Mak 9

1Zozii ya ‑awlɛ maa 'cla lebhe: «N solu anyɩ, ɩ ‑glɩ ‑nʋawlɛ, maa ‑ɔ ‑kʋ 'lɛ ‑da na, mala nɩkplaan ‑anʋa cɩ 'ta 'ka 'ku 'nyɩ ma cɩ Laagɔ 'la Nyɩbhɛlɩdua* ‑ʋ cili 'lɛ 'tɛtɩ nɩkplaan na 'ciinlɩ.»

Zozii ya kaci

(Mat 17.1-9; Luk 9.28-36)

2Clɩɩ ‑ngbʋflʋ 'plɩ 'lɛ na, Zozii ya Pɩɛlɩ, Zakɩ ɩya Zaan ‑tɛɛ 'ma, ma ya 'kikikadie bhlo 'wlu mʋ 'nyɩ maa 'ci 'kʋ, ɔ ya kaci, 3ɔla nɩkplaanplalokua ya pubha plɛtɛtɛɛ, saa ‑dʋdʋ ‑naa 'kʋ, lokwi 'ta ka ‑azla 'lɛ pubha na. 4Elii ɩya Moyizi ya maa 'ciinfutolu 'nyɩ maya Zozii zʋa 'dɩ. 5Pɩɛlɩ ya Zozii 'cla lebhe: «Canyɔ, ɩ nanɩ lebhe ‑a kʋ ‑da, ‑a 'sla ‑paapli ‑mɔta, ‑nanʋ bhlo, Moyizi 'nʋ bhlo ɩya Elii 'nʋ bhlo.» 6Pɩɛlɩ 'taanɩa wɔlɩa 'titia ɔ nyɩtɛa 'lɛ na ‑ci, sa ŋanɔ ‑plaa ɔya ɔ 'yea na. 7'Nyukplu ya ci, ʋla ‑zuzua ya maa 'kʋwɔlɩ 'nyɩ ‑blɩɩzɔn bhlo ya 'nyukplua nɩkplaan 'wlʋlʋ, ʋ claa lebhe: «‑Anɔ ‑naa, ɔmɔ ‑ɔ ‑glɩ 'lɛ 'na ‑wawacoa. A poo 'nyukwliin.» 8'Kplookʋ, ma na ma kope 'lɛ macɩ cɩ na, ma 'tanɩ ‑buun nclɔɔ bhlogbɩɩ 'lɩ, ‑ma Zozii ɔya maasɔ ‑tɛɛ.

9Daa ma ‑kʋa 'lɛ 'kikea kwlida na, ɔ ya maa 'cla lebhe ɩmɩa ma 'lɩ 'lɛ na, Nclɔɔa 'Cʋa* 'ta ka 'kwɩɩnkʋbho na, ma 'la solui nclɔɔ bhlogbɩɩ. 10Wɔlɩ ‑naa, ɔ solu 'lɛ maa na, ma yɩɩ 'kʋplɩlɩ. ‑Ma, maa bhlobhlo 'claclalɩa neen lebhe: «‑Anɩsaa ‑ɩ ‑glɩa ‑awlɛ 'lɛ 'kwɩɩnkʋbhue bha?»

11Ma ya Zozii neencla lebhe: «'Lɩsaa 'la gbʋ ‑jlɩmaazienyaa* claa 'lɛ lebhe Elii ‑cɩ 'ka 'lɛ ‑bɛɛ cili bha?» 12Ɔ ya maa neenŋonu lebhe: «‑Zaagbʋsa Elii ‑cɩ 'ka 'lɛ ‑bɛɛ cili ɩya ɔ 'ka lɩɩa ‑tɛtɛa 'kʋgɩglalɩ. ‑Ma, 'lɩsaa 'la gbʋ Zieziewɔlɩa ‑masɛɛ claa 'lɛ lebhe Nclɔɔa 'Cʋa, 'kwlɩ cɩ 'kɔɔ bhɩa ‑bhutukpa ɩya ma 'kɔɔ zɔbhɛlɩ bha? 13‑Ma n cla anyɩ lebhe: Elii ya tooto ci 'nyɩ ma yɔɔ mala saa ma ‑wa 'lɛ na nʋ, saa ɩ ‑zieoa 'lɛ lebhe ma cɩ kaa 'mɔɔ nʋ na.»

