2 Korente-na 7
7
1Agi buniyôn suma od’a, vun ma hle máma pet ni keya. Kayam ndata, ar ei mbud’i tei yed’et, ar ei walei woi ki tcho d’a le d’a lara ge pet kur hliu teya, kur muzugei mi. Ar ei b’ad’ei tei á tini tei irat vat á le mandar Alona kur tit meid’a.
Furîd’a hi Paul-la
2Ar agi tinigi hurugi kamiya. Ami lami nga vama tcho mi sa d’i, ami b’lagami nga sa d’i, ami hlami nga va hi sa kad’eng nguo mi. 3An de hina kayam an kagi ni sariyad’a kagi d’i. Kayam an dagi avok ala ami tinimi hurumi kagiya, ami nga zlapa ki sed’egi kur arid’a, d’oze kur matna mi. 4An tin hurun kagiya, an nga ni subur tan kagi mi. An hurun b’leng ngola. Kur ndak mamid’a pet, an nga ni le furîd’a ngola mi.
5Wani kid’a ami mbami yam ambas sa Maseduwan-nda, ami fami nga yima tuk tamina d’i, kayam ami fami ndaka ata yima lara ge pet. Ami nga durumi woi abu ki suma pet, wani kurumi krovo ni mandarâ. 6Wani Alo ma b’leng hur suma a nga kur djib’erina, mi b’lengêmi hurumi ata yima Tit mi mbana. 7Ami lami furîd’a ni yam mba mamba hol li, wani yam zla d’a mi dami ala agi tagi b’lengêm hurumu d’a mi. Mi dami kua ala agi tagi nga had’agi hurugi ngola á golonu, agi nga yorogi tagi kan ngola, tagi nga d’i lagi zlezleû á ndjunun mi. Kayam ndata, an nga ni le furîd’a ngola mi.
8Le mbaktum man nda an lagizid’a ti zalagi hurugiya ni, ki tchetchemba, an hurun nga hat ti. Kavoka an wala mbaktum manda ti zalagi hurugiya, wani ni ndjö hawa. 9Wani ki tchetchemba, an nga ni le furîd’a, ni kayambala an zalagi hurugiya d’a d’i, wani kayam zal hur magi máma mi zud’ugi ná mbud’ugi hurugiya. Ami wami ala zal hur magina ni minda hAlonid’a, kayam vama ami lagizina ná b’lagagi d’i. 10Kayam zal hur ma tcholï ata Alonina nga mi mbut sana hurum á fe suta. Sut ndata, zal hurâ mi nga kua d’i, wani zal hurâ hi duniyad’ina mi ingî kur matna. 11Gola! Zal hur ma tcholï ata Alo ma mi had’agina nga mi zud’ugi avogovok á väd’u zla magid’a. Hina, agi nga ki hur ma hata, agi nga ki mandarâ, agi nga ki hur ma tinda á wanu, tagi nga d’i lagi zlezleû, agi nga ki hur ma hata á ka sariyad’a yam tchod’a mi. Kur ahle ndazina pet, agi nga tagagi woi ala zla nga kagi d’i.
12Wani an b’irigi mbaktum ndata ni yam sama mi le tchod’ina d’oze ni kayam sama mi lum tchod’ina d’uo, wani ni kayam agi wagi hat hur magina kami avok Alona. 13Ni kayam ndata ba, ami hurumi b’lenga.
Nga ni kayamba ami hurumi b’lenga hol li, wani ata yima ami wami Tit nga ki furîd’ina, ami lami furîd’a ngola kayamba agi b’lengêm hurumba mi. 14Le an nga ni subur tan kagi avoromu ni, zulona nga mi lan ndi. Ahlena pet suma ami nga dagizina ni gagazid’a. Hina, subur ta mami d’a kagi avok Tit-ta ni gagazi mi. 15Ata yima humam gum yam ge d’a agi gagi yagi kä avoromba, ata yima agi vum atagi ki mandarâ ki zlakina, hurum vagi ngola kala. 16An nga ni le furîd’a ngola kayam an tin hurun kagi yam ahlena pet.
Currently Selected:
2 Korente-na 7: BA
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.