Mak 4

Golonyɔa 'la ‑nyandla

(Mat 13.1-9; Luk 8.4-8)

1'Yɛpɩ 'nyia cɩ, Zozii ya ‑awlɛ calɩɛ bhɔ. Ncaabhutukpa yɔɔ cɩ 'wluwlalɩ. Mala zuloa 'la gbʋ na, ɔ ya gɔlʋʋn 'tɔ 'nyia 'kʋtaan 'nyɩ ɔ ya sakʋ. ‑Alawleea ‑kʋa ‑dʋdʋa 'kʋ 'nyia cɩ. 2‑Nyandla nɩkplaan, Zozii caa maa wɔɔbhutukpa. Ɔla cacawɔlɩa nɩkplaan, ɔ claa maa lebhe: 3«A po 'nyukwliin! 'Lɩka golonyɔa ya ‑zɔnwlʋ le ɔ 'ka ɔla gologololɩɩa 'moni. 4Na, daa ɔ ‑kʋa 'mɩɩ 'lɛ 'monida na, 'ca ‑ana ya ‑gugwiea cɩ bhlili, libhli ya ci 'nyɩ ɩ ya 'a 'fɩan li. 5‑Ana ya cokwie 'kʋ, daa ‑dʋdʋ 'ta 'lɛ ‑zu na, bhlili. 'Kplookʋ, a ya 'wlʋ sa ‑dʋdʋa 'taa ku ‑ka na. 6‑Ma daa 'ylʋa ‑glɛɛn 'lɛ na, gologololɩɩ ‑naa, sa ɩ 'ta ka 'lɛ ‑sikplii 'pa na, ɩ ya 'kʋ si 'nyɩ ɩ ya yɛ. 7Gologololɩɩa ‑anɩ ‑ma, ɩ ya 'ŋupiti nɩkplaan bhlili. 'Ŋua yɩɩ 'wlu gʋagʋalɩ, ɩ ya gba na, ɩmɩ ‑ma ɩ 'ta 'ca tlʋ. 8'Nyɩ ‑awlɛ, gologololɩɩa ‑anɩ ‑ma, ɩ ya 'lɛ ‑dʋdʋ 'nanʋ 'kʋ bhlili. Ɩ ya 'wlʋ, ɩ ya 'kʋnama 'nyɩ ɩ ya tlʋ. ‑Anɩ, ‑gwlʋʋ ɩya 'kʋgba, ‑anɩ, ‑gwlɩɩ ‑mɔta, ‑anɩ ‑gwlɩɩ ‑ngbi.» 9'Nyɩ Zozii claa lebhe: «Ɔmɔa ‑ɔ ‑ka 'lɛ 'nyukwli le ɔ 'ka 'nu na, 'naa ɔ 'nu.»

Wɔlɩa 'la gbʋa Zozii bu 'lɛ ‑nyandla na

(Mat 13.10-17; Luk 8.9-10)

10Daa Zozii ‑salɩ 'lɛ ‑alawleea ‑vakɩ na, 'kʋgba ‑mɔsɔa ɩya maa ‑ɔ kʋ ‑azlɔɔ 'lɛ cɩ na, ma yɔɔ neencla lebhe: «'Lɩsaa 'la gbʋ ‑n nyɩtɛlɩa 'lɛ ‑nyandla nɩkplaan bha?» 11Ɔ ya maa 'cla lebhe: «Laagɔ 'la Nyɩbhɛlɩdua* 'la wɔlɩa ‑ɩ ‑zizieo 'lɛ na, anyɩ ɩ ‑nyɩɔ 'lɛ le a cibhlilii. ‑Ma maa ‑anʋa ‑ɔ ‑kʋ 'lɛ ‑jlukuun na, ‑nyandla nɩkplaan ma 'nunu 'lɛ wɔlɩa ‑tɛtɛa 12ɩya ka ma ‑ka ‑jlɛ 'titio na, ma 'la ka salɩ, ka ma ‑ka ‑ŋlɛ 'titio na, ma 'la ka 'nu. Ma 'la ka sɛ kwlacala ɩya mala nyinyia ɩ 'la ka sɛ maa ‑vɔɔ!»

Zozii ya golonyɔa 'la ‑nyandlaa ‑zɔnsa

(Mat 13.18-23; Luk 8.11-15)

