Sinulo 2
2
Ze ñolezwi Keleke ya Efese
1“Ñolela lingeloi la keleke ya Efese, u li,
‘Ki ye taba ye zwa ku yena ya sweli linaleli ze supile mwa lizoho la hae la silyo, mi ya zamaya mwahal'a lilampi ze supile za gauda. 2Ni ziba z'o ezize kaufela. Ni ziba m'o sebelelize ka tata ni ka pilu-telele. Ni ziba kuli ha u lumelelani ni ba ba maswe, ni kuli u s'o likile ba ba ipiza baapositola, be i si bona, mi wa fumana kuli ki mahata. 3U na ni pilu-telele, u keni mwa manyando kabakala ka, mi ha u si ka katala. 4Kono se ni ku nyaza ka sona ki se. Ha u sa ni lata mo n'o ni latela pili. 5Hupula buhule bwa ku zwa k'o wile! U tuhele libi za hao, mi u eze mo n'o kalezi. Haiba u sa tuheli libi za hao, ni ka taha ku wena, ni t'o zwisa lampi ya hao mwa sibaka sa yona. 6Nihakulicwalo, se sinde kwa neku la hao ki se. U toile likezo za Manikolai sina mo ni li toyezi ni na.
7 #
Sim 2.9; Sin 22.2; Ezek 28.13; 31.8 ‘Haiba mu na ni lizebe, mu utwe s'o bulela Moya kwa likeleke!
‘Ba ba tuzi, ni ta ba lumelela ku ca miselo ya kota ya bupilo ye melile mwa simu ya Mulimu.’
Ze ñolezwi Keleke ya Smirna
8 #
Isa 44.6; 48.12; Sin 1.17; 22.13 “Ñolela lingeloi la keleke ya Smirna, u li,
‘Ki ye taba ye zwa ku Wa Pili ni Wa Mafelelezo, ya n'a shwile mi wa pila hape. 9Ni ziba maswenyeho a hao. Ni ziba ni bubotana bwa hao. Kono hande-nde u fumile! Ni ziba bumaswe b'o bulelwa ka bona ki ba ba ipiza Majuda, kono be i si bona. Bao, ki mukopano feela wa batu ba ba zamaiswa ki Satani. 10U si ke wa sabiswa ki sifi ni sifi se si ka ku nyandisa. Teeleza! Ya Maswe u ta mi lika ka ku kenya ba bañwi mwa tolongo. Maswenyeho a mina a ta nga mazazi a lishumi. U sepahale ku isa kwa lifu, mi ni ta ku fa mupuzo wa ba ba tuzi, ili bona bupilo.
11 #
Sin 20.14; 21.8 ‘Haiba mu na ni lizebe, mu utwe s'o bulela Moya kwa likeleke!
‘Ba ba ka tula ha ba sa na ku utwiswa butuku ki lifu la bubeli.’
Ze ñolezwi Keleke ya Pergamo
12“Ñolela lingeloi la keleke ya Pergamo, u li,
‘Ki ye taba ye zwa ku yena ya na ni sabule ye seha kafa ni kafa. 13Ni ziba k'o ina. Ki kona kw'a beile Satani lubona lwa hae. Wena u na ni niti ku na, mi ha u si ka tuhela tumelo ya hao ku na, nihaili ka yona nako ya Antipasi, paki ya ka ye sepahala, h'a bulaiwa hona ko ku mina kw'a inzi Satani. 14#Lipa 22.5, 7; 31.16; Mul 23.4; Lipa 25.1-3 Nihakulicwalo, li teñi ze ni ku nyaza ka zona. Ku sa na ni ba bañwi, hona koo, ba ba sa latelela lituto za Balaami, yena ya lutile Balaki mw'a ka kenyeza batu ba Isilaele mwa sibi, ka ku ca lico ze tabezwi balimu, ni ka buhule cwalo. 15Kamukwaoswana, u sa na ni batu, hona koo, ba ba sa latelela tuto ya Manikolai. 16Tuhela libi za hao! Hakusicwalo, ni ka taha ni t'o lwanisa kapili batu bao ka sabule ye zwa mwa mulomo wa ka.
17 #
Mut 16.14-15; 16.33-34; Joa 6.48-50; Isa 62.2; 65.15 ‘Haiba mu na ni lizebe, mu utwe s'o bulela Moya kwa likeleke!
‘Ku bona ba ba tuzi, ni ka ba fa kwa manna a patilwe. Ni ka fa yo muñwi ni yo muñwi wa bona licwe le lisweu, fo ku ñozwi libizo le linca, le li sa zibwi ki mutu konji yena feela ya li amuhela.’
Ze ñolezwi keleke ya Tiyatira
18“Ñolela lingeloi la keleke ya Tiyatira, u li,
‘Ki ye taba ye zwa ku Mwan'a Mulimu, wa meeto a tuka sina mulilo, ni wa mahutu a benya sina sipi ye kenisizwe. 19Ni ziba z'o eza kaufela. Ni ziba lilato la hao, busepahali bwa hao, bunde bwa lituso za hao ku ba bañwi, ni mutundamenyi wa hao. Ni ziba kuli ka nako ye u eza ze ñata ku fita pili. 20#1 Male 16.31; 2 Male 9.22, 30 Kono se ni ku nyaza ka sona ki se. U fa Jezabele sibaka, ili yena musali ya ipiza mulumiwa wa Mulimu. Yena yo u kelusa batanga ba ka, ka ku ba luta za buhule, ni ka ku ca lico ze tabezwi balimu. 21Ni mu file nako ya ku tuhela libi za hae, kono h'a lati ku lisela buhule bwa hae. 22Cwale ni ka mu poseza fa mumbeta, fo yena ni ba ba fosize ni yena kaufela ba ta nyanda hahulu. Ni ka eza cwalo honafa, konji ha ba ka tuhela bumaswe bo ba ezize ni yena. 23#Lipi 7.9; Jer 17.10; Lipi 62.12 Ni ta bulaya ni bana ba hae, mi cwale likeleke kaufela kihona li ta lemuha kuli ki na ya ziba mihupulo ni litakazo za batu. Ni ta kutiseza yo muñwi ni yo muñwi wa mina ka s'a ezize.
24‘Haili mina ba bañwi ba keleke ya Tiyatira, ba ba siyezi, ha mu si ka latelela lituto ze maswe zeo. Ha mu si ka ituta ze bizwa ki ba bañwi kuli ki “kunutu ye tuna ya Satani.” Ni mi bulelela kuli ha ni sa na ku ekeza fa bukiti bo mu lwezi. 25Kono mu kumalele ku se mu sweli ku fitela ha ni ta kuta. 26Ku ba ba tula, ba ba ka tundamena ku eza se ni bata ku fitela kwa mafelelezo, ni ta ba fa maata fahalimw'a macaba. 27Luli, ni ta ba fa maata a swana ni a ni filwe ki Ndate. Ba ta busa macaba ka mulamu wa sipi ni ku a tuba buemba-emba sina lipiza za lizupa. 28#Lipi 2.8-9 Ni ta ba fa ni Lilungwe cwalo.
29‘Haiba mu na ni lizebe, mu utwe s'o bulela Moya kwa likeleke!’ ”
Currently Selected:
Sinulo 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.