Mareka 12

Nguli ya balimi ba ba maswe

(Mat 21.33-46; Luk 20.9-19)

1 # Isa 5.1-2 Jesu kih'a kala ku bulela ni bona ka linguli, a li, “Ne ku na ni mutu ya n'a calile simu ya likota za veine. A i sileleza ka lukwakwa, a yepa mwateñi silubelo, mi a yaha kalani. A beya simu mwa pabalelo ya balimi, mi a nga musipili. 2Ka nako ya kutulo, a luma mutanga kwa balimi kuli a y'o nga kalulo ya hae ya ze kutuzwi mwa simu. 3Kono balimi bao ba swala mutanga, ba mu nata, mi ba mu lundula ba si ka mu fa se siñwi. 4Muñ'a simu kih'a ba lumela hape mutanga yo muñwi. Yo, ba mu pobaula matuma mwa toho, mi ba mu tompolola. 5A luma yo muñwi hape, mi yo, ba mu bulaya. Mi ba nyandisa batanga ba bañata kamukwaoswana. Ba bañwi ba lindaulwa, ba bañwi ba bulaiwa. 6Muñ'a simu n'a sa siyalezwi ki mutu a li muñwi, yena mwan'a hae ya n'a lata hahulu. Kwa mafelelezo a ba lumela yena, a nz'a hupula kuli, ‘Mwan'a ka ba ta mu kuteka.’ 7Kono balimi bao ba lelisana, ba li, ‘Shwana ki yo. A mu te, lu mu bulaye, kuli simu i be ya luna!’ 8Kiha ba mu swala, ba mu bulaya, mi ba nepela situpu sa hae kwand'a simu.”

9Jesu a buza, a li, “Kana muñ'a simu u ta eza cwañi ka balimi bao? U ka taha, a t'o ba bulaya, mi simu a i fe ba bañwi. 10#Lipi 118.22-23 Kikuli ha mu si ka bala linzwi, le li li,

‘Licwe le ne li kendilwe ki bayahi,

ki lona le li fetuhile licwe le li tiisize lilulu la ndu.

11Ki sona s'a si ezize Mulena,

mi sa komokisa mwa meeto a luna.’ ”

12Bazamaisi ba Majuda ba bata ku swala Jesu, kakuli ne ba lemuhile kuli n'a shedekela bona ka nguli yeo, kono ba saba sicaba. Kiha ba mu siya, mi ba ikela.

Puzo bakeñisa mutelo

(Mat 22.15-22; Luk 20.20-26)

13Ba lumela ku Jesu bafalisi ba bañwi ni ba sitopa sa Heroda ku t'o mu swasa ka lipuzo. 14Ba t'o mu bulelela, ba li, “Muluti, lu ziba kuli u na ni niti. Ha u na taba kuli yo ki mañi. Ha u na sobozi, kono u luta niti yeo Mulimu a bata kuli batu ba zamaye ka yona. A ku lu taluseze kapa kwa lukela kuli lu zwiseze puso ya Baroma mutelo, kapa ha ku lukeli? Lu tele, kapa lu si ke lwa tela?”

15Kono Jesu a lemuha bupumi bwa bona, mi a li, “Mu ni likelañi? A mu ni tiseze mali a muwaya-waya, ni a bone!”

16Ba mu tiseza ona, mi Jesu a ba buza, a li, “Siswaniso se, ni ze ñozwi fateñi, ki za mañi?”

Ba li, “Ki za Sesare!”

17Jesu a li ku bona, “Mu kutisize ku Sesare ze li za Sesare, ni ku Mulimu ze li za Mulimu!”

Mi kalabo ya hae ya ba komokisa hahulu.

Puzo bakeñisa zuho ya bafu

(Mat 22.23-33; Luk 20.27-40)

18 # Lik 23.8 Basaduki ba bañwi, ili bona batu bao ba ba latula zuho ya bafu, ba taha ku Jesu, mi ba mu buza, ba li, 19#Mul 25.5“Muluti, Mushe u lu tomezi mulao o li, ‘Mwanahabo mutu haiba a ka shwa a siya musali ya si na mwana, mutu yo u swanezi ku nyala mbelwa ku zuseza mwanahabo ya shwile lusika.” 20Cwalehe, ne ku na ni micaha ba supile, ili bana ba mutu a li muñwi. Yo muhulu ku bona a nyala musali, mi a shwa a si ka pepa ni yena. 21Ya mu tatama a nyala mbelwa yo. Ni yena hape a shwa a si na mwana. Kwa ba cwalo ni ku wa bulalu. 22Mane kaufela bona ba supile ba shwa ku si na ya pepile mwana ni yena. Kwa mafelelezo ni yena musali a shwa. 23Cwale, ka lizazi la zuho ya bafu, musali yo u ta ba wa mañi, kakuli kaufel'a bona ba supile ne ba mu nyezi?”

