Mareka 8

Jesu u fepa batu lwa bubeli

(Mat 15.32-39)

1Ha ku si ka fita nako ye telele, kiha ku t'o kubukana hape batu ba bañata ku Jesu. Kakuli ne ba si na lico, Jesu kiha s'a biza balutiwa ba hae, mi a li ku bona, 2“Ni utwela batu bao butuku, kakuli se li mazazi a malalu ba nze ba inzi ni na, mi ha ba sa na sa ku ca. 3Ha ni ka ba kutiseza kwa mahae ni tala, ba ta welelela mwa nzila kakuli ba bañwi ku bona ba zwa kwahule.”

4Balutiwa ba hae ba mu alaba, ba li, “Mwa naheñi mo, mutu u ka fumana kai lico za ku fa batu ba ba kuma fa?”

5Jesu a ba buza, a li, “Mu na ni mahobe a makai?”

Ba li, “Ki a supile!”

6Kih'a laela nyangela kuli ba ine fafasi. Cwale a nga mahobe ao a supile. A sin'o itumela ku Mulimu, a' komauna, mi a' fa balutiwa ba hae kuli ba a abele batu. Balutiwa ba eza cwalo. 7Ne ba sa na ni tutapinyana tu sikai. Jesu a itumela ku Mulimu, mi a bulelela balutiwa kuli tu abiwe ni tona. 8Ba ca kaufel'a bona, mane ba kula, mi kwa kutiswa lizuma ze supile ze tezi bungululwa bo bu siyezi. 9Ibo, ba ba ne ba cile ne ba bata ku eza likiti ze ne. Jesu kih'a ba fundula. 10A longana kapili mwa sisepe ni balutiwa ba hae, mi a ya mwa naha ya Dalmanuta.

Bafalisi ba kupa makazo

(Mat 16.1-4)

11 # Mat 12.38; Luk 11.16 Bafalisi ba bañwi ba taha ku Jesu, mi ba kala ku kanana ni yena. Ba mu lika ka ku kupa kuli a eze makazo ye bonisa kuli maata a hae n'a zwa ku Mulimu. 12#Mat 12.39; Luk 11.29 Jesu a lula moya, mi a li, “Kikabakalañi batu ba kacenu ha ba kupa makazo? Kaniti na mi bulelela kuli ha ku na makazo ye ba ta fiwa.

13Kih'a ba siya, a longana hape mwa sisepe, mi a silela mwabuse.

Mumela wa Bafalisi ni wa Heroda

(Mat 16.5-12)

14Balutiwa ne ba libezi ku longa lico, mi ne ba si na se siñwi mwa sisepe kwand'a buhobe bu li buñwi feela. 15#Luk 12.1 Jesu kih'a ba laela, a li, “Mu tokomele, mi mu ambuke mumela wa Bafalisi ni mumela wa Heroda.”

16Balutiwa ba kala ku ambolisana mwahal'a bona fahalimw'a linzwi leo, ba li, “U bulela cwalo kakuli ha lu na mahobe!”

17Jesu a ziba ze ne ba ambola, mi a li ku bona, “Kiñi ha mu ambola ka za ku tokwa mahobe? Kana ha mu si ka ba kale ni kutwisiso? Ha mu swali litaba? Kiñi lipilu za mina ha li sa tatafalile? 18#Jer 5.21; Ezek 12.2; Mar 4.12 Mu na ni meeto. Kiñi ha mu palelwa ku bona? Mi mu na ni lizebe. Kiñi ha mu palelwa ku utwa? Ha mu sa hupuli kanti kiñi? 19Ha ni kile na komaunena batu ba likiti li ketalizoho mahobe a ketalizoho, ne mu talize lizuma ze kai za bungululwa bo bu ne bu siyezi?”

Ba mu alaba, ba li, “Ze lishumi ka ze peli.” 20“Mi ha ni kile na komaunena batu ba likiti ze ne mahobe a supile, ne li ze kai lizuma za bungululwa ze ne mu talize?” Ba li, “Ze supile!”

