Mareka 9

1Mi Jesu a zwelapili, a li, “Mu hupule taba ye! Ku na ni ba bañwi, hona mo, ba ba si ke ba shwa, ba si ka bona pili Mubuso wa Mulimu ha u taha ka maata.”

Jesu u bonahala ku benya inge liseli

(Mat 17.1-13; Luk 9.28-36)

2 # 2 Pit 1.17-18 Mwamulaho a mazazi a silezi, Jesu a nga Pitrosi, ni Jakobo, ni Joani, mi a kambama ni bona fa lilundu le litelele, ko ba y'o ina ba li nosi. Sibupeho sa hae sa fetuha ba nze ba talimezi. 3Liapalo za hae za kala ku benya. Za ba ze sweu twaa, ili busweu bo bu si ka tahiswa ki mutu mwa lifasi kaufela. 4Kiha balutiwa bao ba balalu ba bona Elia ni Mushe ba nze ba ambola ni Jesu. 5Honafo, Pitrosi a li ku Jesu, “Mulen'a ka, ha si bunde bo ha lu inzi kwanu! Kabe lu yaha maongo a malalu. Lo luñwi lu be lwa hao, lo luñwi lwa Mushe ni lo luñwi lwa Elia!” 6Yena hamoho ni ba bañwi, ne ba sabile hahulu, mane n'a sa zibi ni s'a n'a bulela.

7 # Mat 3.17; Mar 1.11; Luk 3.22 Kwa taha lilu, mi la ba kwahela ka muluti wa lona. Mi kwa utwahala linzwi mwa lilu, le li li, “Yo ki Mwan'a ka luli ye ni lata. Mu mu utwe!” 8Cwale honafo, balutiwa ba talima kafa ni kafa, kono ha ba si ka bona mutu haisi Jesu feela, ya inzi ni bona.

9Ha ba nze ba shetumuka ku zwa fa lilundu, Jesu a ba laela, a li, “Mu si ke mwa bulelela mutu ze mu boni, konji na, Mwan'a Mutu, ha ni se ni zuhile kwa bafu.”

10Ba mamela taelo yeo, kono ba buzana mwahal'a bona, ba li, “Taba ye ya ku zuha kwa bafu, i talusañi?” 11#Mala 4.5; Mat 11.14 Kiha ba buza Jesu, ba li, “Kikabakalañi Baluti ba Mulao ha ba bulela kuli Elia u swanezi ku taha pili?”

12 # Litu 48.10 Kalabo ya hae ya li, “Elia ki niti u swanezi ku taha pili ku t'o lukisa lika kaufela. Kono, kikabakalañi ha ku ñozwi kuli na, Mwan'a Mutu, ni ta nyandiswa hahulu ni ku shwaulwa? 13Nihakulicwalo, ni mi bulelela kuli Elia u s'a tile kale, kono batu ba ezize ze ne ba lata kaufela ku yena, sina mo ku ñolezwi bakeñisa hae.”

Jesu u folisa mushimani wa moya o maswe

(Mat 17.14-21; Luk 9.37-43a)

14Ha ba se ba li fakaufi ni balutiwa ba bañwi, ba bona kuli ne ba beilwe mwahali ki batu ba bañata ni kuli Baluti ba Mulao ne ba kanana ni bona. 15Batu ba sa bona feela Jesu, ba komoka hahulu, mi ba ulumukela ku yena ku y'o mu lumelisa. 16Jesu a buza balutiwa ba hae, a li, “Mu pihisana ka lifi ni bona?”

17Mutu yo muñwi, mwahal'a nyangela, a mu alaba, a li, “Muluti, ni tisize mwan'a ka wa mushimani ku wena, kakuli u kenwi ki moya o maswe o mu paleleliswa ku bulela. 18Fo u mu swalela kaufela, u mu wiseza fafasi. Hape, mwana u tubula nakambuti kwa mulumo, u kweca meeno mi wa omelela. Ni kupile balutiwa ba hao kuli ba leleke moya wo, kono ba palezwi.”

19Jesu a li ku bona, “Mu batu ba ba cwañi, ba ba sa lumeli? Ni ta ina ni mina nako ye kuma kai? Ni ta konana lili ni mina? A mu ni tiseze mwanana!” 20Mi ba mu tisa ku Jesu.

Moya u sa bona feela Jesu, wa zuhela mwanana ka tata. Mwanana a wela fafasi, a pitika, mi a tubula nakambuti kwa mulomo. 21Jesu a buza ndat'ahe, a li, “Se li nako ye kuma kai mwanana yo a nz'a li cwana?”

Ndat'ahe a li, “N'a li cwalo ku zwa kwa bumbututu bwa hae. 22Se li hañata u nz'o bata ku mu bulaya ka ku mu wisezanga mwa mulilo kamba mwa mezi. Haiba wa kona, u lu utwele butuku, mi u lu tuse!”

23Jesu a li ku yena, “U li, haiba wa kona! Linto kaufela za konahala ku ya lumela!”

24A sa utwa feela cwalo, ndat'ahe mwanana a kalumuka, a li, “Na lumela. Kono a ku ni tuse mwa ku fokola kwa tumelo ya ka.”

25Ibehe, Jesu h'a bona kuli batu kamukana se ba taha ba mata, a kalimela moya o maswe, a li ku ona, “Moya wa busataambi, na ku laela, zwa ku mwanana yo, mi u si ke wa kutela ku yena hape.”

