Sunda hi suma a sunuzinid’a 5
5
Ananiyas azi ki Safira
1Wani sana simiyêm ala Ananiyas kamamba Safira, a gus yi mazina woyo. 2Mi ngei beged’a woi nde, amamba ti we mi, mi mba kad’ut ta ara, mi tinit kä avok suma a sunuzina. 3Wani Pierre mi dum ala: Ananiyas, ni kayam me ba, Seitan mi kal kurung á ka zlad’a mi Muzuk ma bei tchod’a ba na á ngei beged’a hi yina woi nde ge? 4Kid’a ang nga ki sed’emba, ni mangâ d’uo zu? Le ang guzum mbei pî, begem ni manga mi d’uo zu? Ni yam me ba, ang nga hurung á lahle ndazina na ge? Ang ka ni zlad’a mi suma d’i, wani ni mAlona. 5Ata yima Ananiyas mi hum zla ndatina, mi puk kä, mi mid’a. Suma a hum ahle ndazinina pet a le mandarâ ngola. 6Azungeîna a yo akulo, a d’ud’umu, a hlumu, a i tozomu.
7Bugol d’igi lera hindi na, amamba ti mba ti kal kur gonga, ti we nga vama lena d’i. 8Pierre mi djobot ala: Ndak danu, Na ni agi guzugi yi magina woi ni beged’a hina?
Ti hulong dum ala: Â, begemî na.
9Wani Pierre mi dat ala: Ni kayam me ba, agi ndjagagi vunagi á kuk Muzu’â hi Salad’ina ge? Gola! Wana nasem suma a i tos ndjuvu’â, a nga abu vun gonga, a mba hlak ini ndak mi. 10Ata yi máma na wat, ti puk kä avok Pierre, ti mid’a. Azungeîna a mba, a kal kur gonga, a fat matna kä, a hlad’u, a i tozot gen ndjuvud’u. 11Suma Toka ki suma a hum ahle ndazinina pet a le mandarâ ngola.
Ahle suma simat suma tetengâ
12Suma a sunuzina a lahle suma simata kahle suma atchapma ngola aduk suma. Suma he gagazid’a a nga toka tu ad’u azangâ hi Salomon-na. 13Wani suma a nga le mandara á kal adigaziya, wani suma a nga yorozi ndjundjum. 14Suma a he gagazi mi Salad’ina a nga zul kam kua kam kua ablaud’a, andjofâ karopma mi. 15A nde yoï suma tugud’eid’a ir palumba kazang mazina ki zlod’ei mazina mi. A mba tchuguzi kä avun lovota, kayam Pierre le mi kala ni, dam anguzam mbi kal yam suma ding adigazi zi ge. 16Ablau suma kur azì ma nglo ma ngui Jerusalem-ma a toga, a yoï suma tugud’eid’a ki suma muzuk ma tchona nga mi lazi ndakina; azi pet a fe lafiya mi.
Djop vuna hi suma a sunuzina
17Wani ma ngol ma ngat buzuna ki suma a nga ki sed’ema pet, nala, suma a nga ad’u Sadusiyênina, a le yungôra yam suma a sunuzina heî. 18Azi yo suma a sunuzina, a tchuguzi dangeina. 19Wani malaikana hi Salad’ina mi mba andjege, mi mal vun gong nga dangeina woyo. Mi buzuguzi woi abua, mi dazi ala: 20Agi igiya, agi i tchologi kur gong nga kud’ora hAlonid’a, agi tchagi wala mi suma pet yam ari d’a awilid’a. 21Ata yima suma a sunuzina a hum zla ndatina, a kal kur gong nga kud’ora hAlonid’a ki yorogo tcholola, a nga hat suma.
Ma ngol ma ngat buzuna ki suma a nga ki sed’ema a mba, a yï suma b’ak zlad’a ki nglo suma toka hi Israel-lîna pet. A sun suma á halï suma a sunuzina kur gong nga dangeina. 22Kid’a suma a sunuzina a mbazid’a, a fazi nga kur gong nga dangeina d’i. A hulongî a dazi ala: 23Ami fami vun gong nga dangeina nga duka memet, suma ndjola a nga tchola avun gonga, wani kid’a ami malat vunat teid’a, ami fami nga sa kur ri.
