Mateu 9

Ketsutsi kemɨrenayehɨa huriekame

(Mat 9:2-8 – Mar 2:3-12, Ruk 5:18-26)

1Merikɨtsɨ kanuwatsie kayerɨka 'anutaɨye paitɨ kaneyani, yukiekaritsie kaninuani. 2Hikɨ mana hipatɨ teɨteri huriekame mekani'atɨirieni 'itaritsie yekaime. Ketsutsi waxeiyatɨ yuri kememɨte'eriekai mɨpaɨ huriekame katiniutahɨawe:

—Yukɨ pepɨkati'akɨhɨaweni, nehamiku, 'ari pepɨreuyehɨwiyarie 'axapemɨtiuyurikɨ.

3Hikɨ hipatɨ 'inɨarikɨ memɨte'ɨkitametetɨkai mɨpaɨ mekateniyukɨhɨawekaitɨni yu'iyaritsie: «'Ikɨ Kakaɨyari hepaɨtsita 'axaputaine.»

4Ketsutsi wa'iyaritɨarika maitɨ, mɨpaɨ katiniwarutahɨawe:

―¿Titayari 'axaxeteyukɨhɨawe yu'iyaritsie? 5¿Tita matsi katikwaniwe: “Pepɨreuyehɨwiyarie 'axapemɨtiuyurikɨ”, xɨka'utayɨni, nutsu: “Kenanukukexi kenekuyeikani, xɨka'utayɨni”? 6Hikɨtsɨ ya'aneme xekanetimaikuni kename heitserie nehexeiya kwiepa nemɨtiwareuyehɨwirienikɨ 'axamemɨte'uyuri, Yuri Tewi nehɨkɨtɨtɨ.

Hikɨ mɨpaɨ katinitahɨawe huriekame:

—Kenanukukexi, 'a'itari kenakwetɨ, 'akie kenemie.

7Hikɨ tewi 'anukukeka yukie kaneyani. 8Teɨteri me'ixeiyaka waɨkawamekɨ mekanimamakaitɨni, 'aixɨa mekaniutiyuanekaitɨni Kakaɨyari hepaɨtsita, heitserie mɨwarupitɨakɨ teɨteri mɨpaɨ memɨteyurienikɨ.

Mateu kemɨtiuta'ini

(Mat 9:9-13 – Mar 2:14-17, Ruk 5:27-32)

9Hikɨ kepauka Ketsutsi mana mɨyetɨa, xeime tewi kaniuxeiya Mateu titewakame mana memɨte'ayutituayatsie 'akaime. Mɨpaɨ katinitahɨawe: «Nehetsie ketinewiyani». Mateu 'anukukeka hetsiena katiniuwiya.

10Hikɨ Ketsutsi katinikwakaitɨni kiita, yumɨiretɨ kuwiyexinu hetsiemieme tewawamete meta 'axateyuruwamete, me'u'axɨaka Ketsutsi matɨa meta teyɨ'ɨkitɨwametemama wahamatɨa metenikwakaitɨni 'axeikɨa. 11Kepauka paritseutsixi memɨwaruxei mɨkɨ, mɨpaɨ mekateniwarutahɨawe teyɨ'ɨkitɨwametemama:

—¿Titayarikuta tewawamete meta 'axateyuruwamete wahamatɨa tixe'ɨkitɨwame tikwa'a?

12'Ikɨ tiu'enieka, Ketsutsi mɨpaɨ katiniwarutahɨawe:

—'Aixɨa memɨteheu'erie mepɨkaheiyehɨwa tiyu'uayemawame, mɨkɨ memɨtekukuye pɨta mekaneiyehɨaka. 13Peuyewetse 'akuxi yaxemɨtehetimanikɨ kemaine mɨkɨ niuki mɨpaɨ manuyɨne: “Ne nepɨxewawirie xeketeneuyukanenimayaka, nepɨkaxewawirie mawari”. Ne nepɨkanua newata'inienike mɨkɨ heitseriemekɨ yamemɨtekahu, mɨkɨ 'axamemɨteyurie pɨta newata'inienike nekaninuani.#9:13 RV60 meta hipatɨ mepenanɨitɨa memɨtehayewakɨ ke'axamemɨteyuriekai.

