Mak 5

Zozii ya 'wugonyunyunyɔ bhlo jabha

(Mat 8.28-34; Luk 8.26-39)

1Zozii ɩya ɔla gɩlɩnya* ya 'nyia 'tɔ 'nyɩ ma ya Zelasaabhlɩa 'kʋ ŋeni. 2Daa Zozii 'wlʋ 'lɛ gɔlʋa nɩkplaan ‑jaa na, 'wugonyunyɔ bhlo ya lesikpaa nɩkplaan 'wlʋlʋ 'nyɩ ɔ yɔɔ 'bɩɩncili. 3Lesia nɩkplaan ‑glɩa 'lɛ ɔla kʋkʋda. 'Nyɩ nclɔɔ bhlogbɩɩ mino 'taanɩa 'mɔɔ gʋalɩɛ, ‑abhluaka 'titio nɩkplaan. 4Sa ma zʋa ‑azlaa 'mɔɔ 'kpamu ɩya ‑abhluakɩ nɩkplaan, ‑ma ka ‑tɛɛ ɔ gbʋgbɔlʋa 'kpamua 'nyɩ ɔ dɩa ‑abhluakɩa. Nclɔɔ bhlogbɩɩ 'tanɩa ɔla ‑sɩatɛtɩ ‑ka. 5Bhlibhliylʋ ɩya zezezeli nɩkplaan, ka ‑tɛɛ ɔ 'plɩplɩlɩa 'lɛ lesia nɩkplaan ɩya 'kikia 'wlu 'kʋ, ɔ paa 'lɛ 'kasɛ, ɔ maa 'lɛ cɔkʋ 'nyɩ ɔ kplekplelia ɔcɩ. 6Daa ɔ 'lɩlɩ 'lɛ Zozii 'vʋʋn na, ɔ ya sɔmɩfa 'nyɩ ɔ yɔɔ ‑deliin ‑kukoonkplii sasla. 7Ɔ ya nɩkplaan ‑gaa 'nyɩ ɔ ya 'cla lebhe: «Zozii, 'Kʋzilo Laagɔ 'la 'Cʋ, wɔɔsaa ‑ɔ ‑kʋa 'lɛ n ‑yɔɔsɔ ‑gbaaglɩɩn bha? N slɔɔ 'wlu Laagɔ 'la 'ŋlɩa nɩkplaan, ‑naa zʋan ‑vʋʋ!» 8Sa Zozii claa 'mʋʋ lebhe: «'Wugo ‑nyunyu, 'wlʋ nclɔɔ ‑naa nɩkplaan!» 9Zozii yʋʋ neencla lebhe: «‑Naa 'ŋlɩ?» Ʋ yɔɔ 'cla lebhe: «'Na ŋlɩ ‑glɩ 'lɛ zulobuo, sa ‑a ‑zu ‑gbɔɔn na.» 10Ʋ zɩzlalɩa Zozii cɩ le ɔ 'la 'tlia maa 'bhlɩa 'kʋ. 11Bhuzikpa 'kadie ‑kʋa 'dɛ 'kikea cɩ 'nyɩ a lia. 12'Wugwi ‑nyinyia ya Zozii 'wlusla 'nyɩ ɩ yɔɔ 'cla lebhe: «Falɩ ‑anyɩ bhuzia nɩkplaan, 'talɩ ‑anyɩ 'cin ɩya ‑a kɩɩ nɩkplaan ble.» 13Ɔ yɩɩ 'dɛ 'la ‑jiolia 'nyɩ. Ɩ ya ‑zɔnwlʋ 'nyɩ ɩ ya bhuzia nɩkplaan ble. Bhuzikpaa ya 'kikea 'wlu 'wlʋ, a ya 'nyia nɩkplaan 'kɔsɔ 'nyɩ a ya 'kʋmla. Ɩ cɩa ‑sa bhuzi ‑tabhli ‑mɔsɔ (2000) 'wlʋ.

14Bhuzia 'la kpanyaa ya 'gu 'nyɩ ma ya duku ɩya ‑bhlidia 'kʋ 'dɩ fa. 'Nyɩ ncɛlɩ ya ci le ma 'ka ɩmɩa ‑ɩ 'plɩ 'lɛ na 'lɩ. 15Ma ya Zozii cɩ ŋeni 'nyɩ ma ya nclɔɔa 'wugwi ‑nyinyi ‑bhutukpaa ‑kʋa 'lɛ nɩkplaan na 'lɩ, ɔ ‑kʋa 'dɛ sa, ɔ ‑bibiea lokwi 'nyɩ ɔ ‑falɩa ɔcɩ pɔlɛ cɩ. Na, ŋanɔ ya maa pla. 16Maa ‑ɔ 'lɩmʋa 'lɛ ɩmɩ ‑naa 'la da na, ma ya maa ɩmɩa ‑ɩ ŋenia 'lɛ 'wugwinyinyinyɔa ɩya bhuzia na, 'dɩkʋsalɩ. 17Ma ya Zozii 'wlusla le ɔ 'wlʋ mala 'bhlɩa 'kʋ.

