Lobh 9

Zozii ya Pɔlʋ la

(Lobh 22.3-21, 26.9-20)

1'Dɛ 'la daa, ‑ɔ ‑glɩ 'lɛ Sɔlʋ na, ‑Kwlenyɔ 'la gɩlɩnyaa* 'la pɔɔvʋzʋlɩɛ ɩya 'bhlawɔlɩ ‑tɛɛ ɔ gugua 'lɛ. Na, ɔ ya ‑teyiyinyɔ ‑kpasaa* 'bhlɩ mʋ, 2'nyɩ ɔ yɔɔ ‑afluwi 'clalɩ le ɔ 'ka ‑jioli 'lɩ ɩya ɔ 'ka 'dua ma la 'lɛ Damasɩ na 'la bhibhiepalɩa* ‑zɔn ble, ɩya ka ɔ ‑kaa 'yɛpɩ ncɛlɩa ‑ɔ bhli 'lɛ ‑Kwlenyɔ 'la ‑gugwiea na 'lɩ na, 'ŋwlɛ ‑aana ŋodieo, ɔ 'kaa maa ‑abhluakɩɩn zʋ ɩya ɔ 'ka maa Zolizalɛmʋ famʋ.

3Sɔlʋ ya ‑gugwie 'ma 'nyɩ daa ɔ 'kaanɩa 'lɛ Damasɩdua cɩmɛ na, 'kplookʋ, zezezeli ya ‑laagɔɔn 'wlʋlʋ 'nyɩ ɩla 'jɩa yɔɔ didio. 4Ɔ ya ‑dʋdʋ 'kʋ bhlili, 'nyɩ ɔ ya ‑blɩɩzɔn bhlo 'nu, ʋ yɔɔ 'cla lebhe: «Sɔlʋ, Sɔlʋ, 'lɩsaa 'la gbʋ ‑n saan 'lɛ gbaylɩ bha?» 5Ɔ ya neencla lebhe: «‑Kwlenyɔ, ncaasaa ‑n ‑glɩa 'lɛ bha?» ‑Blɩɩzɔan yɔɔ 'cla lebhe: «Zozii, ‑n sa 'lɛ gbaylɩ na, ɔmɔ n ‑glɩ 'lɛ#9.5 Zienya ‑anʋa ya nɩkplaanŋatɩlɩɛ ‑naa 'kʋ wɔɔkle ‑naa ‑gbɛ.‑N ‑ya 'papalɩɩa 'ka 'lɛ 'tɩtɔ na, ɩ cɩ 'ka 'tɛbhalɩ ɩya ɩ kɔɔ 'nyɩ. Ɔla ‑lɩɩbhuoa tɩtɛlɩa 'nyɩ nikpoo ‑slaa 'mɔɔ. Na, ɔ ya 'cla lebhe: «‑Kwlenyɔ 'lɩsaa ‑n ‑wa 'lɛ lebhe n nʋ bha?» ‑Kwlenyɔa yɔɔ 'cla lebhe.. 6‑Ma 'maa ‑bhokʋ, ble 'dua nɩkplaan ɩya ma 'kɔɔ ɩmɩa ‑n ‑cɩ 'ka 'lɛ nʋ na solu.» 7Ncɛlɩa ɔya maasɔ bhlia 'lɛ ‑gugwiea na, ya 'nylugo, neen ya maa yɛ. Ma nua ‑blɩɩzɔan, ‑ma maa 'lɩ 'taa nclɔɔ bhlogbɩɩ. 8Sɔlʋ ya ‑dʋdʋa 'kʋ 'kʋbho, ɔla 'cia ‑kalɩɔa 'bhlɩɩ, ‑ma 'ɔ 'lɩ 'tanɩa sa. Na, ɔla 'namʋnyaa yɔɔ sɔ 'kʋbhli, 'nyɩ ma ‑yɔɔsɔ ya 'lɛ Damasɩdua nɩkplaan ble. 9Ɔ ‑kʋa 'yɛpɩ, ɔ 'ta salɩ, ɔ 'ta li, ɔ 'ta 'mla ‑aan clɩɩ ‑mɔta 'wugo.