Kemɨtiuta'iwawiyarie hakiya hepaɨtsita

(Mat 9:14-17 – Mar 2:18-22, Ruk 5:33-39)

14Hikɨ Wani hetsɨa miemete teyɨ'ɨkitɨwamete Ketsutsi hetsɨa me'u'axɨaka mɨpaɨ mekatenita'iwawiya:

—¿Titayari tame meta paritseutsixi tete'utatihakiwa, peru 'ahetsɨa miemeteta teyɨ'ɨkitɨwamete titayari hawaikɨ?

15Ketsutsi mɨpaɨ katiniwaruta'eiya:

—¿Neɨkiyapa kemeteyɨwawe neneɨkeme 'inierimama memɨyuheiwerieka mexi neneɨkeme wahamatɨa 'uyeika? Tukari kanaye'amɨkɨ kepauka neneɨkeme mɨtihanieni watsata, hikɨ 'anake mekaniyuhakikuni. 16Nixewitɨ tewi 'ixuriki mɨye'i pɨkamanetsikitɨwa 'ixuriki mɨhekwakɨ, 'ixuriki mɨhekwa xɨka yutatuni mɨye'i pɨtatsana, tsanimeyari matsi waɨkawa 'axa'anetɨ payeika. 17Yaxeikɨata tsixai mɨyeye'itsie pɨkakatuariwa kaxie winuyari mɨhekwa mukwanakɨ. Mexɨka mɨpaɨ tiuyurieni, tsixai kanititsanikeni, winu kanitayeuriweni, meta tsixai kaneuyewautseni. Matsi kaxie winuyari mɨhekwa tsixai mɨhehekwatsie kanikatuariwani, mɨpaɨ naitɨ 'atsipɨkatiyɨni.

'Uka nunutsi kemɨtimɨkikai meta 'ukaratsi mɨtikuyekai

(Mat 9:18-26 – Mar 5:22-43, Ruk 8:41-56)

18Mexi mɨpaɨ tiwakuxaxatɨwakai, xewitɨ kaninuani teɨteri wa'ukiyari, hɨxiena kaniutitunumakeni, mɨpaɨ tikɨhɨawetɨ:

—Neniwe 'uka kanemɨni xike. Peru kenemie hetsiena keneutime'i, 'ana kananutanierimɨkɨ.

19Ketsutsi 'anukukeka 'utɨmana kaneyani, teyu'ɨkitɨwamete warawitɨtɨ. 20Hikɨ 'ana, 'uka mɨtikuyekai tamamata heimana huta wiyari mɨyuriekai xuriyaya kaheunuawekaku, 'ahurawa kaniuyani waritana 'uyemietɨ kanimayɨani 'ɨkarieya putuniyaritsie. 21Mɨpaɨ katiniku'eriwakaitɨni: «Xɨka ne'imayɨani tsikere 'ɨkarieya xeikɨa, 'aixɨa nereu'erietɨ nepayani». 22Peru Ketsutsi ta'aurie 'aweka 'ixeiyaka mɨpaɨ katinitahɨawe:

—Pepɨka'a'iyaritɨakari, neniwe. Yuri pemɨti'eriekɨ 'aixɨa pereu'erietɨ pepatɨa.

'Anatɨtɨ 'aixɨa reu'erietɨ patɨa 'uka.

23Hikɨ Ketsutsi teɨteri wa'ukiyari kie nuaka, kɨrautawiwamete meta teɨteri meniukixiekame waruxeiyaka, 24mɨpaɨ katiniwarutahɨawe:

—Xekeneutayeixɨa. 'Ɨimari pɨkamɨki, matsi pukutsu.

