Mak 10

'Cɩcɩɛ ɩya 'cɩcɩɛgbɔlʋlɩɛ

(Mat 19.1-9)

1Zozii ya 'dɛ 'wlʋ 'nyɩ ɔ ya Zudeebhlɩa 'kʋ, Zludɛɛn ‑nyidɔlʋa leen mʋ. Ncaabhutukpa ya ‑awlɛɔ cɩ 'wluwlalɩ 'nyɩ saa ɔ nʋ ‑azla 'lɛ na, ɔ ya maa calɩɛ bhɔ. 2Falizɩɛnnyaa* yɔɔ cɩmɛ le ma 'kaa 'mɔɔ 'gbuzu ‑zɔn 'pa. Ma claa 'mɔɔ neen lebhe: «‑Jioli ‑nyɩɔ nclɔɔ le ɔ gbɔlʋ ɔ nʋŋlɔ 'cɩcɩɛ bha?» 3Zozii ya maa neencla lebhe: «‑Jlɩmaa saa Moyizi 'nyɩa 'lɛ anyɩ bha?» 4Ma yɔɔ neenŋonu lebhe: «Moyizi ya ‑jioli 'nyɩ le ma zie 'cɩcɩɛgbɔlʋfluwa ɩya ma 'tli 'ŋlɔ.» 5Zozii ya maa 'cla lebhe: «Sa ala pɔlɩa ‑titlilio 'lɛ na, ɩla gbʋ Moyizi 'nyɩ 'lɛ anyɩ ‑jlɩmaa ‑naa. 6‑Ma bhɔdaa, daa Laagɔ nʋ 'lɛ ‑laagɔzɔan na, ɔ ya maa ŋodi ɩya 'ŋlɔ cɩ nʋ. 7Ɩla gbʋ dɛ nclɔɔ cɩ 'ka 'lɛ ɔ to ɩya ɔ 'nɔ cɩɩnwlʋlʋ, ɔ 'ka ɔ nʋŋlɔ cɩmɛ 8ɩya maa ‑mɔsɔa 'kanɩ 'nyɛkɛ bhlo 'plɩ. Dɛ 'la daa, ma 'tanɩ ‑mɔsɔ ‑glɩ, ‑ma 'nyɛkɛ bhlogbɩɩ. 9Na ɩmɩa Laagɔ ya 'lɛ cɩmɛmɛnɩ na, nclɔɔ 'la ‑sasalɩɩ cɩ.»

10Daa ma ci 'lɛ 'sleen na, gɩlɩnyaa* ya ‑awlɛ wɔlɩ ‑naa Zozii neencla. 11Ɔ ya maa 'cla lebhe: «Ɔmɔa ‑ɔ gbɔlʋ 'lɛ ɔ nʋŋlɔ 'cɩcɩɛ 'nyɩ ‑ɔ cɩ 'lɛ ‑buun ŋlɔ na, ɔ ‑glɩ ŋlʋmatɩnyɔ ɔ nʋŋlɔa 'ci 'kʋ. 12'Nyɩ 'ŋlɔ ‑ma ɔ ‑ka ɔ ‑ŋuto 'cɩcɩɛgbɔlʋ 'nyɩ ɔ ‑ka ‑buun ‑ŋodi 'cɩ na, ɔ ‑glɩ ŋodimatɩŋlɔ.»

Zozii palɩ 'cuo 'nyu

(Mat 19.13-15; Luk 18.15-17)

13Ma ya Zozii 'cuo ‑la le ɔ 'ka maa sɔ 'wlu ‑gbɛ. ‑Ma gɩlɩnyaa* ŋonu 'taa. 14Daa Zozii 'lɩ 'lɛ ɩmɩ ‑naa na, ɩ 'tɔɔ pɔlɛkʋmɛma 'nyɩ ɔ ya maa 'cla lebhe: «A 'talɩ 'cuoa 'cin, ma cɩɩn cɩ, a 'la 'tlia maa, sa Laagɔ 'la Nyɩbhɛlɩdua* ‑kʋ, ʋ ‑nyɩɔ maa ‑anʋa, ‑ɔ ‑kʋ 'lɛ maa 'bhisa na. 15N solui anyɩ, ɩ ‑glɩ ‑nʋawlɛ: Ɔmɔa ‑ɔ cɩ 'ta 'lɛ Laagɔ 'la Nyɩbhɛlɩdua wabha le 'cilee 'bhisa na, ɔ cɩ 'tʋʋ nɩkplaan ble.» 16'Nyɩ ɔ ya maa 'ma, ɔ ya maa sɔ 'wlu ‑gbɛ 'nyɩ ɔ ya maa 'nyupalɩ.