10Nclɔɔ bhlo ‑kʋa Damasɩdua 'kʋ, ma laa 'mɔɔ Ananɩasɩ. Ɔ ‑glɩa Zozii 'la gɩlɩnyɔ*. ‑Kwlenyɔ yɔɔ 'ciinfutolu, ɔ yɔɔ la: «Ananɩasɩ!» Ɔ ya ŋonu 'nyɩ ɔ yɔɔ 'cla lebhe: «'Lɩkaan, ‑Kwlenyɔ!» 11Na, ‑Kwlenyɔa yɔɔ 'cla lebhe: «'Plɩ, ‑n mʋ ‑gugwiea ma la 'lɛ 'ciingɩlɩgugwiea na 'kʋ, ble Zuda 'bhisleen ɩya ‑n 'cla Talɩsɩdua 'kʋ la nclɔɔa ma la 'lɛ Sɔlʋ na bɩ 'kʋ. 'Lɩka, ɔ ‑kʋ 'yɛpɩ ɔ bhibhie 12'nyɩ ɔ ‑jlɛ nclɔɔ bhlo, ma lɔɔ Ananɩasɩ, ɔ ya ble 'nyɩ ɔ yɔɔ sɩ 'wlu ‑gbɛ le ɔ 'ka salɩ.» 13Ananɩasɩ yɔɔ neenŋonu lebhe, n ya nclɔɔ ‑naa 'la cɩa wɔlɩ ncaabhutukpa neen 'nunu, 'nyɩ ma ya ‑abhɔlɛgbɩa ‑tɛtɛa ɔ nʋ 'lɛ ‑naa ncɛlɩa cɩ Zolizalɛmʋdua nɩkplaan na, 'la wɔlɩa nyɩtɛ. 14'Nyɩ ‑teyiyinya -kpasɩaa yɔɔ ‑jioli 'nyɩ le ɔ bhli ncɛlɩa ‑tɛtɛa ‑ɔ ‑kʋ 'lɛ ‑wɔlʋ 'nyɩ ‑ɔ slɔɔ 'lɛ 'ŋlɩ na 'kʋ. 15‑Kwlenyɔa yɔɔ 'cla lebhe: «'Maa mʋ, ‑ma n ya nclɔɔ ‑naa desla le n 'kɔɔ 'kʋ 'plɩlɩ ɩya ɔ 'ka gba ɩya ncɛlɩa ‑ɔ 'ta 'lɛ Zifʋnya* ‑glɩ na, ɩya mala nyɩbhɛlɩa ɩya Izlayɛlɩnyaa* ‑ma 'ka 'na 'ŋlɩa cibhlili. 16‑Amʋ 'titi, n cɩ 'kɔɔ 'kwlɩa ‑tɛtɛa ɩ ‑fata 'lɛ le ‑ɩ bhɩɔ 'na 'ŋlɩa 'la gbʋ na, pala.»

17Na, Ananɩasɩ ya mʋ, 'nyɩ ɔ ya 'sle ‑naa nɩkplaan ble. Ɔ ya Sɔlʋ sɩ 'wlu ‑gbɛ 'nyɩ ɔ yɔɔ 'cla lebhe: «Sɔlʋ, n bholi, ‑Kwlenyɔ Zoziia ‑ɔ futoluo 'lɛ 'ciin daa ‑n bhlia 'lɛ ‑gugwiea na, ɔmɔ ‑ɔ lobhuun 'lɛ le ‑n ka ‑awlɛ salɩ ɩya ‑Kplɔkplɔ ‑Wugoa* 'kɔɔ yeli.» 18'Kplookʋ, ‑lɩɩ yɔɔ 'ciin 'wlʋ 'nyɩ ɩ ya bhli, ɩ ‑kʋa le kʋkwɩ. Ɔ lɩanɩa ‑awlɛ sa 'nyɩ ɔ ya 'nyuwluzʋlɩɛ 'lɩ. 19Ɩla leen, ma yɔɔ nyɩ 'nyɩ, ɔ ya li, 'nyɩ 'tɛtɩ yɔɔ 'kʋ ci.

Sɔlʋ sa Dɩnanɩa Damasɩdua nɩkplaan

Sɔlʋ ya clɩɩ ‑zlʋsaasa gɩlɩnyaa* ‑ɔ ‑kʋa 'lɛ Damasɩdua nɩkplaan na cɩ li. 20Na, ɔ ya 'kplookʋ Zifʋnyaa* 'la bhibhiepalɩa* ‑zɔn plicilɩɛ bhɔ lebhe Zozii ‑glɩ 'lɛ Laagɔ 'la 'cʋa. 21Ncɛlɩa 'fɩan ‑ɔ ‑kʋa 'lɛ 'dɛ 'nyɩ ‑ɔ poa 'mɔɔ 'lɛ 'nyukwliin na, nikpoo ‑slaa maa, 'nyɩ ma claa lebhe: «‑N 'ta nclɔɔ ‑naa ‑ɔ ‑sa 'taa 'lɛ maa ‑ɔ sla 'lɛ ŋlɩɩ ‑naa 'ŋlɩ na gbaylɩ 'yɛpɩ Zolizalɛmʋdua 'kʋ bha? 'Nyɩ, ‑n 'ta ka ɔ 'taa 'lɛ ‑titisa ci le ɔ 'ka maa ‑ɔ ‑kʋ 'lɛ -wɔlʋ na 'kubhli, ɔ 'ka maa ‑abhluakɩɩn zʋ, ɩya ɔ 'ka maa ‑teyiyinya -kpasɩa ‑deliin fa bha?» 22‑Ma Sɔlʋ zʋnɩa 'tɛtɩ, 'nyɩ ɔ ‑ka Zifʋnyaa ‑ɔ ‑kʋa 'lɛ Damasɩdua 'kʋ na, pala lebhe Zozii ‑glɩ 'lɛ Laagɔ 'la ‑Sasanyɔa* na, maa 'lɩ 'taanɩa ne ɩya ma 'ka nyɩtɛ.

