Mat 16

Ncɛlɩ ya Zozii ghleda 'clalɩ

(Mak 8.11-13; Luk 11.16,29)

1Falizɩɛnnyaa* ɩya Saduseyɛɛnyaa* ya Zozii 'bhlɩ mʋ le ma 'kɔɔ 'gbuzu ‑zɔn 'pa, 'nyɩ ma yɔɔ 'cla lebhe ɔ pala maa ghleda bhlo, ‑ɩ 'wlʋlʋ 'lɛ ‑laagɔɔn na. 2‑Ma Zozii ya maa 'cla lebhe: «Gbazɩ 'ylʋ kʋ 'lɛ mʋda 'nyɩ ‑laagɔa nɩkplaan ‑ka ‑kplɔ na, a cla lebhe: ‑Cɩpa daa cɩ 'ka nama. 3'Nyɩ gbazɩ ‑zeli ‑ka ze 'nyɩ ‑laagɔa nɩkplaan ‑ka ‑tuun ‑kʋ na, a cla lebhe: ‑Yaka daa cɩ 'ta nama. Na, a ‑ci ‑sa ɩmɩa ‑ɩ plɩ 'lɛ ‑laagɔa nɩkplaan na ‑zɔnsasa, 'nyɩ 'a mino 'ta 'lɛ ‑pɔtɔnʋ 'la ghledɩa ‑zɔnsalɩɛ bha? 4‑Yaka 'la ncaanyinyia ‑ɔ 'ta 'lɛ Laagɔ 'la 'nyiyilie ‑ka na, ma 'clalɩ ka ghleda! 'Ma cɩ 'ta ‑buun -naanɩ bhlogbɩɩ 'ciinlɩ, ɩ ‑ka ‑kʋ lebhe ‑n 'ta Laagɔnekʋnyɩtɛnyɔ* Zonasɩ 'nɩa ‑tɛɛ na.» 'Nyɩ ɔ ya maa cɩɩnwlʋlʋ, ɔ ya mʋ.

A zʋlʋ Falizɩɛnnyaa ɩya Saduseyɛɛnnya pɔlɛ 'kʋ

(Mak 8.14-21)

5Gɩlɩnyaa* ya 'nyi 'tɔ, ‑ma ma ya bo, ma 'ta 'flawi 'ma. 6Zozii ya maa 'cla lebhe: «A zʋlʋ pɔlɛ 'kʋ! A 'gulu Falizɩɛnnyaa* ɩya Saduseyɛɛnyaa* 'la 'zɩa*!» 7Na, Gɩlɩnyaa claa macɩ lebhe: «‑A 'ta 'lɛ 'flawi 'ma na, dɛ ɔ nyɩtɛ 'lɛ ‑sa.» 8‑Ma Zozii ya mala wɔɔgugwie cibhlili 'nyɩ ɔ ya maa 'cla lebhe: «Ala pɔɔtɛtɛa 'ta 'ghli. 'Lɩsaa 'la gbʋ ala wɔɔgugwiea ‑kʋa 'lɛ 'flawia a 'ta 'lɛ 'ma na 'kʋ bha? 9Anyɩ, a 'ta ka ‑azla 'nu bha? 'A luoli 'ta 'flawia ‑ngbia a poli 'lɛ ncaatabhlia ‑ngbia ɩya ‑tokua a yeli 'lɛ 'klia ‑ɩ ‑to 'lɛ na, ɩla nea bha? 10‑Aana 'a luoli 'ta ‑awlɛ 'flawia ‑ngbɔɔsɔa a poli 'lɛ ncaatabhlia ‑nmɔɔnaa ɩya ‑tokua a yeli 'lɛ 'klia ‑ɩ ‑to 'lɛ na, ɩla nea bha? 11N claa 'lɛ anyɩ lebhe: A 'gulu Falizɩɛnnyaa ɩya Saduseyɛɛnnyaa 'la 'zɩa na, 'nsasa 'nyɩ a 'nu 'ta 'lɛ lebhe ‑n 'ta 'flawi 'la wɔlɩ n solu 'taa 'lɛ anyɩ bha?» 12Na ma yaanɩa 'nu lebhe ‑n 'ta 'flawi 'la 'zɩa ɔ 'ta 'lɛ 'cla lebhe ma 'gulu, ‑ma Falizɩɛnnyaa ɩya Saduseyɛɛnnyaa 'la calɩɛa.

Pɩɛlɩ nabhe Zozii ‑glɩ 'lɛ Laagɔ 'la ‑Sasanyɔa

(Mak 8.27-30; Luk 9.18-21; Zan 6.66-71)

13Zozii ɩya ɔla gɩlɩnyaa* ya 'bhlɩa ma la 'lɛ Sezalee Filipʋ na 'kʋ ŋeni. Ɔ ya maa neencla lebhe: Ncɛlɩ 'la da, ncaasaa «Nclɔɔa 'Cʋa* ‑glɩa 'lɛ bha?» 14Ma yɔɔ 'cla lebhe: «Ncɛlɩ ‑anʋa 'la da, ‑n ‑glɩ 'Nyuwluzʋnyɔ Zaan, ‑anʋa 'la da, Laagɔnekʋnyɩtɛnyɔ* Elii 'nyɩ ‑anʋa ‑ma, mala da, ‑n ‑glɩ 'lɛ Laagɔnekʋnyɩtɛnyɔ Zelemii, ‑aana ‑buun Laagɔnekʋnyɩtɛnyɔ bhlo.» 15Ɔ ya maa neencla lebhe: «'Nyɩ anyɩ 'titi, ncaasaa a laan 'lɛ bha?» 16Simɔɔn Pɩɛlɩ yɔɔ neenŋonu lebhe: «‑Mɔ ‑glɩ 'lɛ Laagɔ 'la ‑Sasanyɔa*, ‑Jajalaagɔa 'la 'Cʋa.»