18Daa Zozii ‑kʋ 'lɛ gɔlʋa nɩkplaan 'tɔda na, nclɔɔa 'wugwi ‑nyinyia 'wlʋ 'lɛ nɩkplaan na, ɔ yɔɔ bhibhie le ɔ famʋɔ. 19‑Ma Zozii 'ta ŋonu, ɔ yɔɔ 'cla lebhe: «Cɔlɔ, mʋ 'sleen, ‑naa ncɛlɩ cɩ ɩya ‑n solu maa ɩmɩa ‑Kwlenyɔ, ɔla ŋaazɩɩnlɩlɩɛa nɩkplaan, ɔ nʋ 'lɛ 'nyɩ ɔ yɔɔ 'lɛ 'nyɩ na.» 20Nclɔɔa ya mʋ 'nyɩ Dekapɔlʋbhlɩa 'kʋ, ɩmɩa 'fɩan Zozii nʋɔ 'lɛ cɩ na, ɔ salɩa 'mɩ 'dɩ 'kʋ. 'Nyɩ maa 'fɩan ‑ɔ 'nua 'mɔɔ 'lɛ neen na, nikpoo ya maa sla.

Zayiwlusu ‑nyɔŋlɔ ɩya 'ŋlɔa ‑ɔ klaa 'lɛ Zozii 'la lokwia cɩ na

(Mat 9.18-26; Luk 8.40-56)

21Zozii ya gɔlʋʋn 'tɔ 'nyɩ ɔ ya gbazɩa ɔ 'wlʋlʋa 'lɛ na, cɔlɔ. Ncaabhutukpa yɔɔ cɩ 'wluwlalɩ. Ɔ ‑kʋa 'nyia cɩ. 22Zifʋnyaa* 'la bhibhiepalʋa* tocɩa nɩkplaan bhlo, ma lɔɔ Zayiwlusu, ɔ ya ci. Ɔ 'lɩ 'lɛ Zozii na, ɔ yɔɔ ‑deliin ‑kukoonkplii sasla, 23ɔ ya zɩzla 'nyɩ ɔ yɔɔ 'cla lebhe: «'Na 'ciŋlʋcʋkwlaa ɔ ‑kʋ 'kwɩ neen, ci ‑n ‑gbɛɔ sɔ 'kʋ, ɔ 'ka jabha ɩya ɔ 'ka kʋ.» 24Zozii ‑yɔɔsɔ ya mʋ. Ncaabhutukpa gɩlɩa 'mɔɔ 'nyɩ ma mɛmɛnɩa 'mɔɔ.

25'Ŋlɔ bhlo ‑dolu wlʋa 'mɔɔ cɩ ‑aan liowli 'kʋgba ‑mɔsɔ 'wugo. 26Ɔ ya ‑dɔtɛcɩ ‑bhutukpa wlɩɩn sɛlɩ, ɔla 'dalaa 'fɩan ɔ ‑kaa 'lɛ na, ɔ yaa nyumo. Ɔ 'tɩɩ jabhʋ bhlogbɩɩ nɩkplaan 'lɩlɩ, ‑ma ka ‑tɛɛ ɔla gua nylanylanɩa 'lɛ 'kʋ. 27Ŋlɔɔ ‑naa ya Zozii 'la wɔlɩ 'nu. Ɔ ya ‑alawleea sidiin ci, ɔ yɔɔ leen 'wlʋlʋ 'nyɩ ɔ ya ɔla lokwia cɩkla. 28Ɔ claa ɔcɩ lebhe: «Gbazɩ n ‑kaa mino 'nyɩ n ‑kaa ɔla lokwia ‑tɛɛ cɩkla na, n cɩa jabha.» 29'Kplookʋ, ‑dolua ‑ʋ wlʋa 'mɔɔ 'lɛ cɩ na, ya nɩkplaan do 'nyɩ ɔ ya ɔla 'nyɛkɛa nɩkplaan 'lɩ lebhe ɔ ya jabha. 30Dɩpɩa bhlogbɩɩ, Zozii ya 'lɩ lebhe 'tɛtɩ bhlo yɔɔ nɩkplaan 'wlʋ. ‑Alawleea sidiin, ɔ ya kwlacala 'nyɩ ɔ ya neencla lebhe: «‑Ɔ klaa 'lɛ 'na lokwia cɩ bha?» 31Ɔla gɩlɩnyaa* yɔɔ 'cla lebhe: «‑Mɔ 'titi ‑n ‑jlɛ ‑alawleea ‑a mɛmɛnɩɔ 'lɛ na 'nyɩ ‑n cla neen lebhe: Ncaasaa ‑ɔ klaan 'lɛ cɩ bha?» 32‑Ma ɔmɔ, ɔ kopea ɔcɩ cɩ le ɔ 'kaa ɔmɔa ‑ɔ nʋ 'lɛ sɛɛ na cibhlili. 33Sa 'ŋlɔa ‑cia 'lɛ ɩmɩa ‑ɩ 'plɩlɩɔ 'lɛ 'kʋ na, pɔɔvʋ yɔɔ kla, ɔ tɩtɛlɩa, ɔ ya ci, ɔ ya Zozii ‑deliin ‑kukoonkplii sasla 'nyɩ ɔ yɔɔ ‑nʋawlɛa 'fɩan solu. 34Zozii yɔɔ 'cla lebhe: «N ‑nyɔŋlɔ, ‑naa pɔɔtɛtɛa yɔɔ jabha. Mʋnʋ pupueen ɩya ‑naa gua ʋ bhɩa.»

