Lobh 12

Ma ya Zakɩ 'bhla 'nyɩ ma ya Pɩɛlɩ ‑palʋʋn 'pa

1'Dɛ 'la 'bhlɛsʋa nɩkplaan, nyɩbhɛlʋ Ewlɔdʋ#12.1 Ewlɔdʋ ‑naa ma sa 'lɛ ‑da na, ɔmɔ ma 'lɛ Ewlɔdʋ Aglipaa. Ɔ ‑glɩ Ewlɔdʋ Antipa, ‑ɔ gba 'lɛ 'nyɩ ma 'dɩ Zaan 'wlu 'kʋ na, ɔla ‑golio. ya ‑jioli 'nyɩ lebhe ma -sa ‑laagɔnɩkplaa 'la ncɛlɩ ‑anʋa gbaylɩ. 2Ɔ ya gba, ma ya lɛtɛ 'ma, 'nyɩ ma ya Zaan bholia ma laa 'lɛ Zakɩ na 'bhla. 3Na, daa ɔ 'lɩ 'lɛ lebhe wɔlɩ ‑naa mɛnɩa Zifʋnyaa* pɔlɛ 'kʋ na, ɔ ya gba 'nyɩ ma ya Pɩɛlɩ ‑masɛ 'kʋbhli. Ɩ ‑glɩanɩa 'flawia ‑ɩ 'ta 'lɛ 'zɩɩn* ‑ka na 'la 'fɛtlɩa 'la liclɩɩ. 4Daa ma bhli 'lɛ Pɩɛlɩ 'kʋ na, Ewlɔdʋ ya gba, ma yɔɔ ‑palʋʋn 'pa 'nyɩ ɔ yɔɔ 'soja ‑nmɔɔna 'la 'ci ‑nmɔɔna wlɩɩn zʋ le ma ‑bɛa 'mɔɔ. Ewlɔdʋ ‑waa lebhe geyliinwlʋfɛtlɩa* kaa 'plɩ na, ɔ kaa 'mɔɔ 'bhlɩnyaa ‑deliin fa ɩya ma 'kaa 'mɔɔ 'tɩtɩpla. 5Daa, Pɩɛlɩ ‑kʋa 'lɛ ‑palʋʋnpapalʋa ‑zɔn na, ‑laagɔnɩkplaa via ‑nwɔ, 'nyɩ a bhibhiea Laagɔ kpaan.

