Proverbios 29
29
1Ñayii ndee ini ma, te nuna ndaka'an‑so'o o nuu i ma,
te su'va sa'a ndee‑ka i ini i ma
chi sanaa sanaa‑ni, te kenda in tnundo'o nuu i ma,
te ni ma nduva'a‑ka i.
2Nú ñayii ka sa'a ja va'a ja ndaa ma
te ndimaa ke koo va'a ja ka sa'a i ma
chi ndaka ñayii ñuu ma chi ka iyo sii ini i,
kovaa ora ka kundee maa ñayii ka sa'a ja u'vi ma
chi ka tnana u'vi‑nka ñayii ñuu ma ja ka jini i sukan ma.
3Suchi kándija te jan‑ta'vi i tnu'u ndichi ma
chi sa'a i ja iyo sii ini yuva i ma,
kovaa suchi kívi nduu kívi ni'ni ji'in ña'a ka kuneé ka ku‑uun ma
chi skenaa i ndaka ja jâ neva'a i ma.
4Rey tee ja'nde ndaa tniñu ñayii ñuu de ma
chi sa'a de ja núkuiñi va'a ñuu ma,
kovaa tee yika‑ni ja ndí ini de ja na kivi‑ka xu'un ma
chi xnaa de ñuu yukan.
5Ñayii ká'an vii ja kuu ñayii ketna'a ini ji'in i ma
te masu ûni ndija i ja ká'an i ma
chi ja ndúku i kúu ja ñayii nda'vi yukan
te kendeka i te skenaa i maa i ma.
6Maa ja u'vi sa'a ñayii ndee ini ma, te nukun‑tuu ña'a i,
kovaa ñayii sa'a ja va'a ja ndaa ma
chi sii ini‑ni iyo i te sii ini‑ni jita i.
7Ñayii sa'a ja va'a ma chi ja ndí ini i kúu
ja chindee i ñayii nda'vi ma,
kovaa ñayii sa'a ja u'vi ma
chi masu ndí ini kuiti i ja kuu ñayii nda'vi ma.
8Ñayii ka jatna ini ja jin ka'an i tnu'u in‑ka ñayii ma
chi ûni ka kundee maa i ka skanaa i ni‑ka'nu ñuu ma,
kovaa ñayii ndichi ma chi ka kundee i
ka ndasa'a kuee ini i ñayii ka ndakiti ini ma.
9Nú in ñayii ndichi ma, te jakituu tna'a i ji'in in ñayii ndee ini ma,
chi masu nawa kundee kuiti i,
vaa ñayii ndee ini ma
chi kuu ndakiti ini i xi jakundee i ñayii ndichi ma‑ni.
10Ñayii játna ini ja ka'ni i in‑ka ñayii ma
chi ndákiti ini i nuu ñayii masu na kuechi ndiso ma,
kovaa ñayii ka sa'a ja va'a ja ndaa ma
chi ka kuni i ja ndusii ini ñayii yukan.
11Ñayii kúkuee xeen ma ja ñatuu jáku'ni ini i ma
chi ûni wa'a maa i tnu'u ja ndákiti xeen ini i te sa'a ndeva'a i ma,
kovaa ñayii ndichi ma chi kúndee i tátnuni i nuu maa i,
te ndúkuee ini i, te ñatuu sa'a i ja u'vi ma.
12Nú tee tátnuni ma, te kándija de tnu'u xnda'vi tna'a ma,
chi sa'a de ja ndaka tee ka jinukuechi ji'in de ma ka sa'a tna ja u'vi
sukan kúu maa de ma.
13Su'si ma chi inuu‑ni ni sa'a ya ja kuu ñayii nda'vi ma
ji'in ja kuu ñayii xndo'o xneni ñayii nda'vi ma,
vaa ni sa'a ya nduchinuu nduu i ma,
sukan‑va'a nduu i jin kuni te jin ndasa'a i kuenda nawa ka sa'a i ma.
