Mak 6

Nazalɛtɩnyaa 'ta Zozii 'la pɔɔtɛtɛ ‑ka

(Mat 13.53-58; Luk 4.16-30)

1Zozii ya 'dɛ 'wlʋ. Ɔ ya ɔ 'bhlɩdu 'kʋ ci 'nyɩ ɔla gɩlɩnyaa* yɔɔ gɩlɩ. 2Zifʋnyaa* 'la nyɔkwɛclɩɩa* 'kʋ, ɔ ya mala bhibhiepalʋa* ‑zɔn calɩɛ bhɔ. Ncaabhutukpaa ‑ɔ ‑poa 'mɔɔ 'lɛ 'nyukwliin na, nikpoo ya maa sla 'nyɩ ma 'claclalɩa neen lebhe: «‑Anɩ ‑naa, 'ndagbazɩ ɩ 'wlʋlʋɔ 'lɛ bha? Dɩgalɩ ‑naa ɩya 'ciinzizielɩlobholi ‑naa ‑tɛtɛa 'la nʋtɛtɩa, ‑ɔ 'nyɩɔ 'lɛ mɩ bha? 3‑N 'ta ‑paagblinyɔa ‑ɔ ‑glɩ 'lɛ Malii ‑yowlia na bha? ‑N 'ta Zakɩ, Zozɛsɩ, Zudu ɩya Simɔɔn bholia bha? 'Nyɩ ‑n 'ta ‑aya ɔ mɛɛncɩ 'ta 'lɛ ‑da ‑kʋ bha?» Ɩmɩ ‑naa 'fɩan ɩ gbaa na ma 'taa ɔla pɔɔtɛtɛ ‑ka. 4Zozii ya maa 'cla lebhe: «Laagɔnekʋnyɩtɛnyɔ* 'ta ɔ 'bhlɩ ‑dʋdʋ 'kʋ, ɔla 'lɔlʋnya sidiin ɩya ɔ 'bhisleen 'ŋlɩ ‑ka.» 5Ɔ 'ta mino ɔ 'ka 'dɛ 'ciinzizielɩlobholi bhlogbɩɩ nʋnʋ, ‑n 'ta le guzenya ‑zlʋsaasa ‑tɛɛ ɔ ‑gbɛ 'lɛ sɩ 'wlu 'nyɩ ‑ɔ jabha 'lɛ na. 6Ɩ slaa 'mɔɔ nikpoo, saa ma 'taa 'lɛ pɔɔtɛtɛ ‑ka na.

Zozii ya gɩlɩnyaa 'kʋgba ‑mɔsɔa lobhu

(Mat 9.35, 10.1,5-14; Luk 9.1-6)

Zozii 'plɩlɩa 'dia ‑ɩ mɛ 'lɛ 'dɛ cɩ na 'kʋ 'nyɩ ɔ caa. 7Ɔ ya 'kʋgba ‑mɔsɔa ɔcɩ cɩ lalɩ. 'Nyɩ ɔ ya maa lobhulɩɛ bhɔ ‑mɔsɔ ‑mɔsɔ. Ɔ ya maa 'wugwi ‑nyinyi 'la 'tlitɛtɩ 'nyɩ. 8Ɔ ya maa 'cla lebhe: «‑Gugwiea a cɩ 'ka 'lɛ bhli na, ‑n 'ta le ‑kpama ‑tɛɛ na, a 'la 'maa lʋʋ bhlogbɩɩ, a 'la 'maa 'flawo, tɩtalʋʋ, ‑juku ʋya 'dala. 9A zʋ 'bhlikalɩgbanbʋɩ, a 'la 'maa nɩkplaanplalɩɩ ‑mɔsɔ.» 10'Nyɩ ɔ ya ‑awlɛ maa 'cla lebhe: «A ‑ka da mʋ, 'slitʋtʋʋntʋa a cɩ 'ka 'lɛ nɩkplaan ble na, a kʋ 'dɛ ‑aan ɩya ala mʋclɩɩa 'ka ŋeni. 11A ‑ka 'du 'kʋ mʋ, dunyaa 'ta anyɩ kla 'nyɩ ma 'ta anyɩ 'nyukwliinpo na, a gbɔtɔ ala kplia cɩ 'la pipia ɩya a 'wlʋ 'dɛ, ɩ 'ka kɩnɩ ‑danʋfʋɛlilie 'plɩ.» 12Ma ya mʋ 'nyɩ ma claa ncɛlɩa 'fɩan lebhe ma cala kwla. 13Ma ya 'wugwi ‑nyinyi ‑bhutukpa 'tli. Ma ya guzenya ‑bhutukpa 'kpʋ 'wlu tɔlʋ 'nyɩ ma ya jabha.