26Cwale, moya wa huwa, mi wa mu wiseza fafasi a nz'a nyakaula ka tata. Kiha u zwa ku yena, mi mwanana a siyala inge situpu feela, mane ba bañata ne ba li, “U shwile!” 27Kono Jesu a swala mwanana kwa lizoho, a mu yemisa, mi a nanuha.

28Jesu ha s'a li mwa ndu, balutiwa ba hae ba mu buza kwa mukunda, ba li, “Kanti kiñi luna ha ne lu palezwi ku leleka moya wo?”

29Mi Jesu a ba alaba, a li, “Moya wa mufuta wo, ha u koni ku zwiswa ki se siñwi, konji ka tapelo feela!”

Jesu u talusa hape za lifu ni zuho ya hae

(Mat 17.22-23; Luk 9.43b-45)

30Ba zwa mwa sibaka seo, mi ba pazula naha ya Galilea fahali. Jesu n'a sa lati kuli batu ba zibe kw'a n'a inzi. 31N'a nz'a luta balutiwa ba hae. N'a li, “Na, Mwan'a Mutu, ni ta fiwa batu ba ba ta ni bulaya. Nihakulicwalo mazazi a malalu ha s'a felile, ni ta zuha kwa bafu.”

32Kono balutiwa ne ba sa utwisisi s'a n'a bulela, mi ne ba saba ku mu buza.

Yo mutuna ki mañi?

(Mat 18.1-5; Luk 9.46-48)

33Ba fita mwa Kapernauma. Ha s'a keni mwa ndu, Jesu a buza balutiwa ba hae, a li, “Ne mu ambola ka lifi mwa nzila?”

34 # Luk 22.24 Kono ba kuza feela, kakuli mwa nzila ne ba kananile fa taba ya kuli yo mutuna ku bona ki mañi? 35#Mat 20.26-27; 23.11; Mar 10.43-44; Luk 22.26 Jesu kih'a ina, a biza balutiwa ba lishumi ka ba babeli, mi a li ku bona, “Mutu h'a lata ku ba wa pili, u swanezi ku ikeza wa mafelelezo ni sikombwa sa ba bañwi kaufela.” 36Kiha s'a nga mwanana, mi a mu yemisa fapil'a bona. A kambeka mazoho fahalimw'a hae, mi a li ku bona. 37#Mat 10.40; Luk 10.16; Joa 13.20 “Mutu kaufela ya amuhela yo muñwi wa banana ba banyinyani sina yo, ka libizo la ka, u amuhela na. Mi ya ni amuhela h'a amuheli na feela, kono u amuhela ni ya ni lumile.”

Ya sa lu lwanisi wa lu yemela

(Luk 9.49-50)

38Joani a li ku Jesu, “Muluti, lu boni mutu ya n'a leleka mioya ye maswe ka libizo la hao, mi lu mu bulelezi kuli a tuhele ku eza cwalo, kakuli ha si wa ku luna.”

39Kono Jesu a alaba, a li, “Mu si ke mwa lika ku mu hanisa, kakuli ha ku na mutu ya kona ku eza makazo ka libizo la ka, hape ku zwa fo a y'o ni sinya libizo. 40#Mat 12.30; Luk 11.23 Ya sa lu lwanisi wa lu yemela. 41#Mat 10.42 Luli na mi bulelela kuli ya ka mi fa komoki ya mezi kakuli mu ba Kreste, yo u ta fumana mupuzo wa hae.

Ze sitatalisa

42“Haili ya ka sitatalisa yo muñwi wa bao ba banyinyani ba ba lumela ku na, ne i ka ba hande ha n'a ka tamelelwa licwe le lituna mwa mulala, mi a nepelwa mwa liwate. 43#Mat 5.30 Haiba lizoho la hao li ku isa mwa sibi, u li pume. Ne i ka ba hande ku wena ha n'o ka kena mwa bupilo ni lizoho li li liñwi, ku fita ku ba ni mazoho a mabeli, mi u y'o nepelwa mwa lyangalilo, mwa mulilo o sa timi. 44Mo ni mabuku a ca litupu a sa shwi, ni mo ku sa timi mulilo. 45Haiba ki lihutu la hao le li ku isa mwa sibi, u li pume. Ne i ka ba hande ku wena ha n'o ka kena mwa bupilo ni lihutu li li liñwi, ku fita ku ba ni mahutu a mabeli mi u y'o nepelwa mwa lyangalilo. 46Mo ni mabuku a ca litupu a sa shwi, ni mo ku sa timi mulilo. 47#Mat 5.29 Mi, haiba ki liito la hao le li ku isa mwa sibi, u li longole. Ne i ka ba hande ku wena ha n'o ka kena mwa Mubuso wa Mulimu u li simpolyo, ku fita ku ba ni meeto a mabeli mi u y'o nepelwa mwa lyangalilo. 48#Isa 66.24 Mo ni mabuku a ca litupu a sa shwi, ni mo ku sa timi mulilo.

49“Mañi ni mañi u ta ncafazwa ka lizwai la mulilo.

50 # Mat 5.13; Luk 14.34-35 Lizwai li munati, kono ha li sampuka li ka natifiswa kañi?

“Mu be ni lizwai, mi mu pilisane ka kozo.”

Currently Selected:

Mareka 9: Lozi09

Highlight

Copy