Nehemia 4
4
Musebezi wa Nehemia wa hanyezwa
1Sanibalati h'a utwa kuli luna Majuda ne lu yaha sinca limota, a halifa hahulu, mi a kala ku lu sheununa. 2A bulela fapil'a banabahabo ni makuta a Masamaria, a li, “Bona Majuda ba, ba ba si na maata, ba hupula kuli ba ezañi hona fa? Ba, ba hupula ku yaha munzi sinca, nji? Kana ba hupula kuli ka ku eza litabelo ba ta kona ku feza musebezi ka lizazi li li liñwi feela, nji? Kana ba ta kona ku fumana macwe a ku yahisa mwahal'a mabunda a matakala a cile ao, nji?”
3Tobia wa Muamoni n'a yemi kwatuko a hae, mi a ekeza, a li, “Ki limota mañi le ba yaha? Bati nihaili luwawa feela ne lu ka kona ku li wisa!”
4Na, Nehemia, na lapela, na li, “Oho Mulimu, utwa mo ba lu sheununela. Ku lu sheununa kwa bona ku ba kutele. Ba amuhiwe ze ba na ni zona kaufela, ba hapiwe mi ba isiwe sina mapantiti kwa naha i sili. 5U si ke wa swalela bumaswe bo ba eza, mi u si ke wa libala sibi sa bona, kakuli ba tompolozi luna ba ba yaha.”
6Cwale lwa zwelapili ku yaha limota, mi kapili lwa fita fahali a lona ku ya mwahalimu, kakuli batu ne ba tabela ku sebeza.
7Sanibalati ni Tobia, ni batu ba Arabia, Maamoni, ni Maashidodi ha ba utwa kuli lu zwelapili mwa musebezi wa ku zusa limota la Jerusalema ni kuli libaka ze n'e tubehile za tibiwa, ba nyema hahulu. 8Cwale ba lelisana hamoho ku t'o lwanisa Jerusalema kuli ku be ni mufili-fili. 9Kono lwa lapela ku Mulimu wa luna, mi lwa beya balibeleli kuli ba libelele musihali ni busihu.
10Batu ba Juda ne ba na ni pina ye ne ba opela, ye li,
“Lwa fokola ka ku lwala milwalo.
Matakala a' swanezi ku zwiswa
ki a mañata.
Cwale lu ka yaha cwañi limota
kacenu?”
11Lila za luna ne li hupula kuli ha lu na ku li bona kamba ku ziba se si ezahala, konji ha li se li fitile, mane li lu bulaye ni ku yemisa musebezi wa luna. 12Ka nako ni nako Majuda ba ba ne ba pila mwahal'a lila zeo, ne ba tahanga ku t'o lu lemusa milelo ya zona bakeñisa luna. 13Cwale na abela batu mikwale, malumo, ni buta, mi na ba inisa ka mishiku ya bona kwabuse bwa limota, kai ni kai ko ne ku si ka fela kale.
14Na bona kuli batu ne ba bilaela hahulu, kiha ni se ni li ku bona ni kwa baeteleli ba bona hamoho ni manduna, “Mu si ke mwa saba lila za luna. Mu hupule butuna bwa Muñ'a Bupilo ni mw'a sabiseza, mi mu lwanele banabahabo mina, bana ba mina, basali ba mina ni mandu a mina.” 15Lila za luna za ziba kuli ne lu se lu utwile ka milelo ya zona, mi za lemuha kuli Mulimu n'a tuzi milelo ya zona. Cwale lwa kutela ku y'o sebeza kwa limota kamukan'a luna.
16Ku zwa hona fo, batu ba ka ba bañwi ba sebeza, mi ba bañwi ba libelela ba sweli malumo, litebe, buta, mi ba apezi liapalo za ndwa. Mi baeteleli ba tusa ka pilu ya bona kaufela batu ba Juda. 17Batu bao ne ba yaha limota sinca. Mutu ufi ni ufi ya n'a sebeza kwa muyaho n'a sebeza ka lizoho li li liñwi feela, mi ku le liñwi n'a sweli sitabaniso. 18Hape, yo muñwi ni yo muñwi ya n'a sebeza n'a lepelelize mukwale mwa teka. Ya n'a swanezi ku liza tolombita ya ku lemusa batu n'a ina ni na. 19Na bulelela baeteleli, manduna ni batu ba bona, na li, “Musebezi ki o mutuna, u namile, mi luna lu shambaukile hahulu fa limota. 20Haiba mu utwa tolombita i lila, mu t'o kopanela ku na. Mulimu wa luna u ta lu lwanela.” 21Cwale ka zazi ni zazi, ku zwa ha ku patalala mane ku isa ka swalala, ba bañwi ne ba sebeza fa limota, mi ba bañwi ne ba libelela ba sweli malumo mwa mazoho.
22Ka zona linako zeo kaufela ne ni bulelelanga bazamaisi kaufela kuli bona ni batusi ba bona kamukana ne ba swanezi ku ina mwa Jerusalema busihu, kuli lu libelele munzi busihu ni musihali lu nze lu sebeza. 23Ne ni sa tubuli liapalo za ka busihu, nihaili bona banabahesu cwalo, kamba batanga ba ka, mane ni bona balibeleli ba ka. Ka nako kaufela, kamukan'a luna ne lu sweli lilwaniso za luna.
Currently Selected:
Nehemia 4: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