'Nyuwluzʋnyɔ Zaan 'la 'kwɩ

(Mat 14.1-2; Luk 9.7-9)

14Nyɩbhɛlʋ Ewlɔdʋ ya Zozii 'la wɔlɩ 'nu, sa ɔla 'ŋlɩ ya daa ‑tɛtɛa 'fɩan dlolu na. Ma claa lebhe: «'Nyuwluzʋnyɔ Zaan ya 'kwɩɩnkʋbho, ɩla gbʋ dɛ ɔ ‑ka 'lɛ 'ciinzizielɩlobholi 'la nʋtɛtɩ.» 15‑Anʋa claa lebhe: «Elii ‑kʋ 'lɛ.» 'Nyɩ ‑anʋa ‑ma claa 'lɛ lebhe: «Laagɔnekʋnyɩtɛnyaa, mala nɩkplaan bhlo.» 16Ewlɔdʋ 'nu 'lɛ ɩmɩ ‑naa na, ɔ ya 'cla lebhe: «'Nyuwluzʋnyɔ Zaan, ɔmɔa n gba 'lɛ 'nyɩ ma 'dɩ 'lɛ 'wlu 'kʋ 'na, ɔmɔ ‑ɔ ‑bho 'lɛ 'kwɩɩn 'kʋ!»

17Sa Ewlɔdʋ yaa gba ma ya Zaan 'kʋbhli, ma yɔɔ gʋa 'nyɩ ma yɔɔ ‑palʋʋn 'pa, ɔ bholi Filipʋ nʋŋlɔ Ewlodiadɩ, ɔ 'cɩa 'lɛ na 'la gbʋ. 18Sa Zaan claa Ewlɔdʋ lebhe: «‑N 'ta ‑jioli ‑ka ɩya ‑n kɔɔ 'cɩ.» 19Ɩmɩ ‑naa 'wluku, Ewlodiadɩ ‑zɔa Zaan, ɔ 'matɩa 'mɔɔ 'bhlada ‑ma 'ɔ mino 'taa, 20sa Ewlɔdʋ ‑cia 'lɛ lebhe Zaan ‑glɩa 'kʋnylugolunyɔ ɩya ‑kplɔkplɔnyɔ na, ɔ 'gulua 'mɔɔ 'nyɩ ɔla 'ci ‑kʋa 'mɔɔ 'kʋ. Ɔ ‑kaa 'mɔɔ 'nyukwliinpoda 'wlʋ na, pɔlɛ mlɔmlɔnʋa 'mɔɔ cɩ, ‑ma 'bhlɩmɔɔn ɔ ‑waa 'mɔɔ 'nyukwliinpolɩɛ.

