Mateu 8
8
Ketsutsi kemɨrenayehɨa tewi nawi kwiniyayari mexeiyakai
(Mat 8:2-4 – Mar 1:40-45, Ruk 5:12-16)
1Merikɨtsɨ kepauka yemuritsie makane, teɨteri yumɨiretɨ mekaniweiyakaitɨni. 2Hikɨ tewi nawi kwiniyayari mexeiyakai hetsɨana nuaka hɨxiena 'utitunumakeka mɨpaɨ katinitahɨawe:
—Ti'aitame, xɨka pe'awaɨriyani, pepɨyɨwe pemɨnetsi'itieni.
3Ketsutsi yumamá 'utatseraka kanimayɨani, mɨpaɨ 'utaitɨ:
—Nepɨnewaɨriya. Pekaniu'itiyaniri.
Hikɨ yapauka kwiniyaya neunuani, 'itiyatɨ kanayani. 4Hikɨ Ketsutsi mɨpaɨ katinitahɨawe:
—Neuxei, xeimetɨma pepɨkaraxaxatɨwani, mawari wewiwame hetsɨa pɨta kenemie kene'ahekɨata matsihexeiyakɨ, meta 'imikieri kenanutimawa kemɨtiu'aitaxɨ Muitsexi yapemɨtiwatahekɨatɨanikɨ.
Kuyaxi tiwa'aitɨwame yuri kemɨti'eriekai
(Mat 8:5-13 – Ruk 7:1-10)
5Merikɨtsɨ Kaperunaume kiekariyaritsie heutahaku kuya hetsɨana kaninuani xeitsienituyari kuyaxi tiwa'aitɨwame, mɨkɨ waɨriyarika kanipitɨani 6mɨpaɨ 'utaitɨ:
—Ti'aitame 'aku, neti'uximayatsiriwame nekiita payeka hurietɨ kwiyɨanetɨ kwiniyakɨ.
7Ketsutsi mɨpaɨ katinita'eiya:
—Ne nekanimieni 'aixɨa reu'eriekame nemayeitɨanikɨ.
8Kuya rehɨawe:
—Ti'aitame, 'aixɨa nepɨka'ane nekiita pemeutahanikɨ, niukikɨ xeikɨa yakeneutayɨki, mɨkɨkɨ panayehɨiyani neti'uximayatsiriwame. 9Netatsiere nekatini'aitɨarieka nekuyatɨtɨ, meta kuyaxi nepɨtiwa'aitɨwame. Xɨka mɨpaɨ netitahɨawe xeime: “Kenemie”, mɨkɨ pɨyemie. Xeimeta mɨpaɨ xɨka netiutahɨawe: “Kenaye'a”, mɨkɨ kanayeimɨkɨ. Xɨka mɨpaɨ netitahɨawe neti'uximayatsiriwame: “'Ipaɨ ketineyurieneni”, mɨkɨ mɨpaɨ pɨtiyurieni.
10Ketsutsi 'i'enieka nihɨxiyakaitɨni, mɨpaɨ katiniwarutahɨawe mɨkɨ memikuweiyatɨwekai:
—Yurikɨ mɨpaɨ nepɨxerahɨawe, nixeime tɨma 'ixaheritsixi watsata 'ikɨ hepaɨ 'aneme nepɨkakaxeiyawe yuri ti'eriekame. 11Mɨpaɨ nepɨtixekɨhɨawe, yumɨiretɨ mekani'axɨakuni tau manatineika hepatsie kiekatari meta makayuyuipike hepatsie kiekatari, 'Apɨrahami, 'Itsahaki meta Kakuwu wahamatɨa mekaniutiyaxikuni hakewa mɨre'aita taheima makawe. 12Peru mɨkɨ mana memeutahaxɨanikekai mɨpaɨ 'ayumieme memutinunuiwakai, mɨkɨ mekananuyexɨriyakuni takwa yɨwipa yemekɨ memu'uwanikɨ, mana meniutitsuanakuni meniyutakewekuni.
13Hikɨ Ketsutsi mɨpaɨ kuyaxi tiwa'aitɨwame katiniutahɨawe:
—Kenemie. Yuri kepemɨti'erie, mɨpaɨ pɨtiyɨni. 'Anatɨtɨ 'aixɨa reu'erietɨ kanayani ti'uximayatame mɨkɨ hurayaritsie.
Yumɨireme kemɨtiwaranayexɨri
(Mat 8:14-16 – Mar 1:29-34, Ruk 4:38-41)
14Hikɨ kepauka Ketsutsi Pekuru kie munua, warɨkaɨya kaniuxeiya yu'utatsie kakaime hɨiyakame. 15Mamayatsie kanimayɨani, hikɨ hɨiya kanihayewa. Hikɨ mɨkɨ 'anukukeka katiniwarumini.
16Hikɨ taikai, mekani'atɨirieni yumɨireme teɨteri kakaɨyarixi 'axamemɨ'anene memɨwawiyakai, hikɨ kakaɨyarixi niwarayenɨ'ani xeiniukiyarikɨ, 'ana yunaime 'aixɨa meteheu'eriekame kaniwarayeitɨani memɨtekukuyekai. 17Mɨpaɨ tiuyurieku, paye'a Kakaɨyari niukameya Kitsariyaxi kemutayɨ:
«Mɨkɨtɨtɨ kataniunawairieni takwiniya, meta takukuiniya petɨ».
