Sinulo 3
3
Ze ñolezwi Keleke ya Sarda
1“Ñolela lingeloi la keleke ya Sarda, u li,
‘Ki ze litaba ze zwa ku yena ya sweli mioya ye supile ya Mulimu ni linaleli ze supile. Ni ziba z'o eza kaufela. Ni ziba kuli u tumile kuli wa pila, kanti u shwile! 2Cwalehe, zuha! U tiise s'o sa na ni sona, si si ka shwelela kale. Kakuli ni lemuhile kuli z'o ezize ha li si ka konda fapil'a Mulimu wa ka. 3#Mat 24.43-44; Luk 12.39-40; Sin 16.15 U hupule z'o lutilwe, ni m'o li utwezi. U li mamele, mi u tuhele libi za hao. Haiba u sa zuhi, ni ka taha ku wena sina lisholi, u sa zibi nako ye ni ka taha ka yona. 4Kono ba sikai, hona koo ku mina kwa Sarda, ba bulukile liapalo za bona li nze li kenile. Bao ba ta zamaya ni na, ba apezi ze sweu, kakuli ba lukela ku eza cwalo. 5#Mut 32.32-33; Lipi 69.28; Sin 20.12; Mat 10.32; Luk 12.8 Ba ba ka tula, ba ta apeswa liapalo ze sweu, mi ha ni na ku zwisa mabizo a bona mwa buka ya bupilo. Ni ta bulela patalaza fapil'a Ndate ni mangeloi a hae kuli ki ba ka.
6‘Haiba mu na ni lizebe, mu utwe s'o bulela Moya kwa likeleke!’ ”
Ze ñolezwi Keleke ya Filadelfia
7 #
Isa 22.22; Job 12.14 “Ñolela lingeloi la keleke ya Filadelfia, u li,
‘Ki ze litaba ze zwa ku ya kenile ni wa niti, ya sweli sinotolo sa Mulena Davida, ya kwalula mi ku si na ya kona ku kwala, ni ya kwala mi ku si na ya kona ku kwalula. 8Ni ziba z'o eza kaufela. Ni ziba kuli u na ni maatanyana feela, kono nihakulicwalo u latelezi linzwi la ka, mi u sepahalile ku na. Ni ku kwalulezi sikwalo se si si na ya ka si kwala. 9#Isa 49.23; 60.14; 43.4 Utwa! Haili ka za sitopa sa Satani sani, sa mahata, ba ba ipiza Majuda kono i si bona luli, ni ta ba tisa ku wena, ba t'o ipeya kwatas'a hao, mi kaufel'a bona ba ta ziba kuli na ku lata. 10Kakuli u bulukile linzwi la ka ka tundamo, ni na, ni ta ku babalela ka nako ya manyando a' tuha a tela lifasi kaufela, ku t'o lika batu kamukana. 11Ni tuha ni taha. U babalele s'o na ni sona, kuli u si ke wa uzwezwa ki mutu mupuzo wa hao wa ku tula. 12#Sin 21.2; Isa 62.2; 65.15 Ya ka tula, ni ta mu eza musumo mwa tempele ya Mulimu wa ka, mi h'a sa na ku zwa mwateñi hape. Ni ta ñola fa pata ya hae libizo la Mulimu wa ka, ni libizo la munzi wa Mulimu wa ka, ona Jerusalema o munca, o ka tuha u zwa kwa lihalimu ku Mulimu wa ka. Ni ta ñola cwalo ni libizo la ka le linca.
13‘Haiba mu na ni lizebe, mu utwe s'o bulela Moya kwa likeleke!’ ”
Ze ñolezwi Keleke ya Laodisea
14 #
Mash 8.22
“Ñolela lingeloi la keleke ya Laodisea, u li,
‘Ki ze litaba ze zwa ku Amen, paki ye sepahala, ni ya niti, ya li makalelo a z'a bupile Mulimu kamukana. 15Ni ziba z'o ezize kaufela. Ni ziba kuli ha u bati, bo ha u cisi. Ni lakaza kuli kambe wa bata kapa ku cisa! 16Kono kakuli u futumala feela, ha u cisi, bo ha u bati, ni ta ku taza! 17U bulela cwana, u li, “Ni fumile mi ni iketile. Ni na ni ze ni tokwa kaufela.” Kono ha u zibi kuli u mubotana ya nyanda luli! U njebwe, u mapunu, mane u sibofu. 18Na ku eleza kuli u leke ku na gauda luli ye nde, ye kenisizwe ka mulilo kuli u fume. U leke hape liapalo ze sweu kuli u apale, u pate mapunu a hao a swabisa. U leke ni mulyani wa ku beya mwa meeto a hao kuli u bone. 19#Mash 3.12; Maheb 12.6 Na, ni kalimela ni ku nata be ni lata kaufela. Tukufalelwahe, mi u tuhele libi za hao. 20Utwa! Ni yemi fa munyako, mi na ngongota. Haiba mutu a utwa linzwi la ka, mi a kwalula sikwalo, ni ta kena mwa ndu ya hae, ni y'o ca ni yena, mi ni yena u ta ca ni na. 21Ku ba ba ka tula, ni ta ba lumelela ku ina kwatuko a ka fa lubona lwa ka, sina na, ha ni tuzi, mi ni inzi ni Ndate fa lubona lwa hae.
22‘Haiba mu na ni lizebe, mu utwe s'o bulela Moya kwa likeleke!’ ”
Currently Selected:
Sinulo 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