13'Nyɩ Zozii ya ‑awlɛ maa 'cla lebhe: «A 'nu 'ta ‑nyandla ‑naa 'la ‑zɔn! Na, 'nsasa a cɩ 'kaa 'lɛ daa ‑nyandlaa ‑tɛtɛa 'la ‑zɔn 'nu bha? 14Golonyɔa, Laagɔ 'la wɔɔnyɩtʋa ɔ golo 'lɛ. 15Gologololɩɩa, ‑ɩ bhlili 'lɛ ‑gugwiea cɩ na, ɩ ‑glɩ maa ‑anʋa wɔɔnyɩtʋa ya 'lɛ nɩkplaan ‑goloo na. ‑Ma daa ma yʋʋ 'lɛ 'nu na, 'kplookʋ Sataan* ci 'nyɩ ɔ sa mala pɔlɩa nɩkplaan wɔɔnyɩtʋa ‑ʋ ‑golo 'lɛ 'yɛpɩ na. 16Ɩmɩa ‑ɩ bhlili 'lɛ cokwiea 'kʋ na, ɩ ‑glɩ maa ‑anʋa ‑ɔ ‑ka 'lɛ wɔɔnyɩtʋa 'nu 'nyɩ 'kplookʋ ‑ma 'manɩʋ 'lɛ pɔlɛkʋmɛnɔ nɩkplaan na. 17‑Ma, wɔɔnyɩtʋa 'lɩ 'ta ‑jioli ɩya ʋ 'ka mala pɔlɩa nɩkplaan ‑sikplii 'palɩ, sa ma kaci wɔɔgugwie 'faanfan na. Daa 'kwlɩbhɩɛ ‑aana gbaylɩsalɩɛ ya 'lɛ maa ŋeni ‑jaa, wɔɔnyɩtʋa 'la gbʋ na, ka mala pɔɔtɛtɛa bhli 'lɛ. 18Ɩmɩa ‑ɩ bhlili 'lɛ 'ŋua sidiin na, ɩ ‑glɩ maa ‑anʋa ‑ɔ ya 'lɛ wɔɔnyɩtʋa 'nu, 19‑ma ‑laagɔzɔan 'la pɔɔplelie, 'bhɛlɩlilie 'la gɩlɩlɩɛ ɩya ‑awlɛ ‑buun lɩɩ 'la 'matɩɛ ble maa pɔlɛɛn, ɩ gʋa wɔɔnyɩtʋa 'nyɩ ʋ plɩ 'kpɔkpɔ. 20Ɩmɩa ‑ɩ bhlili 'lɛ ‑dʋdʋ 'nanʋa 'kʋ na, ɩ ‑glɩ maa ‑anʋa, ‑ɔ nu 'lɛ wɔɔnyɩtʋa, ‑ɔ 'mʋʋ 'lɛ 'nyɩ ‑ɔ tlʋ 'lɛ 'ca na, ‑anʋa ‑glʋʋ ɩya 'kʋgba, ‑anʋa, ‑gwlɩɩ ‑mɔta, ‑anʋa, ‑gwlɩɩ ‑ngbi.»

‑Kanie ɩya ‑bɩɔlʋʋ 'la ‑nyandla

(Luk 8.16-18)

21Zozii ya ‑awlɛ maa 'cla lebhe: «Nclɔɔ ŋama 'ta ‑kanie ɩya ɔ 'kɛɛ ‑tokuo 'wlu ‑gblii ‑aana ɔ 'kɛɛ 'kusi ‑zɔn zʋ. ‑Ma ka ɔ gbeziee 'lɛ. 22‑Tɛtɛa 'fɩan ‑ɩ ‑zizieo 'lɛ na, ɩ cɩ 'ka ‑zɔnwlʋ ɩya ɩmɩa 'fɩan ‑ɩ ‑wɔlɩɔ 'lɛ 'kʋ na, ɩ 'ka 'kʋwɔlɩkʋwlʋ 'kpataa. 23‑Ɔ ‑ka 'lɛ 'nyukwli le ɔ 'ka 'nu na, 'naa ɔ 'nu.» 24Zozii ya ‑awlɛ maa 'cla lebhe: «A falɩ ɩmɩa a nu 'lɛ na, pɔlɛ cɩ! ‑Bɩɔlʋʋa a cɩ 'ka 'lɛ 'ma, a 'ka ‑bɩɔ na, ʋmʋ cɩ 'ka 'lɛ anyɩ ‑ma ala ‑bɩɔlʋʋ 'plɩ 'nyɩ ma cɩ ‑awlɛ anyɩ ‑gbɔɔn 'nyɩ. 25Sa ɔmɔa ‑ɔ ‑ka 'lɛ na, ma cɩ 'kɔɔ 'nyɩ, ‑ma ɔmɔa ‑ɔ 'ta 'lɛ ‑ka na, 'pɛpɛa 'titia ɔ ‑ka 'lɛ na, ma cɩ 'kɔɔ mɔ ‑salɩ.»

Gologololʋʋa ‑ʋ 'wlʋlʋ 'lɛ ʋcɩ 'kʋ na

26Zozii ya ‑awlɛ 'cla lebhe: «Laagɔ 'la Nyɩbhɛlɩdua* 'la gbɩa ‑kʋ le saa nclɔɔ bhlo moni 'lɛ gologololɩɩ ‑dʋdʋ 'kʋ na. 27Ka ɔ ‑ka ŋɔmʋo ‑aana ka ɔ ‑ka ‑gao na, zezezeli ɩya bhlibhliylʋ nɩkplaan, ɔ 'ta saa gologololɩɩa ɩ 'wlʋwlʋlʋ 'lɛ ‑aana, saa ɩ 'pʋpʋlʋ 'lɛ na ‑ci. 28‑Dʋdʋa ʋmʋ 'titii gba 'lɛ 'nyɩ gologololɩɩa wlʋ 'lɛ ‑piti 'bhisa ‑bɛɛ, 'fɩɔn ɩ 'bhʋabhʋalɩ 'lɛ 'nyɩ ɩ tlʋ 'lɛ. 29'Nyɩ daa 'caa ya 'lɛ zalɩ na, ma dɩɩ 'lɛ, sa 'dɩdaa ya ŋeni na.»

