Lobh 8

1Sɔlʋ ‑ya Etɩɛnɩ 'la 'kwɩa 'la wɔlɩa wabha.

Sɔlʋ sa ‑laagɔnɩkplaa gbaylɩ

Clɩɩa 'kʋa ma 'bhla 'lɛ Etɩɛnɩ na, 'dɛ 'la clɩɩa bhlogbɩɩ 'kʋ, ma ya Zolizalɛmʋ 'la ‑laagɔnɩkplaa gbaylɩ 'kadɩ ‑salɩɛ bhɔ. ‑Laagɔnɩkplaa 'la ncɛlɩa ‑tɛtɛa ya Zudeebhlɩa ɩya Samaliibhlɩa 'kʋ dlolu. Lobhulobhunyaa* ‑tɛɛ ‑toa 'lɛ. 2Laagɔgɩlɩnya* ya Etɩɛnɩ zizie 'nyɩ ma yɔɔ ‑gbɔɔn 'tu.

3‑Ma ‑ɔ ‑glɩ 'lɛ Sɔlʋ na, ‑laagɔnɩkplaa ɔ 'matɩa 'lɛ le ɔ 'kaa nua. Ɔ plɩa 'sli 'sli, ɔ bhlia maa ‑ɔ zʋ 'lɛ mala pɔɔtɛtɛa Zozii 'kʋ na 'kʋ, 'ŋwlɛ ɩya ŋodie, 'nyɩ ɔ paa 'lɛ maa ‑palʋʋn. 4‑Ma, maa ‑ɔ dlolua 'lɛ na, 'plɩa 'di 'di 'nyɩ ma saa Dɩnanɩa*.

Laagɔ 'la wɔɔnyɩtʋa ya Samaliibhlɩa 'kʋ ŋeni

5'Lɩka ‑sa Filipʋ mʋ 'lɛ Samaliibhlɩa 'la 'du bhlo 'kʋ 'nyɩ ɔ ya 'lɛ 'yɛpɩ Laagɔ 'la ‑Sasanyɔa* 'la Dɩnanɩa* ‑salɩ. 6Ncɛlɩa 'fɩan ya pɔlɛ 'kʋ 'wlalɩ 'nyɩ ma ya Filipʋ 'la wɔɔnyɩtʋa 'ma, sa ma nua 'ciinzizielɩlobholia 'la wɔlɩa ɔ nyɩtɛa 'lɛ na 'nyɩ ma lɩa 'mɩɩ 'ciin. 7‑Masa, 'wugwi ‑nyinyi ‑bhutukpa ‑gaa nɩkplaan 'nyɩ ɩ wlʋa ncɛlɩa nɩkplaan ɩ ‑kʋa 'lɛ na, 'nyɩ bhubhubhubhunya ɩya 'bhlɛnya ‑bhutukpa jabhaa na. 8Du ‑naa ‑kʋa pɔlɛkʋmɛnɔ 'kadie nɩkplaan.

9Nclɔɔ bhlo ‑kʋa du ‑naa nɩkplaan tooto, ma laa 'mɔɔ Simɔɔn, ɔ ‑glɩa ‑abhobhoyanʋnyɔ 'nyɩ ɔla nʋnʋgbɩa slaa 'lɛ Samaliinyaa nikpoo. Ɔ laa ɔcɩ ‑gɩganclɔɔ 10'nyɩ ncɛlɩa 'fɩan, ‑ɩ bhɔlʋ 'lɛ 'cuo 'kʋ ‑aan 'nyɩ ‑ɩ ŋeni 'lɛ ‑glɛɛglɛnya 'kʋ na, -waa 'mɔɔ 'nyukwliinpolɩɛ. Ma 'claa ma lebhe: «Nclɔɔ ‑naa ‑glɩ Laagɔ 'la 'Tɛtɩa, ɩmɩa ma la 'lɛ 'tɛtɩ 'kadiea na.» 11Ka maa 'fɩan -wɔɔ 'lɛ 'nyukwliinpolɩɛ ‑ofi lebhe ɔya ɔla ‑abhobhoyanʋlɩɛa ‑kaa 'lɛ maa nikpooslalɩɛ bhɔ na, ɩ ya ‑gwlɛlɩ. 12‑Ma, daa ma zʋ 'lɛ mala pɔɔtɛtɛa Laagɔ 'la ‑kwleliea 'la Dɩnanɩa ɩya Zozi Klisi 'la 'ŋlɩa Filipʋ plicia 'lɛ maa na 'kʋ na, ma ya 'nyuwluzʋlɩɛ 'lɩ, mala 'ŋwlɛ ɩya mala ŋodie.

