Proverbios 28
28
Ñayii sa'a ja u'vi ma chi ndani'i ndatna'a maa i ja u'vi sa'a i ma
1Ñayii sa'a ja u'vi ma chi yu'u xen‑xeen i te jinu i kua'an i,
vaa jani ini i ja ndimaa ka iyo ñayii ka sondikin ña'a,
kovaa ñayii sa'a ja va'a ja ndaa ma masu nawa yu'u i,
sukan kúu ndika'a ma sukan kúu i,
vaa kúkanu ini i ja masu na in kundee nuu i.
2Ñuu nuu ñatuu ka ketna'a ini ñayii ka iyo ma
chi ka kukua'a tee ka ka'an ja suu de ka tatnuni,
kovaa ñuu nuu iyo in tee netniñu ja kúu de tee ndichi ma,
chi vivii ka ketna'a ini ndaka ñayii ma, te iyo va'a ñuu yukan.
3Tee netniñu in ñuu ma te sa'a ndeva'a de ñayii ka kunda'vi ma
chi sukan kúu savi xeen kúun ma te xnaa ndute ma itu iyo viyu ma,
sukan kúu tee ya'a.
4Ñayii ñatuu kándija sukan ká'an
tnu'u ni kaxtnu'u Su'si ma nuu Moisés ma
chi jani ini i ja in jayiñu'u xeen kúu
ja ka sa'a ñayii ka sa'a ja u'vi ma,
kovaa ñayii kándija te sa'a i sukan ká'an tnu'u Su'si ma
chi su'va jasi ndee i nuu ñayii ka sa'a ja u'vi ma
sukan‑va'a má jin sa'a‑ka i ja u'vi ma.
5Ñayii ndee ini ma te so'o xeen kaa i ma
chi ñatuu jaku'ni ini i tnu'u va'a tnu'u ndaa ma,
kovaa ñayii ka ndanduku Su'si ma
chi ka jaku'ni ini i ndaka.
6Ja va'a‑ka kúu ñayii nda'vi ma ja ndimaa jani va'a ini i
te ñatuu nde xnda'vi i in‑ka ñayii ma
sana ñayii kúxiku ma te ndee xeen ini i te so'o kaa i ma.
7Sa'ya o suchi kándija te sa'a i sukan ká'an tnu'u Su'si a
chi suchi ndichi kúu i,
kovaa suchi ndikin tna'a ji'in ñayii ka ndi ini
yika‑ni ja jin kaa jin ko'o i ma‑ni
chi ja kan‑yu'u ja kan‑nuu wa'a i yuva i ma.
8Ñayii wanuu xu'un i ma
te ndimaa ké'en ya'vi‑ka i sa'ya xu'un i ma
chi ndaka ja ni'i i ma
chi satu'va i ja nduu kuenda ñayii kúnda'vi ini ñayii nda'vi ma.
9Ñayii ñatuu niniso'o‑ka tnu'u Su'si ma
te ñatuu kúni‑ka i ja sa'a i sukan ká'an ma
chi Su'si ma chi suni masu koniniso'o kuiti ya ja jikan‑ta'vi i ma.
10Ñayii sa'a ja u'vi ma te ska'an i ñayii ka sa'a ja va'a ja ndaa ma
ja jin sa'a tna i ja u'vi ma
chi su'va maa i ndando'o ndaneni
sukan kúni i ja ndo'o in‑ka ñayii ma.
Kovaa ñayii ndimaa sa'a ja va'a ja ndaa ma
chi ja vii ja va'a kuta'vi i.
11Ñayii kúxiku ma chi jani ini i ja ñayii ndichi xeen kúu i,
kovaa nuna kototnuni ña'a ñayii kúnda'vi‑ka ma
te kuni maa i ja masu nawa jini kuiti ñayii kúxiku ma.
12Nú ka kundee ñayii ka sa'a ja va'a ja ndaa ma
chi ndaka ñayii ka kutachi,
kovaa ora ka kundee ñayii ka sa'a ja u'vi ma
chi ndaka ñayii ma ka chu'u,
vaa ñatuu ka jini i naxe jin ndo'o jin neni i
ja kuechi ñayii ka sa'a ja u'vi ma.
13Ñayii ñatuu ndáka'an ja u'vi ni sa'a i ma nuu Su'si ma
ja ndasakanu ini ña'a ya ma
chi masu kee va'a i,
kovaa ñayii ndáka'an ndákachi ja u'vi ni sa'a i ma nuu Su'si ma
te ndákani ndáka'vi ini i te xndoo i ichi u'vi ni yo jika i ma
chi sakanu ini ña'a Su'si ma.