6Na, clɩɩa 'kʋ Ewlɔdʋ bhɔsʋa 'lɛ le ɔ 'kaa 'mɔɔ 'bhlɩnyaa ‑deliin fa ɩya ma 'kaa 'mɔɔ 'tɩtɩpla na, ɩla dobhea, Pɩɛlɩ pʋa 'soja ‑mɔsɔ sidiin 'nyɩ ɔ ŋɔmʋa. ‑Abhluakɩ ‑mɔsɔ gɩa 'mɔɔ 'nyɩ gbinibɛnyaa ‑kʋa gbinea ne 'kʋ. 7'Kplookʋ, ‑Kwlenyɔ 'la 'bhlaandlee* bhlo ya futo 'nyɩ zezezeli ya ‑palʋa ‑tɛtɛa 'kʋcɩlɩ. 'Bhlaandleea ya Pɩɛlɩ 'la gbakɩa ko, ɔ yɔɔ galɔ 'nyɩ ɔ yɔɔ 'cla lebhe: «‑Bho 'kʋ 'faanfan!» ‑Abhluakɩa ya do 'nyɩ ɩ ya Pɩɛlɩ sɩɩn 'wlʋ. 8'Bhlaandleea yɔɔ 'cla lebhe: «Gʋa ‑naa 'bɛtʋa ɩya ‑n zʋ ‑naa ‑gbanbʋɩa.» Pɩɛlɩ ya sɛɛ nʋ 'nyɩ 'bhlaandleea yɔɔ 'cla lebhe: «Pla ‑naa lokwia nɩkplaan ɩya ‑n gɩlɩɩn.» 9Pɩɛlɩ yɔɔ 'kʋ gɩ 'nyɩ ma ya ‑palʋa ‑zɔn 'wlʋ. ‑Ma Pɩɛlɩ gugu 'ta lebhe ɩmɩa ‑tɛtɛa 'bhlaandleea gba 'lɛ 'nyɩ ‑ɩ 'plɩa 'lɛ na ‑glɩa ‑nʋawlɛ. Ɔ 'maa 'mɩɩ lebhe claawluun 'la wɔlɩ. 10Na, ma ya ‑bɛka ncɛlɩ cɩ 'plɩ, ma yaa ‑mɔsɔ ‑naanʋa cɩ 'plɩ 'nyɩ ma yaa letiegbinea, ‑a ‑tla 'lɛ 'dua nɩkplaan 'klʋ na 'kʋ ŋeni: Ama 'titi ya maa 'ci 'kʋ kalɩlɩ. Ma ya ‑zɔn 'wlʋ, ma ya 'pɛpɛ namʋ 'nyɩ dɩpɩa bhlogbɩɩ, 'bhlaandleea ya Pɩɛlɩ 'ciinmlɔnʋ. 11Daa 'ciin gbe 'lɛ Pɩɛlɩ na, ɔ ya nesa 'nyɩ ɔ ya 'cla lebhe: «‑Pɔtɔnʋ, n cibhlilinɩ sɛɛ lebhe ‑Kwlenyɔ lobhu 'lɛ ‑zaagbʋsa ɔla 'bhlaandleea 'nyɩ ɔ yaan 'lɛ Ewlɔdʋ wlɩɩn ɩya ɩmɩa ‑tɛtɛa Zifʋnyaa ‑bɛa 'lɛ na nɩkplaan ‑sa.» 12Na, ɔ ya gugu ‑aan 'nyɩ ɔ ya wɔlɩ ‑naa ‑tɛtɛa 'la ‑zɔn 'nu. 'Nyɩ ɔ ya Zaan, ɔmɔa ma laa ‑awlɛ 'lɛ Makɩ na, ɔ nɔ Malii 'bhisleen mʋ. Ncaabhutukpa 'wlalɩa dɩpɩa 'wlu 'nyɩ ma bhibhiea Laagɔ Pɩɛlɩ 'la da. 13Daa, ɔ bhuti 'lɛ clikpugbinea na, lobhoco bhlo, 'ɔ ‑lɩɩŋlʋgbɩɔ, ma laa 'mɔɔ Wlodu, ɔmɔ cio 'lɛ gbine kalɩkan. 14‑Ma ɔ cibhili 'lɛ Pɩɛlɩ 'la ‑blɩɩzɔan na, pɔlɛkʋmɛnɔa nɩkplaan, ɔ 'ta gbinea kalɩ 'kplookʋ, ‑ma ɔ ya sɔmɩ fa, ɔ ya cɔlɔ 'nyɩ ɔ ya 'dɩ fa le Pɩɛlɩ ‑kʋa clɩkpugbinea 'kʋ. 15Ma yɔɔ 'cla lebhe: «Ka pɔlɛ bhlɔɔ bha?» ‑Ma, ɔ ya wɔlɩa 'kʋkpafɩalɩ. Na, ma yɔɔ 'cla lebhe: «Ɔla ‑zuzu cɩ sɛ 'lɛ kʋ.» 16‑Ma, daa ma ‑kʋa 'lɛ nyɩtɛda na, Pɩɛlɩ bhutia gbinea ‑tɛɛ. Na, da ma kalɩnɩ 'lɛ gbinea na 'nyɩ ma 'lɩɔ 'lɛ na, nikpoo ya maa 'fɩan sla. 17Ɔ ya maa sɔ 'kʋ 'sakalɩ le ma 'la ‑saa 'kasɛ, ɔ ya maa saa ‑Kwlenyɔa ‑sasalɩɔ 'lɛ ‑palʋʋnpapalʋa ‑zɔn na 'dɩkʋsalɩ 'nyɩ ɔ ya maa 'cla lebhe: «A mʋ, a ‑sa dɩ ‑naa Zakɩ#12.17 ‑N 'ta lobhulobhunyɔ Zakɩ 'la wɔlɩ ma nyɩtɛ 'ta 'lɛ ‑da, ‑ma ‑Kwlenyɔ Zozii bholi Zakɩ ‑ɔ ‑glɩa 'lɛ Zolizalɛmʋ 'la ‑laagɔnɩkplaa 'la 'kʋklʋʋnpʋnyɔa na. ɩya ‑daa bholiecɩa.» Ɩla leen, ɔ ya ‑zɔnwlʋ 'nyɩ ɔ ya ‑buun da 'manɩ.