23Wɔlɩ ‑naa 'plɩ 'lɛ, 'nyɩ ɩla daa bɔɔn 'lɛ na, Zifʋnyaa ya neennununu 'nyɩ ma ya Sɔlʋ 'la 'bhlawɔlɩ gʋa. 24‑Ma mala wɔlɩa ma gʋa 'lɛ na, ɩ ya Sɔlʋ 'nyukwliin bhlili. Ma gbaa 'nyɩ ncɛlɩ ‑bɛa 'dua 'la gbinia bhlibhliylʋʋn ɩya zezezeliin, le ma 'kɔɔ 'bhla. 25Na, dobhesa bhlo, ɔla gɩlɩnyaa yɔɔ ‑tokuoon zʋ, ma yɔɔ 'dua 'la glɔa 'wlu pleli 'nyɩ ma yɔɔ gua.

Sɔlʋ ya Zolizalɛmʋ mʋ

26Sɔlʋ ya mʋ 'nyɩ ɔ ya Zolizalɛmʋ ŋeni. Ɔ 'matɩa le ɔ 'kaa 'yɛpɩ 'la gɩlɩnyaa* nɩkplaan bhlili. ‑Ma ɔla ŋanɔ bhlaa maa, sa maa gugu 'taa le ɔ yaa ‑zaagbʋsa Zozii 'la gɩlɩnyɔ* 'plɩ na. 27Na, nclɔɔa ma laa 'lɛ Banabasɩ na yɔɔ 'ma. Ɔ ‑yɔɔsɔ ya lobhulobhunyaa* 'bhlɩ mʋ. 'Nyɩ ɔ ya maa saa ‑Kwlenyɔa futofutolu 'lɛ Sɔlʋ 'ciin ‑gugwiea 'kʋ, ɩmɩa ‑Kwlenyɔ soluo 'lɛ ɩya saa ɔ pliciplicili 'lɛ ‑delikʋtɛlɔ nɩkplaan ‑Kwlenyɔ Zozii 'la 'ŋlɩa 'yɛpɩ Damasɩdua nɩkplaan na 'dɩkʋsalɩ. 28Na, ‑ɩ 'manɩɔ 'lɛ 'dɛ na, Sɔlʋ ‑ya maasɔ 'plɩplɩlɩanɩa Zolizalɛmʋdua nɩkplaan 'kʋ, 'nyɩ ɔ nyɩtɛa Zozii 'la cɩa wɔlɩa ‑owe -owe. 29Ɔ mʋa Zifʋnyaa* ‑ɔ nyɩtɛ 'lɛ Glɛkɩwɔlɩa na 'bhlɩ 'nyɩ ɔya maasɔ 'tɩtɔa wɔlɩ. ‑Ma maa, ma 'matɩa ɔla 'bhlada. 30Daa gɩlɩnyaa cibhlili 'lɛ sɛɛ na, ma yɔɔ 'ma 'nyɩ ma yɔɔ Sezaleedua 'kʋ fa, ma ya gba ɔ ya dɩpɩa 'wlʋlʋ 'nyɩ ɔ ya 'dua ma la 'lɛ Talɩsɩ na 'kʋ mʋ. 31Na, Zudee, Galilee ɩya Samaliibhlɩa 'kʋ, daa ‑tɛtɛa, ‑laagɔnɩkplaa ‑kʋnɩa pupueen, ala pɔɔtɛtɛa zʋlʋa 'kʋ, a namʋnʋa ‑Kwlenyɔ 'la zʋlɩɛ nɩkplaan, 'nyɩ ‑Kplɔkplɔ ‑Wugoa* zʋa 'maa 'tɛtɩɩn, 'nyɩ ala ncɛlɩa zʋlʋzʋlʋlʋa 'kʋ.