Zozii ɩya ncaanyɩbhɛlʋ

(Mat 19.16-30; Luk 18.18-30)

17Daa Zozii maanɩa 'lɛ ‑gugwie na, nclɔɔ bhlo ya sɔmɩ fa, ɔ yɔɔ ‑deliin ‑kukoonkplii sasla 'nyɩ ɔ yɔɔ neencla lebhe: «Canyɔ 'nanɔ, 'lɩsaa n cɩ 'kaa 'lɛ nʋ ɩya n 'ka 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, 'lɩ bha?» 18Zozii yɔɔ 'cla lebhe: «'Lɩsaa 'la gbʋ ‑n laan 'lɛ ncaananɔ bha? Nclɔɔ ‑ylɛylɛ 'ta ‑nanɩ, ‑ma Laagɔ bhlo ‑tɛɛ. 19‑N ‑ci ‑jlɩmaa: ‑Naa 'bhlaa nclɔɔ, ‑naa 'matɩa 'ŋlɔ, ‑naa ghlia 'wi, ‑naa lia ‑kplakpla ‑danʋfʋɛ, ‑naa lia nclɔɔ ‑dufle ɩya zʋ ‑n 'nɔ ɩya ‑n to.» 20Nclɔɔa yɔɔ 'cla lebhe: «Canyɔ, ‑jlɩmaa ‑naa ‑tɛtɛa n yaa 'kʋplɩlɩ 'na nyɩgbɛ 'kʋ tooto.» 21Zozii yɔɔ 'ciinkope, ɔ yɔɔ wabha 'nyɩ ɔ yɔɔ 'cla lebhe: «Ɔ ‑tonɩɔ lʋʋ bhlogbɩɩ: Mʋ, zʋ ‑naa kalɩkalɩlɩɩa 'fɩan 'pɛlʋ, va 'dalaa ŋaazɩnya ɩya ‑n ka ‑laagɔɔn 'bhɛlɩ li ɩya ci ‑n gɩlɩɩn.» 22Ɔ 'nu 'lɛ wɔlɩ ‑naa na, 'nyɛkɛ yɔɔ 'kɔtɔ, ɔ ya ‑cʋʋ 'plɩ 'nyɩ ɔ ya mʋ, sa ɔ ‑lioa 'bhɛlɩ 'kadɩ na.

23Zozii ya ɔcɩ cɩ kope 'nyɩ ɔ ya ɔla gɩlɩnyaa* 'cla lebhe: «Laagɔ 'la Nyɩbhɛlɩdua* nɩkplaan ‑blelɩɛa cɩ 'ka 'tɛbhalɩ ɩ 'ka maa ‑ɔ ‑lio 'lɛ 'bhɛlɩ 'kadɩ na ‑nyɩɔ.» 24Wɔlɩ ‑naa ya gɩlɩnyaa pɔlɛɛnsa. ‑Ma Zozii ya ‑awlɛ maa 'cla lebhe: «'Na 'cuonyɩ, Laagɔ 'la Nyɩbhɛlɩdua nɩkplaan ‑blelɩɛa, ɩ 'tɛ. 25‑Samoo 'ka 'lɛ 'mɛsɛlʋ 'la kofo nɩkplaan bleli na, ɩ ‑cɔlʋɔ 'nyɩ ɩ zi saa nyɩbhɛlʋ 'ka 'lɛ Laagɔ 'la Nyɩbhɛlɩdua nɩkplaan ble na 'kʋ.» 26Gɩlɩnyaa 'la pɔlɛɛnwlʋlɩɛa ya ‑awlɛ 'kʋzʋlʋ 'nyɩ ma 'claclalɩa neen lebhe: «Na ncaasaa 'titi ‑ɔ ‑cɩ kanɩ 'lɛ gbʋʋnsalɩɛ 'lɩ bha?» 27Zozii ya maa 'ciinkope 'nyɩ ɔ ya maa 'cla lebhe: «Ɩmɩ ‑naa, ncɛlɩ cɩ 'tɩɩ nʋlɩɛ mino, ‑ma Laagɔ ɔmɔ, ɔ cɩɩ mino, sa ɔ ‑glɩ ‑tɛtɛa 'fɩan 'la minonyɔ na.»

