2 Amuleina 6
6
Andjet ma vit tei ma a hulong fuma
1Bur tu adesâ hi suma djok vunina a de mi Elise ala: Gola! Yima ami togomi kua avorongâ mi kid’agamiya. 2Ang hami lovota ami imi avun alum ma Jurdê-na, nge nge pî mi kaï aguna, ami mba minimï yima ding ma kaka.
Elise mi dazi ala: Agi igiya!
3Wani ma dingâ tu adigazi mi dum ala: Ang i ki sed’emiya.
Elise mi dum ala: Djiviya! An iya.
4Elise mi i ki sed’ezi avun alum ma Jurdê-na, ata yima ka aguna. 5Wani ma dingâ tu adigazi mi nde ka aguna. Sï andjet mama mi pat mi nde kä kur aluma. Mi er ad’um akulo ala: Alë! Salana, ni zla me na ge? Andjet máma an tchemï ni tchena!
6Elise mi djobom ala: Mi nde ni lara ge? Mi tagam yima mi nde kuana. Elise mi ka agu ma gorâ gutubung, mi gum sä kä ata yi máma. Atogo hina zak sï andjetna mi ndeï akulo yam mbina.
7Elise mi dum ala: Ang hlumu! Sa máma mi mat abom mi hlumu.
Elise mi yo azigar suma Siri-na
8Ata yima amul ma Siri-na nga mi dur ayîna ki Israel-lîna, mi min zlad’a ki azigar mam suma nglona ala: Agi vagi anguvora ata yima wana.
9Wani Elise mi de mamul ma Israel-lâ ala: Ang gol tang djiviya; ang hle yi máma d’i, kayam azigar suma Siri-na a nga i kua. 10Kayam ndata, amul ma Israel-lâ nga mi sun azigarâ yam dodogo á ndjol yima Elise mi dum kam ala: Ang gol tang djiviya na. Ahle ndazina a le ni yazi ablaud’a.
11Amul ma Siri-na hurum zal ngola yam zla ndata. Mi yi azigar mam suma nglona, mi dazi ala: Agi nga dan ndei yam sama adigei ma mi hle zla mei d’a gumunda mi it mamul ma Israel-lîna d’uo zu?
12Ma dingâ tu aduk azigar mam suma nglona mi hulong dum ala: Salana, sama adigei ma mi hle zla mei d’a gumunda mi it mamul ma Israel-lîna nga d’i. Ni Elise ma djok vun Alona ma nga avo Israel-lâ ba, mi ndak á de zla d’a ang dat kur gong mang nga burîd’a woi mamul mama!
13Amul ma Siri-na mi dazi ala: Agi i gologi yima mam nga kuana; an i ni vumu.
A hulongî a dum ala: Mi nga navo Dotan. 14Kayam ndata, mi sun azigarâ ablaud’a kakulumeina ki pus ma dur ayîna teteng; a mbaza andjege, a ngui azì máma. 15Kid’a azongâ hi Elise-na mi nde woi ki yorogo avun azì ma ngolid’a, mi we azigarâ kakulumeina ki pus ma dur ayîna teteng a ngui azina d’uhl, mi er ad’um akulo ala: Alë! Salana, ei lei ni nana ge?
16Elise mi hulong dum ala: Ang ring mandar ri! Suma a nga ki sed’eina, ablau mazid’a kal suma a nga ki sed’ezina. 17Bugola, Elise mi tchen Ma didina ala: Ma didina, an nga ni tchenengû, ang malam iram mbei á wed’a. Ma didina mi malam iram mbeyo. Mi wakulumei suma akud’a ki pus ma aku ma dur ayîna teteng akulo yam ahinad’a ngui Elise d’uhl.
18Kid’a azigar suma Siri-na a mba á ve ma djok vuna Elise-d’a, mam tchen Ma didina ala: Ma didina, an nga ni tchenengû, ang duk ir azigar ndazina woyo. Ma didina mi duguzi irazi woi d’igi Elise mi tchenem na.