18Na, daa ‑zeli ze 'lɛ na, ŋanɔ yaa 'sojaa pla 'nyɩ ma claa macɩ neen lebhe: «'Ndagbazɩ Pɩɛlɩ 'plɩlɩa 'lɛ bha?» 19Ewlɔdʋ ya gba ma yɔɔ 'matɩ, ‑ma ma 'tɔɔ 'lɩ. Na, ɔ ya 'sojaa neencla 'nyɩ ɔ ya ‑jɩolɩ 'nyɩ le ma 'bhla maa. Ɩla leen, ɔ ya 'plɩ, ɔ ya Zudeebhlɩa 'kʋ 'wlʋ 'nyɩ ɔ ya 'dua ma la 'lɛ Sezalee na sakʋkan mʋ. Ɔ ya 'yɛpɩ clɩɩ ‑zlʋsaasa li.

Ewlɔdʋ ya 'ku

20Wɔlɩ ‑kʋa nyɩbhɛlʋ Ewlɔdʋ ɔya 'dia ma la 'lɛ Tili ɩya Sidɔɔn na 'kʋ 'la ncɛlɩa ‑gbaaglɩɩn. Na, ncɛlɩ ‑naa, maya Ewlɔdʋ 'la pʋdaa 'la 'kʋgɩglalɩnyɔa ma la 'lɛ Blatusu na ya neennununu le ma 'kaa Ewlɔdʋ 'bhlɩ mʋ ɩya ma 'kaa 'mɔɔ 'wlu sla, sa lɩɩa ‑tɛtɛa ma ‑miea 'lɛ mala 'bhlɩa 'kʋ na, Ewlɔdʋ 'nɩa 'kʋ ɩ 'wlʋlʋa 'lɛ.

21Na, clɩɩa ma zʋa 'lɛ na, ɩ ŋeni 'lɛ na, Ewlɔdʋ ya ɔla nyɩbhɛlɩlokwia nɩkplaanpla, ɔ ya ɔla kpoa 'kʋ sakʋ 'nyɩ ɔ nyɩtɛa, ɔ solua ncɛlɩa. 22Ɔ ‑kʋa 'lɛ nyɩtɛda na, ncɛlɩa bholia 'kpaakpɩ 'nyɩ ma cla lebhe: «‑N 'ta nclɔɔ 'titi nyɩtɛ 'ta 'lɛ ‑da, ‑ma 'wugo bhlo!» 23‑Ma, dɩpɩa bhlogbɩɩ Laagɔ 'la bhlaandleea* ya Ewlɔdʋ 'bhla, ‑ofi lebhe ma 'ta Laagɔ 'la 'klʋagbaa 'nyɩ. Nɔ yɔɔ li 'nyɩ ɔ ya 'ku. 24Maa ‑ɔ poa 'lɛ Laagɔ 'la wɔɔnyɩtʋa 'nyukwliin 'nyɩ ‑ɔ 'maa 'mʋʋ 'lɛ na, 'la nea zʋlʋa clɩɩa 'fɩan 'kʋ. 25Na, daa Banabasɩ ɩya Sɔlʋ bhɩalɩ 'lɛ mala ‑laagɔlobholia 'yɛpɩ Zolizalɛmʋ na, ma ya Zaan, ɔmɔa ma pa 'lɛ 'ŋlɩ'kʋ 'nyɩ ma la 'lɛ Makɩ na 'ma 'nyɩ ma ‑yɔɔsɔ ya mʋ.

Currently Selected:

Lobh 12: NTLD13

Highlight

Copy