Zozii ya 'cileea 'wugo ‑nyunyua ‑kʋa 'lɛ nɩkplaan na jabha

(Mat 17.14-21; Luk 9.37-43)

14Daa Zozii, Pɩɛlɩ, Zakɩ ɩya Zaan ‑kʋa 'lɛ gɩlɩnyaa* 'bɩɩn mʋnʋda na, ma ya 'lɩ lebhe ncaabhutukpa ‑didioa maa 'nyɩ ‑jlɩmaazienyaa ‑ya maasɔ 'tɩtɔa wɔlɩ. 15Daa ncɛlɩa 'lɩ 'lɛ Zozii ‑jaa na, nikpoo ya maa sla 'nyɩ maya sɔmɩ yɔɔ 'bɩɩn mʋnʋ le ma 'kɔɔ ‑ayo 'pa. 16Zozii ya ɔla gɩlɩnyaa neencla lebhe: «Wɔɔsaa aya maasɔ 'tɩtɔa 'lɛ bha?»

17‑Alawleea sidiin, nclɔɔ bhlo yɔɔ neenŋonu lebhe: «Canyɔ, 'na 'cʋa ‑n ‑lɔɔ 'lɛ, sa 'wugo ‑nyunyu 'nyɩ 'tɔɔ ‑jioli le ɔ nyɩtɛ. 18Daa 'fɩan ɔ cɩ 'lɛ kʋ na, 'wugoa ‑kɔɔ 'kʋ ‑gblaa na, ka ʋ palɩɔ 'lɛ sa, ‑daadʋflifli wlʋɔ 'lɛ neen, ɔ talɩ 'lɛ ‑glaa 'nyɩ ɔ jɛjɛlɩ 'lɛ. N ya ‑naa gɩlɩnyaa 'cla lebhe ma 'tli 'wugo ‑naa, ‑ma ma 'ta mino.» 19Ɔ ya maa 'cla lebhe: «Anyɩ ‑pɔtɔnʋ 'la ncɛlɩ ‑naa, ‑a 'ta 'lɛ pɔɔtɛtɛ ‑ka na, bhlaasaan n cɩ 'kaa 'lɛ anyɩ cɩɩnwlʋlʋ bha? 'Na pɔɔklalɩɛa, bhlaasaan ɩ cɩ 'kaa 'lɛ 'wluko bha? A ‑laan 'cileea.» 20Ma yɔɔ mɔ fa. Daa 'wugoa 'lɩ 'lɛ Zozii 'ciin na, ʋ ya 'cileea 'dɩdɔ gbasa, ɔ ya ‑dʋdʋ 'kʋ bhli, ɔ 'bhisioa 'nyɩ ‑daadʋflifli wlʋa 'mɔɔ neen. 21Zozii ya ɔ toa neencla lebhe: «Ɩmɩ ‑naa ‑kɔɔ 'lɛ nʋlɩɛ bhɔ na, ɩ nʋnɩ liowli ‑zlʋsaa bha?» Toa yɔɔ neenŋonu lebhe: «Ɔla 'cuon tooto. 22‑Daanda, 'wugoa pɔɔ ‑kosuun, ʋ pɔɔ 'nyiin le ɔ 'ka 'ku. ‑Ma ɩ ‑ka ‑kʋ lebhe ‑n cɩ mino na, 'lɩ ‑anyɩ ŋaazɩɩn ɩya ‑n ci ‑anyɩ 'kʋ.» 23Zozii yɔɔ 'cla lebhe: «'Lɩsaa 'la gbʋ ‑n claa 'lɛ lebhe: Ɩ ‑ka ‑kʋ lebhe ‑n cɩ mino na bha? Ɔmɔa ‑ɔ ‑ka 'lɛ pɔɔtɛtɛ na, ɔ mino ‑tɛtɛa 'fɩan nʋlɩɛ.» 24'Kplookʋ, 'cileea toa yaan ‑gaa 'nyɩ ɔ ya 'cla lebhe: «N 'tɛlɩ pɔlɛ 'kʋ, bhooje ciin 'kʋ ɩya ‑n zʋlʋ 'na pɔɔtɛtɛa 'kʋ.»

25Daa Zozii 'lɩ 'lɛ lebhe ncaabhutukpa 'wlalɩa 'wlʋ na, ɔ ya 'wugo ‑nyunyua 'wlugaalɩ 'nyɩ ɔ yʋʋ 'cla lebhe: «‑Amuna ɩya 'nyukwliteli ‑wugo, ‑amʋ n clɔɔ lebhe 'wlʋ 'cilee ‑naa nɩkplaan ɩya ‑naa cɔlɔanɩ ‑ylɛylɛ.» 26'Wugoa yaan ‑gaa, ʋ ya 'cileea gbasa 'dɩdɔ 'nyɩ ʋ ya ‑zɔnwlʋ. 'Cileea ya 'plɩ le saa ɔ ya 'lɛ 'ku na, ɩ gba na, maa 'fɩan ma claa lebhe: «Ɔ ya 'ku.» 27‑Ma Zozii ya ɔla sɔa 'kʋbhli, ɔ yɔɔ 'kubhli 'nyɩ ɔ ya 'nylugo.