14Nú in rey ma, te sa'a ndaa sa'a ndija de ja jin kuu ñayii nda'vi ma,
konukuiñi va'a de te kani kivi ko tatnuni de ñuu de ma.
15Nú nawa ni sa'a sa'ya o ma, te ke'en o i ji'in yutnu xii ma
ja ndakani ichi o i ma,
chi kutu'va i naxe ko kuu i ñayii ndichi,
kovaa nú ndimaa kuji'in o ji'in i
chi ndimaa ja kan‑nuu ndakua'a i si'i i ma.
16Nuna kukua'a ñayii ka sa'a ja u'vi ma
chi kúnuu maa‑nka ja u'vi ma ñuu yukan,
kovaa ñayii ka sa'a ja va'a ja ndaa ma,
chi jin konde'ya nde'ya‑ni i
sukan jin skenaa maa ñayii ka sa'a ja u'vi ma.
17Ka'an‑so'o ni nuu sa'ya ni ma ja na ku'un kaji ku'un va'a ini i,
te sukan, te sa'a i ja ndatatu anua ni te koo sii ini ni.
18Nú ñatuu na ñayii ndakaxtnu'u tnu'u Su'si ma iyo in ñuu ma
chi ma jin sunkani ñayii ñuu ma ja ma jin sa'a‑ka i ja u'vi ma,
kovaa ñayii sa'a sukan tátnuni Su'si ma
chi chindee ña'a ya te koo vava'a i.
19Ñayii jinukuechi ma chi visi na ka'an na ka'an o nuu i
kovaa masu ndasa'a i kuenda,
vaa visi jaku'ni ini i ja jiña'a o ma,
kovaa sa'a so'o i maa i te ñatuu kándija i ja ká'an o ma.
20¿Jâ ni kuu jini ni in ñayii ja ni masu jani ini i
te yachi‑ni ká'an i ma?
Ja ká'an sa kúu ja iyo‑ka tnu'u kanu ini
ja ndasa'a ñayii kúkuee ma kuenda sana ñayii ya'a.
21Nú onde luluu suchi ko kunukuechi ma,
te ndimaa ko kuji'in jito'o i ma ji'in i
chi kenda kivi, te suu i ndunda'a ndaka ja neva'a de ma.
22Tee ndimaa ndákiti ini ma chi ndimaa ja kanaa de kúni de,
kovaa ja sukan kúu de ma chi ndimaa jiso kuechi de.
23Ñayii kúvixi ma te jani ini i ja maa i kúu‑ka ma
chi masu na'a‑ni te jin sa'a ñayii ma ja ndatna'a i ja kan‑nuu,
kovaa ñayii jani ini ja masu nawa kuu sa'a i ja maa in‑ni i ma
chi su'va masu na'a‑ni te ndani'i i jayiñu'u nuu ñayii ma.
24Ñayii chísa'vi ñayii kui'na ma chi sa'a u'vi i maa i,
vaa nuna kenda i nuu tee ja'nde tniñu ma
chi visi na ka'an de ja kuechi tna i kúu,
kovaa koyu'u i te masu ka'an kuiti i.
25Ñayii koyu'u in‑ka ñayii ma chi ja xnda'vi ña'a ja u'vi ma kúu,
kovaa ñayii kúkanu ini Su'si ma chi koo va'a i te koo jayiñu'u i.
26Kua'a xeen ñayii ndúku ja ketna'a ini i ji'in gobiernu ma,
sukan‑va'a chindee ña'a de te koo va'a i, jani ini i,
kovaa yika‑ni ja Su'si o Iya Tátnuni ma
kúu iya ka'nde ndaa tniñu o a.
27Ñayii ka sa'a ja va'a ja ndaa ma chi masu ka jatna ini kuiti i
sukan ka sa'a ka kuu ñayii ka sa'a ja u'vi ma,
te ñayii ka sa'a ja u'vi ma
chi ka saxiko i ñayii ka sa'a ja va'a ja ndaa ma.
Currently Selected:
Proverbios 29: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
