Sinulo 1
1
1Mwa buka mo, ku ñozwi litaba ze sinuzwi ki Jesu Kreste. Jesu u filwe litaba ze ki Mulimu ku bonisa batanga ba hae ze ka tuha li ezahala. Kreste u zibisize mutang'a hae Joani litaba ze, ka ku mu lumela lingeloi la hae. 2Mi Joani u bulezi z'a boni kaufela. Ye ki piho ya linzwi le li zwa ku Mulimu ni niti ye sinuzwi ki Jesu Kreste. 3U litohonolo ya bala buka ye patalaza, mi ba litohonolo ba ba teeleza manzwi a bupolofita bo, mi ba mamela se si ñozwi mwa buka ye, kakuli nako i se i li fakaufi kuli zeo kaufela li ezahale.
Litumeliso kwa likeleke ze supile
4 #
Mut 3.14; Sin 4.5 Na Joani, ni ñolela likeleke ze supile ze mwa naha ya Asia.
Mu fiwe sishemo ni kozo ki Mulimu ya li teñi, ya n'a li teñi, ni ya sa taha. Mu fiwe sishemo ni kozo ki mioya ye supile ye fapil'a lubona lwa hae. 5#Isa 55.4; Lipi 89.27 Mu fiwe sishemo ni kozo ki Jesu Kreste, paki ye sepahala, mweli wa mushimani, wa pili ya zusizwe kwa bafu, mi ya li mubusi wa malena ba lifasi.
Wa lu lata, mi u lu lukuluzi kwa libi za luna ka lifu la hae. 6#Mut 10.6; Sin 5.10 U lu ezize sicaba sa baprisita ku sebeleza Mulimu Ndat'ahe. Bulena ni maata li be za Jesu Kreste kamita ni mita! Amen.
7 #
Dan 7.13; Mat 24.30; Mar 13.26; Luk 21.27; 1 Bates 4.17; Zak 12.10; Joa 19.34, 37 A mu bone ki yo, wa taha ka malu! Mutu kaufela u ta mu bona, mane ni bona ba ba mu tabile. Batu ba lifasi kamukana ba ta lila kabakala hae. Ee, ku ta ba cwalo! Amen.
8 #
Sin 22.13; Mut 3.14 “Ki na Wa Pili ni Wa Mafelelezo,” ku bulela Mulena Mulimu ya Maata Kaufela, ya li teñi, ya n'a li teñi, ni ya sa taha.
Joani u bona Kreste mwa pono
9Ki na Joani, mwanahabo mina, ya kopana ni mina ka Jesu mwa manyando, ni mwa Mubuso, ni mwa tundamo. Ni beilwe mwa soli se si bizwa Patmosi kakuli ni bulezi linzwi la Mulimu ni niti ye ni sinulezwi ki Jesu. 10Ka Lizazi la Mulena, na ngiwa ki Moya, mi na utwa linzwi le lituna, le li utwahala inge tolombita, mwamulaho wa ka. 11La li, “Ñola mwa buka z'o bona, mi u lumele buka yeo kwa likeleke ze, ze supile, ili likeleke ze mwa Efese, mwa Smirna, mwa Pergamo, mwa Tiyatira, mwa Sarda, mwa Filadelfia ni mwa Laodisea.”
12Na itemuna kuli ni bona ya n'a bulela ni na. Kiha ni bona lilampi ze supile za gauda. 13#Dan 7.13; 10.5 Mwahal'a zona na bona inge ku na ni sibupeho se si swana ni sa mutu ya apezi siapalo se sitelele, se si bata ku kwahela mahutu a hae, mi ya itamile lukanda lwa gauda mwa sifuba. 14#Dan 7.9; 10.6 Milili ya hae ne i li ye misweu twaa, inge boya bo bu kenile hahulu kapa litwa, mi meeto a hae n'a swana ni mulilo o tuka. 15#Ezek 1.24; 43.2 Mahutu a hae n'a benya sina sipi ye shengunuka mwa mulilo, ye hutilwe ni ku keniswa hande. Linzwi la hae ne li tuuma inge mezi a fa sibuba se situna. 16N'a sweli linaleli ze supile mwa lizoho la silyo, mi mwa mulomo wa hae ne ku zwa sabule ye buhali kafa ni kafa. Pata ya hae ne i benya sina lizazi musihali. 17#Isa 44.6; 48.12; Sin 2.8; 22.13 Ha ni mu bona, na wela kwa mahutu a hae sina mutu ya shwile. Kiha s'a beya lizoho la hae la silyo fahalimw'a ka, mi a li, “U si ke wa saba! Ki na Wa Pili ni Wa Mafelelezo. 18Ki na ya pila! Ne ni shwile, kono cwale ni pila kuya kuile. Ni na ni maata fahalimw'a lifu ni lifasi la ba ba shwile. 19Ñola lika z'o bona, ili ze li teñi ka nako ye, hamohocwalo ni ze ka ezahala mwamulaho. 20Taluso ya kunutu ya linaleli ze supile z'o bona mwa lizoho la ka la silyo ni ya lilampi za gauda ze supile ki ye. Linaleli ze supile ki mangeloi a likeleke ze supile. Mi lilampi ze supile ki likeleke ze supile.”
Currently Selected:
Sinulo 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.