28Daa Zozii ble 'lɛ 'sleen na, ɔla gɩlɩnyaa yɔɔ ‑asule neencla lebhe: «'Lɩsaa 'la gbʋ ‑anyɩ ‑a 'ta 'lɛ 'wugo ‑naa 'tliliɛ mino bha?» 29Ɔ ya maa 'cla lebhe: «‑Sa 'la 'wugo ‑naa, bhibhieli ‑tɛɛ ‑ɩ minʋʋ 'lɛ 'tlilɩɛ.»

Zozii nyɩtɛ ‑mɔsɔda ɔla 'kwɩ ɩya ɔla 'kwɩɩnkʋbhue 'la wɔlɩ

(Mat 17.22-23; Luk 9.43-45)

30Zozii ɩya ɔla gɩlɩnyaa* ya 'dɛ 'wlʋ, ma 'ŋatɩa Galileebhlɩa, ‑ma Zozii 'taa ‑wa lebhe ma cibhlilia sɛɛ. 31Sa ɔ caa ɔla gɩlɩnyaa 'nyɩ ɔ claa maa lebhe: «Nclɔɔa 'Cʋa*, ma cɩ 'kɔɔ ncɛlɩ wlɩɩn 'pɛlʋ zʋlʋ, ma 'kɔɔ 'bhla ‑ma ɩla ‑mɔta ‑zelɩa, ɔ cɩ 'ka 'kwɩɩnkʋbho.» 32‑Ma gɩlɩnyaa 'nu 'taa wɔlɩ ‑naa 'la ‑zɔn 'nyɩ ma 'kaa 'mɔɔ 'lɛ neencla na, ɩ ‑kaa maa ŋanɔ.

‑Anɔsaa ‑ɔ zia 'lɛ ɔ 'yea -tɛtɛa 'kʋ bha?

(Mat 18.1-5; Luk 9.46-48)

33Zozii ɩya ɔla gɩlɩnyaa* ya Kapɛnayumʋ mʋ. Ma ble 'lɛ 'sleen na, Zozii ya ɔla gɩlɩnyaa neencla lebhe: «‑Gugwiea 'kʋ, wɔlɩ saa a 'titɔanɩa 'lɛ bha?» 34‑Ma 'ma ‑sa 'taa ne. Sa ‑gugwiea 'kʋ, ma yaa wɔlɩ 'tɩtɔ le ma 'kaa, ɔmɔa ‑ɔ zi 'lɛ maa 'fɩan 'kʋ na, cibhlili. 35Zozii ya sakʋ, ɔ ya 'kʋgba ‑mɔsɔa la 'nyɩ ɔ ya maa 'cla lebhe: «‑Ɔ ‑ka ‑wa lebhe ɔ 'ka 'kʋklʋʋn kʋ na, 'naa ɔ 'plɩ anyɩa 'fɩan 'la leen ‑naanɔ ɩya ala lobhoco.» 36'Nyɩ ɔ ya 'cileeco 'ma, ɔ yɔɔ maa sidiin zʋ, ɔ yɔɔ gbʋgbʋa 'nyɩ ɔ ya maa 'cla lebhe: 37«Ɔmɔa, ‑amʋ 'wluku, ‑ɔ ‑cɩ ka 'lɛ ‑anɔ ‑naa 'bhisa 'kʋ 'la 'cilee 'nanɩ kla na, ‑amʋ 'titi ɔ kla 'lɛ 'nanɩ. 'Nyɩ ɔmɔa ‑ɔ klaan 'lɛ 'nanɩ na, ‑n 'ta ‑amʋ ɔ kla 'ta 'lɛ 'nanɩ, ‑ma ɔmɔa, ‑ɔ lobhuun 'lɛ na.»