Hikɨ mɨkɨ mekani'atsekaitɨni. 25Peru kepauka memanuyenɨ'arie teɨteri, Ketsutsi kaneutahani, mamayatsie kawiereku, kananukukeni 'ɨimari. 26Hikɨ mɨpaɨ pɨtiutamariwaxɨ mɨkɨ kwieyaritsie naitsarie.

Memakɨkɨpe meta memɨkaniuwawe Ketsutsi 'aixɨa kemɨwaruyuri

27Merikɨtsɨ kepauka Ketsutsi mana mɨyetɨa, yuhutatɨ memɨkaheuneniere mekanenukuweiya, mɨpaɨ mete'uhiwatɨ:

—Ketaneutinenimayata, Rawiri pemɨnu'aya.

28Kiita heutahaku mɨkɨ, memakɨkɨpe 'ahurawa mekaniukɨne, Ketsutsi mɨpaɨ katiniwarutahɨawe:

—¿Yuri xete'erie kename neyɨwe?

Mɨkɨ mɨpaɨ metenitahɨawe:

—Huu, Ti'aitame.

29Hikɨ kaniwaramayɨaxɨani wahɨxita, mɨpaɨ 'utaitɨ:

—Xehetsie yaketiuyɨni yuri kexemɨte'erie.

30Hikɨ meheunenieretɨ mekanakɨne. Peru memɨkatehaxaxatanikɨ Ketsutsi mɨpaɨ yemekɨ katiniwaruhɨritɨani:

—Neuxei, 'ikɨ hepaɨtsita nixeime xepɨkatehaxaxatɨwani.

31Peru, kepauka mɨkɨ memayekɨ, mekateniutaxata mɨkɨ hepaɨtsita naitsarie mɨkɨ kwieyaritsie.

32Hikɨ mehewayekɨkakaku mɨkɨ, hetsɨana kani'atɨarieni tewi kaniuwetɨ kakaɨyari 'axamɨ'ane miwiyakai. 33Hikɨ kepauka Ketsutsi kakaɨyari 'axamɨ'ane manuyenɨ'a, mɨkaniuwekai kaniutaniuni. Teɨteri mekanihɨxiyakaitɨni mɨpaɨ me'utiyuatɨ: «Hatsuaku mɨpaɨ tepɨkatenenieriwawe 'Ixaheri kwieyaritsie». 34Peru paritseutsixi mɨpaɨ mekaniutiyuanekaitɨni: «Mɨkɨ kakaɨyarixi 'axamemɨ'anene tiwa'aitɨwame 'iparewiekaku kaniwarayenɨ'awani kakaɨyarixi 'axamemɨ'anene».

'Itsanamete mepeuyewetse

35Merikɨtsɨ Ketsutsi naitsarie kiekaritetsie 'emɨyeyeutsie meta 'etsimɨyeyeutsie kanikuyeikakaitɨni tukiteta tiku'ɨkitanetɨ, niuki 'aixɨa manuyɨne taheima mieme kuxatatɨ, 'aixɨa meteheu'eriekame warayeitɨwatɨ naime kwiniyakɨ meta naime kememɨte'uka'eniwakai. 36Hikɨ teɨteri yumɨireme waxeiyatɨ, kaniwarutinenimayata, yuxaɨtame memu'uwakaikɨ meta metaxɨrietɨkaitɨ muxatsi yɨhɨweme memɨkahexeiya wahepaɨ. 37Hikɨ mɨpaɨ katiniwarutahɨawe yuhetsɨa miemete teyɨ'ɨkitɨwamete: «'Itsanari pɨwaɨkawa, peru 'itsanamete mepɨkayumɨire. 38'Ayumieme xekeneutawawiri 'itsanari kutsiyari, 'itsanamete mɨwatanɨ'anikɨ yu'itsanarita».

Currently Selected:

Mateu 9: hch

Highlight

Copy