19Wani Elise mi de mi azigar ndazina ala: Agi hlagi ni lovot ndata d’i, nazì ma azi tagagizina d’uo mi. Agi mbeyegï ad’unu; an i tinigi ata sama agi halama. Wani Elise mi i ki sed’ezi Samari. 20Kid’a azi tchuk sä avod’a, Elise mi tchen kua ala: Ma didina, ki tchetchemba, ang malazi irazi woyo. Ata yima Alona mi malazi irazi woina, azi gol wani, azi ni kur azì ma ngol ma Samari-na d’ad’ar!
21Ata yima amul ma Israel-lâ mi we azigar ndazina petna, mi djop Elise ala: Abunu, an tchazi woi zu?
22Elise mi hulong dum ala: Ang tchazi d’i! Ang nga tchi azigar suma azigar mangâ a yozï avun ayî ma durîna d’i. Kayam ndata, ang hazi avuna a te, ang hazi mbina a tche mi, ang arazi a hulong gen salazina! 23Amul ma Israel-lâ mi lazi te ma ngolâ. Bugol la azi te a tche d’a, mi arazi a hulong gen salazina. Ki dedei ndata azigar suma Siri-na a hulongî nga yam andaga d’a Israel-la á hurum ahlena d’uo d’a.
Baktarad’a ti nde avo Samari
24Kur biza d’a dinga Ben-Hadat amul ma Siri-na mi tok azigar mama pet; a i ngui Samari á dur ayîna. 25Wani meid’a nde kur azina ngola. Suma mba á durîna a ngui azina teweler gak yam korona baba a guzut ni ir bege d’a hapa dok klavandi, sud’o gugud’a kur angot ta ngad’a tu ni ir bege d’a hapa vahl mi.
26Bur tu amul ma Israel-lâ nga mi kal yam gulumuna, atchad’a tu ti er ad’ut akulo ala: Salana amul mana, ang sud’unu!
27Wani mi hulong dat ala: Le Ma didina mi sud’uk kuo ni, an ndak á sud’uk kuo mi. An ngom nga vama te d’oze vama tche d’uo mi! 28Amulâ mi dat kua ala: Ndak min ni me ge?
Ndat ti hulong dum ala: Ang gol atcha d’a wanda, ti dan ala ami mud’umi gorona ini, avin ami mud’umi matna mi. 29Wani ami yami mana, mud’umiziya. Tchavinda, an dat ala ti veï matna, ami mud’umiziya, wani ti ngeyemu!
30Ata yima amulâ mi hum zla d’a atcha ndata ti dumzid’ina, mi haû baru mama woyo, nga mi tit akulo yam gulumuna. Suma hur azina pet a wumu. Mi nga ki baru d’a dodora krovo atamu. 31Mi er ad’um akulo ala: Le yam Elise Safat goroma bur ini bei ngata ni, Alona mi mban ndak ka ngol la kala kanu!
Elise mi de zla d’a yam dabid’a hi baktarad’id’a
32Wani Elise mi nga avo hatamu, suma nglo suma hur azinina a nga kaka gevem mi. Amulâ mi geï sunda atamu. Wani avok ka bei sama sunda mbaza tua d’a, Elise mi de mi suma nglo ndazina ala: Agi gologiya! Ma tchi mat máma mi sunï nga sana á ngad’an yanu. Agi gologi tagi djiviya. Le mi mba ni, agi dugugi vuna akulo, aram mi kalï avo d’i. Wani nasem salama ba, nga mi tchï blogom wan nduo zu?
33Kid’a Elise nga mi dazi zlad’a tua d’a, sama amulâ sunumïna mi mba. Amulâ mi dala: Ndak ndata pet ti tcholï nata Ma didina. Ni nana ba, an tin hurun kam mbei ge?
Currently Selected:
2 Amuleina 6: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
