2 Korente-na 6
6
1Kayam ami nAlona ndrom suma sunda, ami nga tchenegiya: Ar agi gologi suma d’a Alona mi vagizid’a d’igi vama hawana na d’i. 2Kayam Alona mi de kur mbaktum mamba ala:
Ata yima suma manda nde woina, an humungû;
kur bur ma suta an ndjunung mi.
Gola! Ki tchetchemba, ni yima ir Alona djivid’ina; ini ni bur ma sana ndak á fe sutina.
3Kayam ndata, ami nga lami vama dap asem sa tala suma a de zla d’a tchod’a yam sun mamid’a d’uo d’a. 4Wani kur ahlena pet, ami nga tagami woi ala ami nazungeîna hAlonina. Ami nga vami tami kur ndaka, kur yor tad’a, kur hur ma hata mi. 5A nga tomiya, a nga tchugumi dangeina, a nga siwel kamiya. Ami nga kur sun nda kaud’a, ami nga burumi sen ndi, ami nga fami tena d’uo mi. 6Ami nga tagami woi ala ami nazungeîna hAlonina, kayam ami ni suma yed’etna kur we mamid’a, kur ve ta mamid’a ki djivi mamid’a, kad’enga hi Muzuk mamid’a ki o mami d’a bei lop ira ba d’a 7ki wal mami d’a tchi d’a gagazid’a kad’enga hAlonid’a. Ami nga kahle suma dur ayî suma d’ingêrâ á sut tami á dur ayîna mi. 8A nga suburumiya, a nga mbud’umi zulona mi; a nga dami zlami tchod’a, a nga dami zlami djivid’a mi. Azi nga golomi ni d’igi suma ka zlad’a na, wani ami dami ni zla d’a gagazid’a hol. 9Ami ni d’igi suma bei suma a wazina na, wani suma a wami pet. Ami ni d’igi suma a nga bona na, wani d’igi agi wagi na, ami nga karid’a. Azi nga golomi ni d’igi suma a tozi na, wani ami bomi nga d’i. 10A nga golomi ni d’igi suma a nga yor tazi na, wani ami nga ayâmi teteu. A golomi ni d’igi suma houd’a na, wani ami ni suma a nga mbud’umi suma ablaud’a suma ndjondjoînina. A golomi ni d’igi suma a nga ki va d’uo na na, wani ami nga kahlena pet.
11Agi suma Korente-na, ami nga dagi woi mbak, ami tinimi hurumi kagi heî mi. 12Ami tinimi hurumi kagi heî, wani agi tinigi nga hurugi kami d’i. 13Wani an nga ni dagi ni d’igi ni de mi grona na: Agi tinigi hurugi kami d’igi ami tinimi hurumi kagi na mi.
Ar agi gologi tagi djivi ki filei ma tuwala
14Ar agi zlabagi darigïd’a ki suma bei he gagazid’ina d’i. Na ni d’ingêra ti le darigïd’a ki tchod’a zu? D’oze, b’od’a ti ndak á zlap tu ki nduvunda zu? 15Na ni Christ mi ndak á le darigïd’a ki Seitan zu? D’oze, sama he gagazid’a ki sama bei he gagazid’a a zlap darigïd’a tu zu? 16Na ni gong nga kud’ora hAlonid’a ti zlap darigïd’a ki gong nga tuwal fileina zu? Kayam ei tei ni gong nga kud’ora hAlo ma arinid’a, d’igi Alona tamba mi de na ala:
An mba ni kak aduk sum mana,
an mba ni tit adigazi mi.
An mba ni ka’î Alo mazina,
azi mba ka’î sum mana mi.
17Kayam ndata, Ma didina mi dala:
Ar agi buzugugi woi adigaziya,
ar agi walagi woi ki sed’ezi mi.
Ar agi dogi vama ndjendjed’a d’i;
hina wani, an mba ni vagi atanu.
18Ma didin ma ad’engêm kal petna mi dala:
An mba ni ka’î Abugiya,
agi mba kagagi gron suma andjofâ
ki gron suma aropma mi.
Currently Selected:
2 Korente-na 6: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
