5An nga kamuzleina, korona, aho’â, azungeîna ki yuguneina mi. Kayam ndata, an dang ang salana Esau, kayam ang van atang ki djivid’a.

6Suma sunda a hulongî gen Jakob, a dum ala: Ami i fami wiyengâ Esau; mam nga mi djï ki suma kikis fid’i á d’ugulongû.

7Jakob mi le mandarâ ngola, mi nga kur djib’era, mi wal ir suma ki sed’ema mbà, aho’â, amuzleina ki djambala, 8mi dala: Le Esau mi mba mi tchi ades ma tuna woyo ni, ma hina mba mi sud’a.

9Jakob mi tchen Alona ala: Alona habun ngolo Abraham-ma, Alona habun Isa’â, ni ang Ma didin ma dan ala an hulong yam andaga manda gen simiyên ang mba lan djivid’a na, 10an kid’ak kei ata djivi manga ki d’engzeng manga pet suma ang lazi ki an azong mangîna. Adjeu an djak alum ma Jurdê-na ni ki totogod’a abonu; ki tchetchemba, an nga kadesâ mbà. 11An nga ni tchenengû, ang sud’un ndei abo wiyena Esau, kayam an nga ni le mandarâ abomu, kayam mam mba mi tchan grona kasuyoziya. 12Ni ang ma dan ala ang mba lan djivid’a, ang mba zulun andjavan d’igi les ma avun alum ma ngol ma sa mi ndak á ndumum mbuo na na na.

13Kur andjege ndata Jakob mi bur ata yi máma, mi yo ahle suma ding suma mi min hazi mi wiyema Esau-na, 14nala, b’ogei suma aropma kikis mbà ki suma andjofâ dok mbà, tumiyô suma aropma kikis mbà ki suma andjofâ dok mbà, 15djambala dok hindi ki grot suma tchaponina mi, amuzlei suma aropma dok fid’i ki suma andjofâ dogo, koro d’a aropma dok mbà ki koro ma andjofâ dogo mi. 16Jakob mi hazi abo azungeî mama irazi vazi teteng, mi dazi ala: Agi igi sä avoronu, agi tid’igi adigagi woi d’ud’uluk.

17Mi he vuna mazong ma avo’â ala: Le wiyena Esau ngavang mi djobong wa ala: Angî sana hi nge? d’oze, Ang i ni lara ge? d’oze, Ahle suma avorong wana ni hi nge ge ni, 18ang dum ala: Ni suma hazong mangâ Jakob-ma; wana ni he d’a hawa d’a mam sunungzi mi ang salamid’a; mam tam nga mi djï blogomiya.

19Jakob mi he vun máma mazong ma mbàna ki ma hindina ki suma a nga tit bugol d’uwarîna pet hina ala: Wana ni zla d’a agi mba dat mi salana Esau ata yima mi ngavaginid’a. 20Agi dum ala: Azong mangâ Jakob tamba nga mi djï blogomiya.

Jakob mi de kurum ala: An mba ni b’lengêm hurum ki he d’a hawa d’a sä avoronda. Bugol an mba ni fumu, na ni mba mi van atam ki furîd’a ko zu? 21He d’a hawa ndata kal avoromu, mam tamba mi bur ata yima mi zlup kuana.

Jakob mi ndjiget kAlona

22Kur andjege ndata Jakob mi tchol mi yo arubuyom suma mbàna ki yugunei mazi suma mbàna ki grom suma dogo yam tuna, mi djak alum ma Jabo’â kasemu. 23Mi yoziya, mi djagazi aluma woi kahle suma mam nga ki na. 24Jakob mi ar vam tu, sana tu mi ndjiget ki sed’em gak yina nga ad’um fod’a. 25Kid’a sa máma mi wala mi kal yam Jakob puo d’a, kid’a azi nga kur ndjigetid’a, mi tum Jakob ir tchugulumu; Jakob mi mbut dileîd’a. 26Sa máma mi de mi Jakob ala: Ang aranu, kayam yina ar go á fod’a.

Jakob mi hulong dum ala: An arang ngi. Ang b’e vunang kan tua.

27Sa máma mi dum ala: Simiyêngâ na?

Mi hulong dum ala: Jakob.

28Sa máma mi hulong dum ala: A dok yang ala Jakob puo d’a, wani a mba yang ala Israel. Kayam ang ndjiget kAlona ki sumuna, ang kuza.

29Jakob mi djobom ala: Ang tagan simiyêngû.

Mam dum ala: Ni kayam me ba, ang halan simiyên nge? Ata yi máma mi b’e vunam yam Jakob.

30Jakob mi yi yi máma ala Peniyel, kayam mi dala: An wAlona ki iranu, an nga karid’a mi.

31Kid’a afata deîd’a, Jakob mi djak Peniyel, nga mi tit dileîd’a yam ir tchugulum mba pata. 32Kayam ndata, gak ini Israel-lâ a nga te luluka hab’alîd’a d’i, kayam Alona mi tum Jakob mi ir tchugulumu.

Currently Selected:

Ad’u Tinda 32: BA

Highlight

Copy