Ɔmɔa ‑ɔ 'ta 'lɛ ‑anyɩ ‑zɔ na, ɔ ‑glɩ ala ‑plɔnyɔ

(Luk 9.49-50)

38Zaan ya Zozii 'cla lebhe: «Canyɔ, ‑a ya nclɔɔ bhlo 'lɩ, ɔ ma ‑naa 'ŋlɩa 'nyɩ ɔ tli 'wugwi ‑nyinyi. ‑A ya wabha lebhe ‑a kaa 'mɔɔ mɩ tie, sa 'ɔ gɩlɩ 'ta ‑anyɩ na.» 39‑Ma Zozii ya 'cla lebhe: «A 'la tieo mɩ. Sa nclɔɔ cɩ 'ta 'na 'ŋlɩ 'ma, ɔ 'ka 'ciinzizielɩlobholi nʋ ɩya ɔ ‑ka 'dɛ 'wlʋ na, ɔ 'ka 'na wɔɔnyinyi nyɩtɛ. 40Ɔmɔa ‑ɔ 'ta 'lɛ ‑anyɩ ‑zɔ na, ɔ ‑glɩ ‑ala ‑plɔnyɔ. 41'Nyɩ ɔmɔa ‑ɔ ‑cɩ ka 'lɛ anyɩ 'nyukobhu 'nyɩ le a 'ka 'mla, ‑ofi lebhe, a ‑glɩ Laagɔ 'la ‑Sasanyɔa* 'nʋa na, n solui anyɩ, ɩ ‑glɩ ‑nʋawlɛ, ɔla dluuplʋlɩɛa 'ta 'dɛ ‑wlʋɔ.»

Pɔlɛkʋzʋlʋlɩɛ

(Mat 18.6-11; Luk 17.1-2)

42Zozii ya 'kʋgɩ 'nyɩ ɔ ya 'cla lebhe: «Ncaatʋtʋʋntʋa ‑ɔ ‑cɩ ka 'lɛ 'cuo ‑naa ‑ma ‑ka 'lɛ 'na pɔɔtɛtɛ, mala sidiin 'la bhlo nyinyiin fa na, ɩ nanɩ le ma gʋalɩɔ cokwie 'kadie ‑blɩɩn ɩya ma 'pɔɔ geen. 43Ɩ ‑ka ‑kʋ lebhe ‑naa sɔa, ʋmʋ ‑kɔɔ nyinyiin fa na, 'dɩʋ 'kʋ. Sa ‑n ‑ya sɔ klea ‑ka jabhʋa nɩkplaan ble na, ɩ nanɩ 'nyɩ ɩ zi saa ‑n ‑ya sɩa ‑mɔsɔa cɩ 'kaa 'lɛ ‑kosuun mʋ na 'kʋ. ‑Kosu ‑naa ‑ʋ 'ta 'lɛ ŋomuda ‑ka na. [44]#9.44 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Gbazɩa nɔa 'ku 'ta 'lɛ 'nyɩ ‑kosua ŋomu 'ta 'lɛ na.» 45Ɩ ‑ka ‑kʋ lebhe ‑naa bhoa ‑ʋ kɔɔ nyinyiin fa na, 'dɩʋ 'kʋ. Sa, ‑n ‑ya bho klea ‑ka jabhʋa nɩkplaan ble na, ɩ nanɩ 'nyɩ ɩ zi saa ‑n ‑ya bhɩa ‑mɔsɔa cɩ 'kaa 'lɛ ‑kosua ‑ʋ ŋomu 'ta 'lɛ na nɩkplaan ble na 'kʋ. [46]#9.46 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Gbazɩa nɔa 'ku 'ta 'lɛ 'nyɩ ‑kosua ŋomu 'ta 'lɛ na.» 47'Nyɩ ɩ ‑ka ‑kʋ lebhe ‑naa 'cia ‑ɛ ‑kɔɔ nyinyiin fa na, kpɛɛ. Sa ‑n ‑ya 'ci bhlo ‑ka Laagɔ 'la Nyɩbhɛlɩdua* nɩkplaan ble na, ɩ nanɩ 'nyɩ ɩ zi saa ‑n ‑ya 'cia ‑mɔsɔa cɩ 'kaa 'lɛ ‑kosua ‑ʋ ŋomu 'ta 'lɛ na nɩkplaan ‑pɔɔ na 'kʋ. 48Gbazɩa nɔa 'ku 'ta 'lɛ 'nyɩ ‑kosua ŋomu 'ta 'lɛ na. 49Sa ‑kosuun nclɔɔ nclɔɔ cɩ 'ka 'lɛ ‑gliin 'pɔɔ. 50‑Glii ‑glɩ ‑lʋʋ 'nanʋ. ‑Ma gbazɩ ‑glii ‑kanɩ 'dʋʋn 'wlʋ na, 'nsasa a cɩ 'kanɩɩ 'lɛ 'dʋʋn zʋzʋlʋ bha? 'Naa a kalɩ ‑glii anyɩ 'titi acɩ nɩkplaan ɩya pupue kʋ aya a 'ye ‑gbaaglɩɩn.»

Currently Selected:

Mak 9: NTLD13

Highlight

Copy