Tit 1

‑Ayopalɩɛ

1‑Amʋ Pɔlʋ, n ‑glɩ Laagɔ 'la lobhoco ɩya Zozi Klisi 'la lobhulobhunyɔ* le n 'ka Laagɔ 'la deslaslanyaa pɔɔtɛtɛ 'la ‑gugwiea 'kʋ zʋ, ma 'ka saa ma cɩ 'ka 'lɛ Laagɔ gɩlɩgɩlɩlɩ na 'la ‑nʋawlɛa cibhlili, 2ɩya ma 'ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ 'nyɩ Laagɔ, ‑ɔ zʋ 'ta 'lɛ yodi na, talɩ 'lɛ ‑ndanyɩ 'kʋ bhɔdaa tooto na 'la pɔlɛkʋtɛlɔa nɩkplaan namʋnʋ. 3Daa clɩɩa ‑ɩ ‑zʋɔ 'lɛ na ŋeni 'lɛ na, ɔ ya ɔla wɔɔnyɩtʋa ‑zɔnwla, 'dɩa ɔ zʋʋn 'lɛ wlɩɩn le n ‑sa na nɩkplaan, saa Laagɔ, ‑ala Gbʋʋnsanyɔa soluun 'lɛ na.

4N zieo Titi, ‑amʋ 'titi 'na valɩvalɩco, pɔɔtɛtɛa ‑a 'wlalɩ 'lɛ 'kʋ na 'la 'sasʋʋn. 'Naa to Laagɔ ɩya Zozi Klisi ‑ala gbʋʋnsanyɔa 'la ‑walʋa ɩya pupuea kʋɔ 'kʋ.

Ɩmɩa ma 'matɩlɩ 'lɛ ncaakpasɩa wlɩɩn na

5Na, ‑n ‑ka 'lɩ 'nyɩ ‑n ‑kɔɔ Klɛtɩlekpoa 'kʋ te na, ka n teo 'lɛ 'yɛpɩ lebhe ‑n ka ɩmɩa ‑ɩ ‑to 'lɛ na 'kʋgɩglalɩlɩɛ bhɩalɩ, ɩya ‑n ka 'du 'du 'kʋ, ncaakpasɩ kpo 'kʋ zʋ, saa n soluo 'lɛ na. 6Maa ‑naa, ɩ 'ta ‑fata lebhe ma 'lɩlɩ mala sidiin 'la nclɔɔ ‑ylɛylɛ 'ge nɩkplaan. Ɩ ‑fata lebhe ɔ kalɩ 'ŋlɔ bhlogbɩɩ, ɔla 'cuoa kalɩ Zozii 'la pɔɔtɛtɛ ɩya ma 'la gɩa maa wɔlɩ 'kʋ lebhe ma li ‑badaaglʋ ‑aana ma 'ta 'nyiyilie ‑ka. 7‑Masa 'kʋklʋʋnpʋnyɔ, ɩ 'ta ‑fata lebhe ma 'lɩlɩɔ 'ge nɩkplaan, ‑ofi lebhe Laagɔ 'la lobholia 'la 'klʋlɩnyɔ ɔ ‑glɩ 'lɛ. Na, ɔ 'la 'plɩa ‑tutulelinyɔ, dɔgbɛmanyɔ, nʋgbumlanyɔ, ‑bhɩakpanyɔ, ‑aana ‑duflenyɔ. 8‑Ma, ɩ ‑fata lebhe ɔ 'plɩ nclɔɔa ‑ɔ kla 'lɛ lowie, ‑ɔ ‑wa 'lɛ wɔɔnanɩ, ‑ɔ ‑ci 'lɛ nyɩtɛsa, ‑ɔ ‑glɩ 'lɛ 'kʋnylugolunyɔ, ‑kplɔkplɔnyɔ, ‑ɔ ‑ci 'lɛ ɔcɩ 'kʋklasa, 9'nyɩ ‑ɔ ‑kʋlʋ 'lɛ wɔɔnyɩtʋa ‑ʋ ‑ŋwa 'lɛ 'kʋ le ma kalɩ ʋla pɔɔtɛtɛ na kpaan na. Wɔɔnyɩtʋ ‑naa ‑ʋya cacawɔlɩa ‑glɩ bhlo. ‑Sa, ɔ cɩ 'ka 'lɛ mino, ɩya ɔ 'ka 'lɛ cacawɔlɩa 'titi 'kʋ 'plɩlɩ ɔ 'ka ncɛlɩ 'tɛtɩɩn zʋ ɩya ɔ 'ka maa ɔ mʋnʋ 'lɛ ɔla niwɔlɩa gbatlɩ na, pala lebhe ma ya mlɔ.

Yooyo -wɔlɩ 'la canya

10‑Masa, ma ‑zu ‑gbɔɔn, maa ‑ɔ 'ta 'lɛ zʋlɩɛ ‑ka, ‑ɔ ‑ka 'lɛ neenzizie, 'nyɩ ‑ɔ 'nyiglili 'lɛ ncɛlɩ na, 'nyɩ maa ‑ɔ ‑dɩɔ 'lɛ 'kʋ na sidiin 'titi ma ‑zu ‑awlɛ 'lɛ ‑gbɔɔn. 11Ɩ ‑fata lebhe ‑n ‑kpaslɩlɩ mala nia. Sa, ma ca ɩmɩa ‑ɩ 'ta 'lɛ ‑fata lebhe ma ca na, le ma 'ka ‑dufleedala 'lɩ, 'nyɩ ma gblogblolu 'lɛ 'sli ‑totobhu. 12Maa nɩkplaan bhlo, maa 'titi mala Laagɔnekʋnyɩtɛnyɔ*, ɔmɔ ‑ɔ 'cla 'lɛ lebhe:

«Klɛtɩnyanyɩ, 'lʋkʋlʋkʋ 'la yodizʋnyanyɩ,

mlanyinyi, aya ‑babanɩkplɩa.»

13Ɔla wɔlɩa ɔ nyɩtɛ 'lɛ na, ɩ ‑glɩ ‑nʋawlɛ. Dɛ ɩ ‑fata 'lɛ lebhe, ‑n ‑sa maa 'bɩ ‑gbɔɔn ɩya mala pɔɔtɛtɛa 'ka 'kʋnylugolu. 14Ma 'la ‑kʋlʋa Zifʋnyaa* 'la 'ninia ɩya ncɛlɩa ‑ɔ tla 'lɛ ‑nʋawlɛa kɔkʋʋn na 'la ‑jlɩmaa.

15‑Tɛtɛa 'fɩan ‑kplɔ, maa ‑ɔ ‑kplɔ 'lɛ na, 'la da. ‑Ma maa ‑ɔ 'ta 'lɛ ‑kplɔ, 'nyɩ ‑ɔ 'ta 'lɛ ‑wa lebhe ‑ɔ ka mala pɔɔtɛtɛa Klisi 'kʋ zʋ na, lʋʋ bhlogbɩɩ 'ta mala da ‑kplɔ. ‑Masa mala dɩgalɩa ɩya mala wɔɔgugwiea 'ta ‑kplɔ na. 16Ma cla lebhe ma ‑ci Laagɔ, ‑ma mala nʋnʋlobholia pala lebhe ma yɔɔ ‑blɔ. Ma ‑glɩ ‑munzuenya, ma 'ta zʋlɩɛ bhlogbɩɩ ‑ka 'nyɩ maa mino 'ta nʋnʋgbɩ 'nanɩ bhlogbɩɩ nʋlɩɛ.

Currently Selected:

Tit 1: NTLD13

Highlight

Copy