13Simɔɔn 'titi ‑masɛ ya Dɩnanɩa ‑nʋawlɛ la, ɔ ya 'nyuwluzʋlɩɛ 'lɩ 'nyɩ ɔ ‑salɩ 'tanɩa Filipʋ ‑vakɩ ‑ylɛylɛ. ‑Masa, nikpooslaslawɔlɩ 'kadɩa ɩya 'ciinzizielɩlobholia ‑ɩ ‑nʋɔ 'lɛ na, ɔmɔ ɩ slanɩa 'lɛ nikpoo ‑gbɔɔn. 14Ma 'nu 'lɛ lebhe Samaliinyaa yaa Laagɔ 'la wɔɔnyɩtʋa 'ma na, lobhulobhunyaa* ‑ɔ ‑toa 'lɛ Zolizalɛmʋ na, ya Pɩɛlɩ ɩya Zaan maa 'bhlɩ lobhu.

15Daa ma mʋ 'lɛ 'nyɩ ma ŋeni 'lɛ na, ma ya Samlinyaa 'la da bhibhie le ma 'ka ‑Kplɔkplɔ ‑Wugoa* 'lɩ, 16‑masa, 'Wugoa* 'ta ka kaa maa sidiin bhlogbɩɩ 'kʋ kwlili. 'Nyuwluzʋlɩɛa ‑tɛɛ, ma 'lɩa 'lɛ ‑Kwlenyɔ Zozii 'la 'ŋlɩa nɩkplaan. 17Na, Pɩɛlɩ ɩya Zaan ya maa sɩ 'wlu ‑gbɛlɩɛ bhɔ 'nyɩ Samaliinyaa yaa ‑kplɔkplɔ ‑Wugoa 'lɩ.

18‑Ma daa Simɔɔn 'lɩ 'lɛ lebhe lobhulobhunyaa ‑gbɛa maa sɩ 'wlu 'nyɩ ma lɩa ‑Kplɔkplɔ ‑Wugoa na, ɔ ya 'dala 'ma le ɔ 'ka maa ‑pɩa. 19Ɔ ya maa 'cla lebhe: «A gba ɩya ‑amʋ ‑masɛ n 'ka 'tɛtɩ kalɩmʋ ɩya ncaatʋtʋʋntʋa n cɩ 'ka 'lɛ sɩ 'wlu ‑gbɛ na, ɔ 'ka ‑Kplɔkplɔ ‑Wugoa 'lɩ.»

