Lobh 11

Pɩɛlɩ ‑kʋ Zolizalɛmʋ, ɔ nyɩtɛ

1Lobhulobhunyaa* ɩya bholiecɩa ‑ɔ ‑kʋa 'lɛ Zudeebhlɩa 'kʋ na, yaa 'nu lebhe ncɛlɩa ‑ɔ 'taa 'lɛ Zifʋnyaa ‑glɩ na, ya ŋonu ma ya Laagɔ 'la wɔɔnyɩtʋa 'ma. 2Na, daa Pɩɛlɩ ‑gblaa 'lɛ Zolizalɛmʋ na, 'yɛpɩ 'la ‑laagɔnɩkplaa yɔɔ gbatlɩmʋnʋ 'nyɩ ma ya 'mɔɔ 'cla lebhe: 3«‑N ya ncɛlɩa ‑ɔ 'ta 'lɛ 'kʋ ‑dɩɔ na 'bhisleen ble 'nyɩ n ‑ya maasɔ ya 'lɛ dabhlo lili!» 4Na, Pɩɛlɩ ya wɔlɩa bhɔ, ɔ yɩɩ ɩla bhɔlʋdaa 'manɩ ‑aan 'nyɩ ɔ yɩɩ maa ylɛɛylɛɛ solu. Ɔ ya maa 'cla lebhe:

