Mateu 8

Jesu u folisa wa mbingwa

(Mar 1.40-45; Luk 5.12-16)

1Jesu a shetumuka fa lilundu, mi a latelelwa ki batu ba bañata. 2Wa mbingwa kih'a taha ku yena, a t'o kubama fapil'a hae, mi a li, “Mulena, ha u lata, wa kona ku ni kenisa.”

3Jesu a otolola lizoho, a mu swala mi a li ku yena, “Na lata. U keniswe!” Honafo, mbingwa ya hae ya fela. 4#Malivi 14.1-32 Jesu a li ku yena, “Utwa! Taba ye, u si ke wa i bulelela mutu, kono u yelele feela ku muprisita, a y'o ku tatuba, mi u zwise mpo ye laezwi ki Mushe ku kolwisa batu kaufela kuli u folile.”

Jesu u folisa mubeleki wa nduna wa Muroma

(Luk 7.1-10)

5Jesu h'a kena mwa Kapernauma, a katanyezwa ki muzamaisi wa masole, wa Siroma, ya n'a t'o kupa tuso. 6A t'o li, “Muñ'a ka, mubeleki wa ka wa kula, u lobezi mwa ndu, h'a koni ku zamaya mi u nyanda hahulu.”

7Jesu a li ku yena, “Ni ka ya, ni y'o mu folisa.”

8Kono muzamaisi a li, “Batili, muñ'a ka! Ha ku swaneli kuli u kene mwa ndu ya ka. U laele feela, mi mubeleki wa ka u ka fola. 9#Bar 3.33-35 Ni na, ni na ni ba ba ni zamaisa, mi ni na ni masole be ni zamaisa. Ha ni laela yo muñwi, ni li, ‘Zamaya,’ wa ya. Ha ni laela yo muñwi hape, ni li, ‘Taha,’ wa taha. Mi ha ni laela mubeleki wa ka, ni li, ‘Eza se,’ wa si eza.”

10Jesu h'a utwa cwalo a komoka hahulu, mi a li ku ba ba ne ba mu latelela, “Luli na mi bulelela, ha ni si ka bona tumelo ye cwana kwa batu kamukana ba Isilaele. 11#Luk 13.29 Ni mi bulelela niti, ni li, ‘Ba bañata ba ka taha ku zwa kwa upa ni kwa wiko, mi ba ka t'o ina kwa tafule mwa Mubuso wa kwa lihalimu hamoho ni Abrahama, Isaka, ni Jakobo. 12#Mat 22.13; 25.30; Luk 13.28 Kono ba ba ne ba swanela ku ba mwa Mubuso ba ka nepelwa kwande, mwa lififi, koo ba ka y'o lilela ni ku kweca meeno.’ ” 13Jesu kiha li ku muzamaisi, “Zamaya kwa hae, mi s'o lumezi u ka si ezezwa.”

Mi mubeleki wa muzamaisi yo a fola ka yona nako yeo.

Jesu u folisa bakuli ba bañata

(Mar 1.29-34; Luk 4.38-41)

14Jesu a ya kwa ndu ya Pitrosi. Mwateñi, a y'o fumana mukwenyan'a Pitrosi, a lobezi, a nz'a kula fibele. 15A mu swala kwa lizoho, mi fibele ya fela. Musali a zuha, mi a kala ku mu lukiseza lico.

16Ka swalala, batu ba tisa ku Jesu bakuli ba bañata ba ba ne ba na ni mioya ye maswe. Jesu a lelekisa mioya ye maswe ka linzwi feela, mi a folisa bakuli kamukana. 17#Isa 53.4 A eza cwalo ku taleleza z'a n'a bulezi mupolofita Isaya, ha n'a ize, “U ngile makulanu mi u lwezi matuku a luna.”

Ba ba lakaza ku latelela Jesu

(Luk 9.9, 57-62)

18Jesu h'a bona kuli n'a beilwe ki batu ba bañata mwahali, a laela balutiwa ba hae kuli ba silele mwabuse bwa lisa. 19Muluti wa Mulao a taha ku yena, a li, “Muluti, ni ta ku latelela k'o ka ya kaufela.”

20Jesu a mu alaba, a li, “Mawawa a na ni misima, ni linyunywani li na ni liyaleto, kono na, Mwan'a Mutu, ha ni na fo ni ka pumulela.”

21 # Tob 4.3, 4 Munna yo muñwi, ya n'a li mulutiwa, a li, “Mulena, ni lumelele ni y'o buluka bo ndate pili.”

22Kono Jesu a mu alaba, a li, “U ni latelele, mi u tuhele bafu ba buluke bafu ba bona.”

Jesu u kuzisa liñungwa

(Mar 4.35-41; Luk 8.22-25)

23Jesu a kena mwa sisepe, mi balutiwa ba hae ba longana ni yena. 24Kapili-pili kwa zuha liñungwa le lituna mwa lisa, mane mandinda a bata ku kwahela sisepe. Kono Jesu, yena, n'a lobezi. 25Balutiwa ba sutelela ku yena, mi ba mu zusa, ba li, “Lu pilise, Mulena! Lwa shwa!”

26Jesu a ba alaba, a li, “Mu sabiswa kiñi? Kanti luli tumelo ya mina ki ye nyinyani!” Cwale a zuha, a kalimela moya ni mandinda, mi kwa kuza ni ku ombela hahulu.

27Kaufel'a bona ba komoka, ba li, “Ki mutu ya cwañi yo, ya li mane moya ni mandinda kaufela za mu utwa!”

Jesu u folisa banna ba babeli ba ba na ni mioya ye maswe

(Mar 5.1-20; Luk 8.26-39)

28Jesu a fita mwa naha ya Magadareni, mwabuse bwa lisa, mi a katanyezwa ki banna ba babeli ba ba ne ba zwa fa mayumbelo. Banna bao, ne ba na ni mioya ye maswe, mi ne ba sabisa hahulu, mane ne ku si na mutu ya n'a ka fita ka nzila yeo. 29Ba kala ku huwa, ba li, “U batañi ku luna, wena Mwan'a Mulimu? Kana u til'o lu nyandisa nako i si ka fita kale?”

30Fakaufinyana ni fo, ne ku fula mutapi o mutuna wa likulube. 31Mioya ye maswe ya kupa Jesu, ya li, “Haiba u bata ku lu leleka, u lu lumelele kwa mutapi wa likulube wani.”

32Jesu a i laela, a li, “A mu zwe.” Cwale ya zwa, mi ya ya kwa likulube. Kapili-pili mutapi kaufela wa matela kwa liñope, wa tulela mwa lisa, mi wa mina.

33Balisana ba likulube ba saba, ba matela kwa hae, mi ba y'o talusa litaba zeo kamukana ni se si ezahalile kwa banna ba ba ne ba na ni mioya ye maswe. 34Batu kaufela kiha ba zwa mwa munzi ku y'o katanyeza Jesu, mi ha ba se ba mu boni, ba mu kupa kuli a zwe mwa naha ya bona.

Currently Selected:

Mateu 8: Lozi09

Highlight

Copy