2 Tim 4
4
Plici Laagɔ 'la wɔɔnyɩtʋa
1N clalɩɔ, Laagɔ ɩya Zozi Klisi, ‑ɔ cɩ 'ka 'lɛ ‑jajancɛlɩa ɩya 'kua 'tɩtɩpla na, 'ci 'kʋ, n 'clalɩɔ mɩ ɔla ciliea ɩya ɔla Nyɩbhɛlɩdua* 'la 'ŋlɩa nɩkplaan: 2Plici Laagɔ 'la wɔɔnyɩtʋa, saa 'fɩan ɩ cɩ 'ka 'lɛ kʋkʋlʋo na, 'kpafɩalɩʋ 'kʋ. Falɩ maa wɔlɩ pɔlɛ cɩ ɩya gbadalɩɛ nɩkplaan, ‑n ‑sa maa 'bɩ ɩya ‑n zʋ maa 'tɛtɩɩn clɩɩa 'fɩan ‑naa calɩɛ nɩkplaan. 3Sa clɩɩa cɩ 'ka ‑ci daa ncɛlɩ cɩ 'tanɩ 'lɛ ŋonu le ma 'ka cacawɔlɩa 'titi 'nyukwliinpo na. ‑Ma, ma cɩ 'ka lɩɩa ‑ɩ ‑ka 'lɛ maa 'titi 'tʋ na gɩlɩ ɩya ma 'ka canya ‑bhutukpaa ‑ɔ cɩ 'ka 'lɛ maa ɩmɩa ma ‑wa 'lɛ lebhe ma 'ka 'nu na, macɩ cɩ didio. 4'Sɛlagbʋkʋ na, ma cɩ 'ka ‑nʋawlɛa kɔkʋʋntla ɩya ma 'kanɩ yooyo -ninia 'nyukwliinpolɩɛ wabha. 5‑Ma ‑mɔɔ, ‑tɛtɛa 'fɩan nɩkplaan, 'maa falɩ ‑ncɩ pɔlɛ cɩ. Kla pɔlɛ 'kwlɩbhɩɛa nɩkplaan, 'plɩ Dɩnanɩa* 'la ‑sanyɔ ɩya ‑nʋ 'naa Laagɔ lobholia.
6‑Ma ‑amʋ, ma yaan tooto ‑sa, ‑teyiyimlɛ 'bhisa, 'nyɩ 'na mʋda ya ŋeni. 7N ya tananʋa vʋ, n yʋʋ vʋ ‑aan n ya 'wluko, ‑ma 'na pɔɔtɛtɛa 'ta bhli. 8‑Pɔtɔnʋ, ‑sɩalɩɛ 'la ‑ajakpaa ‑a ‑bɛnɩɩn 'lɛ. Ama ‑a ‑glɩ 'lɛ gbʋʋnsalɩɛ 'la asɩkɛkpoonkpoa ‑Kwlenyɔ, 'tɩtɩplanyɔa ‑ɔ 'nylugolu 'lɛ 'kʋ na, cɩ 'kaan 'lɛ 'tɩtɩplaclɩɩa 'kʋ 'nyɩ na. 'Nyɩ ‑n 'ta ‑amʋ bhlo ‑tɛɛ, ‑ma maa 'fɩan ‑ɔ ‑bɛ 'lɛ ɔla ciliea pɔlɛkʋmɛnɔ nɩkplaan na.