35Wɔlɩ ‑naa, ɩ ‑kʋ kaa 'mɔɔ neen 'nyɩ ncɛlɩ ya 'lɛ Zayiwlusu 'bhisleen 'wlʋlʋ, ma ya 'lɛ ci 'nyɩ ma yɔɔ 'lɛ 'cla lebhe: «‑N ‑nyɔŋlɔ ya 'ku. 'Lɩsaa 'la gbʋ ‑n bhɩaka ‑awlɛ 'lɛ Canyɔa 'kwlɩ bha?» 36Zozii 'ta mala wɔɔnyɩtʋa 'kʋmanɩ, ‑ma ɔ ya Zifʋnyaa* 'la bhibhiepalʋa* toa 'cla lebhe: «Pɔlɛɛn 'la 'wlʋɔ, pɔɔtɛtɛ ‑tɛɛ 'nyɩ ‑n kalɩ.» 37‑N 'ta Pɩɛlɩ, Zakɩ ɩya ɔ bholi Zaan ‑tɛɛ na, ɔ 'ta ‑buun nclɔɔ ‑jioli 'nyɩ le ɔ fɔɔ. 38Ma ya Zifʋnyaa 'la bhibhiepalʋtoa 'bhisleen ŋeni. Zozii lɩ lebhe 'slea ‑gblogbloluo, ncɛlɩ tu 'nyɩ ma paa 'kasɛ. 39Ɔ ya ble 'nyɩ ɔ ya maa 'cla lebhe: «'Lɩsaa 'la gbʋ 'slea ‑gblogbloluo 'lɛ 'nyɩ a tua 'lɛ ‑sa bha? 'Cileea 'ta ka 'ku, ‑ma ka ɔ ŋɔmʋ 'lɛ.» 40Ma nyanɩa 'mɔɔ. Ɔ ya maa 'fɩan ‑zɔnwla 'nyɩ ɔ ya 'cileea to, ɔ 'nɔ ɩya maa ‑tɛɛa ‑ɔ faa 'mɔɔ 'lɛ na, 'ma 'nyɩ ma ya ‑palʋa ‑zɔan 'cileea ‑kʋa 'lɛ na, ble. 41Ɔ ya 'cileea 'la sɔa 'kʋbhli 'nyɩ ɔ yɔɔ 'cla lebhe: «Talita kum», ɩ sa ‑zɔn lebhe: «Ŋlʋgbɩɔco, ‑bho 'kʋ, ‑amʋ ‑ɔ clɔɔ 'lɛ sɛɛ.» 42'Kplookʋ, 'cileea ya 'kʋbho 'nyɩ ɔ ya 'namʋ zʋ, sa ɔ ‑glɩa liowli 'kʋgba ‑mɔsɔco na. Maa ‑ɔ ‑kʋa 'lɛ 'dɛ na, neen ya maa yɛ. 43Zozii ya maa 'cla le ma 'la solua wɔlɩ ‑naa nclɔɔ bhlogbɩɩ 'nyɩ ɔ ya ‑awlɛ maa 'cla le ma 'nyɩɔ nyɩ.

Currently Selected:

Mak 5: NTLD13

Highlight

Copy