17Na, Zozii ya nesa 'nyɩ ɔ yɔɔ 'cla lebhe: «Zonasɩ ‑yowli Simɔɔn, ‑n ‑kʋ 'nanɩ, sa n 'ta 'nyɛkɛ ɩya ‑dolu 'tɔɔ 'lɛ ɩmɩ ‑naa pala, ‑ma n Toa ‑ɔ ‑kʋ 'lɛ ‑laagɔɔn na. 18'Nyɩ ‑amʋ, n clɔɔ lebhe: ‑Mɔ Pɩɛlɩ, ‑n ‑glɩ cokwie 'nyɩ cokwie ‑naa 'kʋ n cɩ 'ka 'lɛ 'na Laagɔpalʋa 'slalɩ 'nyɩ 'kwɩ 'la 'tɛtɩa cɩ 'tʋʋ mino. 19N cɩ 'kɔɔ ‑laagɔɔn 'la Nyɩbhɛlɩdua* 'la 'safʋa 'nyɩnɩ ɩya ‑tɛtɛa 'fɩan ‑n ‑cɩ ka 'lɛ ‑dʋdʋa 'kʋ gʋa na, ma 'kɩɩ ‑laagɔɔn gʋamʋ ɩya ‑tɛtɛa 'fɩan ‑n ‑cɩ ka 'lɛ ‑dʋdʋa 'kʋ ‑blulu na, ma 'kɩɩ ‑laagɔɔn ‑blulumʋ.» 20Na, ɔ ya ɔla gɩlɩnyaa 'cla lebhe ma 'la solua nclɔɔ bhlogbɩɩ lebhe ɔmɔ ‑ɔ ‑glɩ 'lɛ Laagɔ 'la ‑Sasanyɔa.

Zozii nyɩtɛ ɔla 'kwɩ ɩya ɔla 'kwɩɩnkʋbhue 'la wɔlɩ

(Mak 8.31-33; Luk 9.22)

21‑Ɩ bhɔlʋ 'lɛ 'dɛ na, Zozii ya ɔla gɩlɩnyaa* 'kpataa solulɩɛ bhɔ lebhe ɩ ‑fata lebhe ɔ mʋ Zolizalɛmʋ, ɔ sɛlɩ ncaakpasɩa, ‑teyiyinyaa tocɩa ɩya ‑jlɩmaazienyaa* wlɩɩn ‑bhutukpa, ma bhlɔɔ, ɔ 'ku ɩya ‑mɔta ‑zelia, ɔ 'ka 'kwɩɩnkʋbho. 22Pɩɛlɩ yɔɔ 'ma, ma ya gbɛga 'nyɩ ɔ yɔɔ 'bɩsalɩɛ bhɔ. Ɔ yɔɔ 'cla lebhe: «‑Kwlenyɔ, Laagɔ 'la 'nyɩa 'dɛ 'la ‑jiolia. ‑Wɔɔ, ɩmɩ ‑naa cɩ 'tɔɔ ŋeni.» 23‑Ma Zozii ya kwlacala 'nyɩ ɔ yɔɔ 'cla lebhe: «Sataan*, 'wlʋlʋʋn cɩɩn! ‑N paan 'gbuzu ‑zɔn le n 'ka bhli, sa ‑naa wɔɔgugwiea 'ta Laagɔ 'la wɔɔgugwie ‑glɩ, ‑ma ncɛlɩ 'la wɔɔgugwie ɛ ‑glɩ 'lɛ.»

24Na, Zozii ya ɔla gɩlɩnyaa 'cla lebhe: «Gbazɩ nclɔɔ ‑ka ‑wa lebhe ɔ 'kaan gɩlɩ na, ɔ blɔ ɔcɩ, ɔ 'ma ɔla dabhlalɩsua ɩya ɔ gɩlɩɩn. 25Sa ɔmɔa ‑ɔ cɩ ka 'lɛ ɔcɩ 'kʋtɩtɔlʋ le ɔ ka kʋ na, ɔ cɩ 'ku. ‑Ma ɔmɔa ‑ɔ ‑cɩ ka 'lɛ 'ku ‑amʋ 'na gbʋ na, ɔ cɩ jabha. 26'Nyɩ gbazɩ nclɔɔ ‑ka ‑laagɔzɔn bhuoa 'la 'bhɛlɩa li, 'nyɩ ɔ ‑ka 'ku na, ‑nvʋsʋɛ saa ɔ 'lɩlɩɩ 'lɛ nɩkplaan bha? 'Nyɩ 'lɩsaa nclɔɔ cɩ 'kaa 'lɛ 'ma ɩya ɔ 'kaa 'lɛ ɔla jabhʋa nɩkplaan 'kplɩ bha? 27Sa, Nclɔɔa 'Cʋa* ɔya ɔla 'bhlaandleecɩa* cɩ 'ka ɔ To 'la 'klʋagbaa nɩkplaan cili ɩya ɔ 'ka nclɔɔ nclɔɔ 'la nʋnʋgbɩa 'la dluuplʋlɩɛa 'nyɩ. 28N solu anyɩ ɩ ‑glɩ ‑nʋawlɛ, maa ‑ɔ ‑kʋ 'lɛ ‑da na, ‑anʋa cɩ 'ta ka 'ku ɩya ma 'ka Nclɔɔa 'Cʋa 'lɩ, ɔ 'ka nyɩbhɛlʋ 'bhisa ci.»

Currently Selected:

Mat 16: NTLD13

Highlight

Copy