5«N ‑kʋa bhibhieda 'yɛpɩ Zafaadua nɩkplaan 'nyɩ n ya 'lɛ lʋʋ bhlo 'lɩ, ʋ ‑kʋa le lokukadie 'bhisa, 'nyɩ ʋ ‑kaa 'lɛ ‑koti ‑nmɔɔna. Ʋ 'wlʋlʋa ‑laagɔa nɩkplaan, ʋ kwlia ‑dʋdʋa 'kʋ, ʋ ya ci ‑aan 'nyɩ ʋ yaan cɩmɛ. 6N yʋʋ kope 'cɩɩ 'nyɩ n yʋʋ nɩkplaan ‑dʋdʋa ‑tɛtɛa 'kʋ 'la mlaa ‑ɩ ‑ka 'lɛ 'blɩ ‑nmɔɔna, 'kɔmla, ɩmɩa ‑ɩ blɛ 'lɛ ɩya ɩmɩa ‑ɩ 'plɩlɩ 'lɛ ‑laagɔɔn na, 'lɩlɩ. 7'Nyɩ, n ya ‑blɩɩzɔn bhlo 'nu, ʋ yaan 'cla lebhe: Pɩɛlɩ, ‑bho 'kʋ, 'bhla ɩya ‑n li! 8Na, n ya 'cla lebhe: ‑Kwlenyɔ, 'pʋpʋ 'kʋ, ‑saa lɩɩa ‑ɩ 'ta 'lɛ ‑kplɔ na 'ta ka ‑azla 'na nea nɩkplaan mʋ. 9‑Blɩɩzɔan ya ‑mɔsɔda ‑laagɔɔn 'wlʋlʋ 'nyɩ ʋ ya 'cla lebhe: Lʋʋa Laagɔ ya 'lɛ 'cla lebhe ʋ ‑kplɔ na, ‑mɔɔ -naa 'cla lebhe ʋ 'ta -kplɔ. 10‑Mɔtada wɔlɩ ‑naa ‑sakasaka ya ‑awlɛ 'plɩ 'nyɩ lokwi kadiea ya 'lɛ ‑laagɔɔn ‑gblaa. 11'Nyɩ dɩpɩa bhlogbɩɩ, 'lɩka ncɛlɩ ‑mɔta, ma wlʋa Sezaleedua 'kʋ 'nyɩ ma ya daa n ‑plaa 'lɛ 'kʋ na ci. ‑Amʋ 'bhlɩ ma lobhua 'lɛ maa. 12Laagɔ 'la ‑Wugoa yaan 'cla lebhe n 'la 'claa ncɩ wɔlɩ ‑ylɛylɛ neen, ‑ma n ‑bho 'kʋ ɩya n ‑ya maasɔ mʋ. 'Lɩka, bholiecɩa ‑ngbʋflʋa ‑ɔ fa ‑amʋa 'lɛ 'nyɩ ‑a ya 'lɛ nclɔɔ ‑naa 'bhisleen ble na. 13Ɔ ya -anyɩ saa ɔ 'lɩlɩlɩ 'lɛ 'bhlaandlee* ɔ 'bhisleen na ɩla wɔlɩa 'dɩkʋsalɩ. 'Bhlaandleea yɔɔ 'cla lebhe: Lobhu nclɔɔ Zafaadua 'kʋ ɩya ɔ 'cla nclɔɔa ma 'la 'lɛ Simɔɔn 'nyɩ ma pa 'lɛ 'ŋlɩ 'kʋ ma la 'lɛ Pɩɛlɩ na le ɔ ci. 14Ɔ cɩ 'kɔɔ wɔlɩa ‑ɩ -cɩ ka 'lɛ gba ɩya ‑mɔ ɩya ncɛlɩa ‑tɛtɛa ‑ɔ ‑kʋ 'lɛ ‑naa 'slea nɩkplaan na 'ka 'lɛ gbʋʋnsalɩɛ 'lɩ na solu. 15Ɩmɩ ‑naa 'la leen, n ya Kɔlʋnɛyɩ ɩya ‑daa ncɛlɩa solulɩɛ bhɔ. Daa, n ‑kʋa 'lɛ nyɩtɛda na, ‑Kplɔkplɔ ‑Wugoa* ya maa 'kʋ kwlili, le saa Laagɔ 'nyɩʋ 'lɛ ‑anyɩ bhɔɔdaa na. 16Na, n ya wɔlɩa ‑Kwlenyɔa nyɩtɛa 'lɛ na luoli. Ɔ yaa 'cla lebhe: Zaan ya ncɛlɩ 'nyu nɩkplaan 'nyuwluzʋlʋ, ‑ma anyɩ, ‑Kplɔkplɔ ‑Wugoa nɩkplaan ma cɩ 'ka 'lɛ anyɩ 'nyuwluzʋlʋ. 17Na, gbazɩ Laagɔ ‑ka ncɛlɩ ‑naa 'nanɩa bhlogbɩɩa ɔ 'nyɩ 'lɛ ‑anyɩ na 'nyɩmʋ ‑ofi lebhe ma ya ‑Kwlenyɔ Zozi Klisi mala pɔɔtɛtɛa 'kʋ zʋ na, ‑amʋa ‑ɔ glɩ 'lɛ nclɔɔ na, n cɩ mino n cɩɔ tie le ɔ 'la nʋa ɔla lobholia bha?» 18Wɔɔnyɩtʋ ‑naa ya pɔɔtɛtɩkalɩnyaa pɔlɛɛnbhlili, ma ya Laagɔ ‑evliwo 'nyɩ ma ya 'cla lebhe: «'Lɩka, Laagɔ ya maa ‑ɔ 'ta 'lɛ Zifʋnya ‑glɩ na -masɛ kwlacalalɩɛa -ɩ nyɩ 'lɛ jabhʋa na 'nyɩ.»