21'Plɩlɩdaa Ewlodɩadɩ 'matɩa 'lɛ na, ɔ yɩɩ 'lɩ, clɩɩa 'kʋa Ewlɔdʋ 'la valɩclɩɩa 'cɩlɩ 'lɛ 'kʋ na. Ewlɔdʋ ya ɔla goonvlakpoa 'la ncaakadɩa 'fɩan, 'sojatocɩa ɩya Galileebhlɩa tocɩa 'fɩan 'tlɔnblɩ 'kʋ la. 22Ewlodiadɩ ‑naa ‑nyɔŋlɔ ya ‑palʋa ‑zɔn ble, ɔ ya ce 'nyɩ ɔ ya Ewlɔdʋ ɩya ɔla 'tlɔnblɩkʋcinyaa 'fɩan 'tʋpla. Nyɩbhɛlʋa ya ŋlʋgbɩɔa 'cla lebhe: «Lʋʋ 'tʋtʋʋntʋa ‑n ‑wa 'lɛ na, 'clalɩɩn mʋ ‑ma n cɩɔ mʋ 'nyɩ.» 23'Nyɩ ɔ ya ta, ɔ ya 'cla lebhe: «Lʋʋa ‑tɛtɛa ‑n ‑cɩ kaan 'lɛ 'clalɩ, 'na 'bhlɩa 'la 'kle 'titii ‑ka 'lɛ ‑kʋo na, n cɩɔ mɩ 'nyɩ.» 24Ŋlʋgbɩɔa ya ‑zɔnwlʋ, ɔ ya ɔ 'nɔ neencla lebhe: «'Lɩsaa 'titi n cɩ 'kaa 'lɛ 'clalɩ bha?» Ɔ 'nɔ yɔɔ 'cla lebhe: «'Nyuwluzʋnyɔ Zaan 'la 'wlua.» 25'Faanfan, ɔ ya ble, ɔ ya nyɩbhɛlʋa cɩ mɛ 'nyɩ ɔ yɔɔ 'cla lebhe: «N ‑wa lebhe ‑n 'nyɩɩn ‑pɔtɔnʋ 'Nyuwluzʋnyɔ Zaan 'la 'wlua 'cɛnzɩ nɩkplaan!» 26Nyɩbhɛlʋa 'nyɛkɛ yɔɔ 'kɔtɔ, ‑ma ɔla ‑ndanyɩtalɩɛa ɩya 'tlɔnblɩkʋcinyaa 'la gbʋ na, ɔ 'ta 'bɩsalɩɛ mino. 27Dɩpɩa bhlogbɩɩ nyɩbhɛlʋa ya 'sojanyɔ bhlo lobhu le ɔ ‑lamʋ Zaan 'la 'wlua. 'Sojanyɔa ya ‑palʋʋnpapalʋa ‑zɔn mʋ 'nyɩ ɔ ya Zaan 'wlu 'kʋdɩ, 28ɔ yʋʋ 'cɛnzɩ nɩkplaan zʋ 'nyɩ ɔ yʋʋ ‑lamʋ. Ɔ yʋʋ ŋlʋgbɩɔa 'nyɩ, 'nyɩ ɔ yʋʋ ɔ 'nɔ 'nyɩnɩ. 29Daa Zaan 'la gɩlɩnyaa* 'nu 'lɛ ɔla 'kudɩa na, ma ya ɔla ‑blaanyɛkɛa 'ma 'nyɩ ma yɛɛ lesu nɩkplaan zʋ.

Zozii ya ncaatabhliwli ‑ngbi nyɩ 'nyɩ

(Mat 14.13-21; Luk 9.10-17; Zan 6.1-15; Mak 8.1-10)

30Lobhulobhunyaa* ya Zozii cɩ 'wluwlalɩ 'nyɩ ma yɔɔ ɩmɩa ‑tɛtɛa ma nʋa 'lɛ 'nyɩ ma caa 'lɛ na, 'dɩkʋsalɩ. 31Ɔ ya maa 'cla lebhe: «Anyɩ, a ci, ‑a gbɛga, ‑a mʋ daa ‑ɩ ‑kʋ 'lɛ ɩcɩɩn na ɩya a 'ka 'pɛpɛ nyɔkwɛ.» Sa ncaabhutukpa 'plɩplɩlɩa 'lɛ 'kʋ na, 'ɩ 'nyɩ 'taa maa ‑jioli ‑ylɛylɛ ɩya ma 'kaa li. 32Ma ya gɔlʋʋn 'tɔ 'nyɩ ma ya, daa ‑ɩ ‑kʋ 'lɛ ɩcɩɩn na mʋ. 33Ma ‑kʋa 'lɛ mʋda na, ncaabhutukpa ya maa 'lɩ 'nyɩ ma ya daa ma mʋa 'lɛ na cibhlili. Ma ya 'dia 'fɩan 'kʋ 'wlʋlʋ, ma ya namʋ 'nyɩ ma ya gbazɩa Zozii ɩya ɔla gɩlɩnyaa* mʋa 'lɛ na, ‑bɛɛ ŋenili.