Wɔlɩ pɔlɛcɩfalɩlɩɛ
9'Maa 'sɩslɩlɩ ɩya ‑n kaan ‑wɔlʋ ŋeni 'faanfan. 10‑Ma Demasɩ yaan cɩɩnwlʋlʋ ‑ofi lebhe ɔla pɔlɛa ‑kʋ ‑pɔtɔnʋ 'la ‑laagɔzɔan 'kʋ. Ɔ ya 'plɩ ɔ ya Tesalonikibhlɩa 'kʋ mʋ, ɔmɔa ma la 'lɛ Klesaan na, ɔ ya Galasiibhlɩa 'kʋ mʋ 'nyɩ Titi ya 'lɛ Dalɩmasiibhlɩa 'kʋ mʋ. 11Luku bhlo, ɔmɔ ‑ɔ ‑kʋʋn 'lɛ cɩ. Na 'maa famʋ Makɩ, sa ɔ cɩ mino 'nyɩ ɔ cɩɩn lobholi ‑nʋlɩɛ nɩkplaan klalɩ. 12N ya Tisiki Efɛzɩdua 'kʋ lobhu. 13‑N ‑ka cida ‑kʋ na, lamʋ 'na lokukadiea n te 'lɛ Tlʋasɩdua 'kʋ, nclɔɔa ma la 'lɛ Kapusʋ na 'bhlɩ na. ‑Lamʋmʋ ‑afluwia ɩya 'tasɩɩ ɩmɩa ‑ɩ ‑glɩ 'lɛ mlakwi ‑naanɩa na. 14Nclɔɔa ma la 'lɛ Alɛzandlɩ 'nyɩ ‑ɔ nʋ 'lɛ letie lobholia na, ɔ yaan ‑abhɔlɛ 'kadie nʋ, ‑ma Laagɔ cɩ 'kɔɔ ɩmɩa ɔ nʋ 'lɛ na, ɩla dlua ‑plʋ. 15Na ‑mɔɔ ‑ma, ‑n zʋlʋɔ pɔlɛ 'kʋ, sa ɔ ya ‑ala cacawɔlɩa ‑tɛtɛa zɔgblɩ nɩkplaan gbatlɩmʋnʋ.
16N 'ka 'lɛ ‑bɛkada 'tɩtɩplajlea ‑deliin, 'na da nyɩtɛ na, maa 'fɩan yaan te. 'Naa Laagɔ 'la 'manɩa maa 'kʋ. 17‑Ma, ‑Kwlenyɔa, 'ɔmɔ, ɔ yaan 'kʋ ci, ɔ yaan 'tɛtɩɩnzʋ. Ɩ ya gba na, n ya ɔla Dɩnanɩa* 'fɩan ‑tɛtɛa -sa 'nyɩ maa ‑ɔ 'ta 'lɛ Laagɔ ‑ci na, ya 'nu. 'Nyɩ ɔ yaan 'lɛ ‑bhedia neensa. 18‑Awlɛ, ‑Kwlenyɔa cɩ ka 'kaan ‑abhɔlɛnʋnʋgbɩa 'fɩan nɩkplaan ‑sa ɩya ɔ 'ka gba n 'ka ɔla Nyɩbhɛlɩdʋa* nɩkplaan ble. 'Klʋagba ‑glɩ ɔ 'na 'lʋkʋlʋkʋ ɩya 'lʋkʋlʋkʋ! Ɩ kʋ sɛɛ.
Bhɩalɩ -ayopalɩɛ
19Pa Plisii ɩya Akilasɩ ‑ayo, Onezifɔlʋ 'la 'slinyaa ‑ma. 20Elasɩ ya Kolɛntɩ ‑to 'nyɩ n ya 'lɛ Tlofimʋ 'dua ma la 'lɛ Milee na 'kʋ te, sa ɔ 'ta ‑ja na. 21Na 'maa 'sɩslɩlɩ ɩya ‑n ci 'fɩɔn ɩya wɔtlɩa 'la daa 'ka ŋeni. Ebulusu, Pudɛɛnsɩ, Linusu, Klodia ɩya ‑daa bholiecɩa 'fɩan ma pɔɔ ‑ayo. 22'Naa ‑Kwlenyɔa ɔ kʋɔ cɩ. 'Naa Laagɔ 'la 'nyupalɩɛa kʋ anyɩa 'fɩan 'kʋ.
Currently Selected:
2 Tim 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