24Jesu a ba alaba, a li, “Fo mwa fosa ka ku sa ziba, mi se si mi fosisa kikuli ha mu zibi Mañolo nihaiba maata a Mulimu. 25Kakuli ba ba shwile, ha ba ta zuha, banna ni basali ha ba sa na ku nyala kapa ku nyaliwa hape, kono ba ta pila sina mangeloi mwa lihalimu. 26#Mut 3.6 Haili ka za ba ba shwile kuli ba ta zuha hape, kana ha mu si ka bala mwa Buka ya Mushe taba ya sicacani se si ne si tuka, Mulimu h'a bulelela Mushe, a li, ‘Ki na Mulimu wa Abrahama, Mulimu wa Isaka ni Mulimu wa Jakobo?’ 27Mulimu, ki Mulimu wa ba ba pila, isiñi wa ba ba shwile. Fo mu fosize hahulu!”

Mulao o mutuna ku fita ye miñwi

(Mat 22.34-40; Luk 10.25-28)

28 # Luk 10.25-28 Muluti yo muñwi wa Mulao n'a ba utwile ha ne ba nze ba kanana. A bona kuli Jesu n'a ba alabile hande. Kih'a sutelela, mi a mu buza, a li, “Kanti mulao o mutuna ku fita ye miñwi kamukana ki ufi?”

29 # Mul 6.4-5 Jesu a mu alaba, a li, “Mulao wa pili ki wo, ‘Teeleza Isilaele! Mulena Mulimu wa luna ki yena Mulena a nosi. 30U swanezi ku lata Mulena Mulimu wa hao ka pilu ya hao kaufela, ni ka moya wa hao kaufela, ni ka ngana ya hao kaufela, ni ka maata a hao kaufela.’ 31#Malivi 19.18 Mi mulao wa bubeli ki wo, ‘U swanezi ku lata wahenu sina mo u itatela’. Mi ha ku na mulao o muñwi hape o fita milao yeo kwa butuna.”

32 # Mul 4.35 Muluti wa Mulao a li ku yena, “Ki hande Muluti! S'o bulela ki niti. Mulena ki yena Mulimu a nosi, mi ha ku na Mulimu u sili, konji yena. 33#Hos 6.6 Mutu u swanezi ku lata Mulimu ka pilu ya hae kaufela, ni ka kutwisiso ya hae kaufela, ni ka maata a hae kaufela, mi u swanezi ku lata wahabo sina mw'a itatela. Milao yeo i na ni tuso hahulu ku fita ku bulaela Mulimu limunanu ze ciswa fa katala ni ku mu ezeza litabelo za mifuta-futa!”

34Jesu a lemuha kuli n'a alabile ka butali, kih'a mu bulelela, a li, “Ha u yo kwahule ni mubuso wa Mulimu!”

Ku zwa fo, ne ku si na mutu ya n'a na ni pilu-tata ya ku mu buza se siñwi hape.

Puzo bakeñisa Mesia, Mwan'a Davida

(Mat 22.41-46; Luk 20.41-44)

35Ha n'a luta mwa malapa a Tempele, Jesu a buza puzo yeo, a li, “Baluti ba Mulao ba buleliswa kiñi kuli Mesia ki Mwan'a Davida? 36#Lipi 110.1 Kanti yena Davida, ka ku susuezwa ki Moya o Kenile, u ize.

‘Mulimu u bulelezi Mulen'a ka, a li,

Ina ku la bulyo la ka,

ku fitela ha ni ka beya lila za hao

kwatas'a mahutu a hao.’

37Davida, ili yena kasibili, h'a mu biza Mulena, Mesia u ka ba cwañi mwan'a hae hape?”

Mi nyangela kaufela ne ba mu teeleza ka tabo.

Jesu u nyaza Baluti ba Mulao

(Mat 23.1-36; Luk 20.45-47)

38Jesu, ha n'a luta batu, n'a ba bulelelanga kuli, “Mu tokomele Baluti ba Mulao, ba ba tabela ku pota-pota ba apezi liapalo ze telele, mi ba ba lata ku lumeliswa mwa mapatelo. 39Batu bao, ba bata lipula ze kwapili mwa masinagoge ni mabaka a kutekeha mwa mikiti. 40Ba putelela limbelwa, mi ba ba uzweza ze mwa mandu a bona ba nze ba ba puma-puma ka ku ba ezeza litapelo ze telele. Katulo ya bona i ta ba ye tata ni ku fita.”

Mpo ye zwisizwe ki mbelwa

(Luk 21.1-4)

41Jesu ha n'a inzi fakaufi ni sibulukelo sa mali a Tempele, n'a talimezi batu mo ne ba zwiseza limpo za bona. Bafumi ba bañata ne ba zwisa hahulu. 42Musali wa mbelwa wa mubotana a taha, mi a beya mwateñi malinyana a n'a bata ku eza tungwee to tubeli feela. 43Jesu kih'a biza balutiwa ba hae, mi a li ku bona, “Kaniti na mi bulelela kuli musali yo wa mbelwa, ya shebile, u zwisize hahulu ku fita ba bañwi kamukana ba ba beile limpo za bona mwa sibulukelo. 44Kakuli ba bañwi kaufela ba ngile kwa mali a mañata a ba na ni ona. Kanti yena, mwa bubotana bwa hae, u zwisize s'a na ni sona kaufela, ili s'a n'a ka pila ka sona.”

Currently Selected:

Mareka 12: Lozi09

Highlight

Copy