Kemɨtikwaniwe Ketsutsi muweiyanikɨ
(Mat 8:19-22 – Ruk 9:57-62)
18Merikɨtsɨ Ketsutsi waxeiyatɨ teɨteri kememɨteyuxeɨriekai 'auriena yumɨiretɨ, kaniuyuta'aita harakuna 'anutaɨye paitɨ manutuiyanikɨ. 19Hikɨ xewitɨ 'inɨarikɨ mɨti'ɨkitametɨkai hetsɨana nuaka, mɨpaɨ katinitahɨawe:
—Ti'ɨkitame 'aku, 'ahetsie nekatiniwiyamɨkɨ, hakewa pemeyemie neta nekaniyemieni 'a'utɨma.
20Ketsutsi mɨpaɨ katinita'eiya:
—Kauxaitsi yuterɨ mepexeiya, wikixi yu'itua mepexeiyata, peru ne, Yuri Tewi kenemɨtitewa, nepɨkaheixeiya hakewa nemeyukamuritɨani.
21Xewitɨta tiyu'ɨkitɨwame mɨpaɨ katinitahɨawe:
—Ti'aitame, keneneupitɨa meri nemɨyemiekɨ nepaapa nemɨteukimiekɨ.
22Ketsutsi mɨpaɨ katinitahɨawe:
—Nehetsie ketineuwiya, mɨkite keniwaruhayewa, mɨkɨ mɨkite yuhetsɨa miemete mekewarukateuku.
Ketsutsi 'eka kemɨreunuitɨa
(Mat 8:23-27 – Mar 4:35-41, Ruk 8:22-25)
23Merikɨtsɨ kanuwatsie kayerɨka Ketsutsi meta teyɨ'ɨkitɨwametemama yunaitɨ mekanekɨne. 24Hikɨ harakunatsie me'uyehukaku kaniuyutawewieni 'eka waɨkawa tɨrɨkaɨyetɨ hikɨ hamewari kanuwatsie kanakayeuriwekaitɨni. Ketsutsi matsi kanikutsukaitɨni. 25Hikɨ teyɨ'ɨkitɨwamete hetsɨana me'u'axɨaka mekanenutahɨtɨani, mɨpaɨ me'utiyuatɨ:
—Ti'aitame, ketaneutawikweitsitɨa, tepeuyewexime.
26Mɨkɨ mɨpaɨ katiniwarutahɨawe:
―Teɨteri 'etsiwa xeikɨa yuri xemɨte'erie, ¿titayari xetemama waɨkawa?
Hikɨ 'anukukeka 'eka kaniutatieni meta hamewari, hikɨ naitɨ kayuwatɨ kaniutamare.
27Hikɨ mɨkɨ teyu'ɨkitɨwamete mekanihɨxiyakaitɨni, mɨpaɨ me'utiyuatɨ: «¿Tita tewiyari tihɨkɨ 'ikɨ, 'atsita 'eka meta hamewari memei'enie?»
Kakaɨyarixi kememɨtewawiyakai Katarenatari
(Mat 8:28-34 – Mar 5:1-20, Ruk 8:26-39)
28Merikɨtsɨ 'anutaɨye paitɨ heta'aku Ketsutsi, katarenatari wakwietsie paitɨ, yuhutatɨ teɨteri kakaɨyarixi 'axamemɨ'anene memɨwawiyakai teukiyapa mehayenexɨaka mekanenukunake. Kwinimieme metenayu'eririyakaitɨni, 'ayumieme hipatɨ mepɨkayuwaɨriyakai mana memuyekɨnekɨ. 29Merikɨtsɨ mɨkɨ mɨpaɨ mekatenihiwieni:
—¿Ketita perayexeiya, Kakaɨyari nu'aya? ¿'Ena petinua petatsi'uximatɨanike tukari ka'aye'awekaku 'akuxi?
30Merikɨtsɨ mana memanu'uwakaitsie yatewa mekatenikwatɨwekaitɨni tuixuri yumɨiretɨ. 31Kakaɨyarixi 'axamemɨ'anene menitawawirieni mɨpaɨ me'utiyuatɨ:
—Xɨka petatsi'ayenɨ'amɨkɨ, ketaneupitɨa tuixuri temɨwawiyakɨ.
32Mɨpaɨ katiniwarutahɨawe:
—Xekenehu.
Hikɨ mɨkɨ mekanayekɨne teɨteri wahetsie tuixuri wahetsie pɨta mekaneutahaxɨani, hikɨ yunaitɨ tuixuri mekaniutinautsa tekɨata mekaneukaxɨrieni harakunapa, hapa mekaniukwini.
33Hikɨ tuixuri wahɨwemete mekaniyuta'una, hikɨ kiekaritsie me'uxɨaka naime mekateniutaxata meta kakaɨyarixi 'axamemɨ'anene memɨwawiyakai kememu'itɨariekai. 34'Ayumieme yunaitɨ teɨteri kiekatari mekanayekɨne Ketsutsi me'anukunakeke. Hikɨ kepauka memixei waɨriyarika mekanipitɨani mɨyemiekɨ wakwiepa mɨka'uyeikanikɨ.
Currently Selected:
Mateu 8: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
