2 Amuleina 7
7
1Elise mi hulong dazi ala: Agi pet humugiya! Gola! Ma didina mi dala: Avin hina dedege wani, a mba gus afuta kilona dogo yam mbà d’oze awu orsâ kilona dok mbà yam fid’i ir bege d’a hapa tu ad’u suk ma Samari-na.
2Azigar ma ndjun amulâ ma mam nga mi deng tam atama, mi de mi Elise ala: Le Ma didina mi mal ir akulod’a mi yagï awuna kä pî, zla d’a ang dat wanda mba d’i le zu?
Elise mi hulong dum ala: Ang mba wum ki irangû, wani ang mba tum mbi!
Siri-na a ar kang mazina woyo
3Wani suma libina fid’i a nga kaka woi abu bugol azina go ki vun agrek ma ngolâ. A de tazi ala: Ni kayam me ba, ei kagei ka hî á djubi mad’ei ge? 4Le ei kalei avo hur azina ni, ei mba boya, kayam vama te nga d’i. Le ei kagei ka hî d’ei, ei mba boi d’ei! Ki tchetchemba, ar ei i kur kang ma Siri-na geveziya! Le a arei bei tchid’a ni, hotei! Le azi tchï d’ei, ni mat ma kolâ tu!
5Kid’a afata ar go á nikid’a, a tchol a i kur kang ma Siri-na. Kid’a azi mbaza avun kangîd’a, a fe nga sa d’i. 6Kayam Salad’a mi mal hum suma kur kang ma Siri-na á hum asem azigar suma ad’engâ tchina kakulumeina ki pus mazi ma dur ayîna mi. Suma Siri-na a nga de tazi ala: Amul ma Israel-lâ mi wura’î suma Het-na ki suma Ezipte-na. Kayam ndata, azi sunï azigar mazina á duri wana. 7Kayam ndata, azi tchol ringâ andjege á sut taziya, a ar kang mazina woi ki zlub’u mazid’a kakulumei mazina ki koro mazina pet kä mumudjuk.
8Suma libi suma fid’i ndazina a mbaza avun kangâ, a kal kur zlub’ud’a tu, a fe tena, a te a tche mi, a yo kawei ma hapma ki lora ki baruna, a i ngeyezi sä woyo, a kal kur zlub’u d’a dinga, a yo andjaf ahlena teteng, a i ngeyezi sä woi mi.
Dabid’a hi baktarad’id’a
9Wani suma libi ndazina a nga de tazi ala: Ei lei nga djivi d’i. Ei weya, ini ni zla d’a djivid’a keya. Le ei djubi bei de zlad’a gak yina mi foya ni, Alona mba mi kei sariyad’a keya. Ki tchetchemba, ei ï dei zla ndata mi suma avo hamulîna.
10Kayam ndata, azi hulong a yï suma ndjol vun agrek ma ngolâ, a dazi ala: Ami imi kur kangâ hi suma Siri-na, wani ami fami nga sa tu d’i, ami humumi nga del sa d’uo mi. Arî akulumeina ki korona a nga ndjinda kä ni azi hol, a ar zlub’ud’a kä woi mumudjuk mi. 11Suma ndjol vun agre’â a yi sana atogo hina zak ala mi i de zla ndata mi suma krovo kur azina hamulîna.
12Kayam ndata, amulâ mi tchol akulo andjege dangâla, mi de mazungeî mama ala: An nga ni vagi ad’ud’a yam ahle suma Siri-na a nga minizi keina. Azi wala baktarad’a ti nga avo hateya. Kayam ndata, azi ar kang mazina woi a i ngei tazi abageya, a nga dala ei mba buzugi woi kur Samari, azi mba yoi karid’a, azi mba tchuk kur azina avo!
13Wani ma dingâ tu aduk azungeî mama mi dum ala: Ar a yoï akulumeina vahl aduk suma a ar hur azì ma ngolîna, azi mba bo ni d’igi Israel suma ar hur azina na. Hina pî ni, ar ei suni suma hiu á gol vama lena. 14Kayam ndata, azi man pus ma dur ayîna mbà kakulumeina. Amulâ mi sun suma á i bugol azigar suma Siri-na á we vama lena. 15Wani suma amulâ sunuzina, a i blogozi gak avun alum ma Jurdê-na, wani azi fe baruna tchuka kä hur lovota ngola kahle suma suma Siri-na a tchuguzi woi abo aneka á ringâ atogona. Suma amulâ sunuzina a hulongî a de zla ndata mamulâ.
16Ata yi máma suma Samari-na a i kur kang ma suma Siri-na a aram mbeina, a hurum ahlena d’igi Ma didina mi de na ala: A mba gus afuta kilona dogo yam mbà d’oze awu orsâ kilona dok mbà yam fid’i ir bege d’a hapa tu. 17Amulâ mi he vuna mi azigar ma ndjunum ma mam deng tam atama ala mi i mi ndjol vama nga mi läd’u su’â avun agre’îna, wani suma a nga mola ata yi mámina a miret azigar máma kä kaseziya, a tchum d’igi Elise sana hAlonina mi dum ata yima amulâ mba mi fuma na. 18Kayam Elise mi dala: Avin hina dedege wani, a mba gus awu orsâ kilona dok mbà yam fid’i d’oze afuta kilona dogo yam mbà ir bege d’a hapa tu ad’u suk ma Samari-na. 19Wani azigar ma ndjun amulîna mi dum ala: Le Ma didina mi mal ir akulod’a mi yagï awuna kä pî, zla d’a ang dat wanda mba d’i le zu?
Elise mi hulong dum ala: Ang mba wum ki irangû, ang mba tum mbi! 20Ahle ndazina mba kam hina mi; ablaud’a ti mired’em kä avun agre’â, mi mid’a.
Currently Selected:
2 Amuleina 7: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