20‑Ma Pɩɛlɩ yɔɔ 'cla lebhe: «‑N ‑ya ‑naa 'dalaa ‑gbɩɔlʋ nebhlo, ‑ofi lebhe ‑n gugu lebhe n cɩ 'dala 'ma 'nyɩ n cɩ lʋʋa Laagɔ nyɩ 'lɛ 'kpɔkpɔ na ‑pɩa. 21‑Naa da 'ta wɔlɩ ‑naa nɩkplaan ‑kʋmʋ, sa Laagɔ ‑deliin, ‑naa wɔɔgugwiea 'ta 'kʋnylugolu. 22Cibhlili lebhe ɩmɩa ‑n ya 'lɛ nʋ na, ɩ 'ta nanɩ ɩya -n bhibhie ‑Kwlenyɔ ɩya ɔ 'kɔɔ ɩmɩa ‑n gugu 'lɛ ‑naa pɔlɛa 'ciin na va. 23‑Masa, n lɩ lebhe abhɔlɛ ‑yelio cɩɩnkalɔɔ 'nyɩ ‑n ‑kʋ nyinyi 'la gaabhliin.» 24‑Ma Simɔɔn ya Pɩɛlɩ ɩya Zaan neenŋonu 'nyɩ ɔ ya maa 'cla lebhe: «Anyɩ 'titi a bhibhie ‑Kwlenyɔ, a 'nyɩɩn ɩya ɩmɩa a nyɩtɛ 'lɛ na ɩ 'la kaan ŋeni.»

25Na, Pɩɛlɩ ɩya Zaan li 'lɛ ‑Kwlenyɔ Zozii 'la ‑danʋfʋɛ, ma plici 'lɛ ɔla niwɔlɩa 'nyɩ ma bhɩalɩ 'lɛ na, ma ya Zolizalɛmʋ cɔlɔ. Ma saa Dɩnanɩa Samaliibhlɩa 'kʋ 'la 'di ‑bhutukpa.

Filipʋ ɩya Etiopiibhlɩa 'kʋ 'la tlɩkpɛlobholinʋnyɔa

26‑Kwlenyɔ 'la 'bhlaandleea* ya Filipʋ 'cla lebhe: «‑Bho 'kʋ, Mʋ gozɔn gbazɩa, ‑gugwiea ‑ɛ wlʋ 'lɛ Zolizalɛmʋ 'nyɩ ‑ɛ mʋ 'lɛ Gazaa na 'kʋ. Nclɔɔ bhlogbɩɩ 'tɛɛ 'kʋ ‑kʋ.» 27Filipʋ ya 'kubho 'fan 'nyɩ ɔ ya mʋ. ‑Ma Etiopiibhlɩa 'kʋ 'la ncaakadie bhlo, -ɔ -glɩa 'lɛ Kandasɩ, Etiopiibhlɩa 'kʋ 'la ŋlʋbhɛlʋa 'la ‑tlɩkpɛlobholinʋnyɔ ɩya ɔla 'bhakwlɔa 'la 'klʋlɩnyɔ na, wlʋa Zolizalɛmʋ Laagɔ gʋgwlakan 'nyɩ ɔ cɔlɔa ɔ 'bhlɩ. 28‑Kpangɔ jlia ɔla gɔlʋa, ɔ ‑kʋa 'mʋʋ nɩkplaan sa 'nyɩ ɔ zɛlɩa Laagɔnekʋnyɩtɛnyɔ* Izayii 'la ‑afluwaa. 29'Wugoa ya Filipʋ 'cla lebhe: «Mʋ 'kʋklʋʋn ɩya ‑n mɛ gɔlʋ ‑naa cɩ.» 30Filipʋ ya sɔmɩ fa, ɔ ya gɔlʋa cɩmɛ, ɔ ya nclɔɔ ‑naa neen 'nu, ɔ zɛlɩa Laagɔnekʋnyɩtɛnyɔ Izayii 'la ‑afluwaa, 'nyɩ ɔ yɔɔ neencla lebhe: «‑N nu ‑zaagbʋsa wɔlɩa ‑n zɛlɩ 'lɛ na 'la ‑zɔn bha?» 31‑Ma Etiopiinyɔa yɔɔ neenŋonu lebhe: «‑N 'ta 'lɛ nclɔɔ ‑ka ɩya ɔ 'kaan 'lɛ mɩ ‑zɔn ‑sa na, 'nsasa n cɩ 'ka 'lɛ ɩla ‑zɔan 'nununu bha?» 'Nyɩ ɔ ya Filipʋ 'cla lebhe ɔ 'tɔ gɔlʋa nɩkplaan ɩya ɔ kʋɔ cɩ sa.