24Ata yima azi hum zla ndatina, ma ngolâ hi suma a ngom gong nga kud’ora hAlonid’ina ki nglo suma ngat buzuna a nde tcha tata yam b’raud’a hi suma a sunuzinid’a. A nga djop tazi ala: Zla ndata mba d’i le ni nana ge?
25Sana tu mi mba, mi dazi ala: Agi gologiya! Suma agi tchuguzi dangeinina a sä tchola kur gong nga kud’ora hAlonid’a, a nga hat suma. 26Ata yi máma, ma ngolâ hi suma a ngom gong nga kud’ora hAlonid’ina ki sum mama a iya, a yoï suma a sunuzina, wani ni kad’enga d’i, kayam azi nga le mandara suma ala dam a mba duruzi kahinad’a kla ge.
27Kid’a a mbazi d’a, a tcholozi avok suma b’ak zlad’a. Ma ngol ma ngat buzuna mi djobozi ala: 28Ami d’elegi ala: Agi had’agi ki simiyê sa máma d’i. Gola! Hat magid’a b’rau wa woi kur Jerusalem pet. Agi min á mbagi ki buzuna hi sa mámina kami zu?
29Wani Pierre azi ki suma hiu suma a sunuzina a hulong dazi ala: Le ni nana pî, ami humumi Alona kal suma. 30Alona habuyoi ngolona mi tchol Jesus ma agi tchum ata agu ma b’alina akulo aduk suma matna. 31Alona mi hlum sä akulo ata bigam mba ndjufa á kak Amul ma sut suma, kayam mi he Israel-lâ lovota á mbut huruzi yam tcho mazid’a, kayam Alona mi vat hurum mbei yam tcho mazid’a mi. 32Ami ni suma glangâsâ yam ahle ndazina, zlapa ki Muzuk ma bei tchod’a ba ma Alona mi hum mi suma a ge yazi kä ad’uma.
33Wani kid’a azi hum zla ndatid’a, huruzi zal ngola, a min á tchi suma a sunuzina. 34Wani ma Fariziyêna, simiyêm ala Gamaliyel, mi nga aduk suma b’ak zlad’a. Ni ma ngol ma hat gata, ni ma suma pet a nga hum ngolina mi. Mi tchol akulo aduk suma b’ak zlad’a, mi hazi vuna ala a tchuk suma a sunuzi ndazina abu ndjö tua. 35Mi de mi suma nglona ala: Agi Israel-lâ, agi gologi tagi djivi ki vama agi min á lum ki sum ndazinina. 36Kayam le nga burâ ngol luo tua Teudas mi tchol mi dala mam ni va, mi ka suma ad’um d’igi kikis fid’i na. A tchumu, suma pet suma a ge yazi kä ad’uma a b’rau woi yayak, a mbut vama hawana. 37Blogomu, Judas ma Galile-na mi tchol kur bur ma ndum suma, mi ka suma dingâ ad’umu. A tchum mbeyo, suma pet suma a ge yazi kä ad’uma a b’rau woi yayak mi. 38Ki tchetchemba, an nga ni dagiya, agi halagi ad’u sum ndazina d’i. Agi arazi a iya. Le zla mazid’a ki sun mazid’a, le ni hi sumid’a ni, mba d’i dap peyo. 39Wani le d’i tcholï nata Alona gagazi ni, agi ndak á b’lagat tei d’i. Ar á gologi d’igi suma dur ayîna kAlonina na d’i.
40Azi hum zla mamba. Ata yi máma a yï suma a sunuzina, a toziya, a gad’azi ala: Ar agi dagi zlad’a ki simiyê Jesus d’i, a arazi a iya. 41Hina, suma a sunuzina a buzuk kei ata yima b’ak zlad’a, a nga le furîd’a kayam azi ndak á fe djop vuna yam simiyê Jesus. 42Bur ma lara pî, azi nga kur gong nga kud’ora hAlonid’a d’oze kur azina hi sumina, a ar nga bei hat suma d’oze bei tchi wal Zla d’a Djivid’a hi Jesus Christ-sa d’uo mi.
Currently Selected:
Sunda hi suma a sunuzinid’a 5: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.