34Daa ɔ 'wlʋ 'lɛ gɔlʋa nɩkplaan na, Zozii ya ncaabhutukpa ‑naa 'lɩ, ma yɔɔ ŋaazɩ ‑pla, sa mala gbɩa ‑kʋa le 'bhlabhlɩa ‑ɩ 'ta 'lɛ kpanyɔ ‑ka na 'bhisa. 'Nyɩ ɔ ya maa wɔɔbhutukpa calɩɛ bhɔ. 35Sa 'ylʋa yaanɩa 'lɛ tooto 'plɩ na, gɩlɩnyaa yɔɔ cɩ mɛ 'nyɩ ma yɔɔ 'cla lebhe: «‑Daa ‑kʋ ɩcɩɩn 'nyɩ 'ylʋa ya tooto 'plɩ. 36'Talɩnɩ maa 'cin, ma 'ka 'dia ‑ɩ ‑tutoluo 'lɛ ‑anyɩ na, 'kʋ mʋ ɩya ma 'ka lililɩɩ ‑pɩa.» 37Zozii ya maa 'cla lebhe: «Anyɩ 'titi a 'nyɩ maa nyɩ!» Ma yɔɔ 'cla lebhe: «Ka ‑a cɩ 'lɛ mʋ ɩya ‑a ka clɩɩ ‑gwlɩɩ 'kʋgba 'la dluuplʋdala 'ma ɩya a ka 'flawo ‑pɩa ɩya ‑a ka 'lɛ maa 'nyɩ bha?» 38Zozii ya maa 'cla lebhe: «'Flawi ‑zlʋsaa a ‑ka 'lɛ bha? A mʋ a kope.» Ma 'cla 'lɛ neen na, ma yɔɔ 'cla lebhe: «‑A ‑ka 'flawi ‑ngbi ɩya ‑zlii ‑mɔsɔ.» 39Ɔ ya maa 'cla lebhe ma zʋ maa 'fɩan, ‑kandi ‑kandi, ‑pitia 'kʋ. 40Ma ‑kʋanɩa ‑kandi ‑kandi: Ncaagwlɩɩ ‑ngbi (100) 'la ‑kandi ɩya ncaagwlɩɩ ‑mɔsɔ ɩya 'kʋgba (50) 'la ‑kandi. 41Zozii ya 'flawia ‑ngbia ɩya ‑zliia ‑mɔsɔa 'ma 'nyɩ ɔ ya ‑laagɔɔn kope, ɔ ya Laagɔ bhɔlʋ, ɔ ya 'flawia 'kliindɩdɩlɩ 'nyɩ ɔ yɩɩ gɩlɩnyaa 'nyɩnɩ le ma 'kɩɩ maa poli. Ɔ ya maa 'fɩan ‑zliia ‑mɔsɔa ‑ma poli. 42Maa 'fɩan ya li 'nyɩ ma ya lo. 43Ma ya 'flawiklia ɩya ‑zliiklia ‑ɩ ‑toa 'lɛ na 'kʋbhli. Ɩ ya ‑toku 'kʋgba ‑mɔsɔ 'kʋye. 44Maa ‑ɔ lia 'lɛ 'flawia na, ma ‑glɩa ncaaŋodie ‑tabhliwli ‑ngbi (5000).