32Na, 'lɩka wɔɔklia ɔ zɛlɩa 'lɛ Zieziewɔlɩa* nɩkplaan na:

«'Bhlabhlɛa ma mʋ 'lɛ ‑blɩɩn 'dɩkan na 'bhisa,

'bhlabhlicoa ‑ɛ ‑kʋ 'lɛ ɔmɔa ‑ɔ dɩ 'lɛ ɛla 'nyɩa na ‑deliin 'nyɩ ‑ɛ 'tu 'ta 'lɛ na 'bhisa,

ɔ mɛa 'lɛ ɔla nea.

33 Ma 'tɔɔ bu 'nyɩ ‑ma yɔɔ 'nyisasagbɩ cɩ nʋ.

Ma ya 'lɛ ‑dʋdʋa 'kʋ ɔla jabhʋa 'kleen 'dɩ na,

ncaasaa ‑ɔ cɩa 'lɛ ɔla leenbuoa 'la cɩa wɔlɩ nyɩtɛ bha?»

34Etiopiinyɔa ya Filipʋ neencla lebhe: «Laagɔnekʋnyɩtɛnyɔa, ɔmɔ 'titi ɔcɩ ɔ sa 'lɛ bha? ‑Ma ‑buun nclɔɔ bha?»

35Na, Filipʋ ya wɔɔnnyɩtʋ 'ma, ɔ ya wɔlɩa nclɔɔ ‑naa zɛlɩa 'lɛ na 'kʋplɩlɩ, 'nyɩ ɔ yɔɔ Zozii 'la Dɩnanɩa* ‑sa. 36Ma ‑kʋ 'lɛ ‑gugwiea bhlida na, ma ya dabhlo ŋeni, 'nyu ‑kʋ 'dɛ 'nyɩ nclɔɔa ya Filipʋ 'cla lebhe: «'Lɩka 'nyu ‑kʋ. 'Lɩsaa 'la gbʋ n 'lɩ 'ta 'nyuwluzʋlɩɛ 'kpookʋ bha?» [37]#8.37 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Filipʋ yɔɔ 'cla lebhe: Ɩ ‑ka ‑kʋ lebhe ‑n la ‑naa pɔlɛa nɩkplaan Zozii 'la pɔɔtɛtɛ ‑ka na, ‑n cɩ mino ‑n cɩ ’nyuwluzʋlɩɛ 'lɩ. Nclɔɔa yɔɔ neenŋonu lebhe: N ‑ka pɔɔtɛtɛ lebhe Zozi Klisi ‑glɩ 'lɛ Laagɔ 'la 'Cʋa.» 38Ɔ ya gba ma ya gɔlʋa 'nylugolu, maa ‑mɔsɔa yaa 'nyua nɩkplaan kwli, 'nyɩ Filipʋ yɔɔ 'nyuwluzʋ.

39Daa ma 'wlʋ 'lɛ 'nyia nɩkplaan na, ‑Kwlenyɔ 'la 'Wugoa ya ci, ʋ ya Filipʋ famʋ 'nyɩ nclɔɔ 'tanɩɔ 'lɩ. ‑Ma pɔlɛkʋmɛnɔ nɩkplaan, ɔ ya ɔla ‑gugwiea bhli 'nyɩ ɔ ya mʋ. 40Na, ɔ ‑glɩ 'lɛ Filipʋ na, ɔ ya 'dua ma la 'lɛ Azɔtʋ na 'kʋ futolu, ɔ plɩa 'di 'di, 'nyɩ daa ‑tɛtɛa, ɔ ‑kʋa Dɩnanɩa sada ‑aan 'nyɩ ɔ ya 'lɛ 'dua ma la 'lɛ Sezalee na 'kʋ ŋeni.

Currently Selected:

Lobh 8: NTLD13

Highlight

Copy