Nehemia 6
6
Ku leliwa Nehemi
1Sanibalati, Tobia, Geshemu, ni lila za luna kamukana ba utwa kuli lu felize ku yaha limota ni kuli ne ku si na masuba a n'a siyezi ku lona. Nihakulicwalo, ne lu si ka feleleza ku beya likwalo kwa minyako. 2Cwale Sanibalati ni Geshemu ba ni lumela linzwi. Ba kupa kuli ni y'o kopana ni bona mwa munzi o muñwi o mwa Libala la Ono. Kao n'e li kalembeshwa ka bona ka ku ni tiseza kozi. 3Na luma batu ku y'o ba bulelela kuli, “Na, ni sweli musebezi o mutuna, mi ha ni koni ku taha ko. Ha ni na ku yemisa musebezi kabakala ku t'o mi bona feela.”
4Ba ni lumela hape linzwi le li swana, mi ka nako ni nako ne ni nze ni ba alaba kalabo ye swana.
5Cwale Sanibalati a ni lumela liñolo la buketalizoho, ili le li si ka kwaliwa, mi li lwezwi ki yo muñwi wa batanga ba hae. 6Ne li li, “Geshemu u ni bulelezi kuli ku na ni mabulatwi a zamaya mwahal'a batu be lu bapani ni bona kuli wena ni Majuda mu lela ku fetuhela mubuso, mi kikabakaleo ha mu yaha sinca limota. Hape u li wena u lela ku ikeza mulena. 7Mi hape s'o lukisize ni bapolofita ba bañwi ku bulela mwa Jerusalema kuli ki wena mulena wa Juda. Cwale mulena yo muhulu u tamehile ku i utwa. Kiha ni hupuzi kuli, wena ni na, lu t'o kopana lu ambolisane ka taba ye.”
8Na mu lumela kalabo, na li, “Ha ku na niti ku z'o bulela kamukana. Ki wena ya ipupezi zona kaufela.”
9Kaufel'a bona ne ba lika ku lu sabisa kuli musebezi u yeme. Kono cwale, Mulimu u ni fe maata ni tiye!
10I sa li ka yona nako yeo, Shemaya mwan'a Delaya, ili muikulu wa Mahetabele, n'a sa koni ku zwa mwa ndu ya hae. Cwale na y'o mu lekula. Kiha s'a li ku na, “Wena ni na, lu swanezi ku y'o ipata hamoho mwa ndu ye kenile mwa Tempele, mi lu kiye kwa munyako, kakuli ba taha ku t'o ku bulaya. I ka ba busihu bufi kamba bufi ku kala la kacenu le, ba ka t'o ku bulaya.”
11Na mu alaba, na li, “Na, ha ni mutu ya saba ni ku y'o ipata. Kana u hupula kuli ni ka lika ku ipilisa ka ku ipata mwa Tempele, nji? Ha ni na ku ya.”
12Ha ni se ni nahanile litaba zeo, na lemuha kuli Mulimu n'a si ka bulela ni yena, ni kuli bo Tobia ni Sanibalati ne ba mu lekile kweta kuli a ni bulelele taba yeo. 13Ne ba mu lekile ku t'o ni sabisa, ili kuli ni kene mwa sibi, mi ba kone ku ni sinya libizo ni ku ni swabisa.
14“Mulimu, hupula se ba ezize bo Tobia ni Sanibalati, mi u ba utwise butuku. Hupula musali wa mupolofita yani Noadia ni bapolofita ba bañwi ba ba likile ku ni sabisa.”
Mafelelezo a musebezi
15Mwamulaho a mazazi a mashumi a ketalizoho ka a mabeli a ku sebeza limota la fela, kweli ya Eluli ha i eza mashumi a mabeli ka a ketalizoho. 16Lila za luna, ili batu ba ba mwa manaha a lu potolohile, ha ba utwa cwalo, ba komoka ni ku swaba kakuli mañi ni mañi n'a ziba kuli musebezi n'o felizwe ka tuso ya Mulimu.
17Nako yeo kaufela baeteleli ba Majuda ne ba nze ba ñolelana ni Tobia. 18Batu ba Juda ba bañata ne ba li kwa neku la hae, kakuli n'a li mukwenyan'a Shekania, mwan'a Ara. Fahalimw'a zeo, mwan'a hae Johanani n'a nyezi mwan'a Meshulami, mwan'a Berekia. 19Batu ne ba kona ku bulela fapil'a ka ka likezo ze nde z'a n'a ezize Tobia, mi ne ba mu bulelelanga ze ne ni bulela kamukana. Kono a tundamena ku ni lumelelanga mañolo a ku lika ku ni sabisa.
Currently Selected:
Nehemia 6: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
