Ebl 4
4
1Na, daa ɔla nyɔkwɛa 'la nɩkplaanblendanyɩa ‑kʋ ka 'lɛ na, 'naa ŋanɔ 'bhla -anyɩ ɩya -anyɩ sidiin, bhlogbɩɩ 'la 'claa ɔcɩ lebhe ɔ ya leen ‑to. 2Sa, ‑anyɩ ‑ma ‑a ya Dɩnanɩa* 'numu, ncɛlɩ ‑naa 'bhisa. ‑Ma wɔɔnyɩtʋa ma 'nua 'lɛ na, ma 'tʋʋ ‑nvʋsʋɛ ‑ylɛylɛ nɩkplaan 'lɩlɩ, sa maa ‑ɔ poa 'mʋʋ 'lɛ 'nyukwliin na 'tʋʋ mala pɔɔtɛtɛa 'kʋ zʋ. 3Na, ‑anyɩa ‑ɔ ‑ka 'lɛ pɔɔtɛtɛ na, ‑anyɩ ‑ɔ ble 'lɛ nyɔkwɛa nɩkplaan. Nyɔkwɛ ‑naa 'la gbʋa ɔ 'cla 'lɛ lebhe:
'Na dɔgbɛa nɩkplaan, n ya ‑ndanyɩ ta lebhe:
Maa cɩ 'ta kɩnɩ 'na nyɔkwɛa nɩkplaan ble na!
'Bhlɩmɔɔn, ‑laagɔzɔan 'la bhɔdaa tooto, ɔla lobholia ya 'wluko. 4Sa, Zieziewɔlɩa* nɩkplaan, dabhlo nyɩtɛ ‑ngbɔɔsɔ clɩɩa 'la wɔlɩ lebhe: Daa Laagɔ ko 'lɛ ɔla lobholia ‑tɛtɛa 'wlu na, ‑ngbɔɔsɔ clɩɩa 'kʋ, ɔ ya nyɔkwɛ. 5'Nyɩ ɔ cla ‑awlɛ 'lɛ ‑da ‑ala ‑afluwaa nɩkplaan lebhe: Maa cɩ 'ta kɩnɩ 'na nyɔkwɛa nɩkplaan ble.
6Na, sa ɩ ‑zʋɔ ka ka 'lɛ kpo 'kʋ lebhe ‑anʋa ble ɔla nyɔkwɛa nɩkplaan, ‑masa ‑bɛka ‑naanʋa ‑ɔ 'nu 'lɛ Dɩnanɩa* na, ma 'ta 'lɛ blelɩɛ mino, mala 'nyukwlitlilo 'la gbʋ na, 7dɛ Laagɔ zʋ ‑awlɛ 'lɛ ‑buun clɩɩ bhlo, 'nyɩ ɩmɩ ‑ɩ ‑glɩ 'lɛ ‑yaka. Na, ɩla da bɔɔn 'lɛ na, ɔ ya Daviti 'kʋ 'plɩlɩ 'nyɩ ɔ ya 'cla lebhe:
‑Yaka, a ‑ka Laagɔ 'la ‑blɩɩzɔn 'nu na,
a 'la tlibhalɩa 'nyukwli.
‑A yaa wɔlɩ ‑naa tooto nyɩtɛ.
8Ɩ ‑kaa ‑kʋ le Zozie yaa maa nyɔkwɛa nɩkplaan blee na, ɩla leen, Laagɔ cɩ 'taanɩa ‑awlɛ ‑buun clɩɩ 'la wɔlɩ nyɩtɛ. 9Na, nyɔkwɛclɩɩ bhlo, ‑ɩ ‑kʋ 'lɛ le Zifʋnyaa* 'la nyɔkwɛclɩɩa* na ‑kʋ ka, Laagɔ 'la 'lɔlʋa 'la gbʋ. 10'Nyɩ ɔmɔa ‑ɔ ya 'lɛ Laagɔ 'la nyɔkwɛa nɩkplaan ble na, ɔla lobholia ya 'wluko 'nyɩ ɔ bhɔnɩ 'lɛ nyɔkwɛlɩɛ, saa Laagɔ 'nɩa ko 'lɛ 'wlu 'nyɩ ɔ nyɔkwɛ 'lɛ na. 11Na, ‑a 'sɩslɩlɩ ɩya ‑a ble nyɔkwɛ ‑naa nɩkplaan, ɩya 'nyukwlitlilo ‑naa ‑sakasaka 'la kanɩ nclɔɔ ‑ylɛylɛ 'la bhlilie ‑lamʋ.
12Laagɔ 'la wɔɔnyɩtʋa ‑ja, ʋ ‑ka 'tɛtɩ, ʋ nɛ 'nyɩ ʋ zi ‑baandua ‑ʋ ‑ka 'lɛ ni ‑mɔsɔ na 'kʋ. Ʋ ble nclɔɔ nɩkplaan ‑aan, 'nyɩ ʋ mʋɔ pɔlɛ 'ciin, ʋ sasalɩ 'kɔa 'la 'kʋgɩlɩdɩa ɩya 'kɔa nɩkplaan 'la 'mlimlia cɩ. Ʋ wla nclɔɔ 'la pɔlɛ 'ciin 'la wɔlɩ ɩya ɔla wɔɔgugwiea ‑tɛtɛa ‑zɔn. 13Lʋʋ bhlogbɩɩ 'ta Laagɔ 'klʋʋn ‑zizieo. Lɩɩa ‑tɛtɛa ‑kʋɔ 'ci 'kʋ 'kpataa. 'Nyɩ ɔmɔ ‑ɔ ‑cɩ ka 'lɛ ‑anyɩ ɩmɩa ‑tɛtɛa ‑a nʋ 'lɛ na neencla.
Zozii ‑glɩ 'lɛ ‑ala ‑teyiyinyɔ ‑kpasa
14Na, ‑a ‑kanɩ 'lɛ ‑teyiyinyɔ ‑kpasa 'kadiea, ‑ɔ ya 'lɛ ‑laagɔa nɩkplaan bleli, 'nyɩ ‑ɔ ‑glɩ 'lɛ Zozii, Laagɔ 'la 'Cʋa na, ‑a kalɩnɩ ɩmɩa 'la pɔɔtɛtɛa ‑a ‑ka 'lɛ na kpaan. 15‑Teyiyinyɔ ‑kpasaa ‑ɔ cɩ 'ta 'lɛ ‑anyɩ 'kʋcilɩɛ mino na, ‑n 'ta ɔmɔ ‑a 'ta 'lɛ ‑ka, ‑ma ɔmɔ ‑a -yɔɔsɔ ya 'lɛ gbɩɩnclalɩɛa ‑tɛtɛa 'kʋwlalɩ 'nyɩ ‑ɔ 'ta 'lɛ nyinyi nʋ na, ɔmɔ ‑a ‑kanɩ 'lɛ. 16'Dɛndlana, ‑delikʋtɛlɔ nɩkplaan, ‑a mʋnʋ Laagɔa ‑ɔ ‑wa 'lɛ ‑anyɩ na 'la nyɩbhɛlɩkpoa 'bɩɩn, ɩya ‑a ka ɔla ŋaazɩɩnlɩlɩɛ ɩya ɔla dananɔa 'lɩ ɩya daa ‑a ‑kʋ 'lɛ mielieen na, ɔ 'ka ‑anyɩ 'kʋ ci.
Currently Selected:
Ebl 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