28Pɩɛlɩ yɔɔ 'cla lebhe: «'Lɩka, ‑anyɩ ‑a ya ‑tɛtɛa 'fɩan 'cintalɩ 'nyɩ ‑a yɔɔ 'lɛ gɩlɩ.» 29Zozii yɔɔ 'cla lebhe: «N solui anyɩ, ɩ ‑glɩ ‑nʋawlɛ, nclɔɔ cɩ 'ta 'sle, bholiecɩ, mɛɛncɩ, to, 'nɔ, 'cuo ‑aana 'kwlɩ te, n ‑ya Dɩnanɩa* 'la gbʋ 30ɩya ɔ 'la ka ‑pɔtɔnʋ, 'bhlɛsʋ ‑naa nɩkplaan, 'sli, bholiecɩ, mɛɛncɩ, 'nɔcɩ, 'cuo ɩya 'kwlɩ, ɩla dɩpici gwlɩɩ ‑ngbi 'lɩ, gbaylɩsalɩɛ nɩkplaan ɩya 'kʋklʋʋn 'la 'bhlɛsʋa nɩkplaan, ɔ 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'lɩ. 31'Kʋklʋʋn ‑naanʋa ‑bhutukpa cɩ 'ka leen 'plɩlɩ ɩya leen ‑naanʋaa 'ka 'kʋklʋʋn 'plɩ.»

‑Mɔtada Zozii nyɩtɛ ɔla 'kwɩ ɩya ɔla 'kwɩɩnkʋbhue 'la wɔlɩ

(Mat 20.17-19; Luk 18.31-34)

32Zozii ɩya ɔla gɩlɩnyaa* ‑kʋa ‑gugwie 'kʋ, ma ‑gblaa Zolizalɛmʋ 'nyɩ Zozii pʋa maa 'kʋklʋʋn. Gɩlɩnyaa ‑kʋa pɔɔvʋʋn 'nyɩ ŋanɔ bhlaa maa ‑ɔ gɩlɩa 'lɛ maa na. Ɔya 'kʋgba ‑mɔsɔa ya ‑awlɛ gbɛga 'nyɩ ɔ ya maa, ɩmɩa ‑ɩ ‑cɩ kaa 'mɔɔ 'lɛ ŋeni na, solulɩɛ bhɔ. Ɔ ya maa 'cla lebhe: 33«'Lɩka, ka ‑a ‑gblaa 'lɛ Zolizalɛmʋ ɩya Nclɔɔa 'Cʋa*, ma 'kɔɔ ‑teyiyinyaa tocɩa ɩya ‑jlɩmaazienyaa* wlɩɩn 'pɛlʋzʋlʋ, ma cɩ kɔɔ 'tɩtɩpla, ma 'ka 'cla lebhe ma 'bhlɔɔ ɩya ma 'kɔɔ maa ‑ɔ 'ta 'lɛ Laagɔ ‑ci na, wlɩɩn zʋ. 34Ma cɩ 'kɔɔ nyanɩ, ma 'kɔɔ ‑daadʋ 'ciinŋwla, ma 'kɔɔ ‑ngblieen bhutili, ma 'kɔɔ 'bhla, ɔ 'ka 'ku ɩya ɩla ‑mɔta ‑zelia, ɔ 'ka 'kwɩɩnkʋbho.»

Zakɩ ɩya Zaan 'la 'clalɩlɩɛ

(Mat 20.20-28)