21Mi Jesu a ba buza, a li, “Ni ka nako ye ha mu utwisisi?”

Jesu u folisa sibofu mwa Betsaida

22Kiha ba fita mwa Betsaida, mo batu ba bañwi ba tisa mutu wa sibofu ku Jesu, mi ba mu kupa kuli a mu swale, a fole. 23Jesu a swala mutu yo wa sibofu kwa lizoho, mi a mu isa kwand'a munzi. Ha s'a mu sweli fa meeto ka mati, a mu beya mazoho, mi a mu buza, a li, “Kana ku na ni s'o bona, nji?”

24Mutu yo a talima, mi a li, “Ni bona batu. Ni ba bona inge likota, kono ba zamaya.”

25Jesu a beya hape mazoho fa meeto a hae. Cwale a talimisisa, a folelela, mi a bona hande lika kaufela. 26Jesu a mu fundula, mi a mu eleza kuli a kekuluhe munzi wa Betsaida.

Pitrosi u paka kuli Jesu ki Mesia

(Mat 16.13-20; Luk 9.18-21)

27Cwale Jesu a ikela ni balutiwa ba hae kwa minzi ye bapani ni Sisarea wa Filipi. Mwa nzila a ba buza, a li, “Batu ba li ki na mañi?”

28 # Mar 6.14-15; Luk 9.7-8 Ba mu alaba, ba li, “Kutwi u Joani Mukolobezi. Ba bañwi hape ba li ki wena Elia, haili ba bañwi, bona, ba li u yo muñwi wa bapolofita.”

29 # Joa 6.68-69 Jesu cwale a ba buza, a li, “Mina bo, mu li ki na mañi?”

Pitrosi a mu alaba, a li, “Ki wena Mesia.”

30Jesu kih'a ba koñomeka kuli ba si ke ba taluseza mutu cwalo kuli ki yena Mesia.

Jesu u talusa za lifu ni zuho ya hae

(Mat 16.21-28; Luk 9.22-27)

31Cwale Jesu a kala ku luta balutiwa ba hae, a li, “Na, Mwan'a Mutu, ni swanezi ku utwiswa butuku hahulu. Ba bahulu ba sicaba, ni baprisita ba bahulu hamohocwalo ni Baluti ba Mulao, ba ta ni hana, ni ta bulaiwa, kono nihakulicwalo, ni ta zuha mwamulaho a mazazi a malalu.” 32A ba bulelela taba yeo patalaza. Cwale Pitrosi kih'a mu bizeza kwatuko, mi a kala ku mu kalimela. 33Kono Jesu a itemuna, a talima balutiwa ba hae, mi a omanya Pitrosi, a li, “Zwa ku na Satani, kakuli mihupulo ya hao ki ya butu, isiñi ya Mulimu!”

34 # Mat 10.38; Luk 14.27 Ibehe, Jesu a biza nyangela ni balutiwa ba hae, mi a li ku bona, “Mutu h'a lata ku ni latelela, haisi kuli a itobohe, a lwale sifapahano sa hae, mi a ni latelele. 35#Mat 10.39; Luk 17.33; Joa 12.25 Mutu ufi ni ufi ya lakaza ku babalela bupilo bwa hae, u ta sinyehelwa ki bona. Kono ya ka sinyehelwa ki bupilo bwa hae kabakala ka ni la Litaba ze Nde, yo u ta ba a ipulukezi bona. 36Kana ku tusañi mutu nih'a ka luwa lifasi kaufela, mi a sinyehelwa ki bupilo bwa hae? 37Ki sika mañi s'a ka zwisa mutu kuli a leke bupilo bwa hae hape? 38Hakulicwalo, haiba mutu a ka ni swabela, na ni tuto ya ka, mwa nako ye ya bumaswe bwa ku sa saba Mulimu, na, Mwan'a Mutu, ni ta mu swabela zazi le ni ka taha mwa kanya ya Ndate ni mangeloi a kenile.”

Currently Selected:

Mareka 8: Lozi09

Highlight

Copy