Pɩɛlɩ ya gba Enee ya jabha

32Pɩɛlɩ 'plɩlɩa 'bhlɩa 'la 'dia ‑tɛtɛa 'kʋ. Clɩɩ bhlo, ɔ ya ‑Kwlenyɔ 'la ncɛlɩa ‑ɔ ‑kʋ 'lɛ 'dua ma la 'lɛ Lida na 'kʋ na, kopekan mʋ. 33Ɔ ya 'yɛpɩ nclɔɔ bhlo ŋeni, ma lɔɔ Enee. Ɩ nʋanɩa liowli ‑ngbaata ɔ pʋa 'lɛ ‑gbite 'kʋ, sa ɔ ‑bhubhuo na. 34Ɔ yɔɔ 'cla lebhe: «Enee, Zozi Klisi yɔɔ jabha. ‑Bhokʋ ɩya ‑mɔ 'titi ylʋ ‑naa ‑gbitea!» 'Kplookʋ, ɔ ya 'kʋbho. 35Lidadua ɩya Salɔɔnbhlɩa 'kʋ 'la ncɛlɩa yɔɔ 'lɩ, ɩ ya gba ma ya kwlacala 'nyɩ ma ya ‑Kwlenyɔ 'klʋ ‑tla.

Pɩɛlɩ ya gba Tabita ya 'kwɩɩngalɔ

36'Ŋlɔ bhlo ‑kʋa 'dua ma la 'lɛ Zafaa na 'kʋ. Ma laa 'mɔɔ Tabita, Glɛkɩwɔlɩɩn, Dɔlʋkasɩ, ɩ sa ‑zɔn le 'lue. Ŋlɔ ‑naa nʋa nʋnʋgbɩ 'nanɩ ‑bhutukpa 'nyɩ ɔ klalɩa 'lɛ ŋaazɩnya. 37Gu yɔɔ kla 'nyɩ ɔ ya 'ku. Ma ya ɔla ‑blaanyɛkɛa budo 'nyɩ ma yɛɛ ‑laagɔsidiinpalʋa ‑zɔn pʋa. 38Lida ɩya Zafaadua 'taa cɩ datlʋtlʋlʋ. Na, gɩlɩnya* yaa 'nu le Pɩɛlɩ ‑kʋa 'yɛpɩ 'nyɩ ma ya ncɛlɩ ‑mɔsɔ lobhu le ma 'clɔɔ lebhe ɔ ci 'fan.

39Daa ncɛlɩa solu 'lɛ Pɩɛlɩ na, 'kplookʋ ɔ ya 'kʋbho 'nyɩ ɔya maasɔ ya mʋ. Ma ŋeni 'lɛ na, ma yɔɔ ‑laagɔsidiinpalʋa 'wlu fa. 'Kuzluŋwlɛa 'fɩan ‑ya 'tutunʋgbʋ yɔɔ 'bɩɩncili, 'nyɩ ma yɔɔ lokua ‑tɛtɛa Dɔlʋkasɩ 'kplaa 'lɛ, daa ɔ ‑jaa 'lɛ na pala. 40Pɩɛlɩ ya ncɛlɩa 'fɩan ‑zɔnwlaa, ɔ ya ‑kukoonkplii sasla, 'nyɩ ɔ ya bhibhie. Daa ɔ bhɩalɩ 'lɛ na, ɔ ya 'kuoa 'klʋ ‑tla 'nyɩ ɔ ya 'cla lebhe: «Tabita, ‑bhokʋ!» Ɔ ya 'ci 'kʋ 'bhli, 'nyɩ ɔ 'lɩ 'lɛ Pɩɛlɩ na, ɔ ya sakʋ. 41Pɩɛlɩ yɔɔ sɔ 'kʋbhli, ɔ ya gba 'nyɩ ɔ ya 'nylugo. Ɔ ya ‑Kwlenyɔ 'la ncɛlɩa ɩya 'kuzluŋwlɛa la 'nyɩ ɔ ya maa Tabita 'la ‑jajanaanɔa pala. 42Zafaadua ‑tɛtɛa ya wɔlɩ ‑naa 'nu, 'nyɩ ncaabhutukpa ya mala pɔɔtɛtɛa ‑Kwlenyɔa 'kʋ zʋ. 43Pɩɛlɩ ya Zafaadua 'kʋ ‑gwlɛlɩ, nclɔɔa ma laa 'lɛ Simɔɔn, 'nyɩ ‑ɔ nʋa 'lɛ mlakulobholia na 'bhlɩ.

Currently Selected:

Lobh 9: NTLD13

Highlight

Copy