Proverbios 27
27
1Máko kuvixi ni ja nde a jani ini ni ja sa'a ni yutnee ma,
vaa ni masu jini ni naxe ko kuu yutnee ma,
2te ni a ko ndachiñu'u ni maa ni
te ko ka'an ni ja ja va'a kúu ja sa'a ni ma.
Ña'a, chi su'va kondetu ni ja in‑ka ñayii ma,
te na jin ndaka'an maa i ja va'a ni sa'a ni ma te koo jayiñu'u ni.
3Yuu ma ji'in ñuti ma inuvee xeen te tnundo'o xeen ja kondiso o,
kovaa tnundo'o xeen‑ka ja kanda o kondiso o
ja ndákiti ini ñayii ndee ini ma.
4Ja ndákiti ini ñayii ndee xeen ini ma
chi ûni sa'a ndeva'a ña'a i,
kovaa ja kúkueñu ini ñayii ma
chi ka'vi xeen‑ka sa'a ña'a i.
5Va'a‑ka ja na ndaka'an‑so'o o nuu ñayii
iyo in ja masu va'a‑ni ni sa'a i ma,
sana ja nú kutoo ndija o in ñayii,
te ma ka'an o te kendoo yu'u ja sukan kutoo o i ma.
6Kuu jin kandija o tnu'u ka'an‑so'o in ñayii ketna'a ini ji'in o ma,
visi tnu'u ka'an i ma sa'a ja tná‑u'vi ini o.
Kovaa in ñayii ñatuu kunimani nuu o ma
chi máko jin kukanu ini o nawa ka'an i ma,
visi chítu chítu i yikinuu o ma.
7Ñayii jâ ni ndutu chii i ma
chi visi nduxi na kua'a o ja kaa i, kovaa masu kuan‑ta'vi‑ka i,
kovaa ñayii kokon ma
chi visi uwa ja iyo ja kaa i ma chi ûni kuni asi xeen i.
8Tee xndoo ve'e de ma
chi sukan kúu in lasaa kiti ni xndoo taka ti ma, sukan kúu de.
9Ndute jáxiko asi ma chi sa'a i ja ndúsii ini anua o a,
te ja ká'an‑so'o ñayii kétna'a ini ji'in o ma
chi sa'a i ja ndúsii ini tna o.
10Máko ndunaa ro ñayii kétna'a ini ji'in ro ma
ni ñayii kétna'a ini ji'in yuva ro ma,
te nuna kenda tnundo'o ve'e ro ma
te máko ki'in ro onde ve'e ku'va ro xi ve'e ñani ro ma
ja ka iyo i onde jika‑ka ma,
chi va'a‑ka ja ki'in ro ve'e ñayii iyo yatni ji'in ro ma,
sukan‑va'a ñama‑ka jin chindee ña'a i.
11Sa'ya maa ri, ko kuu in ñayii ndichi,
vaa sukan, te koo sii ini ini anua ri a,
te ñatuu koyu'u ri ja ka'an ri nuu ñayii ka saxiko ña'a ma
te ka ka'an i tnu'u ri ma.
12Ñayii ndichi ma
chi nú ni jini i ja iyo yika i ma chi jikayata i,
kovaa ñayii ñatuu ndása'a kuenda ma
chi yituu yine'e maa i ma onde ndo'o maa i ja u'vi ma.
13Onde su'nu ñayii kúu nuu ñayii ni jikan yika ma ke'en ni,
sukan‑va'a koo tnu'u kanu ini ni ja ndachunaa i nuu ni.
14Nuna ko kayu'u‑yu'u o xtnee ne'e ma ora ndikin‑ka ma
ja kua'a o nchuxi nuu ñayii iyo yatni ji'in o ma
chi sa'a o ja ndakiti ini i, vaa ne'e‑ka kúu ma.
15Ña'a ndimaa kúni ja kanaa kanaa‑ni ña ji'in o ma
chi sukan kúu xini ve'e ji'in ora kúun savi ma, sukan kúu ña,
16te tee kúni ja sunkani de ña ja máko ko kuu‑ka ña sukan ma
chi sukan kúu in tee ja kúni de ja sunkani de
ja máko ki'i‑ka tachi ma,
xi sukan kúu tee kúni ja sunkani de ji'in nda'a de ma aceite jika ma,
sukan kúu de.
17Kaa ma chi ndi-tna'a kaa i ma,
te kúu ka ndene'e tna'a i nuu i te ka nduxeen i,
te suni sukan ka kuu tna ñayii ma,
vaa ja ka nde'ya i sukan sa'a in‑ka ñayii ma,
te ka kutu'va i sukan jin sa'a tna maa i ja va'a ma.
18Ñayii jito tnu nde'ya higo ma chi kaa i higo kuun ma,
te ñayii jito va'a nawa ni xndoo tee kúu jito'o i ma nuu nda'a i ma
chi ndachiñu'u ña'a jito'o i ma ja vava'a ni sa'a i ma.
19Nuna koto nuu o nuu ndute ma chi ndakuni o nuu o a,
te ja sukan jani ka'vi ini ñayii ma
te ndása'a o kuenda nú ñayii va'a kúu i xi ña'a.
20Ñu'ú ka yinee ndiyi ma chi ni ñatuu chitu
vaa ndetu ndetu‑ni i na in na kûu te kenda i ma,
te sukan kuiti kúu ñayii ndiyo ini ma,
vaa ndimaa ndúku ndúku‑ni i nawa koneva'a‑ka i.
21Ja kuni o nú nanimaa oro xi plata kúu ma
chi nini ja chunee o i nuu ñu'u ma,
te sukan kúu ji'in ñayii ma,
vaa ora ká'an vii ká'an va'a in‑ka ñayii ma ja kuu i ma,
te nú ñatuu kuvixi i ja sukan ká'an ñayii ma ja kuu i ma
chi sani te jini o ja ja ndaa ndija ja ñayii va'a ini kúu i.
22Ñayii ndee xeen ini i ma te játna ini i ja sa'a so'o i ma,
visi na xndo'o xneni xen‑xeen o i, kovaa ni masu jaku'ni ini maa i.
23Ko koto va'a ni ndikachi ni a ji'in ndixi'yu ni a,
te ûni ku'un ini ni ja ko koto va'a ni kiti
ni kunda'a ni ja ko koto ni ma,
24vaa ndaka ja koneva'a o ma visi na kuxiku xeen o ma
chi masu sukan‑ni koneva'a o ni‑kani ni‑jika,
te ni a tee tátnuni te neva'a de tnu'u ndee tnu'u ndatnu ma,
másu sukan‑ni jin koo tnu'u ndee tnu'u ndatnu sa'ya tata de ma
ja jin tatnuni tna i ni‑kani ni‑jika.
25Kénda kivi ja nána kuii ma te vivii ndúkuii
te suni nána tna yi'i yuku ma, te ní'i o ja ka'nde o.
26Te kivi yukan,
te ndasete ni ndikachi ni ma te sa'a ni sa'ma kone'nu ni,
te xiko ni ndixi'yu ni ma te kuu ndakuaan ni in‑ka ñu'u koneva'a ni.
27Te koo kua'a lechi ndixi'yu ni ma
ja jin ko'o ni ji'in sa'ya ni ma ji'in ñayii ka satniñu ve'e ni ma,
sukan‑va'a jin koo ndee jin koo ndatnu ni.
Currently Selected:
Proverbios 27: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