35Zakɩ ɩya Zaan, Zebedee 'la 'cuoa, ma ya Zozii cɩmɛ 'nyɩ ma yɔɔ 'cla lebhe: «Canyɔ, ‑a ‑wa lebhe ɩmɩa ‑a ‑cɩ kɔɔ 'lɛ 'clalɩ na, 'maa nʋɩ ɩya ‑n 'nyɩ ‑anyɩ.» 36Ɔ ya maa 'cla lebhe: «'Lɩsaa a ‑wa 'lɛ lebhe n nʋ ɩya n 'nyɩ anyɩ bha?» 37Ma yɔɔ 'cla lebhe: «Daa ‑n cɩ 'ka 'lɛ ‑naa 'klʋagbaa nɩkplaan ble na, 'maa 'nyɩ ‑anyɩ ‑jioli ɩya bhlo 'ka ‑naa 'lipasɔa 'kʋ sakʋ ɩya bhlo 'ka ‑naa 'dabaa 'kʋ sakʋ.» 38Zozii ya maa 'cla lebhe: «Ɩmɩa a 'clalɩ 'lɛ na, a 'tɩɩ ‑ci. ‑Kɔbhɛa n cɩ 'ka 'lɛ 'mla na, a cɩɛ 'mlalɩɛ mino bha? 'Nyuwluzʋlɩɛa n cɩ 'ka 'lɛ 'lɩ na, a cɩɩ 'lɩlɩɛ mino bha?» 39Ma yɔɔ 'cla lebhe: «‑A cɩ mino.» Zozii ya maa 'cla lebhe: «‑Kɔbhɛa n cɩ 'ka 'lɛ 'mla na, a cɩɛ 'mla, 'nyuwluzʋlɩɛ n cɩ 'ka 'lɛ 'lɩ na, a cɩɩ 'lɩ. 40‑Ma ‑ɩ ‑glɩ 'lɛ 'na 'lipasɔa ‑aana 'na 'dabaa 'kʋ 'la sakʋlɩɛa na, ‑n 'ta ‑amʋ ‑ɔ 'nyɩ 'tɩɩ 'lɛ: Maa ‑anʋa 'la gbʋa ɩ bhɔsʋɔ 'lɛ na, maa ɩ cɩ 'ka 'lɛ ‑nyɩɔ.» 41Daa ‑danaanʋaa 'kʋgbaa 'nu 'lɛ wɔlɩ ‑naa na, ma ya Zakɩ ɩya Zaan dɔgbɛ 'kʋ 'manɩ. 42Zozii ya maa la 'nyɩ ɔ ya maa 'cla lebhe: «A ‑ci sɛɛ lebhe maa ma ma 'lɛ le 'bhlɩtocɩa na, ka ma ‑kwle 'lɛ ma 'bhlɩnyaa 'nyɩ ncaakadɩa kʋlʋ 'lɛ maa 'kʋ. 43‑N 'ta ‑sɛɛ ɩ 'ta 'lɛ anyɩ sidiin ‑kʋ. ‑Ma anyɩ sidiin, gbazɩ bhlo ‑ka ‑wa lebhe ɔ 'ka ‑kwle na, 'naa ɔ 'plɩ ala lobhoco. 44'Nyɩ, anyɩ sidiin, gbazɩ bhlo ‑ka ‑wa lebhe ɔ 'ka 'kʋklʋʋn kʋ na, 'naa ɔ 'plɩ anyɩa 'fɩan 'la geyu. 45Sa, Nclɔɔa 'Cʋa* 'ta ci le ma 'kɔɔ lobho, ‑ma ka ɔ ci 'lɛ le ɔ 'ka lobho ɩya ncaabhutukpa 'la nɩkplaankplɩlɩɛ 'la gbʋ, ɔ 'ka ɔcɩ ‑sa.»

Zozii ya 'citutunyɔ Batimee jabha

(Mat 20.29-34; Luk 18.35-43)

46Zozii ɩya ɔla gɩlɩnyaa* ya Zelikoo mʋ. Da maya ncaabhutukpa ‑kʋa 'lɛ Zelikoo 'wlʋ da na, 'citutunyɔ, Timee ‑yowli, Batimee ‑kʋa ‑gugwiea cɩ sa, ɔ zlaa. 47Ɔ 'nu 'lɛ lebhe Nazalɛtɩnyɔ Zozii na, ɔ yaan ‑gaa 'nyɩ ɔya 'cla lebhe: «Zozii, Daviti 'la 'Cʋ, 'maa 'lɩɩn ŋaazɩɩn!» 48Ncaabhutukpa klaa 'mɔɔ 'kʋ le ɔ mɛa ɔla nea, ‑ma ka ‑tɛɛ ɔ 'tɛbhalɩa neen 'nyɩ ɔ claa lebhe: «Daviti 'la 'Cʋ, 'lɩɩn ŋaazɩɩn!» 49Zozii ya 'nylugo 'nyɩ ɔ ya 'cla lebhe: «A lɔɔ.» Ma ya 'citutunyɔa la, ma yɔɔ 'cla lebhe: «'Sɩslɩlɩ ‑n ‑bho 'kʋ, ɔ lɔɔ.» 50Ɔ ya ɔla bibielʋʋa 'kwlaanpa, ɔ ya ɔcɩɩn 'sʋ 'nyɩ ɔ ya Zozii 'bɩɩn mʋnʋ. 51Zozii yɔɔ 'cla lebhe: «'Lɩsaa ‑n ‑wa 'lɛ lebhe n nʋ ɩya n 'nyɩɔ bha?» 'Citutunyɔa yɔɔ 'cla lebhe: «Canyɔ, 'naa n 'lɩ sa.» 52Zozii yɔɔ 'cla lebhe: «Mʋ, ‑naa pɔɔtɛtɛa yɔɔ jabha.» 'Kplookʋ ɔ ya salɩ, 'nyɩ ɔ ya Zozii gɩlɩ.

Currently Selected:

Mak 10: NTLD13

Highlight

Copy