14Naka vii naka va'a kúu ñayii ndimaa jito va'a i maa i
te ñatuu sa'a i ja u'vi ma vaa yu'u i Su'si ma,
kovaa ñayii ndee xeen ini ma chi ja u'vi ma‑ni ndetu ña'a.
15Sukan kúu oso ma xi ndika'a ma ora ka kokon ti ma,
sukan kúu tee netniñu in ñuu nuu ka kunda'vi ñayii ma,
ja ndimaa sa'a de ja u'vi ja ñatuu játna ini Su'si ma.
16Tee kúu gobiernu ñatuu jáku'ni ini ma
chi sakui'na de ja kúu kuenda ñayii ñuu ma,
kovaa tee ñatuu játna ini ja ko ndiyo ini de ja kuu maa de ma
chi koteku kani de.
17Ñayii ni ja'ni in ndiyi ma
chi ndimaa kunu ya'a kunu yukan‑ni i kua'an i,
te ni ma ndatatu i onde kûu i ma.
Chukan kúu ja máko chindee o i.
18Ñayii ñu'u kaji ñu'u va'a ini ma te sa'a i ja va'a ma
chi kaku i nuu ja u'vi ma,
kovaa ñayii so'o xeen kaa te sa'a ndeva'a i in‑ka ñayii ma
chi sanaa sanaa‑ni kotuu i te skenaa i maa i
sukan ni kuni i ja ndo'o neni in‑ka ñayii ma.
19Ñayii satniñu itu i ma chi ndimaa koo ja kaa i,
kovaa ñayii ndikin tna'a ji'in ñayii kuxi ma
chi ja ndetu ña'a kúu ja ko kunda'vi ko kukee i.
20Ñayii iyo va'a iyo ndaa nuu Su'si ma chi kuta'vi i kua'a ja va'a,
kovaa ñayii ñu'u ini ja ni'i i kua'a xu'un te kuxiku i ma
chi masu kaku maa i ja ndo'o neni i.
21Ñatuu va'a ja ma ka'nde ndaa o tniñu ñayii ma
te kuji'in o ji'in in i ma,
vaa ka iyo ñayii ja visi ja vala ti'i‑ni xita tila ma,
te ûni ka xiko i maa i te ka jiso kuechi i.
22Ñayii kueñu ini ma
chi yika‑ni ja ñu'u ini i kúu ja na kuxiku i,
kovaa masu ndasa'a maa i kuenda ja ichi
ko kunda'vi ko kukee i ma kua'an i.
23Ñayii ndáka'an‑so'o nuu in‑ka ñayii ma chi visi kuee‑ka ma
chi jin ndaka'an vii jin ndaka'an va'a ñayii ma ja kuu i,
kovaa masu sukan ko kuu
ji'in ñayii yika‑ni ja ka'an i tnu'u vii tnu'u luu
ja kuu in‑ka ñayii ma te masu ndija i ma.
24Suchi sakui'na xu'un yuva i ma xi sakui'na i xu'un si'i i ma
te ká'an i ja masu ja u'vi kúu ja sa'a i ma
chi inuu‑ni kúu i ji'in ñayii ka sakui'na te ka xnaa i kuan koo i ma.
25Ñayii kueñu ini ma chi sa'a i ja jin kanaa ñayii ma,
kovaa ñayii kúkanu ini Su'si ma
chi sa'a maa Su'si Iya Tátnuni ma ja ko ni'i ko tna'a i.
26Ñayii kúkanu ini maa i ma ja va'a‑ni kúu ja sa'a i ma
chi ñayii ndee ini kúu i te ñatuu jáku'ni ini i,
kovaa ñayii ndichi ma chi ndása'a i kuenda nawa sa'a i ma,
te kee va'a i te kaku i nuu tnundo'o tnuneni ma.
27Ñayii ndimaa chíndee ñayii nda'vi ma
chi másu ko ka'ni ña'a nawa jiniñu'u i ma,
kovaa ñayii sa'a tnu'u ja ñatuu jini i nuu iyo ñayii nda'vi ma
vaa ñatuu kúni i ja chindee i ñayii yukan
chi ndimaa ja u'vi kenda nuu i ma.
28Nú ñayii ka sa'a ja u'vi ma, ka kana koo i ja jin tatnuni i ñuu ma
chi ñayii ñuu ma, ka chu'u i,
kovaa nú ni ka skenaa ñayii ka sa'a ja u'vi ma te ni ka ji'i i ma
chi ñayii ka sa'a ja va'a ja ndaa ma
chi ka ndatnii i tnu'u ndee tnu'u ndatnu te ka ndukua'a i.
Currently Selected:
Proverbios 28: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
