Nehemia 5
5
Nehemia u felisa lipilaelo za batu
1Mwamulahonyana, batu ba bañata, ili basali ni banna, ba kala ku bilaela ka Majuda bahabo bona. 2Ba bañwi ba li, “Lu na ni mabasi a matuna. Lu bata lico ze ka lu pilisa.”
3Ba bañwi ba li, “Lu se lu kolotisize masimu a luna a lico ni a likota za veine, mane ni mandu, kuli lu fumane lico ze lu likana, lu si ke lwa lapa.”
4Mi hape ba bañwi ba li, “Lu na ni ku kolota mali a ku telela masimu a luna a lico ni a likota za veine. 5Kikuli ha lu bati lika ze batiwa ki Majuda bahabo luna, nji? Bana ba luna kikuli ha ba swani ni ba bona, nji? Kono lu hapelezwa ku isa bana ba luna kwa butanga. Bana ba luna ba basizana ba bañwi ba se ba lekisizwe inge batanga. Ha lu sa na se lu ka eza, kakuli lu se lu amuhilwe masimu a luna a lico ni a likota za veine.”
6Cwale na, ni li Nehemia, ha ni utwa lipilaelo za bona, na nyema. 7#Mut 22.25; Malivi 25.35-37; Mul 23.19-20 Na nahana se ni ka eza. Na nyaza baeteleli ni manduna, mi na li ku bona, “Mu nyandisa banabahabo mina!”
Na biza mukopano o mutuna ku t'o talima za butata bo. 8Na li, “Lu likile mo ne lu konela kaufela ku liulula Majuda bahabo luna ba ba itekisize kwa balicaba. Cwale mina mu hapeleza banabahabo mina ku itekisa kwa Majuda bahabo bona!” Baeteleli ba kuza, mi ba palelwa ku fumana se ne ba ka bulela.
9Cwale na li, “Se mu eza si fosahalile! Mu swanezi ku saba Mulimu ni ku eza ze lukile, isiñi ku fa lila za luna, bona balicaba, libaka la ku lu sheununa ka lona. 10Ni lumelezi batu ku kolota lico ni mali ku na, mi ni bona banabahesu ni babeleki ba ka ba ezize cwalo. Cwale a lu tuheleñi likoloti zeo kaufela. 11Mu ba kutiseze masimu a bona a lico, a likota za veine, za olive, ni mandu hona fa! Mu takule likoloti ze ba mi kolotezi kamukana i ka ba mali, kamba mabele, waine kamba mafula.”
12Baeteleli ba alaba, ba li, “Lu ta eza m'o bulelela, mi lu ta kutiseza liluwo kwa bañi ba lona ni ku sa lifisa mali a likoloti.”
Cwale na biza baprisita mi na hapeleza baeteleli kuli ba itame, mi ba buluke buitamo bwa bona. 13Cwale na tubula siapalo se ne ni itamile mwa liteka, na si tutula, na li, “Mulimu u ka tutula cwalo ufi ni ufi wa mina ya si ke a buluka buitamo bwa hae. Mulimu u ta nga mandu a mina ni ze mu luile kaufela, a mi siye mu si na ni se sikana.”
Batu kaufela ba ba ne ba li teñi fo, ba li, “Amen!” Ba lumbeka Muñ'a Bupilo, mi ba buluka buitamo bo ne ba ezize.
Bunde bwa Nehemia
14Mwa lilimo ze lishumi ka ze peli kamukana ze ne ni li mubusisi wa naha ya Juda, ili ku zwa ka silimo Aritazerisi ha n'a li mulena yo muhulu ka lilimo ze mashumi a mabeli, ku fitela silimo sa hae sa bumashumi a malalu ka ze peli, banabahesu kamba na, ha lu si ka ca lico ze ne lu lukela ku ca ha lu li babusisi. 15Babusisi ba ba ne ba li teñi pili ku na, ne ba imeza batu ka ku telisa yo muñwi ni yo muñwi mashumi a mane a muwaya-waya wa silivela ka zazi ni zazi, ili wa lico ni waine. Mane ni bona babeleki ba bona ne ba nyandisa batu. Kono na, na fapana ni bona kakuli ne ni saba Mulimu. 16Na beya maata a ka kamukana mwa musebezi wa ku yaha limota, mi ha ni si ka bata bufumu. Mutu kaufela ya n'a sebeza ku na, n'a tusana ni na kwa ku yaha. 17Ne ni atisa ku ca ni batu ba mwanda ka mashumi a ketalizoho ili Majuda ni baeteleli ba bona cwalo, kwand'a batu ba ba ne ba tahanga ku na ku zwa mwa manaha a fakaufi. 18Ka zazi ni zazi ne ni ba bulaelanga pulu, lingu ze silezi ze nde ka ku fitisisa ni likuhu ze ñata, mi mwamulaho a mazazi a lishumi hape ne ni ba tisezanga waine ye nca. Nihakulicwalo ne ni sa bati tuso ye zwa kwa batu sina babusisi ha ba lumelezwi cwalo, kakuli batu ne ba imezwi.
19Na ku lapela, Mulimu, u hupule bunde bo ni ezelize batu ba.
Currently Selected:
Nehemia 5: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.