Mareka 11

Jesu u kena mwa Jerusalema

(Mat 21.1-11; Luk 19.28-40; Joa 12.12-19)

1Ha ba se ba atumezi kwa Jerusalema, fakaufi ni minzi ya Betefage ni Betania, kwatuko a Lilundu la Likota za Olive, Jesu a luma balutiwa ba hae ba babeli. 2A li ku bona, “Mu ye mwa munzi o fapil'a mina. Mu sa kena feela mwateñi, mu ta fumana kambongolo ka ka fungilwe, ka ka si ka pahamiwa kale ki mutu. Mu ka fungulule, mi mu ka tise kwanu. 3Mi mutu h'a ka mi buza, a li, ‘Se si mi ezisa cwalo kiñi?’ Mu mu alabe, mu li, ‘Mulena wa ka bata, mi u ka tuha a ka kutisa.’ ”

4Ba ya, mi ba fumana kambongolo ka ka fungilwe fa munyako wa ndu, kwande kwatukw'a nzila. Ba ka fungulula. 5Ba bañwi ba ba ne ba yemi fo ba ba buza, ba li, “Yela mina, kiñi ha mu fungulula kambongolo kao?”

6Balutiwa ba ba alaba sina mw'a n'a bulelezi Jesu, mi batu bao ba ba tuhela. 7Ba tisa kambongolo ku Jesu. Ba yala likubo za bona fahalimw'a kona, mi Jesu a pahama fateñi. 8Batu ba bañata ba yala liapalo za bona mwa nzila, mi ba bañwi ba eza cwalo ka macacani a ne ba lemile mwa masimu. 9#Lipi 118.25-26 Ba ba ne ba etelezi Jesu ni ba ba ne ba mu latelela ne ba huweleza, ba li, “Ku lumbekwe Muñ'a Bupilo! Ku tohonolofazwe ya taha ka libizo la Mulena! 10Ku fuyaulwe mubuso o taha, mubuso wa ndat'a luna Davida! Ku lumbekwe Muñ'a Bupilo, mwa lihalimu!”

Jesu u kuta kota ya feiga

(Mat 21.18-19)

11Jesu a kena mwa Jerusalema, mi a ya kwa Tempele. A talimisisa linto kaufela, mi a kutela kwa Betania ni balutiwa ba hae ba lishumi ka ba babeli, kakuli lizazi ne li se li ile.

12Habusa, ba sin'o zwa mwa Betania, Jesu a lapa. 13Kwahulenyana, a bona kota ya miselo ya lifeiga ye na ni matali, mi a y'o bona kapa n'a ka fumana miselo ku yona. Kono h'a fita fakaufi ni kota ha ku na s'a fumani, haisi matali feela, kakuli ne si nako ya miselo yeo. 14Jesu kih'a bulelela kota ya feiga, a li, “Ku si ke kwa fumanwa mutu ya ka ca hape miselo ya hao, kuya kuile!”

Mi balutiwa ba hae ba utwa manzwi ao.

Jesu u hanisa litekiso mwa mabaka a Tempele

(Mat 21.12-17; Luk 19.45-48; Joa 2.13-22)

15Ha ba fita mwa Jerusalema, Jesu a kena mwa lapa la Tempele, mi a kala ku lundula baleki ni balekisi mwateñi. A wisakela fafasi litafule za ba ba cinca mali ni lipula za ba ba lekisa linkwilimba. 16N'a sa lumeleli mutu ku fita mwa malapa a Tempele a nz'a lwezi sika. 17#Isa 56.7; Jer 7.11 Kih'a ba luta, a li, “Ku ñozwi kuli, ‘Ndu ya ka i ta bizwa ndu ya tapelo ya macaba kaufela.’ Kono mina mu i fetuzi maipato a masholi.”

18Baprisita ba bahulu ni Baluti ba Mulao ba utwa taba yeo, mi ba bata mukwa wa ku bulaya Jesu. Ne ba mu saba kakuli nyangela kaufela ne i komokiswa ki tuto ya hae.

19Ka nako ya manzibwana, Jesu a zwa mwa Jerusalema ni balutiwa ba hae.

Tuto bakeñisa kota ya feiga ye kutilwe. Maata a tumelo

(Mat 21.20-22)

20Habusa, i sa li kakusasana, ha ne ba nze ba zamaya mwa nzila, ba bona yona kota yani ya feiga. I se i omile ni mibisi. 21Pitrosi a hupula ze ne ezahalile, mi a li ku Jesu, “Muluti, bona kota ya feiga y'o n'o kutile. I omile!”

22Jesu kiha s'a bulelela balutiwa ba hae, a li, “Mu lumela ku Mulimu! 23#Mat 17.20; 1 Bakor 13.2 Haiba mu eza cwalo, luli ne mu ka laela lilundu le kuli, ‘Nanuha, u y'o itatela mwa liwate!’ Ha mu sa bilaeli mwa lipilu za mina, kono mu lumela kuli se mu bulela si ta ezahala, mu ta si fiwa. 24Kabakaleo ni li ku mina, mwa linto kaufela ze mu kupa ka tapelo, mu lumele kuli mu se mu li amuhezi, mi mu ta li fiwa. 25#Mat 6.14-15 Mi ha mu yemi mu nze mu lapela, haiba ku na ni ya mi foselize, mu mu swalele, ili kuli Ndat'a mina ya kwa lihalimu a mi swalele milatu ya mina. 26Kono haiba mu sa swaleli ba ba mi foselize, Ndat'a mina ya kwa lihalimu, ni yena h'a na ku mi swalela milatu ya mina.”

Bulena bwa Jesu bu zwa kai?

(Mat 21.23-27; Luk 20.1-8)

27Cwale ba kutela kwa Jerusalema. Jesu ha n'a nz'a zamaya-zamaya mwa lapa la Tempele, baprisita ba bahulu ni Baluti ba Mulao hamohocwalo ni bahulu ba sicaba ba taha ku yena. 28Ba mu buza, ba li, “Maata a u eza zeo ka ona u a fumani kai? Mi hape ya ku file tukelo ya ku li eza ki mañi?”

29Jesu a ba alaba, a li, “Ni bata ku mi buza puzo i liñwi feela. Ha mu ka tabela ku ni alaba, kihona ni na, ni ta mi bulelela maata a ni eza zeo ka ona. 30Ya lumile Joani kuli a kolobeze, n'e li mañi? N'e li Mulimu kapa batu? A mu ni alabe.”

31Ba elezana hamoho, ba li, “Ha lu alaba kuli ki Mulimu ya mu lumile, u ta li, ‘Kiñi ha mu si ka lumela ku yena?’ 32Kono ha lu alaba kuli, ‘Ki batu ba ba mu lumile!’” Fohe ne ba saba batu, kakuli kaufela ne ba kozwi kuli Joani ne li mupolofita kasibili. 33Cwale ba alaba Jesu, ba li, “Ha lu zibi!”

Mi Jesu a li ku bona, “Ni na, ha ni na ku mi bulelela kw'a zwa maata a ni eza zeo ka ona!”

Currently Selected:

Mareka 11: Lozi09

Highlight

Copy