Laagɔ 'la Wɔɔnyɩtʋa ya Antɩɔsʋ ŋeni

19Maa gbaylɩsalɩɛa ‑ɩ ‑lamʋ 'lɛ Etɩɛnɩ 'la 'kwɩa na, dlolua 'lɛ na ya Fenisiibhlɩa, Siplʋlekpoa ɩya Antɩɔsʋdua 'kʋ 'plɩlɩ, ‑ma ma 'ta ‑buun nclɛlɩ ‑ylɛylɛ Laagɔ 'la wɔɔnyɩtʋa plici, ‑n 'ta le Zifʋnyaa* ‑tɛɛ na. 20'Bhlɩmɔɔn, maa nɩkplaan, ‑anʋaa ‑ɔ ‑glɩa 'lɛ Siplʋlekpoa ɩya Silɛnɩdua 'kʋ 'la ‑dʋdʋvalɩnya na, ma ŋeni 'lɛ Antɩɔsʋdua 'kʋ na, ma ya Glɛkɩnyaa ‑ma, ‑Kwlenyɔ Zozii 'la Dɩnanɩa* -sa. 21‑Kwlenyɔ 'la 'tɛtɩa ‑kʋa maa 'kʋ, ɩ ya gba na, ncaabhutukpa ya kwacala, ma ya ‑Kwlenyɔ 'klʋta 'nyɩ ma ya pɔɔtɛtɩkalɩnya 'plɩ. 22Wɔlɩ -naa ya ‑laagɔnɩkplaa ‑a ‑kʋa 'lɛ Zolizalɛmʋ na 'nyukwliin bhlili 'nyɩ ma ya Banabasɩ Antɩɔsʋ lobhu.

23Daa ɔ ŋeni 'lɛ, 'nyɩ ɔ 'lɩ saa Laagɔ palɩpalɩlɩ 'lɛ maa ‑ɔ la 'lɛ Dɩnanɩa ‑nʋawlɛ na 'nyu na, pɔlɛ 'kʋ yɔɔ mɛma, 'nyɩ ɔ ya maa 'fɩan 'tɛtɩɩn zʋ le ma kʋlʋ ‑Kwlenyɔa. 24Ɔ ‑glɩa nclɔɔa ‑ɔ 'nylugolua 'lɛ 'kʋ 'nyɩ ‑Kplɔkplɔ ‑Wugoa* ɩya pɔɔtɛtɛ ‑yelioa 'lɛ na. Ncaabhutukpa ‑ya ‑Kwlenyɔ ya bhlo 'plɩ. 25Banabasɩ ya Talɩsɩdua 'kʋ Sɔlʋ 'matɩkan mʋ, 26ɔ yɔɔ 'lɩ 'nyɩ ɔ yɔɔ Antɩɔsʋdua 'kʋ famʋ. Maya ‑laagɔnɩkpla ‑naa ya nebhlo lobholi nʋnʋ ‑aan liowlu ‑totobhuo 'nyɩ ma ya 'lɛ ncaabhutukpa Laagɔ 'la wɔlɩa ca. Na, 'yɛpɩ Antɩɔsʋ, ma lalɩ 'lɛ gɩlɩnyaa* ‑bɛkada Klisinɩkpaannya.

Ma ya Zudeenyaa klalɩ

27Na, 'dɛ 'la clɩɩa nɩkplaan, Laagɔnekʋnyɩtɛnya* ya Zolizalɛmʋ 'wlʋlʋ 'nyɩ ma ya Antɩɔsʋ mʋ. 28Na, maa sidiin 'la bhlo, ma laa 'mɔɔ Agabusu. Laagɔ 'la 'Wugoa ya gba 'nyɩ ɔ ya 'cla lebhe ŋɔmʋ 'kadie cɩ 'kaa ‑dʋdʋa ‑tɛtɛa 'kʋ pla. Ŋɔmʋ ‑naa yaa pla ‑nʋawlɛɛsa, 'bhlɛsʋa nɩkplaan Klodu ‑kʋa 'lɛ goonvlakpoa 'kʋ na. 29Na, gɩlɩnyaa ya bhlo 'plɩ le ma 'kaa 'dala ‑bʋʋ, nclɔɔ nclɔɔ 'la saa ɔ cɩ 'lɛ mino na ɩya ma 'kaa bholiecɩa ‑ɔ ‑kʋa 'lɛ Zudeebhlɩa 'kʋ na tlɛlɩ. 30Na, ma ya sɛɛ nʋ. 'Nyɩ, ma ya Banabasɩ ɩya Sɔlʋ 'dalaa ma 'wlalɩ 'lɛ 'wlu na 'nyɩnɩ le ma faa 'yɛpɩ 'la ncaakpasɩa.

Currently Selected:

Lobh 11: NTLD13

Highlight

Copy