Zozii ya 'nyi 'kʋtaan namʋnʋ

(Mat 14.22-33; Zan 6.16-21)

45'Kplookʋ, Zozii ya ɔla gɩlɩnyaa* gɔlʋʋn zʋ le ma pʋ 'kʋklʋʋn ɩya ma 'tɔ 'nyia Bɛsayida -gbazɔa, daa ɔmɔ 'titi 'talɩ kaka 'lɛ ‑alawleea 'cin ‑bhlɛ na. 46Daa ɔ 'talɩ 'lɛ maa 'cin na, ɔ ya 'kike bhlo 'wlu ‑gblaa le ɔ 'ka bhibhie.

47Daa 'ylʋ bhli 'lɛ na, gɔlʋa ‑kʋanɩa 'nyi ‑sidian 'nyɩ ɔmɔ bhlo ‑kʋanɩa 'lɛ 'nyigean. 48Ɔ lɩ 'lɛ lebhe gɩlɩnyaa mino 'taanɩa gɔlʋa 'lulɩɛ, sa ‑pupolua cilia maa gbatlɩ na, ziplisa 'la 'klia nɩkplaan, ɔ ya 'nyia 'kʋtaan namʋnʋ, ɔ ya maa 'bɩɩnmʋnʋ 'nyɩ ɔ ya ma cɩplɩplɩsa nʋ. 49Daa ma 'lɩɔ 'lɛ 'nyia 'kʋtaan namʋnʋda na, ma ya gugu le 'kuo nɩnanɩa 'lɛ maa 'nyɩ ma ya 'kasɛ 'palɩɛ bhɔ. 50Sa maa 'fɩan ya 'mɔɔ 'lɩ 'nyɩ pɔlɛɛn ya maa 'wlʋ na. 'Kplookʋ, ɔ ya nesa 'nyɩ ɔ ya maa 'cla lebhe: «Ŋanɔ 'la 'bhlaa anyɩ! A kalɩ pɔɔtɛtɛ, ‑amʋ ‑kʋ 'lɛ!» 51Daa ɔ 'tɔ 'lɛ gɔlʋa nɩkplaan ‑jaa na, ‑buboa ya ‑dʋdʋ 'kʋ ci 'nyɩ nikpoo ya maa sla 'kadieda. 52Sa ma 'taa 'flawia 'la wɔlɩa ‑zɔn 'nu ‑ylɛylɛ, mala pɔlɩa ‑titlilio kaa.

Zozii ya Zenezalɛtɩ bhlɩa 'kʋ guzenya jabha

(Mat 14.34-36; Zan 6.22-25)

53Ma 'tɔ 'lɛ 'nyia na, ma ya Zenezalɛtɩbhlɩa 'kʋ 'pɛ. 54Daa ma 'wlʋ 'lɛ gɔlʋa nɩkplaan ‑jaa na, ncɛlɩ ya Zozii cibhlili. 55Ma 'plɩlɩa 'bhlɩa 'la 'dia ‑tɛtɛa 'kʋ, ma bhɛa guzenyaa 'kʋpʋlɩɩ 'kʋ 'nyɩ ma lamʋa maa da 'tʋtʋʋntʋa ma nua 'lɛ lebhe ɔ ‑kʋa na. 56Daa 'fɩan ɔ blea 'lɛ na, dicʋ, dikadɩ, ‑aana ‑bhlidi 'kʋo, ma lamʋa guzenyaa 'clikpua nɩkplaan, ma zɩzlaa 'nyɩ ma 'clalɩa 'mɔɔ le ɔ 'talɩa maa 'cin ɩya ma 'kaa ɔla lokwia 'la numlua ‑tɛɛ cɩkla 'nyɩ maa 'fɩan ‑ɔ klaa 'mɔɔ 'lɛ cɩ na, ma ya jabha.

Currently Selected:

Mak 6: NTLD13

Highlight

Copy