‑Mutadɩsucie

(Mat 13.31-32; Luk 13.18-19)

30Zozii ya ‑awlɛ 'cla lebhe: «'Lɩsaa ‑a ‑cɩ kaa 'lɛ Laagɔ 'la Nyɩbhɛlɩdua* palalɩ, ‑aana ‑nyandlaa saa nɩkplaan ‑a ‑cɩ kaa 'lɛ ʋla cɩa wɔlɩa nyɩtɛlɩ bha? 31Ʋla gbɩa ‑kʋ le ‑mutadɩsucie. Ma ‑kɛɛ goloda ‑kʋ na, ɛ ‑glɩ 'pʋpʋ ‑naa 'kʋ 'la sicaa 'fɩan sidiin, 'la ‑lɩɩco. 32‑Ma daa ɛ ya 'lɛ ‑goloo 'nyɩ ɛ ya 'lɛ 'wlʋ na, ɛla sua 'ghlibholi 'nyɩ ʋ zi godikwla nɩkplaan 'la sia 'fɩan 'kʋ. Ʋ zʋ 'labhɩ 'kadɩ, ɩ gba na ‑laagɔɔn 'la libhlia mino 'nyɩ ɩ 'slalɩɩ ɩla ‑palɩ nɩkplaan.»

‑Nyandla nɩkplaan ‑tɛɛ Zozii calɩ 'lɛ

(Mat 13.34-35)

33‑Sa 'la ‑nyandla ‑bhutukpa, ma cɩa 'lɛ 'nulɩɛ mino na, nɩkplaan Zozii solulua 'lɛ maa Laagɔ 'la wɔlɩa. 34‑Nyandla nɩkplaan ‑tɛɛ ɔ solulua 'lɛ maa, ‑ma ɔya ɔla gɩlɩnyaa* ‑kaa macɩɩn ‑kʋ na, dɛ ɔ saa 'lɛ maa ‑nyandlaa 'fɩan ‑zɔn.

Zozii ya ‑bubo ‑dʋdʋ 'kʋ ‑la

(Mat 8.18,23-27; Luk 8.22-25)

35'Dɛ 'la clɩɩa 'kʋ, daa 'ylʋ mʋ 'lɛ na, Zozii ya ɔla gɩlɩnyaa 'cla lebhe: «‑A 'tɔ 'nyi.» 36Ma ya ‑alawleea cɩɩnwlʋlʋ, ma ya gɔlʋa nɩkplaan ɔ ‑kʋa 'lɛ na 'tɔ 'nyɩ ma ‑yɔɔsɔ ɩya ‑buun -gɔlɩ mʋnʋa cɩ. 37‑Bubo ya 'ma 'nyɩ saa 'titia 'nyigagbɩa diea 'lɛ ɩcɩ gɔlʋa na, ʋ ya 'nyu 'kʋ yelɩɛ bhɔ. 38‑Ma ɔmɔ, ɔ ‑kʋlʋa 'gɔgbadaa, ɔ pʋa 'wlutelilʋʋ 'kʋ 'nyɩ ɔ ŋɔmʋa. Ma yɔɔ galɔ 'nyɩ ma yɔɔ 'cla lebhe: «Canyɔ, ‑a ku 'lɛ na, 'ɩ nʋ 'tɔɔ lʋʋ ‑ylɛylɛ bha?» 39Ɔ galɔ 'lɛ na, ɔ ya ‑buboa 'wlugaalɩ 'nyɩ ɔ ya 'nyia 'cla lebhe: «‑La ‑ncɩ ‑dʋdʋ 'kʋ, 'plɩ 'cɩɩ!» ‑Buboa ya ‑dʋdʋ 'kʋ ci 'nyɩ daa ‑tɛtɛa ya 'cɩɩplɩ. 40Zozii ya maa 'cla lebhe: «'Lɩsaa 'la gbʋ ŋanɔ bhlaa 'lɛ ‑sa anyɩ bha? A 'ta ka ‑azla pɔɔtɛtɛ ‑ka bha?» 41Pɔlɛɛn ‑wlʋa maa 'kadieda 'nyɩ ma 'claclalɩa neen lebhe: «Ncaasaa 'titi ɔ ‑glɩa 'lɛ 'nyɩ ‑bubo 'titi ɩya 'nyi 'nyɩɔ 'lɛ 'klʋ bha?»

Currently Selected:

Mak 4: NTLD13

Highlight

Copy